MU BIISANG bifundilobw Bibl, muut uyaay kabakangan eecy cisak cindiy baakady batwaal buk mu cisak cya ba mukaj. Mu buk aamw mwaakady biit bya buseeb, nyam, eecy makut. Ciisang aacy, byaakady bilomb kukal mudimw muvul bwa kutwaal buk aabw, teng bu cilongel Jakobw, wiitabil bwa kukal mudimw umwaakishil taatend a Rashel mu mivw mwandamuteket bwa kumwaakishel Rashel bwa ashaal macimen indiy. (Kbwa. 29:17, 18, 20) Bwabiny baakady batwaal buk?

Carol Meyers udy mumanyik myand ya mu Bibl uleeleeb nook: “Batwaatwaal buk ku baamukaj, bu mwaakady balel bakadil mwaan aabab wa bakaj mudimw muvul, ni waakady wiibambulwiish mu cisak bwa midimw ya buseeb habitaatal myand ya madimy.” Baakady mwa kukal mudimw cikwaabw ni buk bwa kukashish bulund hakacy a bisak bidy byumvwangan bwa kulong maluw. Kuswiikakan kwa bisak eeby kudy mwa kulong bwa bahet mushind udyobw mwa kwambulwiishanganobw mu biisang bya makab. Bwaal bukwaabw budy neey: buk bwaakadyobw batwaal bwaakady bujaadik neey: mukaj i mwiitab maluw bwa kwaalukey mu bikam bya taat indiy bwa kuyey kudy mbayend.

Kutwaal buk kakwaakady kumvwiij neey: mukaj waakady ciit cyaakadyobw mwa kusumb eecy kulandish. Mukand wa mu Angleh: Ancient Israel​—Its Life and Institutions uleeleeb neey: “Bukenj bwa kutwaal makut oobw, eecy biit ha cyaab cya makut, mu cisak cya baamukaj, kwaakady kulong bwa cisak eecy cilong bwa maluw ma biin Izaleel mamweek bu maakady ciit cya kusumb. Bimweemweek neey: baakady bangat [buk] bu diifut ditwaal kwaabamukaj ni kiin mushing wa kusumb nend mukaj.”

Leeloow, mu bibunj bikwaabw, baat bacituutungunuk ni cilel cya kutwaal buk bwa kwangat mukaj. Hady balel biin Krist batung buk, biikaam “baleej mudyobw batalal myand kuuhal kwa baat boos” hakulek kutung bihak bikahit kuvul mu mushind uleeleej neey: kabiin ni meej malengel. (Fili. 4:5; 1 Kor. 10:32, 33) Mu mushind oow, baleeleej mudyobw kabay “bakat fwalang,” eecy biin lwiis lwa fwalang. (2 Tim. 3:2) Cikwaabw, hady balel biin Krist baleej mudyobw ni meej malengel hakulek kutung buk buhit kuvul, kabyaakukasakenoh bend sangiilum wiiyiiy kubak bwa kuleheshey ciisang cya kulong maluw hadyey ni biit bikumban bidyey mwa kutwaal ku buk budyobw bamulomb. Eecy sangiilum wiiyiiy kubak kakwiimanyikoh bend mudimw indiy a buuseb’ aa njil bwaal bimuloolomb bwa kwiikaley ni diib divul bwa kukaley mudimw indiy a bikam bwa kuhetey bihak bidyobw bamulomb bwa kutwaaley kwa baamukaj buk buhit kuvul budyobw bamulomb.

Mu bibunj bikwaabw, badyaakal ni mukenj udy baat mwa kulond bwa buk budy muut mwa kutwaal. Cyaab cidyobw bumb mukenj oow, Biin Krist bady ni cya kukooyel mikenj aay. Bwabiny tuleeleeb nook? Bwaal Diiy dya Mawej diloolomb biin Krist bwa ‘bakooyel kudy bakaleng ba mbul-matady’ ni bwa kukooyel mikenj yidy baat bumb yidy kayiy yilekangan ni mikenj ya Mawej.​—Rom 13:1; Yil. 5:29.