1-2. I tat kaay yidy baat bakaakadil Yehow mudimw ni lulamat mwa kuhet?

 MYAND yibiih yiy yiitufikil, yidy mwa kushintulul shikacil iitut musang aakaabumw. Cileejel, mwiin-kweet mwaan-mulum mukwaabw wa lulamat dindiy Luis a bamukwaacil ni lubeel lwa kanseer kady kakay mu baat bavul. Dokteer umwambiil neey kwaakady kumushaadil suuny yikeeh bwa kufwey. Monika ni mbaayend baakady biitwaal mu mudimw a Mawej. Diifuk dikwaabw, Monika umanyikil neey: mbaayend waakady mukul, waakady ulong mpekaat muush-muush mukacy mwa mivw yivul. Olivia, mwiin-kweet mwaan-mukaj mujik, waalukil ku cibel kwindiy bwaal ciheeh cikasakan cyaakady habwiih ni kulongek. Hahingileyomw, usangeen ciheeh aacy cinyangakany nzubw indiy woos. Musang umw shikacil ya baat aab yishiitulukil. Kudyok bwaal kaahand bubiih bwaakady bukulongekel ni bushiitulul musang umw shikacil iibuh eeny?

² Ning mutudy biin mudimw ba Yehow ba lulamat, tuheehet makab, ni tubeebeel teng bu baat boos. Tudy mwa kuhet cikwaabw bulwiish bwa kudy baat bady bakin baat ba Mawej. Ning mudy Yehow kay wiitweehul ku makab aam, wiitulaalay bwa kwiitwambulwiish. (Ye. 41:10) Hadyey wiitwambulwiish, tudy mwa kutungunuk ni kwiikal ni musangal iitut, twangat mahangadik malengel ni tushaal teng bamulamat ning hatumoomon makab makasakan menmen. Mu ciin bwaal eecy, twiiyiiy kukontonon mishind inaay yidy Yehow wiitwambulwiish mu biisang bitumoomon makab mu shikacil iitut. Twiiyiiy kutal cikwaabw citudy mwa kulong bwa Yehow kwiitwambulwiishey.

 YEHOW WIIYIIY KUKULAM

3. Hatutwiitwiilangan ni myand yikasakan, i biny bidy mwa kwiitukasakeen bwa kulong?

³ Lutat. Hatumoomon mal, bidy mwa kwiitukasakeen bwa kulang mu mushind mulengel ni bwa kwangat mahangadik malengel. Bwaabiny? Bwaal micim yiitut yidy mwa kwiikal yiit mund bikasakan ni bituhicil mu lungeny bwa kaakunying. Bidy mwa kwiituhicil mut, tukaakal ni cya kulong. Tal mumvwiil biin-kweet baan-bakaj babidy badyobw baman kuleej ku mut ook hamweenenobw mal. Olivia uleeleeb neey: “Ciheeh cikasakan aacy ciman kunyang nzubw aam, niiyumvwiil muhomw ni byaakady biihicil.” Monika uleeleeb bwa mbaayend waakady ulong myand ya muush-mush neey: “Niiyumvwiil mumb-mwanz ku makas. Numvwiil an bu neey muut waakady muuyit keel. Cicyaakadyoh bend naman kulong midimw ya ku diifuk bilengel. Cyaakadyoh bend nalang neey myand ya nook yaakady mwa kuulongekel.” I mushind kaay udy Yehow wiitulay bwa kwiitwambulwiish hatumvumvw myand yiituhicil?

4. Bilondeshel Biin Filipw 4:6, 7, i biny bidy Yehow mwiitulay?

⁴ Cidy Yehow ulong bwa kwiitwambulwiish. I mwiitulay bwa kwiitwaakish cidy Bibl ubiikan neey “diitalal dya Mawej.” (Bal Biin Filipw 4:6, 7, NWT.) Diitalal eedy, dileeleej kubatamij kwa mu micim ni kwa mu lungeny kutuheehetel ku bulund bulengel butudy bady nend. Diitalal eedy “i dihitok meej moos malaalang baat”; I dilengel mu mushind utudy katuy mwa kuleeb. Ukaady musambiloh Yehow bikasakan menmen ni uw kumvw musang umw diitalal dya mu micim kuunyim kwa diisambil eeny? Ciwumvwiil aacy i cicy cibiibiikanobw neey: “diitalal dya Mawej.”

