CIIN BWAAL CYA KULONG CYA 4
Bwabiny Tudyaakal Tutweel mu Civulukil?
“IIkalaay nulongaay nook bwa nun kuulangilaayoh.”—LUUK 22:19.
MUSAMBW A 20 Wakafila Muanebe wa mushinga mukole
KADYOOSH *
1-2. a) I diib kaay ditudyaakal nang-nang tuvuluk lufw lwa muut utudy bakat? b) I biny bilongeel Yeez bufuk kuuhal kwa kufwey?
NING mudy baat batudy bakat bakaady bafw kukaady mafuk mavul, tuyaakal teng twiibavuluk. Tuyaakal teng tuvuluk lufw lwaabab hatufiifik diifuk dyaakadyobw bafw.
2 Muvw woos oow, tudyaakal mukacy mwa miliyo ya baat ba ha bulab butuutul biikokongakeen haakaabumw bwa kuvuluk lufw lwa muut utudy bakat bikasakan—Yeez Krist. (1 Py. 1:8) Tudyaakal twiikongakeen aakaabumw bwa kuvuluk muut udy mutwaal buumy bwindiy bwa kwiitukuuloh ku mpekaat ni ku lufw. (Mat. 20:28) Biin-biin, Yeez waakady mukat bwa biiyij bindiy biikal bavuluk lufw lwindiy. Bufuk kuuhal kwa kufwey, ulongolweel kudy kwa habwaah kwa kawul ni kwiibambiley neey: “Iikalaay nulongaay nook bwa nun kulangilaayoh.” *—Luuk 22:19.
3. I biny bitwiiyiiy kukontonon mu ciin bwaal eecy?
3 Kasumbw kakeeh ka baat batweetweel mu civulukil cya lufw lwa Krist bady ni kutakamin kwa kwiikal ni buumy mu diiwul. Ki miliyo ya baat bavul bady ni ditakamin dya kushikat ha bulab batweetweelomw byaabw. Mu ciin bwaal eecy, twiiyiiy kukontonon bwabiny bisumbw bibidy eeby ibikat kutweel mu Civulukil muvw woos. Twiiyiiy kukontonon cikwaabw mutudy mwa kuhet myand yilengel ha tutweetweelomw. Tukontononayaak kabaak tumw tubingil tuleeleej bwa biny bashing diisaby badyaady ni banwaan.
BWABINY BASHING DIISABY BATWEETWEELOMW
4. Bwabiny bashing diisaby badyaady mukat ni banwaan mviny mu Civulukil?
4 Muvw woos, bashing diisaby iibatum meej maabab ku myand yidy yiibindil kuuhal ook hatweetweelobw mu Civulukil hadyaadyobw mukat ni hanwaanobw mviny. Bwabiny bidy ni buseeb bwaababw kudy mukat ni kun mviny? Bwa kwaalabul ku diijooj eecy, tutalayaak cyaakady cilongek bufuk bwa bulekel bwa kwiikalok kwa Yeez ha bulab. Kuunyim kwa bab baman ni kudy basak, Yeez ulongel citubiibiikan leeloow neey: Kudy kwa kawul kwa Mukaleng. Waakady muhitij mukat ni mviny kudy bapostol bindiy 11 balulamat ni kwiibambiley neey: dyangaay ni nwangaay. Yeez wiisambil naabw habitaatal kuhwaan kwa milay yibidy, eecy baakady bumvwangan—bwa kuhwaan kuhyaakuhy ni kuhwaan kwa Bukaleng. * (Luuk 22:19, 20, 28-30) Kuhwaan kwa milay yibidy eey kulongel bwa bapostol aab ni kasumbw kakeeh ka baat bakwaabw bwa biikal bakaleng ni balambul ba milambw mu diiwul. (Yis. 5:10; 14:1) Teng bashaadil bashing diisaby, * bady mu kuhwaan kwa milay yibidy eey, ki bady mwa kudy mukat ni kun mviny mu Civulukil.
