CIIN BWAAL CYA KULONG CYA 4
MUSAMBW A 30 Tatu wanyi, Nzambi wanyi, ne Mulunda wanyi
Yehow i mukukat bikasakan
“Yehow udy ni lukat luvul.”—JAK. 5:11, NWT.
BWAAL BUTAM
Lukat lwa Yehow lwiiyiiy kwiitufwenj habwiih nend, lwiiyiiy kulong bwiitut kwiiyumvw balam bilengel ni lwiitwaakishulul diikand.
1. I biny bikwiiyiiyil mu meej hawulaalang bwa Yehow?
UKAADY muteetok kwiifwanyikijil mudyaakal Yehow eeny? Hawudyaakal wiisamb nend mu diisambil, i biny bidyaakal bikwiiyil mu lungeny? Ning mudy Yehow kay umweek, Bibl wumvumvwiij buumuut bwindiy mu mishind yishiil-shiilangan. Babiibiikan Yehow neey: “i diib, i ngabw”, ni “i mudil ubuubutul byooshooshey.” (Mis. 84:11; Ebr. 12:29) Ezekiyeel umvwiijil mushind udy Yehow mu myand yitadiley bu mu cilot neey: i mufwaanakan ni diibw dibunduluk dya buseeb buvul, ni cyaamw cibeebezem ni mwanzakongol. (Ezek. 1:26-28) Myand yidyobw baleeb bwa Yehow eey idy mwa kwiitukemesh eecy kwiituhicil.
2. I biny bidy mwa kukaakeesh baat bakwaabw bwa kufweejobw habwiih ni Yehow?
2 Bu mutudy katuy mwa kutal Yehow, bidy mwa kwiitukasakeen bwa kwiitab neey i mwiitukat. Baat bakwaabw balaalang neey Yehow kiish mwa kwiibakat bwa myand yilongelobw kal mu shikacil aababw. Misang yikwaabw kabaakady ni taat waakady mwiibakat. Yehow i mumanyik mutwiiyumvumvw ni mumanyik cikwaabw bwaabiny bidy mwa kwiitukasakeen bwiitut kufwenj nend habwiih. Bwa kwiitwambulwiish, i mwiituleej buumuut bwindiy bulengel mu Diiy dindiy.
3. Bwaabiny bikaam tukontonon bilengel lukat lwa Yehow?
3 Mwaak umw umvumvwiij bilengel mudy Yehow, i lukat. (1 Jah 4:8) Yehow i lukat. Myand yoos yiloolongey, wiiyiloolong teng bwa lukat. Lukat lwa Mawej i lutam ni i lukasakan ni kiish wiiluleej teng baat bady bamukat, ki wiiluleeleej cikwaabw ni kudy baat bakiish bamukat. (Mat. 5:44, 45) Mu ciin bwaal eecy, twiiyiiy kukontonon bilengel buumuut bwa Yehow ni lukat lwindiy. Bwaal hatumaamanyik Yehow bilengel, twiiyiiy kumukat bikasakan.
YEHOW I MWIITUKAT BIKASAKAN
4. Wiiyumvumvwok bicy bwa lukat luvul ludy naalw Yehow? (Tal cikwaabw cifwaatul.)
4 “Yehow udy ni lukat luvul.” (Jak 5:11) Mu Bibl, wiifwaafwanyikij ni maam udy mukat mwaan indiy. (Ye. 66:12, 13) Lang ket mudyaakal maam ulam mwaan indiy ni lukat loos. Umwaamwangatok ha mikon, uzab nend, ni wiisamb nend ni diiy dilengel. Hady mwaan udil eecy ni biitiit, maam umaamanyik neey udy ni cikaakaamey. Hatumoomon makab, twiikal beyeleel Yehow bamanyik neey, i mwiitukat. Mumb a misambw ufundil neey: “Diib didy mut aam mwiiwul teh ni myand yivul, uukaakashish ku micim, mucim aam woos udy ni musangal.”—Mis. 94:19.