5. I mushind kaay udy diitalal dya Mawej dilam meej miitut ni micim yiitut?

⁵ Verseh waakaabumw oow uleeleeb neey diitalal dya Mawej “diiyiiy kulam,” eecy kukung “micim yiinun ni meej miinun.” Mwaak “kulam” i mwaak wa mu myand ya basalaay, ni baakady bakal nend mudimw haakadyobw biisamb bwa basalaay baakady balam taawuny bwa kumukung ku bulwiish. Baat baakady mu taawuny waakadyobw balam baakady balaal ku mat talal, bwaal baakady bamanyik neey basalaay baakady biibalam. Bya mushind aakaabumw, hady diitalal dya Mawej dilam micim yiitut ni meej miitut, tumvumvw diitalal bamanyik neey i biitukungok. (Mus. 4:8) Teng mwaakadyeby bwa Aan, ning shikacil iitut kay mushintuluk musang aakaabumw, twiiyiiy kumvw diitalal dya mu micim. (1 Sam. 1:16-18) Ni hatumvumvw diitalal eedy, bikaakal biheehel bwiitut kulang meej bilengel ni kwangat mahangadik malengel.

6. I biny bitudy mwa kulong bwa kuhet diitalal dya Mawej? (Tal cikwaabw cifwaatul.)

⁶ Citudy mwa kulong. Hawudy ni myand yikutond, lomb Yehow bwa akwambulwiish. Mushind kaay? Lomb teng ni awuheehet diitalal  dya Mawej. (Luuk 11:9; 1 Tesa. 5:17) Luis, utubaaman kuteel umvwiijil mwaakadyey yiy, ni mukaj indiy Ana, bahet mushind a kutaatameen hibambilobw neey kwaakady kumushaadil teng suuny yikeeh bituh bwa kufwey. Uleebel neey: “Mu biisang bya nook, ibikasakan menmen bwa kwangat mahangadik habitaatal londah ni myand yikwaabw. Ki diisambil dyaakady ni buseeb buvul bwa tut kuhet diitalal mu ciisang eecy.” Luis ni mukaj indiy baleebel neey: baakady basambil bikasakan misang yivul, bend balomb Yehow bwa kwiibakishey diitalal dya mu lungeny ni dya mu micim, bamulomb ni meej bwa kwangat mahangadik malengel. Ni bumvwiil mwaakadyey mwiibambulwiish. Uw mwiikal ni lutat kaahand, tungunuk ni kusambil, ni wiiyiiy kutal mudy diitalal dya Yehow dilam mucim iibuh ni meej miibuh.—Rom 12:12.

YEHOW WIIYIIY KUKUSHIIKIK KU MAT TALAL

7. Tudy mwa kwiiyumvw bicy hatumoomon makab?

⁷ Lutat. Hatumoomon makab makasakan, mushind utwiiyumvumvw, meej miitut, ni mushind iitut a kulong myand bidy mwa kwiiy kushilangan ni mushind utudyaakal tulong koosook. Tudy mwa kwiiyumvw bayumbakany kudy myand yikasakan yilondangan. Ana, utubaaman kuteel, uleebel neey: uhetel kaakunying kavul kuunyim kwa lufw lwa Luis. Uleebel neey: “Hanaakady niiyumvw kaayaany, natangil kwiiyumvw bibiih menmen bwa cinaakady. Cikwaabw naakady numvw cinj bwa lufw lwindiy.” Misang yikwaabw, Ana waakady wiiyumvw kaayend ni umvw kaakunying bwa kwangat mahangadik mu myand yaakady Luis uhit naay bilengel. Misang yikwaabw, waakady wiiyumvw an bu neey waakady mu ciheeh cikasakan hakacy ha mwanz. I mushind kaay udy Yehow wiitwambulwiish hady kaakunying ka mushind oow katang kwiitukooyesh?

