1. Bwabiny baat bavul bendend ni kwiikondakaj?

KUDY bitendeleel bivul leeloow biileeleej neey: i bya biin Krist ni badyomw baleeleeb neey: bahahambidil Mawej mu mushind umusaasangeej. Ki bwabiny, baat bavul bendend ni kwiikondakaj! Biiyihahanguj neey: “kudyok teng citendeleel cyaakaabumw cya biin-biin, eecy byoos bisaasangeej Mawej?” Tut Batemw ba Yehow tudyok batwiishiibw neey: tuloolongweesh myand ya biin-biin ni tuhambidil Yehow mu mushind udyey mukat eeny? Bidy mwa kwiikalok bilengel bwiitut kwiikal batwiishiibw bwa myand eey eeny? Tutalaayaak cijaadik.

2. Bilondeshel mukand a 1 Biin Tesalonik 1:5, bwabiny mupostol Pool waakady mutwiishiibw neey: udy mu myand ya biin-biin?

² Mupostol Pool waakady mutwiishiibw bikasakan bwa myand ya biin-biin. (Bal 1 Biin Tesalonik 1:5.) Kaakadyoh bend mwiiyitab bituh bwaal yaakady yimusangeej. Waakady ulong diiy dya Mawej bikasakan. Ni wiitabil neey: “Mukand a Mawej oow woos i mufund ni meej ma kudy Mawej.” (2 Tim. 3:16) I myand kaay yimanyikiley mu kulong kwindiy? Haakady Pool ubal diiy dya Mawej, uhetel cijaadik cya neey: Yeez waakady Mesih​—udyobw balay, cijaadik cyaakady bafumw ba bitendeleel biin Yuud baleek. Bafumw ba bitendeleel biin myand ya mush-mush aab bajaadikil neey: i bamanyik Mawej, ki myand yaakadyobw balong yileejel neey: kabiishoh bend bamumanyik. (Tiit 1:16) Ki Pool kaakadyoh bend bu baat aab, bwa kwiitab myand yikwaabw ya mu Bibl ni kulek yikwaabw. Waakady mwiihang bwa kulongweesh baat ni kwiibambil bwa kukooyelobw “myand yoos yidy Mawej mulongolol.”​—Yil. 20:27.

3. Bwiitut kwiikal batwiishibw bikasakan, bikaam tuhet teng maalabul ku majooj miitut moos eeny? (Tal cikwaabw kazubw ka neey: “ Biit bidy Yehow mulong ni meej​—‘I bivul bwa kwiibileeb byoos.’”)

 ³ Baat bavul balaalang neey: citendeleel cya biin-biin cidy ni mushind a kwaalabul majooj moos ning majooj mady Bibl kay mwaalabul. Ki mudyeby mwa kwiikal eeny? Twangat cileejel cya mupostol Pool. Waakady mukashish biin Krist bwa “bateet bwa kujingunun myand yoos,” ki waakady mwiitab cikwaabw neey: kwaakady myand yivul yaakadyey kay mwanj kumanyik. (1 Tes. 5:21) Pool ufundil neey: “bwaal myand yitudy bamanyik i yikeeh,” uleebel cikwaabw neey: “kaabaak biit bitutaatal bidy bu cifulabij cimweemweek bu mu lumween.” (1 Kor. 13:9, 12) Pool kaakadyoh bend mumanyik myand yoos; ning tut byeet katwiin bamanyik myand yoos. Ki Pool waakady mumanyik myand yitam yidy Yehow mulongolol. Waakady mutwiishiibw neey: myand yidyey mumanyik i ya biin-biin!

4. I mushind kaay utudy mwa kukashish diitabij diitut mu myand ya biin-biin yitudy bahet, ni twiiyiiy kutal myand kaay yitaatal biin Krist ba biin-biin?

⁴ Mushind utudy mwa kukashish diitabij diitut mu myand ya biin-biin yitudy bahet, i kufwanyikij mushind a kuhambidil uleejel Yeez ni mushind udy Batemw ba Yehow bahambidil leeloow. Mu ciin bwaal eecy, twiiyiiy kutal neey: biin Krist ba biin-biin 1) baleeleek kuhambidil kish, 2) baneeneemek diijin dya Yehow, 3) i bakat myand ya biin-biin, ni 4) i bakatangan menmen.

5. I biny bitudy mwa kulongel ku mushind mulengel waakady Yeez uhambidil Mawej, ni i mushind kaay utudy mwa kukooyel myand yidyey mulongweesh?

