1. I diijooj kaay ditudy mwa kwiiyihanguj?

UKAADY mutatok ni micim hawulaalangil ha myand yiikal mwa kulongek kuuhal ook bu mudy:​—kubutuk kwa bitendeleel bya makos, kulwiish kwa Kok wa mu bulab bwa Makok, ni bwa diivit dya Armakedon? Ukaady mwiiyihagujok neey: ‘Iikal ciisang aacy mwa kufik, niikaakal mukumban bwa kutaatameen myand yumvumvwiij mooy ni kulam mucim aam mutook eeny?’ Iikaleby neey: udy ni myand eey mu meej, twiiyiiy kwiisambil ha may ma Yeez madyobw bateel mu verseh wa ciin bwaal eecy, ni miiyiiy kukwambulwiish menmen. Yeez wambiil biiyij bindiy neey: “Kanuzakalaay bend. Iitabijaay.” (Jah 14:1) Diitabij dikasakan diiyiiy kwiitwambulwiish bwa kutaatameen myand yiikal mwa kulongek kuuhal ook.

2. I mushind kaay utudy mwa kukashish diitabij diitut, ni i biny bitwiiyiiy kukontonon mu ciin bwaal eecy?

² Tudy mwa kukashish diitabij diitut bwa kutaatameen makab maciiyiiy kuuhal hatukookontonon mushind utuleeleej diitabij diitut bwa mateet matuheehet leel oow. Hatulaalangil ha mushind utuloolong myand leel oow hatuheehet mateet, biikaam tumanyik neey i mu myand kaay yitudy mwa kukashish diitabij diitut. Ciisang cyoos citutaatatameen diiteet, diitabij diitut diikaakasakan. Kulong nook, kwiiyiiy kwiitwambulwiish bwa kutaatameen makab miikal mwa kwiiy kuuhal. Mu ciin bwaal eecy, twiiyiiy kutal myand yinaay yaakady biiyij ba Yeez batal neey: byaakady bikaam bavudij diitabij dyaababw. Twiiyiiy kukontonon mushind utudy mwa kuhit bilengel ni makab maakaabumw aam ni mushind udyem mwa kwiitulongolol bwa makab matwiikal mwa kuhet mafuk maciiyiiy.

3. Teng mudyeby bileej mu Matewus 6:30, 33, i bwaal kaay budy Yeez mutookesh butaatal diitabij?

³ I bilengel bwa fumw a cisak akaamin mukaj ni baan byaakudy, bizang ni cyaab cya kulaal. Kabiishoh bend biheehel bwa kulong  nook mu biisang bikasakan eeby. Mu byaab bikwaabw, biin kwiitabij neet bady mwa kwiikal bajimbaj mudimw waakadyobw balong, ning mudyobw biikashishomw bwa kulong mudimw bikasakan, kabiin ni mushind wa kuhetobw mudimw mukwaabw. Bakwaabw i balek mudimw udy kay uhetangan ni miitabij ma biin Krist. Mu myand yoos eey: bikaam tukashish diitabij diitut didy Yehow mwa kutal neey: ki didy cisak ciitut mwa kwiikal naady. Yeez waakady mutookeshel biiyij bindiy bwaal oobw mu mwiisamb ulongeley ha mulund. (Bal Matewus 6:30, 33.) Tut biikal batwiishibw neey: Yehow kakwiitulekoh bend, twiiyiiy kutum meej miitut​—ku myand ya Bukaleng. Tut batal mushind udy Yehow wiitwambulwiish ni biit bitukaakaam, twiiyiiy kumutal mudyey muut a biin-biin ni diitabij diitut dikaakasakan.

4-5. I biny byaakady byambulwiish cisak kahand mwa kuhit bilengel ni lutat lwa biit bya ku nyeet byaakadyobw naaby dikeng?

⁴ Tutalaay mwaakady Yehow mwambulwiish cisak cya mu Venezuela cyaakady citat bwa kuhet biit bya ku nyeet. Ciisang cikwaabw, cisak cya mwiin-kweet Castro cyaakady ni shikacil muheehel haakadyobw bakadil mudimw mu ferm waababw. Haanyim, cisumbw cya bakank ciiyil kuhawul biit byaababw byoos ni kusakobw cisak eecy bwa cyaaluk ha cyaab aacy. Taat Miguel, uleeleeb neey: “Kaabaak tudiidimin an ha ka cyaab kakeeh kadyobw bitwiisombej. Diifuk dyoos naakady nasambil Yehow bwa kwiitwambulwiishey ni biit bitwaakady tukaam bwa diifuk aady.” Shikacil wiiyil kukasakeen cisak eecy, ki bu mwaakadyobw ni diitabij divul kudy Taat udy ni lukat, utaatat bwa bitukaakaam diib dyoos, cisak cya taat Castro citweetweel mu bisangil ha ciibidil ni ciloolong mudimw a kudiil baat musah. Biin mu cisak aab, bateeteek myand ya Bukaleng ha cyaab cya kuuhal mu shikacil aababw, ni Yehow wiibakuukumbajil bikaakaamobw.