8. Temg mudyeby bileej mu Yeshaay 33:​6, i biny bidy Yehow wiitujaadikil?

⁸ Cidy Yehow ulong bwa kwiitwambulwiish. wiitujaajaadikil neey wiiyiiy kwiitushikik talal. (Bal Yeshaay 33:6.) Hady bwaat mukacy mwa ciheeh cikasakan hakacy ha mwanz, budy mwa kutang kunyeekan bibiih menmen but ook ni ook. Bwa bwaat kulek kunyeekanobw, maat mavul madyaakal ni malobw madyobw bumb mu mwanz ku butamb ni butamb bwa kwiibwiimanyik. Malobw aam mady mwa kukeehesh menmen kunyeekan kwa bwaat, ni malong bwa baat bady mu bwaat kabiikal mu buuhund ni biikal batuukij mu diis. Ki malobw aam makaakal mudimw bilengel hady bwaat bwend buy kuuhal. Bya mushind aakaabumw, Yehow wiiyiiy kwiitushikik talal hatutuutungunuk ni kumukadil mudimw ni lulamat loos mu biisang bikasakan.

9. I mushind kaay udy biit biitut bya kukaam naaby myand biitwambulwiish bwiitut kubatamij micim mu biisang bikasakan? (Tal cikwaabw cifwaatul.)

⁹ Citudy mwa kulong. Hawumvumvw myand  yikuhicil, iikal wiikashishomw bwa kusambil, kutweel mu bisangil, ni kudiil baat musah. Cya biin, misang yikwaabw kwaakwiiy kulong myand eey muwaakady wiiyilong kuuhal, ki manyik neey Yehow kiish mwa kwiitulomb bwa kulong myand yitudy katuy mwa kulong. (Fwanyikij ni Luuk 21:1-4.) Ning uw usambil, utweel mu bisangil ni udiil baat musah, iikalok ni diib dya kwiilongel Diiy dya Mawej ni kulangiloh. Bwabiny? Bwaal kuhicil ku bulongolody bwindiy, Yehow wiitwaakaakish biin bwaal bilengel ni film bidy mwa kwiitwambulwiish bwiitut kutukij mu diis ni kulam meej miitut mu biisang bikasakan. Bwa kuhet biit biwukaakaam, udy mwa kukal mudimw ni biit biitwambambulwiish bwa kwiibiikaam, bidyok mu cileebel ciinun, bu mudy aplikasion wa JW Library^®, Index des publications des Témoins de Jéhovah, ni Mukanda wa makebulula wa Bantemu ba Yehowa. Monika, utubaaman kuteel, uleebel neey waakady ukal mudimw ni biit bya kukaam naaby eeby, bwa kuhet mibel hakadyey umvw kaakunying kavul kakaam kumukwaat. Cileejel, waakady ukaam kumanyik habitaatal mwaak “cinj.” Misang yikwaabw waakady ukaam habitaatal myaak bu mudy “kumbangan mwanz ku makas” eecy “lulamat.” Ni waakady ubal an teng ni haakadyey wiiyumvw bilengel. Uleebel neey: “Hanaakady natang kukaam myand, naakady numvw kaakunying kavul menmen, ki hanaakady natungunuk ni kubal, naakady numvw teng bu neey Yehow ubuubukacil mu bikam bindiy. Bu munaakady nabal, naakady nafik ku kutwiishiibw neey Yehow waakady umvw meej moos manaakady nalang ni waakady uuyambulwiish.” Dyambulwiish dya kudy Yehow dya nook didy mwa kukukwanjok cikwaabw bwa kubatamij micim yiibuh teng ni hawumvumvw diitalal dya mu micim.—Mis. 119:143, 144.