“Teng bu mudyaakal maam ulam mwaan indiy, nook, niiyiy kutungunuk ni kukukashish ku micim” (Tal cikos cya 4)
5. Bwiibuh, lukat lwa bulamat lwa Yehow lumvumvwiij biny?
5 Yehow udy ni lulamat. (Mis. 103:8, NWT) Kiishoh bend wiitulek ning hatuloolong bwaal bubiih. Biin izaleel bumbiil Yehow mwanz ku makas misang ni misang. Ki haakadyobw biikunying bwa myand yibiih yilongelobw ni biiyilek, Yehow wiibajaadikil lukat lwindiy lwa bulamat ni may aam: “Udy ni buseeb ku mees kwa mim, nakubaabal bu muut ni nady mukukat.” (Ye. 43:4, 5) Lukat lwa Mawej kalwiish lushintuluk. Nook, twiikalaay teng batakamin mu lukat oolw. Ning tut balong bilem bitam bya bicy, Yehow kiishoh bend mwa kwiitulek. Hatwiikuukunying ni tuhingomw kudy Yehow, twiiyiiy tutal neey ucidy teng mwiitukat. I mwiitulay neey: “ufwiifwiilangan lus luvul.” (Ye. 55:7) Bibl uleeleeb bwa lus oolw neey, lwiitwaakaakish “biisang bya kwiitukashish naaby . . . byaalaalukil kudy Yehow.”—Yil 3:19.
6. Zakarih 2:8 wiituloolongweesh biny bwa Yehow?
6 Bal Zakarih 2:8. Bu mudyey mwiitukat, Yehow umaamanyik musang umw mushind utwiiyumvumvw, ni i mukat bwa kwiitulam. Umvumvw bibiih hatudy bumvw bibiih. Nook, twiikal batwiishiibw hatumusaasambil neey: “Lamany bilengel bu kakish ka diis diibuh.” (Mis. 17:8, NWT) Diis i cituh cya buseeb buvul cya ku nyeet. Ki bwa bingany hady Yehow wiitufwaanyikij ni kakish ka mu diis dindiy, bidy teng bu neey wiitwaambaambil neey: ‘Muut woos wiinuloolongel bibiih nun baat ba mim uloolongel bibiih ciit cidy ni buseeb buvul ku mees kwaamim.’
7. Bwaabiny bikaam tukashish kweeyelel kwiitut kwa neey, Yehow i mwiitukat?
7 Yehow ukaakam bwa twiikal bajaadik neey i mukat muut woos wa kutudyook. Ki, i mumanyik neey bwa shikacil utwaakady nend kuuhal tudy mwa kwiiyihanguj ning udy mwa kwiitukat. Eecy tudy mwa kwiikal twend ni kumon makab kaahand maloolong bwa tutal neey Yehow kiish mwiitukat. I bingany biikal mwa kukashish kweeyeleel kwiitut kudy Yehow? Long mudy Yehow muleej Yeez lukat, mudyey wiiluleej bashing diisaby, ni muut woos wa kutudy.
MUDY YEHOW MULEEJ LUKAT LWINDIY
8. Bwaabiny Yeez waakady mujaadik neey taat indiy i mumukat?
8 Mu mivw buuny kabuy kubal, Yehow ni Mwaanindiy udyey mukat bikasaakan baswiikil bulund ni baakady bakatangan menmen. Bulund bwaababw i bwa kal weeh. Yehow uleejel hatook lukat lwindiy bwa Yeez teng bu mutwiibibaabal mu Matewus 17:5. Yehow waakady mwa kuleeb bituh neey, ‘Mwiinoow i muut unady mukat.’ Ki ukaamin bwiitut kumanyik mudyey mukat Yeez bikasakan, ki bwaabiny umubiikeen neey “Mwaan a mim, unady muhit kukat.” Yehow waakady ni musangal bwa cyaakady Yeez ni byoos byaakadyey ulong. (Ef. 1:7) Ni Yeez byend kaakady weelakan bwa mushind waakady Taat indiy wiiyumvw bwindiy. Yeez waakady mujaadik biin-biin neey, lukat lwaakady Taat indiy mumukat naalw lwaakady lwa biin-biin. Uleebel misang ni misang ni kutwiishiibw koos neey: Taat indiy i mumukat.—Jah 3:35; 10:17; 17:24.