5. I biny bidy bashing diisaby bamanyik bwa kutakamin kudyobw naak?
5 Kabingil kakwaabw kaleeleej bwabiny bikaam bashing diisaby batweel mu Civulukil: Bwaal kulong nook kwiibaakaakish mushind a kulangil ha kutakamin kwaababw. Yehow i mwiibakish kutakamin kulengel—biiyiiy kusangal bwaal biikaakal ni nyeet yikiish yifw ni yikiish yoonyek mu diiwul, biiyiiy bakookesh ni Yeez Krist ni bakwaabw ba mu baat 144 000, bab boos biikaakal mu diiwul kuuhal kwa Yehow Mawej! (1 Kor. 15:51-53; 1 Jah 3:2) Bashing diisaby iibamanyik neey: i bibabikan bwa kwiikalobw ni musangal a kukadil mudimw mu diiwul. Bwa kwiibitabilobw bwaabab kutweel mu diiwul, bikaam bashaal ni lulamat teng ni ku lufw lwaababw. (2 Tim. 4:7, 8) Byaakaakish bashing diisaby musangal muvul bwa kuleej mudyobw ni kutakamin kwa kuy mu diiwul (Tiit 2:13) Tudy mwa kuleeb bicy bwa “mikook yikwaabw?” (Jah 10:16) I tubingil kaay tuloolong bwa yitweel byaay mu Civulukil?
BWABINY MIKOOK YIKWAABW YITWEETWEELOMW
6. Bwabiny mikook yikwaabw yitweetweel mu Civulukil?
6 Mikook yikwaabw yitweetweel mu Civulukil, kin bwa kudy mukat ni kun mviny, ki bady ni musangal a kwiikalomw. Mu 1938, baat boos baakady ni kutakamin kwa kushaal ha bulab bibabiikeen bwa kutweelobw mu Civulukil bwa musang a kuuhal. Cibumb cya Muteetekel 1/3/1938, cileebel nook: “Byaakady bilengel bwa [mikook yikwaabw] kwiikalomw mu cisangil aacy ni kutalobw ciloolongekomw. . . . Ki diifuk ni ciisang cyaababw kusangal byaabw.” Teng bu baat babiikan mu musangal a maluw batal biloolongekomw, mikook yikwaabw byaay yidy ni musangal a kutweel mu Civulukil bwa kutal myand yiloolongekomw.
7. Bwabiny mikook yikwaabw yikuukun mat ku myand yidyobw baleeb mu mwiisamb a Civulukil?
7 Mikook yikwaabw i yitakamin byaay. Yituutum meej maababw ku mwiisamb wiikalobw mwa kulong mu Civulukil, wiikal mwa kuleebel bikasakan ha ciikal Yeez ni baat 144 000 mwa kulongel biin lulamat mu bukookesh bwindiy bwa mivw 1 000. Mu bukookesh bwa Mukaleng aabab Yeez Krist, bakookesh ba mu diiwul aab biiyiiy kwambulwiish bwa kufutulul bulab bushaal paradiiz ni kufikijobw baat bakookooyel bwa kushaalobw bawaakan. Ki bwabiny, baat miliyo yivul batweetweel mu Civulukil bwa kulangil ha milay ya mu Bibl yiikal mwa kukumban mafuk miiyiiy, bu mudy yitusasangan mu Yeshaay 35:5, 6; 65:21-23; ni yidy mu Myand Yisokolweel Jah 21:3, 4. Hadyobw balang bwa myand yiikal mwa kulongek ni balang bwa kuhetangan ni baat badyobw bakat bakaady bafw mu bulongolody buhyaabuhy, bakaakashish kutakamin kwaababw bwa mafuk maciiyiiy kuuhal ni biswiik bwa kutungunuk ni kukadil Yehow mudimw.—Mat. 24:13; Kal. 6:9.
8. I kabingil kaay kakwaabw kaloolong bwa mikook yikwaabw yitweel mu civulukil?
8 Tutalaay kabingil kakwaabw kaloolong bwa mikook yikwaabw yitweel mu Civulukil. Bakaakaam kuleej lukat lwaabab ni kwambulwiish bashing diisaby. Diiy dya Mawej dyaakady dileeb kal neey: bashing diisaby bady ni ditakamin dya kuy mu diiwul ni mikook yikwaabw yidy ni ditakamin dya kushaal ha bulab biiyiiy bakadil mudimw aakaabumw. Biyiiy kulongek nook bicy? Twiisambilaayok ha bileejel eeby.
