CIIN BWAAL CYA KULONG CYA 3
Malongweesh Matudy mwa Kuhetel ku Kudil kwa Yeez
“Yeez udidil.”—JAH 11:35.
MUSAMBW A 17 “Ndi musue”
KADYOOSH *
1-3. I myand kaay yififikil baat ba Mawej yidy mwa kwiibadidish?
I DIIB kaay diwudy mudilok mafuk mashaal aam? Misang yikwaabw, tudy mwa kuweekesh maasooj bwa musangal. Ki tudyaakal teng tudiil bwa kakunying katudy mwa kwiikal naak mu micim. Cileejel, tudy mwa kudil hady muut utudy bakat ufw. Lorilei, mwiin-kweet mwaan-mukaj wa mu États-Unis ufundil nook: “Ciisang kahand, naakady ni kakunying kavul ka lufw lwa mwaan a mim mwaan-mukaj, ki kakwaakadyoh bend muut waakady mwa kuukashish. Mu biisang aaby, Naakady nalang teng mwaakady mucim a mim mubusik ni muzaazik mwa kutungunuk ni kutuut.” *
2 Tudy mwa kudil bwa tubingil tukwaabw. Hiromi, seb’aa njil wa mu Japon, Ujaajaadik neey: “Misang yikwaabw naakady nakooyel mu mabok bwa mwaakady baat balek kukun mat ku musah a Bukaleng unaakady niibadiil. Misang yikwaabw nadyaakal nadil, nalomb Yehow bwa ayambulwiish bwa kuhet muut udy mukat kumanyik myand ya biin-biin.”
3 Misang yikwaabw, udyaakalok wiiyumvw teng mudy biin-kweet baan-bakaj aab biyumvw eeny? Bavul ba kutuy bady mwa kwiiyumvw naak. (1 Py. 5:9) Tudy bakat “kukadil Mawej mudimw ni musangal,” misang yikwaabw tudyaakal tudil, bwaal tudy bafwiish muut utudy bakat, ki bwabiny, tudyaakal tukooyel mu mabok, eecy bwa makab matudy naam mady mwa kuteek lulamat lwiitut kudy Mawej mu diiteet. (Mus. 6:6; 100:2 NWT.) I biny bitudy mwa kulong tut twiiyumvw nook?
4. I biny bitwiiyiiy kukontonon mu ciin bwaal eecy?
4 Tudy mwa kulongel ku cileejel cya Yeez. Biisang bikwaabw, kwaakady myand yaakady yimusak bwa ‘kudiley.’ (Jah 11:35; Luuk 19:41; 22:44; Ebr. 5:7) Tutalaayaak myand aay. Bu mutwendend ni kulong, twiiyiiy kutal malongweesh matwiiyiiy kuhetelok. Twiiyiiy kutal cikwaabw, mishind yidy mwa kwiitwambulwiish bwiitut kuhit bilengel ni makab mitudiididish.
YEEZ UDIDIL NI BALUND NEND
Ambulwiish baat bady ni kakunying, teng bu mulongel Yeez (Tal cikos 5-9) *
5. I dilongweesh kaay dituheehetel kudy Yeez mu bwaal budyobw balond mu mukand a Jah 11:32-36?
5 Mu muvw a 32 B.B., Yeez waakady ni mulund nend mulengel Lazaar, waakady ubeel ni wiiyil kufw. (Jah 11:3, 14) Lazaar waakady ni bayaay indiy babidy baan-bakaj, Mariy ni Mart, ni Yeez waakady mukat cisak eecy bikasakan menmen. Baan-bakaj babidy aab, baakady ni kakunying kavul bwaal baakady bafwiish mwaanaabw waakadyobw bakat. Kuunyim kwa lufw lwa Lazaar, Yeez uyiil mu musok a Betanih, mwaakady Mart ni Mariy bashikacil. Hatadil Mart neey: Yeez ubiiy, uyiil lubil kudyey waakamusambakeenomw. Lang mwaakadyey mumwambil ni kakunying koos neey: “A Fumweet, bu uw mwiikaloh, bu uw mwiikal hiinaah, mwaaneet kaakadyoh bend mwa kufw.” (Jah 11:21) Mu kalung kakeeh, hatadiley Mariy ni baat bakwaabw badil, Yeez “udidil.”—Bal Jah 11:32-36.
