Batadil Lukat mu Bilong
YOMARA ni baan baabw—Marcelo ni Hiver—i bashikat mu kamusok ka mu Guatemala. Yomara utwaadijil kulong ni Batemw, ni kuuyim kwa mafuk baan-baabw batwaadijil kulong byaabw. Ki kwaakady cilumbw. Basat ba ku bab baakady bampofw, ni kaabakady mwa kubal mifund yidyaakal bampofw babal (ya mu braille). Nook, mulongweesh aabab a Bibl waakady mwa kwiibabadil bikos bya kulong ni verseh ya mu dilongweesh aady.
Byaakady bikasakan bwaabab kutweel mu bisangil bya cisumbw. Bab kaayabw, kabaakady mwa kulong lwend lwa minit 40 bwa kufik habwiih menmen ni Nzubw a Bukaleng. Ki biin-kweet mu cisumbw baakady balongolol myand bwa kwiikal kwiibangat bwa biikal batweel mu bisangil byoos. Ni haakady baan ba muut basat batwaadij kulong midimw ya mu cisangil cya mukacy mwa luming, biin-kweet baakady biibambulwiish bwa kukwaatobw myand yaabab yaakady ni bwa kuleeb kuuhal kwa baat.
Mu suuny 5/2019, bisangil bya cisumbw bitwaadijil kulongekel mu musok aabab. Bwa kwambulwiish, biin maluw baaseb’ aa njil ba ku diib ni ku diib bamwangeel bwa kuy kashikacil mu musok aaw. Bangacil kiihacil ka kuy kalongweesh baan ba muut basat aab bwa kubal ni mushind a kufund wa bampofw (braille), ning mwaakady biin maluw kabay bamanyik mwa kufund ni kubal mifund ya bampofw (braille), bakacil bwa kwambulwiish balony bampofw basat aab mushind udyobw mwa kulong. Nook, bayiil ku cyaab cidyobw balamin mikand ni bahetel mukand uleeleeb bwa kumanyik mudyobw mwa kulongweesh bakwaabw mushind udyobw mwa kukal nend mudimw.
Marcelo waalaalabul mu cisangil cya cisumbw
Mu suuny yikeeh, sand yisat eey yaakady mwa kubal mifund ya mu braille biheehel, ni mushind oow wiibambulwiishil bwa kuyobw lwang-lwang kuuhal mu myand ya mu spirit. a Kaabaak Yomara, Marcelo, ni Hiver bakaakal mudimw bu baaseb’ aa njil ba ku diib ni ku diib. Marcelo i mukwanjok a mudimw mu cisumbw. Bady ni bivul bya kulong mu mudimw a Yehow luming loos. Cisumy cyaabab i cisak bakwaabw bwa kwiikalobw byaabw ni cisumy mu mudimw a Yehow.
Baan ba muut basat aab bady ni dyanyish kudy biin mu cisumbw bwa mudy biin-kweet biibambulwiish ni lukat. Yomara uleeleeb neey: “Teng diifuk dya kuuhal dituhetelangan ni Batemw, i baaleej lukat lwa bwiin Krist lwa biin-biin.” Marcelo uleeleeb byend neey: “Tudy ni balund balengel beeh mu cisumbw ciitut, ni tudy byeet mu cisak cya ha bulab butuutul cya baat bady ni lukat ni bady mu kaacyumw.” Yomara ni baan baabw baan-balum i batakamin ni micim kwiiwul-kwiiwul bwa kutal mudy Yehow ufutulul bulab bwa kushaalobw Paradiiz.—Mis. 37:10, 11; Ye. 35:5.
a Broshiir wa neey: Apprendre à lire le Braille i mulong bwa kwambulwiish muut udy mpofw eecy udy ni lutat lwa kutal bilengel bwa kulong mushind a kubal ni wa kufund mu mushind a bampofw (mu braille).