⁵ Mu makab maababw, Miguel ni mukaj indiy Yurai, baakady beyeelel Yehow bwa mushind waakadyey mwiibambulwiish. Hahicil mafuk, Yehow ukadil mudimw ni biin Krist bwa kwambulwiishobw Miguel ni biit byaakadyey naaby dikeng ni bwa kuhetey mudimw a bikam mukumban. Mu biisang bikwaabw, Yehow umwambulwiishil ni biit byaakadyey ukaam menmen ku dyambulwiish dya biro bya Filiyal. Yehow kaakadyoh bend mwiibalek. Bu cihet, iibatal mudy cisak cyaababw ciiy kukasakan mu diitabij. Haanyim aababw baman kulond mudy Yehow mwiibambulwiish, mwaan aababw mukuluuh Yoselin, uleeleeb neey: “Biteeteng ku micim bwa kutal mudy Yehow wiitwambulwiish menmen. Niitaatab neey: i yiy mulund unady mwa kuteekel micim.” Uleeleeb cikwaabw neey: “Mateet matudy bahet mu cisak ciitut i miitulongolol bwa kutaatameen mateet makasakan miikal mwa kwiiy mu mafuk ma ciiyiiy kuuhal.”

6. I mushind kaay uwudy mwa kukashish diitabij diibuh hawudy ni lutat lwa fwalang?

⁶ Udyok ni lutat lwa myand ya fwalang eeny? Biby biikal naak, i ciisang cikasakan bwiibuh. Nook, bu muwutaatat, udy mwa kukashish diitabij diibuh. Sambil bikasan ni bal may ma Yeez mady mu mukand a Matewus 6:25-34 ni ulangiloh. Tutalaay bileejel bya baat ba mafuk miitut aam bileeleej mudy Yehow  wambulwiish baat bady ni bivul bya kulong mu mudimw indiy. (1 Kor. 15:58) Hawuloolong nook, wiiyiiy kuteekel Taat iibuh wa mu diiwul micim bikasakan, bwaal i yiy udy mwambulwiish bakwaabw mu shikacil yaakaabumw eey, ni wiiyiiy kukwambulwiish byeeb. I mumanyik biwukaakaam ni i mumanyik mushind a kukwambulwiish. Uw mutal mudy Yehow mukwambulwiish mu shikacil iibuh, diitabij diibuh diiyiiy kukasakan bwiibuh kutaatameen mateet maciiyiiy.​—Hab. 3:17, 18.

7. Bilondeshel Matewus 8:23-26, i mushind kaay waakady “ciheeh cikasakan” citeet diitabij dya biiyij ?

⁷ Haakady Yeez ni biiyij bindiy biikal mu ciheeh cikasakan, Yeez ukadil mudimw ni bwaal oobw bwa kwiibambulwiish bwa bamanyik neey: kudy myand yikwaabw yikaakaam bwa bakashish diitabij dyaababw. (Bal Matewus 8:23-26.) Haakady ciheeh cikasakan cijukil hiiwul a mwanz ni mavuk ma mwanz miikushil ku bwaat, Yeez waakady teng mulaal. Haakady biiyij bindiy bumvw mooy bamubushil ni kumulombobw bwa iibakuuloh, Mukaleng wiibaalabwiil neey: “Bwabingany nudy ni mooy nook? A biin diitabij dikeeh!” Biiyij baakady ni mooy, biiyiil kwiitabij neey: Yehow waakady ni bukash bwa kulam Yeez ni boos baakadyey naabw ku bwaal bubiih bwaakady mwa kwiibalongekel. Tudy batal dilongweesh ditudy mwa kulond eeny? Diitabij dikasakan didy mwa kwiitwambulwiish bwa kutaatameen ciheeh cikasakan eeny lutat lutudy mwa kufwanyikij ni “ciheeh cikasakan.”

8-9. I mushind kaay waakadyobw bateet diitabij dya Anel, ni i biny byaakady bimwambulwiish?