6. Bwabiny Yeez udidil diib aady?
6 Bwabiny Yeez udidil diib aady? Mukand a Étude perspicace waalalabul neey: “Lufw lwa mulund nend Lazaar ni kakunying kaakady naak baayaayend baan-bakaj, bilongel bwa Yeez akabakan ni adil.’” * Yeez udy mwa kwiikal mulangil ha kakunying kaakady naak mulund nend Lazaar mu ciisang cyaakadyey ubeel, ulang a mushind waakady Lazaar wiiyumvw ni hatadiley neey: ukaady habwiih ni kufw. Cikwaabw, Yeez udidil biin-biin hatadiley kakunying kaakady naak Mariy ni Mart bwa lufw lwa mwaanaabw. Uw mwiikal mufwiish mulund neeb wa ha micim eecy mwiin mu cisak, biin-biin, ukaady mumvoh byeeb kakunying kabwiin kiin aak. Tutalaay malongweesh masat matudy mwa kulongel ku bwaal oobw.
7. I biny bitudy mwa kulongel kudy Yehow bwa mwaakady Yeez mudil mulund nend?
7 Yehow i mumanyik mutwiiyumvumvw. Yeez i “ciifwaany cya biin-biin” cya Taat indiy. (Ebr. 1:3) Haakady Yeez mudil, waakady uleej mwaakady Taat indiy wiiyumvw. (Jah 14:9) Uw mwiikal mufwiishok muut uwudy mukat, iikal mujaadik neey: Yehow kiin teng utal kakunying kawudy naak, umvumvw biend bibiih menmen bwa kakunying kawudy naak. I mukat kondah bady ni micim yizaaz.—Mus. 34:18; 147:3 NWT.
8. I biny bidy mwa kwiitujaadikil neey: Yeez wiiyiiy kusangul baat batudy bakat bakaady bafw?
8 Yeez i mukat kusangul baat bawudy mukat. Mutancy mukeeh kuuhal kwa Yeez kudil, waakady mujaadikil Mart neey: “Mwaaneen wiiyiiy kusanguk.” Mart waakady mwiitabij cyaakady Yeez mu mwambil. (Jah 11:23-27) Bu mwaakady Mart uhambidil Yehow, waakady ni bijaadik bya mwaakady muprofet Elih ni Elizeh basangul baat ku kal. (1 Bk. 17:17-24; 2 Bk. 4:32-37) Ni umvwiil cikwaabw mwaakady Yeez musangul baat. (Luuk 7:11-15; 8:41, 42, 49-56) Uw byeeb udy mwa kwiikal mutwiishiibw neey: wiiyiiy kutalangan cikwaabw ni baat bawudy mukat bakaady bafw. Kudil kwa Yeez, kwaakady kukashish balund nend baakady bazaazik ni kakunying, bwaal oobw i cijaadik cya neey: Yeez i mukat kujuul baat bakaady bafw!
9. Teng bu Yeez, i mushind kaay utudy mwa kukashish baat bady ni kakunying kavul? Twaal cileejel.
9 Udy mwa kukashish bady ni kakunying. Yeez kaakady teng mudil ni Mart ni Mariy, ki cikwaabw, waakady mwiibakun mat ni kwiisambey naab bwa kwiibakashish. Tudy byeet mwa kulong nook, bwa kukashish bady ni kakunying. Dan, mukul udy mushikacil mu Australie, uleeleeb neey: “Kuunyim kwa lufw lwa mukaj aam, naakady nakaam dyambulwiish. Biin maluw bavul baakady habwiih bwa kuyambulwiishobw ni kuukunobw mat munyiny ni bufuk. Badidil naany ni kabaakadyoh bend baalekelel ciisang cinaakady naleej kakunying kaamim. Baakady bayambulwiish bikasakan, baayiiteedyel mashiny, bay mu ciik bwa kaasumbilobw byaakudy ni baayiihikil ciisang cinaakady ciy ni mushind a kukumbaj midimw eey. Ni baakady teng basambil naany haakaabumw. Baleejel mwaakadyobw balund ba biin-biin ni baan-beet badyok ‘teng bwa kwaabanyangan mal ni makeng.’”—Tus. 17:17.
