1-2. a) Bwabiny bikaam biin maluw bahyaabahy bateekel Yehow micim? (Musambw 37:3, 4) b) I biny bitwiiyiiy kukontonon mu ciin bwaal eecy?

UKAADY habwiih ni kutweel mu maluw eeny, eecy udy mwiin maluw muhyaamuhy? Iikaleby neey bidy naak, ukaakaam kwiikal biin-biin ni shikacil a musangal ni muut uwudy mukat menmen. Cya biin, shikacil a mu maluw kiishoh bend muheehel. Ni kudy mahangadik ma buseeb mawudy mwa kwangat. Mushind unudy mwa kuhit ni makab ni mahangadik manudy mwa kwiiy kwangat bwa musangal iinun mady ni cidyem mwa kulongel shikacil iinun a mu maluw mu mivw yivul. Uw muteekel Yehow micim, wiiyiiy kwangat mahangadik ma meej, nwiiyiiy kukashish shikacil iinun a mu maluw, ni nwiiyiiy kwiikal ni musangal muvul mu maluw miinun. Nun balek kukooyel diiy dya Mawej, nwiiyiiy kuhet makab mady mwa kwiinufikij ku dyakaby ni kanwaakwiikaloh bend ni musangal.​—Bal Musambw 37:3, 4.

² Mu ciin bwaal eecy, twiiyiiy kwiisambil nang-nang ha myand yitaatal biin maluw bahyaabahy, twiiyiiy kwiisambil cikwaabw ha makab mady biin maluw boos mwa kuhet. Twiiyiiy kwiisambil nang-nang ha malongweesh matudy mwa kuhetel ku bileejel bya baan-balum ni baan-bakaj ba lulamat badyobw bateel mu Bibl. Bileejel bya baat ba mu Bibl aab, bidy mwa kwiitwaakish malongweesh matudy mwa kulond mu myand yishil-shilangan ya mu shikacil, ni mu maluw. Twiiyiiy kutal kabidy malongweesh matudy mwa kuhetel kudy biin maluw ba leeloow ba lulamat.

3-4. I makab kaay mady biin maluw bahyaabahy mwa kuhet?

³ Baat bakwaabw bady mwa kukashish biin maluw bahyaabahy bwa kwiikalobw ni shikacil mulengel. Cileejel, balel ni baan  baabw bakwaabw, bady mwa kusak biin maluw bahyaabahy bwa kulelobw baan teng hacidyobw batweedyeloh mu maluw. Eecy balund ba mucim mulengel ni biin cisak bakwaabw, bady mwa kwambil biin maluw bahyaabahy bwa kusumbobw nzubw ni kumwiiwiijobw ni biit bilengel.

⁴ Hiikal biin maluw kabay badimuk, bady mwa kwangat mahangadik mady mwa kwiibalongel bibiih ni kushaalobw bakady’a mabanz. Nook, biin maluw bahyaabahy aab, bady mwa kukal mudimw diib divul bwa kuhetobw mushind a kufut mabanz. Mudimw a bikam oow, udy mwa kwiibangat diib divul didy mwa kwiibakaakadish bwa kwiikalobw biilongel Bibl, kulong kuhambidil kwa mu cisak, ni bwa kuyobw mu mudimw a bukajaady. Biin maluw bady mwa kukaakal bisangil hadyobw bahitij diib divul ku mudimw aabab wa bikam bwa kuhetobw fwalang eecy bwa kumulam. Bu cihet, kabakwiikaloh bend ni bivul bya kulong mu mudimw a Yehow ni kuhetobw musangal a mudimw oow.

5. I biny biwudy mulongel ku cileejel cya Klaus ni Marisa?

⁵ Bileejel bivul bileeleej neey: kutum meej teng ku kukaam kwa bihak, kakwiin kutwaaloh bend musangal mu shikacil. Tutalaay cidy biin maluw babidy aab, Klaus ni Marisa balongel ku bwaal oobw. * Hacyaakadyobw batweedyeloh mu maluw, baakady bahitij diib divul ku midimw ya bikam yaakadyobw balong bwa kwiikalobw ni shikacil mulengel. Ki, kabaheteloh bend musangal a biin-biin. Klaus uleeleeb neey: “Twaakady tukaam bikasakan biit bya ku nyeet, ki mu myand ya mu spirit, katwaakadyoh bend ni biihacil. Biin-biin, shikacil iitut waakady mukondakany ni katwaakadyoh bend ni musangal.” Misang yikwaabw, uw byeeb ukaady mutaloh neey: kwiihacil bihak bya mu shikacil kakwiin kutwaal musangal. Biby naak, kukooyeloh bend mu mabok. Tutalaayaak bileejel bilengel bya baat bakwaabw ba mu Bibl, bidy mwa kwiinwambulwiish mu bwaal oobw. Cya kuuhal, tukontononaay cidy baan-balum mwa kulongel ku cileejel cishiy kudy Mukaleng Yozafat.