YEHOW WIIYIIY KUKWAMBULWIISH

10. Haanyim ha myand tudy mwa kwiiyumvw bicy?

¹⁰ Lutat. Hady bwaal kaahand bubiih bwiitwaakaakish kaakunying bulongek, kudy mwa kwiiy mafuk makwaabw matudy mwa kwiiyumvw bakooy ni mu lungeny. Tudy mwa kwiiyumvw an bu muzab a mazab ma kut lubil mutahik waakady ut lubil bikasakan kaabaak yiy ki wend ni kutebel. Bidy mwa kwiitukasakeen bwa kulong myand yitwaakady baheehej kuuhal, eecy katwiin mwa kumvw bwa kulong myand yaakady yitusangej kuuhal. Teng bu Elih, tut byeet bidy mwa kwiitukasakeen bwiitut kubuuk, tukaam bituh neey twiikal teng balaal. (1 Bak. 19:​5-7) I biny bidy Yehow mulay bwa kulong hatwiiyumvumvw bakooyel?

11. Bilondeshel Misambw 94:​18, i mushind kaay mukwaabw udy Yehow wiitwambulwiish?

¹¹ Cidy Yehow ulong bwa kwiitwambulwiish. I  mulay bwa kwiitwambulwiish. (Bal Misambw 94:18.) Teng mudy muzab a mazab ma kut lubil mutahik ukaam bwa bamwambulwiish bwa kutungunukey ni lubil, tut byeet tudy mwa kukaam bwa kwiitwambulwiishobw bwiitut kutungunuk ni kukadil Yehow mudimw. Mu biisang bya naak, Yehow wiitujaajaadikil neey: “Nady [Yehow] Mawej iibuh. Nakukwaakwaat ku cikam, nakwambil ney: ‘Lek kuzakal, yaaw niiy nakukwanjok.’” (Ye. 41:13) Mukaleng Davih utadil mwaakady Mawej mumukwanjok. Haheteley makab ni haakadyey kuuhal kwa balwiish, wambiil Yehow neey: “Diikam diibuh dya ciiludy idiilam.” (Mis. 18:35, NWT) I mushind kaay udy Yehow wiitwambulwiish?

12. I banganyi bady Yehow ukal naab mudimw bwa kwiitwambulwiish hatudy bakooy?

¹² Yehow udyaakal wiitwambulwiish, asaasakey baat bakwaabw bwa kwiitwambulwiishobw. Cileejel, musang kaahand haakady Davih mukooyel mu mikon, mulund nend Jonatan uyiil kamutal bwa kumwambulwiish ni kumukashish ku micim. (1 Sam. 23:16, 17) Bya mushind aakaabumw, Yehow usungwiil Elizeh bwa kwambulwiishey Elih. (1 Bak. 19:16, 21; 2 Bak. 2:2) Leeloow, Yehow udy mwa kukal mudimw ni biin mu cisak, balund neet eecy bakul bwa kwiitwambulwiish. Ki hatudy ni kaakunying, tudy mwa kukaam bwa kwiikal kuleeh ni bakwaabw eecy kwiiyiikadil. Tukaakam bituh neey twiikal ha kaayeet. I mum mudyaakaleby bilongek. I biny bitudy mwa kulong bwa kuhet dyambulwiish dya Yehow?

13. Bikaam tulong biny bwa Yehow kwiitwambulwiishey? (Tal cikwaabw cifwaatul.)

¹³ Citudy mwa kulong. Iikashishomw bwa kulek kwiikosokel kaayeeb. Hatuhiihit kwiikosokel, lungeny lwiitut ludyaakal civul lushiikil, ni tutaatangng tengeng kulangil teng ha myyiitut myand yiitwendut ni yitutaatatameen. Kulang kwa nook kudy mwa kulong bwa twangat mahangadik mabiih. (Tus. 18:1) Biin-biin, tut boos tudyaakal bakat kwiikosokel kaayeet nang-nang hatudy ni myand yiitutond. Ki tut biikal tuhit kwiikosokel mutancy muleeh tut kaayeet, tudy mwa kukaakal ni mushind a kuhet dyambulwiish dya kudy baat bady Yehow usak bwa kwiitwambulwiish. Ning myand yiwudy muhet yiikal yikasakan menmen, iitab dyambulwiish dya kudy biin mu cisak ciibuh, dya balund neeb ni dya bakul. iIbatal bu baat bady—Yehow ukal naab mudimw bwa kukwambulwiish.—Tus. 17:17; Ye. 32:1, 2.