YEEZ WAAKADY UDIL BWAAL WAAKADY MUKAT BAAT
10. Lond myand yidy mu mukand a Luuk 19:36-40.
10 Yeez ufikil mu Yeruzalem mu diifuk dya 9 suuny a Nisan mu muvw a 33 B.B. Haakady Yeez ki udy habwiih ni kutweel mu cimeng, baat bavul biikongakeen ni baakady baadij bizang kuuhal kwindiy mu njil waakadyey wendel ni kumwiitabobw bu Mukaleng aababw. Biin-biin cyaakady ciisang cya musangal. (Bal Luuk 19:36-40.) Misang yikwaabw, biiyij bindiy kabaakadyoh bend mwa kutakamin cyaakady mwa kulongek mafuk maciiyiiy. “Haakady Yeez ki udy habwiih ni kutweel mu cibunj cya Yeruzalem, wambwiil mees wiicital, yiy waatang kudil bwa ciin cibunj eecy.” Ni maasooj ku mees Yeez uleebel myand yitam yaakady mwa kulongekel baat ba mu Yeruzalem.—Luuk 19:41-44.
11. Bwabiny Yeez waakady mudil bwa baat ba mu Yeruzalem?
11 Yeez waakady mumvw micim yimwiit mund, ning mwaakadyobw bamwaakidil bilengel menmen bwaal waakady mu manyik neey: biin Yuud habwiih ni boos, baakady balek Musah a Bukaleng waakadyey mwiibatwaadil. Bu cihet, Yeruzalem waakady mwa kubutuk ni mwiin Yuud ning waakaabumw kaakadyoh bend mwa kuhanduk ku kubutuk kwa cimeng ni baakady mwa kwiibangat bwa kuyobw naab mu buhik. (Luuk 21:20-24) Bya lus, teng mwaakady Yeez muman kwiibileej, biin Yuud bamulekeel. I mushind kaay udy baat baakidil Musah a Bukaleng cyaab ciwudy mushikacil? Iikal baat bakeeh biitab myand ya biin-biin yiwuyaay kibalongweesh, i biny biwudy mwa kulongel ku kudil kwa Yeez? Tukontononaay malongweesh makwaabw masat.
12. I biny bituloolongel kudy Yehow bwa mwaakady Yeez mudil bwa baat?
12 Yehow utaatacil baat. Kudil kwa Yeez, kwiituleeleej mudy Yehow utacil baat. “Bwaal kiishoh bend mukat bwa muut ning waakaabumw abutuk; ki i mukat bwa ney baat boos bafik ku kulek kulong myand yibiih.” (2 Py. 3:9) Leeloow, tuleeleej mutudy bakat biin-kweet hatutuutungunuk ni kwiikashishomw bwa kuteng micim yaababw hatwiibadiidiil musah mulengel.—Mat. 22:39. *
Longolol program iibuh wa kudiil baat musah, teng bu mulongel Yeez (Tal cikos 13-14) *
13-14. I mushind kaay waakady Yeez muleej baat lus, ni i mushind kaay utudy mwa kwiidikij ciikadil cindiy eecy?
13 Yeez waakady mukal mudimw a bukajaady bikasakan. Uleejel mwaakadyey mukat baat haakadyey mutungunuk ni kwiibalongweesh mu mishind yivul. (Luuk 19:47, 48) I biny byaakady bimusakan bwa kulong nook oow? Bwaal Yeez waakady wiibumvwiil lus. Misang yikwaabw, baat baakady bakaam bwa kumvw diiy dya Yeez bwaal bulongel bwa yiy ni biiyij bindiy ‘bakaakal teng ni mwa kudyobw cyaakudy.’ (Mark 3:20) Cikwaabw, Yeez waakady mukat kulongweesh teng ni bufuk—diib dyaakady muut mukwaabw mukat kwiisamb nend. (Jah 3:1, 2) Baat bavul ba ku baat baakady bakun Yeez mat, kabaakadyoh bend bashaal biiyij bindiy. Ki baat boos baakady bamukun mat, bahetel musah indiy. Leeloow, tukaakaam bwa baat bavul bahet mushind a kukun mat ku musah mulengel. (Yil. 10:42) Bwa kukumbaj bwaal oobw, bikaam tulongolol mushind iitut a kudiil baat musah.