⁸ Tal mudy Anel, sangiikaj ucidy mujik wa mu Puerto Rico, muleej diitabij dikasakan haakadyey mutaatameen diiteet dikasakan. Diiteet dindiy dyaakady “ciheeh cikasakan” citudy bamanyik. Diiteet eedy ditwaadijil mu muvw a 2017 haakady ciheeh cikasakan cya Maria cibukul nzubw indiy. Bu cihet cya ku ciheeh cikasakan eecy, ujimbajil mudimw indiy. “Anel uleeleeb neey: mu mafuk ma makab aam, naakady teng ni kakunying,” ki “nalongel mushind a kuteekel Yehow micim mu diisambil cyaakadyoh bend mwa kulek kwaabakan ni micim kuukaakeesh mwa kulek kulong myand inaakady mwa kulong.”

⁹ Anel uleeleeb neey: kulond may ma Mawej i bwaal bukwaabw bwaakady bumwambulwiish bwa kuhit bilengel ni makab​—. Uleeleeb neey: “Kulond may ma bulongolody ikuyambulwiish bwa mim kubatamij micim mund. Natadil neey: Yehow i muyambulwiish hakadiley mudimw ni baan-beet baan-balum ni baan-bakaj ba mu spirit baakady baakashish ni baayakish biit binaakady naaby dikeng.” Uleeleeb cikwaabw neey: “Yehow i muuyakish biit bihitok binaakady mumulomb, ni diitabij dyaamim dikasakeen menmen.”

10. I biny biwudy mwa kulong uw utaatameen “ciheeh cikasakan?”

¹⁰ Ulwaalook byeeb diivit ni “ciheeh cikasakan” eecy mu shikacil iibuh eeny? Bidy mwa kwiikal makab mawumomon makaamish kudy cihuh kahand. Eecy cidy mwa kwiikal ciheeh cya mu cimfwany, bu mudy lubeel lukasakan ludy mwa kukukooyesh mu mabok ni kuy mumanyik  cya kulong. Udy mwa kwaabakan misang yikwaabw, kady kulekoh bend kwaabakan kwiibuh kukulekeesh bwa kuteekel Yehow micim. Fweej kudyey hakumusambil. Kashish diitabij diibuh hawulaalangil ha myand yikaady Yehow mukulongel. (Mus. 77:11, 12) Iikal mutwiishiibw neey: Yehow kakukulekoh bend​—ning bicy.

11. Bwabiny bikaam twiiswiik bwa kukooyel may ma baat bituloolombol?

¹¹ I biny bikwaabw bidy mwa kukwambulwiish bwa kutaatameen makab? Teng mukaady Anel mwiibileej, lond may ma Mawej. Teek micim yiibuh kudy baat bady Yehow ni Yeez bateekel micim. Hady mafuk mahit, baat badyobw bateek bwa kwiitulombol bady mwa kwiitulombol mu mushind utudy batal neey: kiin mukumban. Ki hatwiibakookooyel, Yehow wiiyiiy wiitufiil kis. Tudy bamanyik neey: i ku diiy dindiy ni ku bileejel bya biin mudimw balulamat bileeleej neey: kukooyel ku may ma Mawej kukuukuuloh baat. (Cim. 14:1-4; 2 Cif. 20:17) Langil ha bileejel eeby. Kulong nook kwiiyiiy kukukashish bwiibuh kulond may ma bulongolody teng kaabaak ni mafuk miiyiiy. (Ebr. 13:17) Kwiikaloh bend ni kabingil kakuciin ciheeh cikasakan, cikaady hakulongek mu kalung kakeeh oomw.​—Tus. 3:25.

12. I dyumvwangan kaay didy Luuk 18:1-8 utwaal habitaatal kwiikal ni diitabij ni kutaatameen myand yibiih yituloolongelobw?

¹² Yeez waakady mumanyik neey: biiyij bindiy biiyiiy kukab bwa myand yibiih yiikalobw mwa kwiibalongel. Bwa kwiibambulwiishey bwa kutatameen, waakady mwiibakish cileejel cidy mu mukand a Luuk. Yeez ulondel kasumw ka mukaj a mulufwiil waakady udidil zuj mubiih bwa hakosol cilumbw cindiy mu mushind muwaakan. Waakady mutwiishibw neey: zuj aaw waakady mwa kumwambulwiish yiy mutungunuk teng ni kumulomb. Kuunyim kwa mafuk, zuj oow wiiyiil kukosol cilumbw cindiy. I dilongweesh kaay kutudy? Yehow kiin ulongelanganoh bend myand yibiih. Ki bwabiny Yeez uleebel neey: “Ki Mawej kiish mwa kukosol bilumbw bya baat badyey munoonoh, bamudiididil bufuk ni munyiny eeny? “ (Bal Luuk 18:1-8.) Cikwaabw Yeez uleebel neey: “Ki biiyok Mwaan a muut, wiiyiiy kutaan biitaatabij ha bulab eeny?” Hatukaakab bwa mal madyobw bitumweesh, tuleeleej mutudy batuukij ni hatututungunuk ni kuleej diitabij dikasakan bu dya mukaj a mulufwiil. Ni diitabij dya nook, tudy batwiishibw neey: kutootoot eecy kundandand Yehow wiiyiiy teng kwiitwaambulwiish. Tukaakaam cikwaabw kwiitab bukash budy naabw diisambil. Misang yikwaabw, biiyiiy kwaalabul masambil miitut mu mushind utudy katuy batakamin.