9. I biny bidy diiy cya ciprofet cidy mu Zakarih 8:23 dileej mudy mikook yikwaabw iyumvw bwa bashing diisaby?
9 Bal Zakarih 8:23. Diiy dya buprofet eedy dileeleej mudy mikook yikwaabw iyumvw bwa baan-babw baan-balum ni baan-bakaj bashing diisaby. Byambil eeby “mwiin Yuud” ni “udy neen” baleeleeb bwa cisumbw cyaakaabumw—bwiikuleeb neey: bashing diisaby. (Rom 2:28, 29) ‘Baat diikumy ba bileebel byoos bya bis bya baat’ i mikook yikwaabw. Yikwaakwaat ku “luzemb lwa cizang”—balamat—bashing diisaby, bwa kwiikal naabw aakaabumw mu kuhambidil ku kiish koonyek. Biin-biin, bufuk buloolongek Civulukil, mikook yikwaabw yileeleej mudyey yilamat bashing diisaby hadyobw batweel naabw aakaabumw mu Civulukil.
10. I biny bidy Yehow mulong bwa kukumbaj diiy dya buprofet didy mu Ezekiyeel 37:15-19, 24, 25?
10 Bal Ezekiyeel 37:15-19, 24, 25. Yehow ukuukumbaj diiy dya buprofet eedy, hadyey ulong bwa bashing diisaby ni mikook yikwaabw bakal mudimw boos mu kaacyumw. Diiy dya buprofet eedy dileeleeb bwa bituh bya mitond bibidy. Baat bady batakamin bwa kuy mu diiwul i bafwanyikij ni cituh cya mutond “cya Yuud” (mu cis mwaakadyobw basungul bakaleng ba Izaleel), ki baat bady ni kutakamin kwa kushaal ha bulab i bafwanyikij ni cituh cya mutond “cya Efrayim.” * Yehow wiiyiiy kuteek bituh bya mitond eeby haakaabumw biikal bitengangan bwa bilong “cituh cya mutond cyaakaabumw.” Bwaal oobw bumvumvwiij neey: bakakadil mudimw aakaabumw mu bukookesh bwa Mukaleng aabab, Yeez Krist. Muvw woos oow, bashing diisaby ni mikook yikwaabw batweetweel mu Civulukil, kabay bu bisumbw bibidy bikabuluk, ki bu “cisumbw cyaakaabumw” biikal ni “mulamy aakaabumw.”—Jah 10:16, NWT
11. I mushind kaay udy “mikook” yidyobw baleej mu Matewus 25:31-36, 40 yit baan-baabw ni Yeez nyam ku mikon?
11 Bal Matewus 25:31-36, 40. “Mikook” yidyobw bateel mu kasumw aak, i baat bawaakan ba mu mafuk ma ku bulekel bady batakamin bwa kwiikalobw ni buumy ha bulab—i bwiin kuleeb neey: mikook yikwaabw. Bambambulwiish ni lulamat bashaadil ba ku baan-baabw ni Krist bashing diisaby dya spirit bwa kwiibambulwiish bwa kukumbajobw mudimw aababw mutam—wa kudiil baat musah ni wa kwiibaalabul bwa bashaal biiyij.—Mat. 24:14; 28:19, 20.
12-13. I mishind kaay yikwaabw yidy mikook yikwaabw mwa kut baan-baabw ni Krist nyam kumikon?
12 Muvw woos mu mbing ya kuuhal kwa Civulukil, mikook yikwaabw yileeleej mudyey yit baan-baabw ni Krist nyam ku mikon hakwiidit bikasakan mu mudimw uloolongek ha bulab butuutul wa kubiikan baat ba mulow bwa biiy batweel neet mu Civulukil. (Tal kazubw ka neey: “ Ukaady Mulongololok program iibuh bwa Civulukil eeny?”) Bambambulwiish cikwaabw ha kulongolol myand bwa bisumbw byoos bya ha bulab butuutul bilong Civulukil, ning iikaleby neey: bisumbw bivul kabiin ni baat badyaady mukat ni banwaan mviny. Mikook yikwaabw yidy byaay ni musangal bwa kwambulwiish baan-babw ni Krist mu mishind eey. Mikook eey i yimanyik neey: Yeez i mutal byoos biloolongelobw baan-baabw bashing diisaby, hatwiibaloolongel nook tumuloolongel yiy.—Mat. 25:37-40.
