MU SIYEKEL a 7 K.K.Y., Asirih ushaadil cibunj citam cyaakady cikookesh ha bulab butuutul, “cyaakady cyeeyeleel baat ba mu Shipreh ba butamb butweetweelel diib mu Iran, ni musang mukwaabw bateekelok ni biin Ejipit,” badyobw balam majin maababw mu mazubw ma mu Grande Bretagne mwaakadyobw balamin biit bya myand ya kal. Niniiv waakady Cibunj citam cya ha bulab butuutul. Baat ba mu cibunj eecy baakady biiyumvw bwa hing yitam yaakadyomw yaakady yikemesh, byaab bilengel byeeh byaakadyobw badimin byaakudy, mazubw malengel meeh, ni mazubw ma kulamin mikand malengel. Myaak yaakadyobw bafund ku biman bya Niniiv wa kal yileeleej neey: teng bu bakaleng bakwaabw ba mu Asirih, Mukaleng Ashurbanipal waakady wiisaasul mwaakadyey “mukaleng a bulab butuutul.” Bimweekel neey: mu bukookesh bwindiy, kakwaakadyoh bend muut ning waakaabumw waakady mwa kucimun cibunj cya Asirih ni Niniiv.

Ki, haakady Asirih mushaal bukaleng bwa bukash buvul, Yehow wambiil muprofet Sefaniyah neey: ‘[Yehow] uyaay . . . kabutul bulab bwa Asirih; ushiy Niniiv bulab buum cyolokot, bu mu cyanganyik.’ Wambiil cikwaabw muprofet Nahum neey: “Hawulaay or hawulaay ni arjah! . . . Bahawiil cibunj, bangat biit, baanyangakany bikwaabw! . . . Boos biiyiiy kukutal biiyiiy kukuy lubil. Biiyiiy kuleeb neey: ‘Niniiv ubaafw kubaah!’” (Sef 2:13; Nah. 2:9, 10; 3:7, NWT.) Hakumvw may ma ciprofet aam baat bady mwa kwiiyihanguj neey: ‘Bwaal oobw bwaakady mwa kulongek cya biin eeny? Baakady mwa kucimun cibunj cya Asirih eeny?’ Bimweekel neey: baat kabaakadyoh bend biitabij bwaal oobw.

Ning nook, baakady bamucimun! Ku bulekel kwa siyekel a 7 K.K.Y., baakady bacimun Asirih kudy biin Babiloon ni biin Meed. Hahicil mafuk, Niniiv ushaadil mund mutuh ni baat kabaakady mwa Kuvulukoh bend cibunj eecy! “Mukacy mwa Mivw Yivul,” biit bya myand ya kal bidyobw balamin mu tawuny udy mu New York, bileeleej neey: “cyaab cyaakady Niniiv cishaadil mund mutuh ni kaciciinok, ni baat i bamanyik Niniiv teng ku dyambulwiish dya Bibl.” Sosiyeteh wa baloolong myand ya biit byumvumvwiij myand ya mu Bibl bidyobw bakalul mu bulab, utwaadijil mu muvw a 1 800, uleeleeb neey: “muut ning waakaabumw kiin mumanyikoh bend cibunj citam cya Asirih cyaakadyok biin-biin.” Ki mu muvw a 1845, mukalul a biit bya mu bulab Austen Henry Layard ukemen bwa bikul bya Niniiv. Bikul byaakadyobw basangan byaakady bileej neey: Niniiv waakady cimeng cilengel menmen.

Kukumban kwa biin-biin kwa may ma ciprofet mataatal Niniiv kwiitukaakashish bwa kwiitabij malay ma mu Bibl miikal mwa kukumban bwa kubutul kwa makaleng ma cidiidy ma bukash madyok leeloow.​—Dan. 2:44; Yis. 19:15, 19-21.