9. Bilondeshel Biin Rom 5:5, i mwaak kaay umvumvwiij mudy Yehow mukat bashing diisaby? Umvwiij.
9 Yehow uleejel cikwaabw lukat lwindiy hatook bwa bashing diisaby. (Bal Biin Rom 5:5.) Tal mwaak wa neey “uteekel.” Mukand kaahand umvumvwiij myand ya mu Bibl umvumvwiij mwaak oow neey “lwiiyiiy kutudy an bu mwanz wa mu kasul.” Mwaak oow uleeleej mudy Yehow mukat bashing diisaby! Bashing diisaby ibamanyik neey i ‘biibakat kudy Mawej.’ (Yuud 1) Mupostol Jah umvwiijil mudyobw biiyumvw hafundiley neey: “Talaay mudy taat mwiitukat bikasakan! Bwa lukat lwindiy ki hiitubiibiikanobw neey baan ba Mawej!” (1 Jah 3:1) Yehow i mukat teng bashing diisaby kaayaabw eeny? Waakweeh, Yehow i mukat woos wa kutudy.
10. I bwaal kaay butam buleeleej lukat lwa Yehow ?
10 I bwaal kaay butam buleeleej lukat lwa Yehow? I cya kukuul naacy baat—kuhicil ku cya kukuul naacy baat, Yehow uleejel lukat ludy muut ning waakaabumw kay mwanj kuleejoh! (Jah 3:16; Rom 5:8) Yehow utwaadil mwaan indiy a buseeb, ni wiitabil bwa kufwiiley baat boos bwa kwiitufwiilok lus ku mpekaat yiitut ni bwiitut kushaal balund nend. (1 Jah 4:10) Hatulaalangil ha buseeb budy Yehow ni Yeez bafut, tudy mwa kumvw bilengel mudy Yehow ni Yeez bakat woos wa kutudy. (Kal. 2:20) Kabafuciloh bend cya kukuul naacy baat bwaal mikenj ya Yehow ya buwaakan yaakady yilomb bwa kulong nook. Ki i cya bukish cileeleej lukat. Yehow i mwiituleej lukat hakulambul muut waakady ni buseeb buvul kudyey—Yeez. Yehow wiitabil bwa mwaan indiy akeng ni afw bwiitut.
11. Jeremih 31:3 wiituloolongweeshok biny?
11 Teng mutubiibital, Yehow kiish wiiyumvw bituh mudyey mwiitukat, ki cikwaabw wiitwambambil mudyey mwiitukat bikasakan. (Bal Jeremih 31:3.) Yehow wiitukookok kudyey bwaal i mwiitukat. (Fwanyikij ni May Mumbulul 7:7, 8.) Kakwiish ciit, ning muut udy mwa kunyang lukat ludy hakacy hiitut nend. (Rom 8:38, 39) Wiiyumvumvw bicy bwa lukat oolw? Bal Musambw a 23, ni tal mwaakady Davih mwiiyumvw bwa lukat lwa Yehow, ni mudy woos wa kutudy mwa kwiiyumvw bwa lukat oolw.
WIIYUMVUMVW BICY BWA LUKAT LWA YEHOW?
12. I mushind kaay uwudy mwa kumvwiij mu cikos Musambw a 23?
12 Bal Misambw 23:1-6. Musambw a 23, i musambw uleeleej mwaakady Davih mweeyeleel lukat lwa Yehow, ni mushind udyey ulam baat. Davih waakady mufund musambw oow, umvumvwiij mwaakady bulund bwindiy ni Mulamy, Yehow. Davih waakady wiiyumvw ku mat talal haakadyey ulek Yehow umulombol, ni waakady mumweeyeleel mu myand yindiy yoos. Davih waakady mumanyik neey lukat lwa Yehow lwaakady ni bwa kumutwaalok mafuk mindiy moos ma buumy. I biny byaakady bilong bwa Davih iikal mutwiishiibw nook?
13. Bwaabiny Davih waakady mujaadik neey Yehow umulaalam?
13 “Ciish mubul ciit ning cyaakaabumw.” Davih waakady wiiyumvw bamulamok bilengel bwaal Yehow waakady umwaakish byoos byaakadyey ukaam. Cikwaabw Davih waakady mumanyik neey, Yehow waakady mulund nend, ni waakady umwanyish. Ki bwaabiny waakady mutwiishiibw neey, ning lutat kaay lwaakady mwa kumufikil mu mafuk maakady miiy, Yehow waakady ni bwa kutungunuk ni kumwaakish byoos byaakadyey ukaam. Bu mwaakady davih mutwiishiibw neey, Yehow waakady mumukat ni waakady mwa kumushikik talal, bimwambulwiishil bwa kulek kwiikaley ni mooy, ki iikal wiiyumvw bilengel ni musangal misang yoos.—Mis. 16:11.