13 I tubingil kaay tukwaabw twiitusaasak tut boos bwa kutweel mu Civulukil, ning tut biikal ni kutakamin kushilangan?
BWABINY TUUT BOOS TUTWEETWEELOMW
14. I mushind kaay udy Yehow ni Yeez bitukat bikasakan?
14 Tufwiifwiijok Yehow ni Yeez bu mudyobw biituleej lukat. Yehow i mwiituleej lukat lwindiy mishind yivul, ki kudy mushind umw udy muhitok yoos. Mawej iitut uleejel mudyey mwiitukat bikasakan hatuminey Mwaan indiy ha buseeb bwa kukabey ni kwiitufwiiley. (Jah 3:16) Tudy bamanyik neey: Yeez byend imwiitukat bikasakan, hatwaadiley buumy bwindiy bwa kwiitufwiil. (Jah 15:13) Katwiinoh bend mwa kufut Yehow ni Yeez bwa lukat ludyobw biituleej. Ki tudy mwa kwiibafwiijok bwa byoos bidyobw biitulongel diifuk dyoos. (Kol. 3:15) Ni tutweetweel mu civulukil bwa kulangil ha lukat ludyobw biituleej ni mutudy byeet mwa kwiibaleej lukat.
15. Bwabiny bashing diisaby ni mikook yikwaabw bangangat cya kukuul naacy baat bu cya bukish cya buseeb buvul?
15 Twangangat cya bukish cya kukuul naacy baat ni buseeb buvul. (Mat. 20:28) Cya kukuul naacy baat cidy ni buseeb buvul ku mees kwa bashing diisabiy, i cicy ciloolong bwa kutakamin kwaababw kwiikal kwa biin-biin. Bu mudyobw biitabij mulambw a Krist, Yehow i mwiibajadikil neey: i baat bawaakan ni mwiibabal bu baan bindiy. (Rom 5:1; 8:15-17, 23) Mikook yikwaabw yanyanyish byaay cya kukuul nacy baat. Bu mudyobw biitabij mulabw a Krist, i batookesh kuuhal kwa Mawej, bady ni mushind a kumukadil mudimw mujilang, ni bady ni kutakamin kwa kuhatuk “mu mal miimiin meeh”. (Yis. 7:13-15) Mushind aakaabumw udy bashing diisaby ni mikook yikwaabw baleej dyanyish bwa cya kukuul naacy baat i hadyobw batweel mu Civulukil muvw woos.
16. I kabingil kaay kakwaabw katutweetweelel mu Civulukil?
16 Tutweetweel cikwaabw mu Civulukil bwaal tudy bakat kukooyel Yeez. Ning tut biikal ni kutakamin kaay bwa mafuk miiyiiy kuuhal, woos wa kutudy i mukat kukooyel diiy dya Yeez dyaakishiley biiyij bindiy bufuk bulongeley Civulukil dya neey: “Longaay nook bwa nun kwiikal nuulangilaayoh.”—1 Kor. 11:23, 24.
I MYAND KAAY YILENGEL YITUHEEHET TUT BOOS HATUTWEETWEELOMW
17. I mushind kaay udy kutweel mu Civulukil kwiitwambulwiish bwa kufweej habwiih ni Yehow?
17 Tufweefweej habwiih ni Yehow. (Jak 4:8) Teng mutubalong, kutweel mu Civulukil kwiitwaatwaakish mushind a kulangil a kutakamin kudy Yehow mwiitwaakish, ni a kulangil a lukat luvul ludyey mwiituleej. (Jer. 29:11; 1 Jah 4:8-10) Hatuleeleej mutudy biin-biin ni kutakamin bwa mafuk maciiyiiy ni biitabij Mawej bwa mudyey mwiitukat, twiiyiiy tukat Yehow bikasakan ni tukashish bulund bwiitut nend.—Rom. 8:38, 39.