6. Mu kuhetangan ni mubel udy mu mukand a Tusumw 3:5, 6, i makab kaay mavul mahetel Mukaleng Yozafat?

⁶ Nun baan-balum, nudy mwa kwiikal bakaakal bwa kukumbaj majit miinun eeny? Iikaleby naak, nudy mwa kulongel ku cileejel cya Mukaleng Yozafat. Bu mwaakady Yozafat mukaleng, waakady ni buneemat bwa kulam baat boos! I biny bilongeley bwa kukumbaj bujit butam oobw? Yozafat ulongel cyoos cyaakadyey mwa kulong bwa kulam baat baakadyey ulombol. Wiibakil bibunj mu Yuudah ni kukaamey basalaay ba diikand bahit ha 160 000. (2 Cif. 17:12-19) kuunyim kwa mafuk, Yozafat uhetel makab mavul. Cisumbw citam cya basalaay biin Amonit, biin Mowaab, ni baan-balum balaalukil ku milund ya kaabuk-koony kafw, biiyil kulwiish Yozafat, biin cisak cindiy ni baat bindiy. (2 Cif. 20:1, 2) Yozafat ulongel biny? Ulombel Yehow dyambulwiish ni diikand. Bwaal oobw buhehetangan ni mubel a meej udy mu mukand Tusumw  3:5, 6. (Bal.) Diisambil dya Yozafat dilong ni kwiihweekej koos, ditusaasangan mu mukand a 2 Cif. 20:5-12, dileeleej mwaakadyey muteekel Taat indiy a mu diiwul udy ni lukat micim. I mushind kaay waakady Yehow mwaalabul diisambil dya Yozafat?

7. I mushind kaay waakady Yehow mwaalabul diisambil dya Yozafat?

⁷ Yehow waakady wiisamb ni Yozafat ku dyambulwiish dya mwiin Leevy Yaziyel. Yehow uleebel neey: “Imanaay teng hiin hah, nwiiman cyaab cyaakaabumw, nutal muniiyiiy kwiinukuuloh.” (2 Cif. 20:13-17) Biin-biin, mushind a kul diivit oow, kaakadyoh bend wa ha ciibidil! May aam, kamaakadyoh bend ma baat; ki, maakady ma Yehow kaayend. Bu mwaakady Yozafat muteekel Mawej indiy mucim indiy woos, ulongel cyaakadyey mumwambil. Haakady Yozafat ni baat bindiy bay katwiilangan ni balwiish, uteekel biin misambw kuuhal kwa basalaay bindiy. Yehow waakady mukumbaj mulay indiy waakadyey mwambil Yozafat; Ubutwiil balwiish ba Yozafat.​—2 Cif. 20:18-23.

8. I biny bidy baan-balum mwa kulongel ku cileejel cya Yozafat?

⁸ Baan-balum bady mwa kuhetel dilongweesh ku cileej cya Yozafat. Nudy ni bujit bwa kutacil biin mu bisak biinun ni kiihacil ka kukal mudimw muvul bwa kwiibalam ni kwiibakumbajil biikaakaamobw. Hanuhehet makab, nudy mwa kulang neey: nudy mwa kwiimaaman kaayeen. Kwiimanyinoh bend teng ha meej miibuh kaayeeb. Hamut iibuh kulong nook, lomb Yehow bwa akwambulwiish. Cikwaabw, uw ni mukaj iibuh, nudy mwa kusambil Yehow ni mucim iinun woos. Kaamaay bulombody bwa Yehow, hanubaabal haakaabumw Bibl ni mikand yimumvumvwiij, yihatul kudy bulongolody bwindiy, ni kooyelaay mibel yinusaasanganomw. Baat bakwaabw kabaakwiitaboh bend mahangadik manwiikal mwa kwangat mahehetangan ni diiy dya Mawej, cikwaabw, bady mwa kwiinwamb munudy babiluby. Bady mwa kwiinwambil cikwaabw neey: fwalang ni biit binusuusumb, bidy mwa kulam cisak ciinun bilengel. Ki vulukaayaak cileejel cya Yozafat. Uleejel mu bilong bindiy mwaakadyey muteekel Yehow micim. Yehow kaakadyoh bend mulek muut mwiin lulamat oow, ni kiin mwa kwiinulekoh bend. (Mus. 37:28; Ebr. 13:5) I biny bidy mwa kujaadikil biin maluw neey: bady ni musangal?