14. I mushind kaay udy Yehow mwa kwiitulam ni lukat loos?
14 Yehow wiitulaalam ni lukat, nang-nang hady myand yibiih yitufikil mu shikacil iitut. Claire, a ukadil mudimw ku Betel mivw yihit 20, wiiyumvwiil mukaakal cya kulong hakady cisak cyaababw cihet makab miimiin malondangan. Taat indiy utangil kulehuk butambw bumw, biihacil mwaacindiy wa bakaj mu cisumbw, ni cisak cyaababw cijimbajil ka mudimw kaakady kibaheteshok mushind ni nzubw a babw. I mushind kaay waakady Yehow mwimbambulwiish ni lukat? Claire uleeleeb neey: “Yehow waakady utal byoos byaakady cisak ciitut cikaam diifuk dyoos. Misang ni misang, Yehow waakady wiitwaakish biit bivul bihit ni bitwaakady tukaam! Hanalaalangil ha mushind waakady Yehow mwiitwambulwiish, ciishoh bend mwa kuvulamin lukat lwindiy. Myand eey, i yiiyambulwiish bwa kutungunuk ni kukadil Yehow mudimw ni musangal ning hady makab makwaabw maafikil mu shikacil aam.”
15. Bwaabiny Davih umvwiil bamufuululul? (Tal cikwaabw cifwaatul.)
15 “Ufuufuululul micim yaam.” Misang yikwaabw, Davih wumvwiil kaakunying bwa myand ni makab maakadyey uhet. (Mis. 18:4-6) Ki lukat lwa Yehow ni lus lwindiy bimufuululwiil. Yehow uyiil ni mulund nend waakady mukooy oow, waamulaadik “ha bisoos bitalal bwa kwiihweej” ni umutwaadil “ha cyaab citalal habwiih ni mwanz.” Nook, Davih uhetulwiil diikand, ni uhetel mushind a kutungunuk ni kukadil Yehow mudimw ni musangal.—Mis. 18:28-32.
Ning mwaakady Davih uy lubil, Yehow waakady mumukat bikasakan ni umuutabaleel hakumukashish (Tal cikos cya 15)
16. I mushind kaay udy lukat lwa Yehow lukwaakishulul diikand?
16 Bya mushind aakaabumw ni leel, “I bwa lukat lwa Yehow lwa bulamat hatudy katuy bafik ku bulekeel bwiitut” hatuheehet makab mu shikacil eecy bulwiish. (Kud. 3:22, NWT; Kol. 1:11) Tutalaay cileejel cya Rachel. Wiiyumvwiil muhomw haakady mbaayend mumulek, mulek ni Yehow mu ciisang cya cihuh cya COVID-19. I biny byaakady Yehow mumulongelok? Uleeleeb neey: “Yehow ulongel bwa mim kwiiyumvw mwaakadyey muukat. Uuyaakishil balund baakady bahicish naany diib misang yoos, baatwaadil byaakudy, baatumin mesaaj ni verseh ya mu Bibl, baasekejok ni bamweemweet naany, ni baavulwiijok misang yoos neey: Yehow i waakady utungunuk ni kuulam. Nafwiifwiijok Yehow bikasakan bwa mudyey muuyaakish cisak citam cya baan-beet bady baakat.”
17. Bwaabiny Davih “kaakady uciin bwaal ning bwaakaabumw”?
17 “Ciish naciin bwaal ning bwaakaabumw, bwaal udy naany.” Buumy bwa Davih bwaakady misang yivul mu buuhund, ni baakady bamulwiish kudy baat baakady ni bukash buvul. Ki lukat lwa Yehow lwaakady lumusak bwa kwiiyumvyey ku mat talal ni bumulamok. Davih waakady ulang neey Yehow waakady nend mu myand yoos yaakady mwa kumufikil, ni biineeby, byaakady bimwaakish diikand. Ni waakady mwa kumb neey: “[Yehow] i muuyaalabul ciish numvw mooy ning wa cingany.” (Mis. 34:4) Mooy waakady nend Davih waakady wa cya biin, ki bu mwaakady Yehow mumukat, uhetel bukash buvul bwa kuful mooy waakadyey nend.