18. Kulangil ha cileejel cya Yeez kwiitusaasak bwa kulong biny?
18 Cileejel cya Yeez citusaasak bwa kulond mu diikas dindiy. (1 Py. 2:21) Mu mafuk ma habwiih ni Civulukil, i mafuk matudy mwa kubal miisamb ya mu Bibl ya luming lwa bulekel lwa Yeez ha bulab, bwa lufw lwindiy, ni kusanguk kwindiy. Cikwaabw, kawul ka diifuk dya Civulukil, mwiisamb wiikalobw mwa kwiitulongel wiiyiiy kwiituleej mushind udy Yeez mwiitukat. (Ef. 5:2; 1 Jah 3:16) Bu mutubaabal myand ya mushind waakady Yeez mwiitwaal ni tulangiloh, bitusaasak bwa kulong myand tend “mwaakady Yeez ulong.”—1 Jah 2:6.
19. I mushind kaay utudy mwa kushimatil mu lukat lwa Mawej?
19 Tudy biihangadij bwa kushimatil mu lukat lwa Mawej. (Yuud 20, 21) Tushaashaal mu lukat lwa Mawej a kulong byoos bitudy mwa kulong bwa kumukooyel, bwa kulong bwa diijin dindiy dijilang bidimanyik kudy boos, ni ku musangeej. (Tus. 27:11; Mat. 6:9; 1 Jah 5:3) Kutweel mu Civulukil kusaasak woos wa kutudy bwa iihangadij bwa kwiikaley ni shikacil uleeleej Yehow neey: ‘Nady mukat kushimatil mu lukat lwiibuh bwa mwendelel!’
20. I tubingal kaay tulengel tutudy naat bwa tutweel mu Civulukil?
20 Ning tut batakamin bwa kuhet buumy bwa mwendelel mu diiwul eecy ha bulab, tudy ni tubingil tulengel twiitusaasak bwa kutweel mu Civulukil. Muvw woos hatwiikookongakeen haakaabumw, tuvuvuluk lufw lwa muut utudy bakat, Yeez Krist. Bwaal bukwaabw butam budy neey: tuvuvuluk cilong citam cya lukat—lukat ludy Yehow mwiituleej hatwaadiley Mwaan indiy bu cya kukuul naacy baat. Muvw oow, twiiyiiy kulong Civulukil mu Ditaan ku kawul 15/4/2022. Tudy bakat Yehow ni Mwaan indiy, nook kwiikalok diifuk aady mu Civulukil cya lufw lwa Yeez, kudy ni buseeb buvul buhitok biit byoos.
MUSAMBW A 16 Tumbishayi Yah bua Muanende muela manyi
^ Ning kutakamin kwiitut kwiikal kwa kuy mu diiwul eecy kwa kushikat ha bulab mu paradiiz, tudy bakat kutweel mu Civulukil muvw woos. Mu ciin bwaal eecy twiiyiiy kwiisambil a tubingil tushimatil mu verseh ya mu Bibl twiituleeleej bwabiny tutweetweelomw ni myand yilengel yitudy mwa kuhetomw.
^ Myaak eey i biyuvwiij cikwaabw neey: “Longaay nook bwa kuvuluk” (Bible Today’s English Version) ni “Longaay nook bu civulukil bwa mim” (Bible de Jerusalem).
^ Bwa kumanyik myand yivul habitaatal kuhwaan kuhyaakuhy ni kuhwaan kwa Bukaleng, tal ciin bwaal cya neey: “Nenuikale Bukalenge bua Bakuidi’” muhatul mu Cibumb cya Muteetekel cya 15/10/2014, dib. 15-17.
^ DYUMVWIIJ: Hadyobw baleeb bwa bashaadil bashing diisaby baleeleeb bwa biin Krist bashing diisaby bacidy ni buumy ha bulab.
^ Bwa kumanyik myand yivul habitaatal diiy dya buprofet dya bituh bya mitond bibidy bidy mu Ezekiyeel shapitil 37, tal mukand a Ntendelelu mukezuke wa Yehowa—mmujadikulula!, diib. 130-135, cik. 3-17.