9. I biny bitudy mwa kuleeb bwa muprofet Yeshaay ni mukaj indiy?

⁹ Muprofet Yeshaay ni mukaj indiy bateekel mudimw a Yehow ha cyaab cya kuuhal mu shikacil aabab. Yeshaay waakady muprofet, bimweek neey: mukaj indiy waakady byend ni midimw ya buprofet, “waakady muprofet mwaan-mukaj.” (Ye. 8:1-4) Yeshaay ni mukaj indiy, baakady bateek kuhambil Yehow ha cyaab cya kuuhal mu shikacil aababw. I cileejel cilengel cidyobw bashiil biin maluw leeloow!

10. I mushind kaay udy may ma buprofet matusaasangan mu Bibl, mwa kwambulwiish biin maluw bwa kwiikalobw ni bivul bya kulong mu mudimw a Yehow?

¹⁰ Biin maluw leeloow, bady mwa kwiidikij Yeshaay ni mukaj indiy hadyobw balong bukash bwa kukadil Yehow mudimw. Bady mwa kukashish diitabij dyaababw kudy Yehow haloolongobw haakaabumw may ma ciprofet bidy mu Bibl ni kutal mushind udyeby byend bikumban. * (Tiit 1:2) Bady mwa kulang bwa cidyobw mwa kulong bwa kwambulwiish mu kukumban kwa may ma ciprofet mady mu Bibl. Cileejel, bady mwa kwambulwiish mu kukumban kwa diiy dya buprofet cya Yeez cya neey: musah mulengel biiyiiy kumudiil baat ba ha bulab butuutul kuuhal kwa bulekel kwiiyebw.  (Mat. 24:14) Hady biin maluw aab batal mudy diiy dya buprofet dya mu Bibl eecy diikal dya biin-biin, biiyiiy kwiiswiik menmen bwa kwiikalobw ni bivul bya kulong mu mudimw a Yehow.

11. I mudimw kaay waakady Prisil ni Akilas balong, ni bwabiny?

¹¹ Biin maluw bacidy baasand, bady mwa kulongel ku cileejel cya Prisil ni cya Akilas, biin Yuud baakady bashikacil mu cibunj cya Room. Baakady bumvw musah mulengel utaatal Yeez ni bab kushaalobw biin Krist. Kakuy kulandul, biin maluw aab, bahetel musangal mu shikacil aabab. Nook, shikacil aabab waakady mwiiy kushiituluk musang umw, haakady muloh Klood mutumin biin Yuud boos diiy bwa kumwangalobw mu Room. Langilaay ha cyaakady Akilas ni Prisil mwa kulong. Baakady mwa kushiy baat baakadyobw biibidilangan naab, bwa kuy kashikacil ha cyaab cihyaacihy, baakady mwa kutang cikwaabw kulong mudimw a kuhung nzubw ya tent ha cyaab cihyaacihy aacy. Makab mahetelobw ha cyaab cihyaacihy eecy, maakady mwa kulong bwa balek kukadil Yehow mudimw bikasakan eeny? Udy mwa kwiikal ni dyaalabul ku diijooj eedy. Hafikilobw ha cyaab cihyaacihy mu Korent, Akilas ni Prisil, batwaadijil kwambulwiish cisumbw hakukal mudimw haakaabumw ni mupostol Pool bwa kwambulwiishobw biin-kweet baakady cyaab aacy. Hahicil mafuk, bayiil mu tawuny yikwaabw mu cyaab cyaakadyobw bakaam bakajaady bikasakan. (Yil. 18:18-21; Rom 16:3-5) Baakady ni bivul bya kulong mu shikacil aababw ni baakady ni musangal!