18. I mushind kaay udy kumanyik neey Yehow i mwiitukat mwa kwiitwaakish diikand hatudy mu biisang bya makab mituloolong mooy?
18 I mushind kaay udy kumanyik neey Yehow i mwiitukat mwa kwiitwaakish diikand hatudy mu biisang bya makab mituloolong mooy? Seb a njil mukwaabw dindiy Susi umvumvwiij mwaakadyey yiy ni mbayend biiyumvw haakady mwaan aababw mwiizuh: “Hady myand yibiih yikulongekel, bidy mwa kukuteng ku micim bikasakan ni wiiyumvw mukaakal ni cya kulong. Ki kumanyik neey Yehow i mwiitukat bikasakan kuloolong bwiitut kwiiyumvw neey i biitukungok ni biitulamok.” Rachel, utubaaman kuteel uvuuvuluk neey: diifuk dikwaabw bufuk, micim yiiyiitil bikasakan ni nakabakeen, numvwiil misong ni mim kudiidil Yehow. Musang umw, waayambulwiish bwa mi kubatamij micim, teng mudyaakal maam ubembelej bebeh windiy, ni nalaadil tul. Ciishoh bend mwa kuvulaminoh ciisang aacy.” Mukul Tasos ulongel mivw yinaay mu nzubw a lukan bwaal ulekel kutweel mu busalaay. I mushind kaay utadiley mwaakady Yehow mumutabaleel ni lukat? Uleeleeb neey: “Yehow waakady muuyambulwiish ni biit byoos binaakady naaby diikeng. Bwaal oobw bukashishil diitabij dyaam ni bwaakady buusak bwa mim kumuteekel micim. Cikwaabw, ku dyambulwiish dya spirit indiy mujilang, Yehow uuyaakishil musangal ning munaakady mushikacil ha cyaab cya lutat. Myand eey i yiijaadikil neey, mim mwiikal nend habwiih ni nakal nend mudimw, niiyiiy kuhet mabenesh ma ku bulengel bwindiy. Ni nashaadil seb’aa njil mu nzubw a lukan.”
FWEEJ HABWIIH NI MAWEJ UDY MUKUKAT BIKASAKAN
19. a) I mushind kaay udy kumanyik neey, Mawej i mwiitukat kutal masambil miitut? b) I biny bidyobw baleeb bwa lukat lwa Yehow bikuteeteng menmen? (Tal kazubw ka neey: “ May miitwambambulwiish bwiitut kumvw mudy Yehow mwiitukat bikasakan.”)
19 Myand yoos yitubaataleey yijaajaadik hatook neey Yehow, “Mawej mwiin lukat,” udy neet! (2 Kor. 13:11) Wiitaatacish bwa myand yidy naay woos wa kutudy. Tudy batwiishiibw neey, “lukat Lwindiy lwa bulamat i lwiitunyunguluk.” (Mis. 32:10, NWT) Hatulaalangil ha mushind udyey mwiituleej lukat lwindiy, twiiyiiy kumutal bu muut a biin-biin, ni twiiyiiy kwiiyumvw habwiih nend. Tudy mwa kufweej nend habwiih biilekelel, ni tumwambil mutukaakaam bikasakan bwa neey iitukat. Tudy mwa kumwambil myand yoos yidy yiitutond, bwaal tudy bamanyik neey, wiitumvumvw ni udy habwiih bwa kwiitwambulwiish.—Mis. 145:18, 19.
20. I mushind kaay udy lukat lwa Yehow lwiitufweej habwiih nend menmen?
20 Teng mutufweefweej ku mudil diifuk dya mashik, ki mutufweefweej kudy Yehow udy mwiitukat. Lukat lwa Yehow i lukasakan ni cikwaabw, i luvul menmen. Nook, iikal ni musangal bu mudy Yehow mukukat. Ni woos wa kutudy udy mwa kuleeb bwa lukat lwindiy hakukem neey: “Nady mukat [Yehow] Mawej”!—Mis. 116:1.
WIIYIIY KWALABUL BICY?
-
I mushind kaay uwudy mwa kumvwiij lukat lwa Yehow?
-
Bwabiny bikaam twiikal bajaadik neey Yehow i mwiiitukat bikasakan?
-
Wiiyumvumvw bicy bwa mudy Yehow mukukat?
MUSAMBW A 108 Dinanga dia Nzambi dia lulamatu
a Majin makwaabw i mashintulul.