⁵ Bu mwaakadyey mukat Mawej bikasakan, Yeez waakady uhambidil teng Yehow kaayend, haakadyey mu diiwul ning ciisang  cyaakadyey ha bulab. (Luuk 4:8) Waakady mulongweesh biiyij bindiy bwa kulongobw bwaal bwaakaabumw oobw. Yeez kambiiloh bend biiyij bindiy ba lulamat aab bwa kukal mudimw ni kish mu kuhambidil kwaabab. Mawej kiish umweekoh bend, nook, muut ning waakaabumw kiish mwa kuhung ciit bwa kumufwanyikij nend! (Ye. 46:5) Ki, tudy mwa kuleeb bicy bwa kish yidyobw bahung ni baleeb neey: i yijilang eecy biyihambidil? Mu diiy diibiidy dya ku may diikumy, Yehow uleeleebomw neey: “Kwiish mwa kusong lukish, ning ciit kaay bwa kufwaanyikij naaby biit bidy mwiiwul . . . Kwiish mwa kwiilutwiil bin ning kwiiluhambidil.” (Cim. 20:4, 5) May aam i ma biin-biin kudy baat bady bakat kusangeej Mawej.

6. I mushind kaay wa kuhambidil udy Batemw ba Yehow balond leeloow?

⁶ Baat bady balong myand ya kal, i bamanyik neey: biin Krist ba mu siyekel a kuuhal, baakady bahambidil teng Mawej kaayend. Cileejel, mukand a mu angleh ubiibikanobw neey: History of the Christian Church ujaajaadik neey: biin Krist ba mu siyekel a kuuhal baakady “bakin kukal mudimw ni kish” mu byaab byaakadyobw bahambidil Mawej. Leeloow, Batemw ba Yehow baloolond cileej cya biin Krist ba mu siyekel a kuuhal. Katwiishoh bend tuhambidil kish ya baat “bajilang” eecy banjel; ni katwiinoh bend tuhambidil Yeez. Katwiin tuhambidil bimanyin, bu mudy drapoh eecy kumb musambw a cibunj. Ning bwaal kaay boos budy mwa kwiitufikil, tudy biiswiik bwa kukooyel may ma Yeez ma neey: “Bumbulukil teng Mawej.”​—Mat. 4:10.

7. I mu myand kaay mudy Batemw ba Yehow bashilangan ni bitendeleel bikwaabw?

⁷ Leeloow, baat bavul baloolond bafumw ba bitendeleel bya karism. Basaasangeel balongweesh aab, bady habwiih ni kwiibahambidil. Baat bavul bayaay mu bitendeleel byaabab, bibasumb mikand, ni baakish balombol ba bitendeleel aab fwalang yivul. Baat bakwaabw biitaatabakan myand yoos yidyobw biibambil. Bady ni musangal a kutal balongweesh aab bu neey: i batal Yeez! Ki bahambidil ba biin-biin, bahahambidil teng Yehow, kabiin balondoh bend muut. Cikwaabw, tuneeneemek biituloolombol, twiitaatab diiy dya Yeez dya neey: “Nun boos nudy baan ba kamuut.” (Mat. 23:8-10) Katwiinoh bend tuhambidil baat, ning balombol ba bitendeleel eecy balombol ba bidiidy. Ni katwiinoh bend tut myand ya bitendeleel byaab eecy ya cidiidy nyam ku mikon. Nook, katwiin tutweelakan mu myand ya cidiidy ni katwiinoh bend ba ha bulab. Nook, mu bwaal oobw, tudy bashiilangan ni bitendeleel bikwaabw biileeleeb neey: tudy biin Krist.​—Jah 18:36.

8. I mushind kaay utudy bamanyik neey: Yehow i mukat kutumbish diijin dindiy ni kwiidimanyikish baat bakwaabw?

⁸ Yeez usambidil neey: “A Taat, tumbish diijin diibuh.” Yehow kayend waalaabwiil mwiiwul mwah neey: namanyin kal ni kwiiditumbish. (Jah 12:28) Yeez utumbishil diijin dya Taat indiy mu mudimw indiy a bukajaady. (Jah 17:26) Nook, biin Krist ba biin-biin bady ni dyakatook dya kukal mudimw ni diijin dya Mawej ni kwiidimanyikish kudy baat bakwaabw.

9. I mushind kaay waakady biin Krist ba mu siyekel a kuuhal baleej neey: baakady baneemek diijin dya Mawej?

⁹ Mu siyekel a kuuhal H.Y., cisumbw cya biin Krist ciman kwiikalok, Yehow “waakady mutum micim kudy baat bakiish biin Yuud ku butambwiil bwa kunooneyoh baat bwa diijin dindiy.” (Yil. 15:14, NWT) Biin Krist ba mu siyekel a kuuhal baakady ni dyakatook dya kukal  mudimw ni diijin dya Mawej ni kwiidimanyikish kudy baat bakwaabw. Biin Krist aab baakady bakal mudimw ni diijin dya Mawej haakadyobw badiil baat musah mulengel ni haakadyobw bafund Bibl. * Baakady baleej mudyobw biikal baat bwa diijin dya Mawej.​—Yil. 2:14, 21.