12. Bwabiny bikaam biin maluw bahyaabahy biifundil biihacil bya mu spirit?

¹² Biin maluw ba leel bady mwa kwiidikij cileejel cya Prisil ni cya Akilas hadyobw bateek mudimw a Bukaleng ha cyaab cya kuuhal mu shikacil aabab. Ciisang cilengel cidy biin maluw mwa kwiisamb bwa biihacil biikalobw mwa kukumbaj mu shikacil aabab, i ha cidyobw baseeselangan. Hady biin maluw bangat haakaabumw mahangadik ni biikashish bwa kukumbaj biihacil bya mu spirit, biiyiiy kutal mudy spirit a Yehow ukal naab mudimw mu shikacil aabab. (Mul. 4:9, 12) Tutal cileejel cya Russell ni cya Elizabeth. Russell uleeleeb neey: “Mu ciisang citwaakady tuseeselangan, twaakady  twiisambil menmen ha biihacil bya mu spirit.” Elizabeth uleeleeb cikwaabw neey: “Twaakady twiisamb ni kiihacil ka kumanyik mahangadik mashil-shilangan matwaakady mwa kwangat, ni twaakady bamanyik neey: mahangadik miitut kamaakady mwa kwiitukaakadish bwa kukumbaj biihacil biitut.” Shikacil a Russell ni Elizabeth waakady mwiibambulwiish bwa kuyobw mu Micronezih bwa kukadil mudimw ha cyaab cyaakadyobw bakaam menmen bakajaady.

13. Bilondeshel mukand a Musambw 28:7, i musangal kaay utwiikal mwa kuhet tut bateekel Yehow micim?

¹³ Teng bu Russell ni Elizabeth, biin maluw bavul i baheehej shikacil aabab bwa kuhetobw diib divul dya kudiil baat musah ni kwiibalongweesh. Hady biin maluw biifundil biihacil bya nook, bwa kukumbaj mu mudimw a Yehow ni bakadil mudimw haakaabumw bwa kwiibikumbaj, biiyiiy kuhatul bihet bilengel, ni biiyiiy kutal cikwaabw mudy Yehow wiibatacil, mushind udyobw bamuteekel micim wiiyiiy ukasakan, ni biiyiiy kwiikal ni musangal muvul.​—Bal Musambw 28:7.

14. I mushind kaay waakady mupostol Pyeel ni mukaj indiy baleej mwaakadyobw bateek micim yaabab mu mulay utusaasangan mu mukand a Matewus 6:25, 31-34?

¹⁴ Biin maluw bady mwa kulongel byaabw ku cileejel cya mupostol Pyeel ni cya mukaj indiy. Suuny yisambombw haanyim aababw baman ni kutwiilangan ni Yeez musang a kuuhal, mupostol Pyeel waakady mwa kwangat dihangadik dya buseeb. Pyeel waakady ni mudimw a kulob misany. Haakady Yeez mubiikan Pyeel bwa kumulondey mu mudimw a ku diib ni ku diib, Pyeel waakady mwa kulang bikasakan bwa shikacil a cisak cindiy. (Luuk 5:1-11) Pyeel waakady musungul bwa kutwaalok Yeez mu mudimw a kudiil baat musah. Diihangadik dindiy eedy dyaakady dya meej! Tudy ni kabingil kalengel ka neey: Mukaj a Pyeel waakady mut diihangadik dya Pyeel nyam ku mikon. Bibl uleeleeb neey: haanyim a kusanguk kwa Yeez, Pyeel ni mukaj indiy, balongelok lwend. (1 Kor. 9:5) Biin-biin, cileejel cindiy bu mukaj mwiin Krist, cyaakady cyambulwiish Pyeel bwa kwiisambey mwiilekelel bwa kwaakishey baan-balum ni baan-bakaj biin Krist mubel mufundish ku spirit mujilang. (1 Py. 3:1-7) Biin-biin, mupostol pyeel ni mukaj indiy bateekel micim yaabab mu mulay wa Yehow wa neey: wiiyiiy kwiibambulwiish bab bateek Bukaleng bwindiy ha cyaab cya kuuhal mu shikacil aabab.​—Bal Matewus 6:25, 31-34.