YEHOW WIIYIIY KUKUKASHISH KU MICIM

14. I biny bidy mwa kwiitulong mooy?

¹⁴ Lutat. kudy mwa kwiikal biisang bitudy mwa kumvw mooy. Mu Bibl, biin mudimw ba lulamat ba Mawej baleeleeb bwa biisang byaakadyobw  ni kaakunying ni haakadyobw bazakal bwa balwiish baababw ni bwa myand yikwaabw. (Mis. 18:4; 55:​1, 5) Bya mushind aakaabumw, tudy mwa kutwiilangan ni bulwiish mu kalaas, ku mudimw, mu cisak ciitut, eecy kudy mbul-matady. Tudy mwa kumvw cikwaabw mooy bwaal tudy mwa kwiiy kufw bwa lubeel. Mu biisang bya nook tudy mwa kwiiyumvw katuy ni diikand an bu mwaan mutofw. I mushind kaay udy Yehow wiitwambulwiish mu biisang bya naak?

15. Misambw 94:19 wiitujaajaadikil biny?

¹⁵ Cidy Yehow ulong bwa kwiitwambulwiish. Wiitukaakashish ku micim ni wiitwaakish diitalal. (Bal Misambw 94:19.) Musambw oow udy mwa kwiituvulwiij mwaan mutofw mwaan-mukaj umvumvw mooy ni ukaakal bwa kulaal tul bwa ciheeh cikasakan. Tudy mwa kufwanyikij mudy taat indiy wiiy kudyey umwangat mu mabok mindiy, umumbembelej teng ni haadyey ulaal tul. Ning mudy ciheeh cikasakan eecy citungunuk ni kutuut, kiishoh bend mwa kumvw cikwaabw mooy bwaal taat indiy imumwangat. Hatuheehet makab maloolong mooy, tudy mwa kukaam bwa Taat iitut a mu diiwul iitwangatok mu mabok mindiy teng ni hatuheehet diitalal dya mu micim. I mushind kaay utudy mwa kuhet dyambulwiish dya nook kudy Yehow?

16. I biny bitudy mwa kulong bwa Yehow kwiitukashish ku micim? (Tal cikwaabw cifwaatul.)

¹⁶ Citudy mwa kulong. Diib dyoos iikal wiisamb ni Yehow—mu masambil ni mu kubal kwa diiy dindiy. (Mis. 77:1, 12-14) Uw mwiikal ni ciibidil cya kulong nook, bwaal bwa kuuhal buwudy mwa kwiiy kulong hawudy ni kaakunying, i kulomb Taat iibuh a mu diiwul dyambulwiish. Ambil Yehow myand yoos yikuloolong mooy ni yidy yikutond. Mukun mat, ni lek akukashish ku micim kuhicil ku diiy dindiy. (Mis. 119:28) Kubal yimw mikand ya mu Bibl, kudy mwa kukukashish ku micim diib diwumvumvw mooy. Cileejel, udy mwa kuhet may makaakashish ku micim mu mukand a Yoobw, mu Misambw ni mu Tusumw kuteekeloh ni mu may ma Yeez mady mu Matewus shapitil 6. Uw usambil Yehow ni ubal Diiy dindiy, wiiyiiy kumvw mudyey ukukashish ku micim.

17. I kutwiishibw kaay kutudy mwa kwiikal naak?

¹⁷ Twiikalaay batwiishiibw neey, Yehow wiiyiiy kwiitwambulwiish tut batwiilangan ni biisang bikasakan. Katwaakwiikaloh bend kaayeet. (Mis. 23:4; 94:14) Yehow i mwiitulay bwa kwiitulam, kwiitwaakish diitalal, kwiitwambulwiish, ni kwiitukashish ku micim. Habitaatal Yehow, Yeshaay 26:3 [NWT] uleeleeb neey: “Wiiyiiy kulam aab boos bady ni mucim aakaabumw kuwudy, wiiyiiy wiibashikik talal bwaal i batakamin kuwudy.” Nook, takamin kudy Yehow ni long cyoos ciwudy mwa kulong bwa kukwambulwiishey. Uw mulong nook, wiiyiiy kuhet diikand mu biisang bikasakan.