14 Katok bwa kulongolol yimw myand. Tut katuy tushiitulul meeb ma kudiil baat musah, katwaakuhetoh bend baat batudy mwa kudiil musah mulengel. Seb’aa njil Matilda uleeleeb neey: “Mbaayany ni mim tudyaakal tukumbul baat meeb mashil-shilangan. Kuhacy a mashik ni bweeh, tukaakal midimw yiitut. Mu miidih baat bavul kabiin ku mazubw maababw, ki tukaakal mudimw ni bibij-bij mu njil hatusaasambakeen naab. Meeb ma kawul, i malengel, bwaal Tusaasangan baat ku bibel byaababw.” Hamut a kulamat teng ku program aakaabumw, bikaam tulongolol program iitut, udy mwa kwiitwambulwiish bwa kuhet baat ku mazubw maababw bwa kwiibadiil musah mulengel. Tut balong nook, twiiyiiy kutwiishiibw neey: Yehow wiiyiiy kusangal.
YEEZ WAAKADY UDIL BWAAL WAAKADY MUKAT BAAT
Iisanjil Yehow hawudy mu makab, Teng bu mulongel Yeez (Tal cikos 15-17) *
15. Teng mudyeby bileej mu mukand a Luuk 22:39-44, i biny byaakady bilongek bufuk bwa bulekel kuuhal kwa Yeez kufw?
15 Diifuk dya 14 suuny a Nisan muvw a 33 B.B ku ma kawul, Yeez uyiil mu budimy bwa Gestemaneh. Kwiin aakw, waakady mwambil Yehow myand yindiy yoos yaakadyey naay ku micim. (Bal Luuk 22:39-44.) Cyaakady ciisang cikasakan cyaakady Yeez ‘mulomb Mawej umwiisanjil ni maasooj ku mees ni diiy dikasakan.’ (Ebr. 5:7) I myand kaay yaakady Yeez mulomb mu diisambil, bufuk bwa bulekel kuuhal kwa kufwey? Ulombel Yehow diikand dya kushaaley ni lulamat ni bwa kulong lukat lwindiy. Yehow umvwiil kudil kwa Mwaan indiy mu diisambil ni kutumey mwanjel bwa kumukashish.
16. Bwabiny Yeez uhetel kakunying diib dyaakadyey usambil mu budimy bwa Gestemaneh?
16 Biin-biin, Yeez waakady mudil diib dyaakadyey usambil mu budimy bwa Gestemaneh, bwa baat baakady baleeb neey: waakady uboyesh diijin dya Mawej. Yeez waakady mumanyik cikwaabw mudimw mutam waakadyey nend—bwa baat batumbish diijin dya Taat indiy. Uw utwiilangan ni shikacil a makab, uteeteet lulamat lwiibuh kudy Yehow, i biny biwudy mwa kulongel ku maasooj maweekeshel Yeez? Tukontononayaak malongweesh masat aam.
17. I biny bitudy mwa kulongel ku mushind waakady Yehow mwaalabul diisambil dya Yeez dilong ni mucim aakaabumw?
17 Yehow umvumvw hawumwiisaasanjil. Yehow waakady mumvw kulomb kwa Yeez. Bwabiny? Bwaal Yeez umulombel bwaal butam mu diisambil bwa kushaaley ni lulamat ni bwa kutumbishish diijin dya Taat indiy. Tut bashaal balamat Yehow ni tutumbishish diijin dindiy, wiiyiiy kwaalabul diisambil diitut bwa kwiitwambulwiishey.—Mus. 145:18, 19.
18. Teel mishind yileeleej neey: Yeez i mulund wiiteeteek ha cyaab cya bakwaabw.
18 Yeez wiiteeteek ha cyaab ciibuh. Tut biikal ni myand yidy yitutond, tudy mwa kwiikal ni musangal hady mulund udy mwa kwiitumvw wiitwaakish dyambulwiish, nang-nang ukaady mutwiilanganok ni makab ma bwiin matudy naam. Yeez ki mulund mulengel i mumanyik ciisang citudy bakooyel ni ciisang citukaakaam dyambulwiish. I mumanyik neey: tudy bahuuyil ni i mutal neey: tukaakaam bwa bitukwanjok “ciisang citudy mu mal.” (Ebr. 4:15, 16) Teng mwaakady Yeez mwiitab dyambulwiish dya mwanjel mu budimy bwa Gestemaneh, tut byeet tudy mwa kwiitab bwa Yehow iitwambulwiish, bitukaakashish ku dyambulwiish dya mikand, video, mwiisamb, eecy hady mukul wiitwaakish mibel ni ku dyambulwiish dya mulund neet udy mukasakan mu myand ya mu spirit.
