Bwa kukumbajobw mudimw aababw oow, byaakady bilomb balony ba Bibl bwa biikal ni mucim mukasakan. Byaakady bikaam biiy badiil balam-lam “musah mulengel,” ni ku “diifuk diiyiiy Mawej iitut kuhingijil balwiish cinding.”

Mwiin-kweet mwaan-mulum Hoskin, waakady mushikacil mu Kanadah, waakady mudiil balwiish musah ni mucim mukasakan. Mu mumvw a mashik mu 1921, uhetelangan ni pasteer wa mu citendeleel cya Metodist. Mwiin-kweet Hoskin utwaadijil kwiisamb nend uleeb neey: “Bikaam twiisambil bilengel a mifund, ning tut katuy tuhetangan ha myand kahand tudy mwa kutungunuk ni kuman mwiisamb iitut mu diitalal, ni kushaal balund.” Ki kabyaakady bilongek mwaakadyey ukaam. Mwiin-kweet Hoskin uleeleeb cikwaabw neey: “Twiisambil nend teng mu minit yikeeh ni yiy [pasteer] oow kutwaadijey kukushil bikasakan ku cibel, natadil neey: mween ya ku cibel cindiy yaakady mwa kutaayik.”

“Pasteer oow wambil mwiin-kweet Hoskin ni diiy dikasakan neey: bwabiny kwiin muy mukatal baat bakiish bamanyik Mawej ni kwiisamb naabw?” Mwiin-kweet Hoskin wiihooyel, ki haakadyey mwaaluk kwa pasteer, utadil neey: ‘cyaakadyoh bend niisamb ni mwiin Krist!’

Haakady pasteer wiiyij mu citand cindiy diifuk dilondel, waakady mutungunuk ni kulwiish mwiin-kweet Hoskin. “Waakady mwambil biin mu citand cindiy bwaal bwaam neey: nady muut mubiih.” Baakady bakaam kuuzuh, ki muleeleeb mwiin-kweet Hoskin. Myand yaakadyobw bamulongel yoos aay kayaakadyoh bend yimukooyesh mu mabok, kady waakady teng mutungunuk ni kudiil baat musah mulengel. Uleebel neey: “Naakady mukat kudiil baat musah cyaab aacy bikasakan. Umw wa ku baat aab, ukemen ni kuleebey neey: ‘Nady mumanyik neey: udy muut a Mawej!’ Ni banjoojel ning bady mwa kuyambulwiish ni biit binaakady nakaam.”

Bwa kwambulwiish baat bwa kumvwobw Bibl bilengel, balony ba Bibl baakady bahatul program wa kulong nend Bible mu cibij-bij cya Âge d’or. * Mwaakady majooj ma mu Bibl maakady matal basand maakady balel mwa kwiisambiloh ni baan baababw. Balel baakady mwa “kumb baan baababw majooj aama ni kwiibambulwiish bwa bahet cyaab cidyobw mwa kuhetel malabul aam mu Bibl.” Mamw ma ku majooj bu mudy: “Mu Bibl mudy mikand buuny kaay?” Malongweesh ma mu Bibl. Tal dyumw dya ku  malongweesh bu mudy eedy: “Mwiin Krist woos udy mwa kutwiilangan ni bulwiish mu mushind kahand eeny?” Malongweesh aam maakady malongolol baasand bwa kudiilobw baat musah ni mucim mukasakan.

Kwaakady program a myand yidy Mawej mulongolol waakadyobw bateek mu cibij-bij cya Âge d’or mulong kudy balony bashimat ba myand ya mu Bibl. Mwaakady majooj ni maalabul ma mu volim 1 wa mukand a Etudes des écritures. Baat bavul baakady babal bahetel musangal ku majooj ni maalabul ma program oow, ki cibij-bij cya Âge d’or 21/12/1921, cimanyishil neey: program yibidy eey kayaakady mwa kutungunuk. Bwabiny bishiitulukil musang umw nook?

Biin-kweet baakady balombol, batadil neey: byaakady bikaam balony ba Bibl bahyaabahy balong malongweesh matam ma mu Bibl. Bulekel bwa byoos, biiyil kuhatul mukand a Harp de Dieu mu suuny a 11/1921. Baat baakady bakat myand ya biin-biin, biitabil bwa kwiibalongweeshobw Bibl ku dyambulwiish dya mukand oow. Kwiilongel kwa mukand oow, kwaakady kwambulwiish baakady babal bwa kumanyik myand yidy “Mawej mulongolol bwa kubenesh baat ni kwiibakish buumy bwa mwendelel.” Byaakady mwa kulongek bicy?

Haakady muut wiitab mukand oow, waakady uhet mudimw a kubal muhatul ha kaalat kakeeh. Luming lwaakady lulond, waakady uhet kaalat ka majooj mashimatil ha mudimw indiy. Kaalat aak kaakady mwa kuh buseeb bwaakak, haakadyey mwa kuman mudimw indiy luming lwaakady lulond.

Luming loos lwa ku mbing 12, mulony woos waakady uhet kaalat kahyaakahy katum kudy cisumbw ciloolombol kalaas aak. Baakady bakish baat bakuluuh mu cisumbw twaalat oot eecy baakady kabay ni mushind a kudiil baat musah ku cibel ni ku cibel. Cileejel, Anna Gardner, wa mu Millvale mu provens a Pennsylvania, mu Étas-Unis d’Amerique. Uvulukil neey: “Baakady bangat mukand a Harp de Dieu, kwaakishobw yaay a mim Thayle, waakady ni lutat lwa kwend bilengel, ni uhetel mudimw muvul wa kulong, hakutum twaalat twa majooj ma kulong luming loos.” Haakady kalaas kah, baakady batum muut wa mu cisumbw bwa kwambulwiish mulony bwa kutungunukey ni kulong myand ya biin-biin.

Ku bulekel kwa muvw, Mwiin-kweet Joseph Rutherford waakady mutumin bisumbw byoos mukand. Uleejel neey: “mudimw a kudiil baat musah a Bukaleng ulongekel bikasakan ni mu mushind mulengel muvw oow, waakady muvw a kwaanun kwa mu spirit kukiish kwanj kulongekoh cikwaabw.” Halangiley bwa mafuk kuuhal, uleebel neey: “Kucidy teng mudimw muvul wa kulong. Ukashishil bakwaabw bwa kwiiditobw mu mudimw a Mawej oow uheehetesh musangal.” Biin-biin balony ba Bibl balongel teng muleebeley. Muvw a 1922 i muvw waakadyobw badiil baat musah a Bukaleng ni mucim mukasakan bishilangan ni kuuhal.