10. I biny bitujaajaadikil neey: Batemw ba Yehow i baat bwa diijin dya Yehow?

¹⁰ Batemw ba Yehow bady mwa kwiikalok baat bwa diijin dya Yehow eeny? Tal cijaadik eecy. Leeloow, bafumw ba bitendeleel bivul, i balong mwaababw moos bwa kusokok diijin dya Mawej. I baful diijin dya Mawej mu Bibl yaababw yidyobw baalabul, ni kabiin biitab bwa kukal mudimw ni diijin dya Mawej mu bitendeleel byaababw. * Bimweemweek hatook neey: bady teng Batemw ba Yehow ki batuutumbish ni baneemek diijin dya Yehow eeny? Biin-biin Batemw ba Yehow ki baneeneemek diijin dya Yehow. Tumamanyikish bikasakan diijin dya Mawej bishiilangan ni bitendeleel bikwaabw! Mu bwaal oobw, tuloolong mwiitut moos bwa kwiikal ni shikacil mulengel uheehetangan ni diijin dya Batemw ba Yehow! (Ye. 43:10-12) Tudy bahatul Bible nkudimuinu wa Bulongolodi bupiabupia yihit ha miliyo 240 ukaakal mudimw ni diijin dya Yehow ha byaab bidyobw baful diijin eedy mu Bibl yikwaabw. Ni tuhaahatul mikand yumvumvwiij  Bibl yikaakal mudimw ni diijin dya Yehow mu bileebel bihit 1 000!

11. I mushind kaay udy biin Krist ba mu siyekel a kuuhal baleej mwaakadyobw bakat myand ya biin-biin?

¹¹ Yeez waakady mukat myand ya biin-biin, myand ya biin-biin eey, yitaatal Mawej ni myand yidyey mulongolol. Shikacil a Yeez waakady uhetangan ni myand ya biin-biin, ni waakady wambil baat bakwaabw myand ya biin-biin. (Jah 18:37) Biiyij ba biin-biin ba Yeez baakady bakat byaabw bikasakan myand ya biin-biin. (Jah 4:23, 24) Biin-biin, mupostol Pyeel uleebel neey: bukw-a-bwiin Krist bwiiyiiy “kutobolweesh myand ya biin-biin.” (2 Py. 2:2) Bu mwaakadyobw bakat bikasan myand ya biin-biin, biin Krist ba mu siyekel a kuuhal baakady balek malongweesh ma bitendeleel, bilel byaabab, ni meej maabab byaakady kabiy bihetangan ni myand ya biin-biin. (Kol. 2:8) Bya mushind aakaabumw, leeloow, biin Krist ba biin-biin ‘baloolong myand ya biin-biin,’ bwaal diitabij dyaababw ni shikacil aabab i bishimacil mu diiy dya Yehow.​—3 Jah 3, 4.

12. I biny biloolongek hady biin mu kasumbw kaludik batal neey: i bilengel kutookesh kumvw kwiitut kwa myand ya biin-biin, ni bwabiny baloolong naak?

¹² Baat ba Mawej leeloow, kabiin baleeb neey: i bumvw bilengel eecy i bamanyik myand yoos ya biin-biin. Misang yikwaabw, balongel bilem mu mushind udyobw bumvwiij malongweesh ma mu Bibl ni mu mushind udyobw balongolol myand mu cisumbw. Bwaal oobw kabwiish mwa kwiitukemesh. Bibl uleeleej hatook neey: baat ba Mawej biiyiiy kumanyik bilengel myand ya biin-biin bikeeh-bikeeh. (Kol. 1:9, 10) Yehow wendend usokolol myand ya biin-biin ku bikeeh ku bikeeh, bikaam twiikal batuukij teng ni mutwiikal mwa kumvw myand ya biin-biin bilengel. (Tus. 4:18) Hady kasumbw kaludik katal neey: kudy bwaal kahand bwa kutookesh habitaatal kumvw kwiitut, biibuloolongolol musang umw. Bafumw ba bitendeleel ba leel, bashiishiitulul malongweesh maabab bwa kusangeej baat ba mu bitendeleel byaabab eecy bwa kuyobw lutumb, ki, Batemw ba Yehow bashiishiitulul myand bwa kusangeej Mawej ni kumuhambidil mu mushind uleejel Yeez. (Jak 4:4) Katwiin tulongolol myand bwa kulond meej ma baat, ki, i bwa kumvw kulengel kutudy bahet mu diiy dya Mawej. Tudy bakat myand ya biin-biin!​—1 Tes. 2:3, 4.