15. I biny bituloolongel ku cileejel cya Tiago ni cya Esther?

¹⁵ Iikaleby neey udy mubak mu mivw yikeeh oomw, i mushind kaay uwudy mwa kutungunuk ni kwiikal ni micim ya kuvudij mudimw iibuh a bukajaady? Mushind aakaabumw uwudy mwa kulong, i kukaam dyambulwiish kudy baat bakaady mu maluw. Nudy mwa kubal biin bwaal bya neey: “Ils ses sont offerts volontairement.” Biin bwaal eeby, byaakady byambulwiish Tiago ni Esther, biin maluw ba mu Brézil, bwa kukashishobw micim yaababw bwa kuy kambulwiish ha cyaab cyaakadyobw bakaam menmen bakajaady. Tiago uleeleeb neey: “Bu mutubaabal myand ya mushind udy Yehow mwambulwiish biin mudimw bindiy ba leeloow, tut byeet tudy bakat kutal mudy Yehow wiitulombol ni wiitwambulwiish.” Hahicil mafuk, bayiil mu Paraguay, mu cibunj aacy baakady bakadil mudimw ha cyaab cyaakady biin Portugal bashikacil kacy mu muvw a 2014. Esther uleeleeb neey: “Verseh utudy bakat menmen, i wa mu mukand a Biin Efez 3:20. Misang yivul, tudy batal mudy may aam miikal ma biin-biin mu mudimw utukaakadil Yehow.” Mu mukand waakady Pool mutumin biin Efez, waakady muleeb neey: Yehow wiiyiiy  kwiibambulwiish ni biit bivul bitudy katuy mwa kulomb. Mulay oow i wa biin-biin!

16. Biin maluw bacitweetweedyeloh mu diibak, bady mwa kuhetel dyambulwiish kudy bangany bwa kukumbajobw biihacil byaababw bya mu spirit?

¹⁶ Biin maluw bacidy baasand, bady mwa kulongel myand yivul kudy biin maluw bady beeyeleel Yehow. Biin maluw bakwaabw bady mwa kwiikal baman kuhitij diib dyaababw divul mu mudimw a Mawej wa ku diib ni ku diib. Bwabiny kanwiin mwa kwiibalombok dyambulwiish nun nukaam kukumbaj biihacil biinun? Wiin oow i mushind mukwaabw uleeleej neey: nudy bateekel Yehow micim. (Tus. 22:17, 19) Bakul bady mwa kwambulwiish biin maluw bacidy baasand bwa kwiifundilobw biihacil.

17. I myand kaay yaakady yifikil Klaus ni Marisa, ni i biny bitudy mwa kulongel ku cileejel cyaababw?

¹⁷ Hahicil mafuk, dihangadik ditwaakady bangat dya kukadil Yehow mudimw bikasakan, kadyaakadyoh bend dikumban mushind utwaakady tukaam. Talaay cileejel cya biin maluw babidy, Klaus ni Marisa, cidyobw baleej ku butambwiil kwa ciin bwaal eecy. Halongelobw mivw yisat mu maluw, bayiil kambulwiish mu midimw ya lwiibak ya Betel wa mu Finland. Biiyil kumanyik neey, kabaakadyoh bend mwa kushaal cyaab aacy mu suuny yihit a yisambombw. Cya kuuhal, bwaal oobw bwiibakooyeshel mu mabok. Ki bu mwaakady myand yiiy kushiituluk, baakady bibabiikan bwa kuyobw kalong cileebel cya biin Arab, bady ni musangal wa kwambulwiish cyaab cileeleebobw ciin Arab mu cibunj cikwaabw. Haakady Marisa mukontonon shikacil indiy, uleeleeb neey: “Naakady ni mooy wa kulong bwaal kahand bunaakady ciy mwanj kulongoh ni byaakady bikaam bwa nateekel Yehow mucim aam woos. Ki natadil mwaakady Yehow utungunuk ni kuuyambulwiish mu mishind yinaakady ciy mutakamin. Hanatadil bijaadik bya mudyey muuyambulwiish, kumuteekel kwaam kwa micim kukasakeen.” Teng mudy ciin bwaal eecy cileej, udy mwa kwiikal mutwiishiibw neey: Yehow wiiyiiy teng ukufut uw mumuteekel mucim iibuh woos.

18. I biny bidy biin maluw mwa kulong bwa kuleej neey: i bateekel Yehow micim?

¹⁸ Maluw i cya bukish cya kudy Yehow. (Mat. 19:5, 6) I mukat bwa biin maluw basangeel cya bukish eecy. (Tus. 5:18) Nun bacitweetweedyeloh mu maluw, bwabiny kanwiin mwa kukontonon myand yinudy mwa kulong mu maluw miinun? Nwiikaakashishomw bwa kuleej Yehow munusaasangeel bya bukish bidyey mwiinwaakish eeny? Leejaay Yehow myand yiinun mu diisambil. Kaamaay mu Diiy dindiy may matam manudy mwa kukooyel mu shikacil iinun ni londaay mubel udy Yehow wiinwaakish. Nwiiyiiy kutwiishiibw neey: nwiikaakal ni musangal ni maluw miinun miiyiiy kukasakan hanukaakadil Yehow mudimw!