19. I mushind kaay muwudy mwa kuhet bukash hawutwiitwiilangan ni makab bwa lulamat lwiibuh kudy Mawej? Twaal cileejel.
19 Yehow wiiyiiy “kwiinushikik talal.” Yehow wiiyiiy kwiitukashish bicy? Hatuloolomb, twiiyiiy ‘kushikat talal kwaakaakish Mawej baat.’ (Fili. 4:6, 7) Diitalal didy Yehow wiitwaakish, dibaabatamij meej miitut. Tukontononaay mwaakady bwaal oobw bumweek bwa biin-biin mu shikacil a mwiin-kweet Luz. Uleeleeb neey: “Nalwaal diivit ni meej ma kwiiyikadil kaayany. Misang yikwaabw kumvw kwa nook, kusaasak bwa nalang neey: Yehow kiishoh bend muukat. Ki hady bwaal bwa nook bufikil, nambambil Yehow musang umw muniiyumvumvw. Diisambil diiyambambulwiish bwa mim kubatamij micim yaam.” Bwaal bwindiy oobw, buleeleej neey: tudy mwa kuhet byeet diitalal hatusaasambil.
20. I malongweesh kaay matudy bahetel ku kudil kwa Yeez?
20 I malongweesh kaay makaakashish ni mady mwa kwiitwambulwiish, matudy mwa kulongel ku kudil kwa Yeez! I bituvulwiij bwa kwambulwiish balund neet bady ni kakunying ni bwiitut kuteekel Yehow ni Yeez micim, bamanyik neey: biiyiiy kwiitwambulwiish ciisang citwiikal mwa kufwiish muut utudy bakat. I bitusak bwa kwiikal ni lus lwa kudiil baat musah ni kwiibalongweesh bwaal Yehow Mawej ni Yeez Krist bituleeleej ciikadil cilengel eecy. Ni tukaakasakan micim hatumaamanyik neey: Yehow ni Mwaan indiy udyey mukat bumvumvw mutwiiyumvumvw, biteeteek ha cyaab ciitut hadyobw batal mutudy bahuuyil ni bakat kwiitwambulwiish bwiitut kutaatameen. Tutungunukaay ni kukooyel myand yitubalong teng ni ku diifuk diikal Yehow mwa kukumbaj mulay indiy mulengel wa neey: ‘wiiyiiy kwiitukuhul maasoj ku mees’!—Mya Yis. 21:4.
MUSAMBW A 120 Idikija bupole bua Kristo
^ Tubaabal mu Bibl neey: Yeez waakady mudil ciisang kahand. Mu ciin bwaal eecy, twiiyiiy kwiisambil ha misang yisat yididil Yeez ni malongweesh matudy mwa kuhetelok.
^ Tudy bashiitulul majin.
^ Tal mukand a Étude perspicace des Écritures, Volume 2, diib. 34.
^ Mwaak wa mu ciin Krek udyobw baalabul neey: “mukween” mu mukand a Matewus 22:39 uleeleej baat bady habwiih neet. Uleeleej cikwaabw muut utwiisaasamb nend haciibidil.
^ DYUMVWIIJ DYA BIFWAATUL: Yeez waakady mukashish Mariy ni Mart. Tut byeet tudy mwa kukashish baat bady bafwiish badyobw bakat.
^ DYUMVWIIJ DYA BIFWAATUL: Yeez waakady mukat kulongweesh Nikodem bufuk. Tudy mwa kulong Bibl ni baat diib ditudy mwa kwiibasangan ku mazubw maababw.
^ DYUMVWIIJ DYA BIFWAATUL: Yeez waakady mulomb Yehow bwa amwaakish bukash bwa kushaaley mumulamat mu mateet. Bikaam tumwiidikij byeet hatutwiitwiilangan byeet ni makab.