13. I ciikadil kaay cya buseeb buvul cyaakady naacy biin Krist ba biin-biin? Ni i mushind kaay udy Batemw ba Yehow bicileej leeloow?

¹³ Bwa biikadil byoos bilengel byaakadyobw bamanyikil biin Krist ba mu cisumbw cya mu siyekel a kuuhal, ciikadil cyaakady ni buseeb buvul menmen i lukat. Yeez uleebel neey: “Binwiikal bakatangan,​—naak baat boos biiyiiy kumanyik ney, aash nudy biiyij ba mim.” (Jah 13:34, 35) Leeloow, Batemw ba Yehow bady ni musangal bwa mudyobw mu kaacyumw ni bakatangan ha bulab butuutul. Bishiilangan ni bulongolody bwa baat, kaacyumw kiitut ka baan ba kamuut, kakiin katal cibunj, ciseb ni bilel bidy naaby muut. Lukat lwiitut lumweemweek ciisang citudy mu bisangil, mu hwiil ni mu bihwiil. Kulong nook, kwiitujaajadikil neey: tuhaahambidil Yehow mu mushind umusaasangeej.

14. Bilondeshel mukand a Biin Kolos 3:12-14, i mushind kaay mulengel utudy mwa kuleejangan lus muut ni mukwaabw?

¹⁴ Diiy dya Mawej dituleeleej neey: “Katanganaay bikasakan muut ni mukwaabw.”  (1 Py. 4:8) Mushind utudy mwa kuleej lukat oolw, i hatufwiifwiilangan lus muut ni mukwaabw ni hatuvuuvulamin buyiil myand yibiih yidy bakwaabw bitulongel. Tukaakaam cikwaabw mishind yitudy mwa kwaakishangan biit ni kwiikal baakidil ba baat mu cisumbw, twaak ni baat bituloolongel myand yibiih. (Bal Biin Kolos 3:12-14.) Lukat lwa mushind oow, i cimanyin cya biin Krist ba biin-biin.

15. I mishind kaay yikwaabw yileeleej neey: tuloolond mushind a kuhambidil waakady nend biin Krist ba mu siyekel a kuuhal?

¹⁵ Tuloolond mushind a kuhambidil wa bwiin waakady nend biin Krist ba mu cisumbw cya mu siyekel a kuuhal. Cileejel, mu bulongolody bwiitut​—mudy: balombol biin lwend, bakul, ni bakwanjok ba mudimw​—teng mwaakadyobw balong kudy biin Krist ba mu siyekel a kuuhal. (Fili. 1:1; Tiit 1:5) Teng bu bab, tuneeneemek mikenj ya Yehow habitaatal kusangil ni maluw, cidy Bibl uleeb habitaatal kukal mudimw ni mash, ni hatulaalam cisumbw ha kwiihat bamulong a bibiih bady kabay baalabul micim, hakulond cileejel cya biin Krist ba mu cisumbw cya mu siyekel a kuuhal.​—Yil. 15:28, 29; 1 Kor. 5:11-13; 6:9, 10; Ebr. 13:4.

16. i biny bituloolongel ku diiy ditusaasangan mu mukand a Biin Efez 4:4-6?

¹⁶ Yeez uleejel neey: baat bavul biiyiiy kuleeb mudyobw biiyij bindiy, ki kabiinoh bend boos biikal biiyij ba biin-biin. (Mat. 7:21-23) Diiy dya Mawej dileebel kal neey: mu mafuk ma bulekel, baat buvul biiyiiy ‘kumweek ku mees kwa baat bu biitabij Mawej.’ (2 Tim. 3:1, 5) Cikwaabw, Bibl wiitwambambil neey: kudy “kwiitabij kwaakaabumw” kudy Mawej wiitabij.​—Bal Efez 4:4-6.

17. I bangany baloolond mu diikas dya Yeez leeloow ni bahambidil Mawej biin-biin?

¹⁷ I bangany bahahambidil Mawej biin-biin leeloow? Tudy bakontonon bwa kuhet bijaadik. Tudy batal mushind a kuhambidil waakady Yeez mulongweesh biiyij bindiy ni mushind waakady biin Krist ba kuuhal bahambidil. Kudy teng dyaalabul dyaakaabumw​—i Batemw ba Yehow baloolong nook. Tudy ni dyakatook ditam dya kwiikal mukacy mwa baat ba Yehow ni dya kumanyik myand ya biin-biin habitaatal Yehow ni myand yidyey mulongolol! Nook, tutuutungunuk ni kulam myand ya biin-biin yitudy bahet.