13. I mushind kaay waakady diisambil dyambulwiish cisak kahand cyaakadyobw bakabish?

¹³ Twangat cileejel cya Vero, udy mushikacil mu cibunj cya Kong. Vero, mwiin mbaayend ukiish Temw, ni mwaan aabab sangiikaj waakady ni mivw 15, baakady mwa kwaaluk mu musok waakadyobw biiy kulwiish kudy basalaay. Mukacy mwa njil, biin cisak aab bafikil ha cyaab cyaakady basalaay biimanyikil baat ni basalaay aab, kutwaadijobw kwiibalwiish bwa kwiibazuh. Haakady Vero mutwaadij kudil, sangiikaj  indiy umwiihooyejel wend usambil ni diiy dikasakan wend uteel diijin Yehow ni wend ni kwiidyambulul mu diisambil. Hamanyiney kusambil kamand ka basalaay umujoojel neey: “Uw sangiikaj, i ngany udy mukulongweesh bwa kusambil?” Sangiikaj umwaalabwiil neey: “Maam ki udy mulongweesh, udyaakal ukal mudimw ni cileejel citusaasangan mu mukand a Matewus 6:9-13.” Kamand ka basalaay uleebel neey: “Sangiikaj, ndaak ni balel biibuh mu diitalal, ni Yehow Mawej iinun iinulam!”

14. I biny bidy mwa kuteet diitabij diitut, ni i biny biikal mwa kwiitwambulwiish bwa kutaatameen?

¹⁴ Bileejel eeby bituloolongweesh bwa kulek kulengulul buseeb budy naabw diisambil. Ki uw mutal neey: kabiish baalabul lwang-lwang masambil miibuh, udy mwa kulong bicy? Teng bu mukaj a mulufwiil wa mu kasumw ka Yeez, tungunuk ni kusambil, takamin neey: Mawej iitut kiin ukulekoh bend ni wiiyiiy kwaalabul masambil miibuh mu ciisang kahand. Tungunuk ni kulomb Yehow spirit indiy mujilang. (Fili. 4:13) Vuluk neey: mu kalung kakeeh oomw Yehow wiiyiiy ukufiil kis muvul ni kwaakuvulukoh bend makeng ma kal. Bu muwutaataatameen mateet ni lulamat ku dyambulwiish dya Yehow, wiiyiiy kuhet bukash bwa kutaatamen miiyiiy kuuhal.​—1 Py. 1:6, 7.

15. Teng mudyeby bileej mu mukand a Matewus 17:19, 20, i makab kaay maakady biiyij ba Yeez batwiilangan naam?

¹⁵ Yeez ulongeshel biiyij bindiy neey: diitabij diiyiiy kwiibambulwiish bwa bab kuhit bilengel ni makab. (Bad Matewus 17:19, 20.) Cileejel, kabaakadyoh bend ni bukash bwa kuful naabw muut demoh, ning mwaakadyobw balong naak mu biisang bikwaabw. Bwa biny kabalongeloh bend naak aah? Yeez umvwiijil neey: byaakady bikaam bavudij diitabij dyaababw. Wiibambiil neey: bab biikal ni diitabij dikumban baakady mwa kuful diilund didy bu cihumbish! Leel oow, tut byeet tudy mwa kutwiilangan ni makab mamweemweek neey: imakasakan bwiitut kwiimataatameen.

16. I mushind kaay waakady diitabij dyambulwiish Geydi haanyim a bab baman kuzuh mbaayend?

¹⁶ Tal cileejel cya mwiin-kweet mwaan-mukaj Geydi, wa mu Guatemala. Baakady bazuh mbaayend Edi, haakadyobw baaluk mu bisangil batal kwaababw. I mushind kaay waakady diitabij dya Geydi dimwambulwiish bwa kutaatameen ning mwaakadyey ni kakunying kavul? Uleeleeb neey: “diisambil dyaakady diyambulwiish bwa kutuudil Yehow bujit budy buuneemen, ni i diishikik talal. Nady mutal mudy Yehow uyambulwiish ku dyambulwiish dya cisak cyaam ni balund naany mu cisumbw. Kwiikal ni bivul bya kulong mu mudimw a Yehow kukeekeehesh kakunying kaam ni kuyambulwiish bwa kulek kwaabakan bikasakan bwa myand yiikal mwa kulongek muucyaaw. Ku bwaal oobw nady muhetelok dilongweesh dilengel dya neey: ning mim mwa kuhet mateet ma mushind kaay mu mafuk miiyiiy, niiyiiy kwiimataatameen kudyambulwiish dya Yehow, dya Yeez ni dya bulongolody bwindiy.”

17. I biny bitudy mwa kulong hatutwiitwiilangan ni makab makasakan mady bu diilund?

¹⁷ Udy mufwiishok muut uwudy mukat menmen eeny? Kashish diitabij diibuh mu kutakamin  kwa kusanguk hakubal miisamb ya mu Bibl ya baat baakadyobw babuush ku lufw hakal. Udyok ni kakunying bwaal i biihat mwiin mu cisak ciinun mu cisumbw eeny? Long bwa wiijadikil neey: ki mushind mulengel udy Mawej utwaal dinyook. Ning bwaal kaay boos mwa kukufikil, i butal bu mushind mulengel wa kukashish diitabij diibuh. Ambil Yehow myand yoos yidy mu micim mwiibuh. Lek kwiiyikadil, ki iikal habwiih ni baan-been baan-balum ni baan-bakaj. Tus. 18:1) Long myand yiikal mwa kukwambulwiish bwa kutaatameen, ning uw udil bwa myand yaakady yikufikil. (Mis. 126:5, 6) Tungunuk ni kuy mu bisangil, kudiil baat musah, ni kwiilongel Bibl. Ni tum meej miibuh ku mabenesh malengel mady Yehow mukulongolweel kuuhal ook. Bu muwutaatal mudy Yehow ukwambulwiish, diitabij diibuh diiyiiy kukasakan menmen.

18. Uw mutal neey: diitabij diibuh dikaady dikooyel, i biny biwudy mwa kulong?

¹⁸ Iikal mateet mawudy naam leel eecy ma kal, makooyesh diitabij diibuh, kukooyeloh bend mu mabok. Tal bwaal oobw bu mushind uwudy mwa kukashish diitabij diibuh. Lomb dyambulwiish kudy Yeez, teng bu mwaakady bapostol bindiy bamulomb haleebelobw neey : “Iituvudijilok micim ya kwiitabij.” (Luuk 17:5) Cikwaabw, langil ha bileejel bitubiisambil mu ciin bwaal eecy. Teng bu Miguel ni Yurai, vuluk misang yoos yidy Yehow mukwambulwiish. Teng bu sangikaj a Vero ni Anel, iikal usambil Yehow ni mucim woos, nang-nang hawudy kuuhal kwa makab makasakan. Teng bu Geydi, manyik neey: Yehow udy mwa kukwambulwiish ni biit biwukaakaam ku dyambulwiish dya biin mu cisak eecy balund. Hawuloolomb Yehow dyambulwiish bwa kuhit bilengel ni makab mawutwiitwiilangan naam leeloow, wiiyiiy kumuteekel micim ni mumanyik neey: wiiyiiy ukwambulwiish bwa kutaatameen makab ning ma bicy mawiikal mwa kutwiilangan naam mu mafuk kuuhal.

19. Yeez waakady mutwiishibw bwa bwaal kaay, ni uw byeeb udy mwa kwiikal mutwiishibw bwa bwaal kaay?

¹⁹ Yeez uleejel myand yaakady yikaam bwa biiyij bindiy bavudij diitabij, ki waakady mutwiishibw neey: Yehow wiiyiiy wiibambulwiish bwa kuhit bilengel ni makab miikalobw mwa kutwiilangan naam mu mafuk miiyiiy kuuhal. (Jah 14:1; 16:33) Waakady mutwiishibw cikwaabw neey: diitabij dikasakan dyaakady mwa kwiiy kwambulwiish baat bavul beeh bwa kushaalobw ni buumy hakiiy mal miimiin meeh. (Yis. 7:9, 14) Wiiyiiy kwiikalok mukacy mwa baat aab eeny? Ku bukish bwa Yehow wiikaakal byeeb mu baat aab, uw ulong bwaal boos buwudy mwa kulong kaabaak bwa kukashish diitabij diibuh!​—Ebr. 10:39.