1. I biny byaakady Yeez mwambil biiyij bindiy habitaatal mafuk ma bulekel ni wiibadimwiijil neey?

 MAFUK makeeh kuuhal kwa Yeez kufweey, biiyij bindiy banaay bamwiihangujil neey: “I cingany ciiyiiy kwiituleej ciisang cya . . . ni bulekel bwa biit byoos [bulekel bwa bulongolody bwa myand oobw]?” (Mat. 24:3) Biiyij aab baakady biyihanguj misang yikwaabw mushind waakadyobw mwa kumanyik ciisang ciikalobw mwa kubutul Yeruzalem ni tempel waakadyomw. Haalabwiil Yeez, kaakadyoh bend uleeb bwa kubutuk kwa Yeruzalem ni tempel indiy ki waakady uleeb cikwaabw bwa ‘bulekel bwa bulongolody bwa myand oobw,’ i bwiin kuleeb neey mu bulongolody mutudyoomw. Habitaatal diifuk dya bulekel, Yeez uleebel neey: “Kakwiishoh bend muut ning waakaabumw udy mumanyik diifuk eecy diib dyaakalongek yiin myand eey. Ning baawaakutum mwiiwul, ning Mwaan, teng Taat kaayend i yiy udy mumanyik.” Kuunyim udimwiijil biiyij bindiy “dimukaay” ni “kanulong nwaalaal.”—Mark 13:32-37.

2. Bwabiny byaakady ni buseeb bwa biin Krist ba mu siyekel a kuuhal bwa kwiikalobw badimuk?

² Biin Krist biin Yuud ba mu siyekel a kuuhal baakady ni bwa kwiikal badimuk; bwa bab kwiiy kuhandukobw. Yeez wambiil biiyij bindiy cyaakadyobw mwa kukaam bwa kujaadikobw bulekel bwa bulongolody bwa biin Yuud. Uleebel neey: “Anwaatalaay Yeruzalem bamujingomw kudy basalaay, nwaamanyikaay ney, kubutuk kwindiy kukaady habwiih.” Naak, baakiikal ku Yuudeh baay lubil mu milund.” (Luuk 21:20, 21) Aab baakady badimuk bwa cyaakadyobw biibambil bahandukil haakadyobw babutul Yeruzalem kudy biin Rom.

3. I biny bitwiiyiiy kwiisambil mu ciin bwaal eecy?

³ Leeloow tukaady mu mafuk ma bulekel ma bulongolody bwa  myand yibiih oobw. Nook, bikaam tut byeet twiikal ni meej makazamuk ni badimuk. Mu ciin bwaal eecy, twiiyiiy kwiisambil ha mushind utudy mwa kwiikal ni meej ma kacy-kacy hatutaatal myand yiloolongek ha bulab, mutudy mwa kwiikal badimuk, ni mutudy mwa kukal mudimw bilengel ni diib dikaady dishaal eedy.

4. Bwabiny bikaam twiitacish bwa kutal mudy myand yiloolongek ha bulab leeloow yiikal yend yikumbaj may ma buprofet?

⁴ Kudy tubingil tulengel tuloolong bwa tukat bwa kutal mudy myand yiloolongek leeloow ha bulab yend yikumbaj may ma buprofet mady mu Bibl. Cileejel, Yeez i mwiitwambil myand yiiyiiy kulongek bwa kwiitwambulwiish bwiitut kumanyik neey bulekel bwa bulongolody bwa Sataan bukaady habwiih menmen. (Mat. 24:3-14) Mupostol Pool i mwiitukashish bwa twiikal badimuk habitaatal kukumban kwa may ma buprofet bwa tushaal teng bakasakan mu diitabij. (2 Py. 1:19-21) Mukand a bulekel wa mu Bibl utwaatwaadij ni may aam: “Mukand mwiinoow i wa myand yaakady Yeez Krist musokolol. Mawej umwambiil bwa kusokolol ni kuleej biin mudimw bindiy myand yaakady mwa kwiiy kulongek mu mafuk miin mah.” (Yis. 1:1) Nook tudy ni bwa kwiitacish bwa kumanyik myand yiloolongek leeloow ni bwa kumanyik mudyey mwa kukumbaj may ma buprofet leeloow. Ni tudy mwa kukat bikasakan bwa kwiisambil ha myand eey ni baat bakwabw.

5. Bikaam tulek biny, ki bikaam tulong biny? (Tal bifwaatul.)

⁵ Hatwendend twiisambil ha may ma buprofet mady mu Bibl, nook, bikaam tulek kuleeb myand yitudy katuy ni bijaadik neey yiiyiiy kulongek. Bwabiny? Bwaal katwiishoh bend bakat bwa kuleeb bwaal budy mwa kukabulul baat mu cisumbw. Cileejel, tudy mwa kumvw bakalombol ba ha bulab baleeb habitaatal mudyobw mwa kuman bilumb kaahand, mudyobw mwa kutwaalobw diitalal ni mwa kulong bwa baat bashikat ku mat talal kakuy bwaal. Hamut a kuleeb bituh bwaal kaahand butudy katuy ni bijaadik neey i bub bwiiyiiy kukumbaj diiy dya buprofet didy mu 1Biin Tesalonik 5:3, bikaam tumanyik myand yidyobw baleej mafuk mashaal aam.” Hatwiisaasambil ha myand yidy bulongolody bwa Yehow buleej, twambambulwiish biin mu cisumbw bwa kushaal mu kaacyumw ni bwa ‘kwiikalobw ni meej maakaabumw.’—1 Kor. 1:10; 4:6.

6. I malongweesh kaay matudy mwa kuhetel mu mukand a 2 Pyeel 3:11-13?

⁶ Bal 2 Pyeel 3:11-13. Mupostol Pyeel wiitwambambulwiish bwiitut kwiikal ni kacy-kacy hatukookontonon may ma buprofet mady mu Bibl. Wiitwambambil neey: “Iimanyinaay diifuk dya Mawej [Yehow].” Bwabiny? Kiin bwa neey tudy bakat teng bwa kulang habitaatal “diifuk ni diib” diiyiiy Yehow kubutul baat ku Harmakedon, ki bwaal tudy bakat kukal mudimw ni diib dikaady dishaal eedy bwa “kushikat bu baat bajilang bimweek ney tudy balamat Mawej.” (Mat. 24:36; Luuk 12:40) Cikwaabw, tudy bakat kulong teng myand yiwaakan ni bwiitut kumanyik neey kwiikashishomw kwiitut mu mudimw a Yehow kuleeleej mutudy bamukat bikasakan. Bwiitut kutungunuk ni kumulongel mudimw, bikaam twiikal badimuk.

7. I mushind kaay utuleeleej neey tudy badimuk? (Luuk 21:34)

⁷ Yeez wambiil biiyij bindiy bwa kwiikalobw badimuk kiin teng ku myand ya ha bulab ki cikwaabw bwa shikacil aabab. Bwaal oobw i biibutookesh mu mubel udy Yeez mutwaal mu Luuk 21:34. (Bal.) Tal cidy Yeez muleeb: “Dimukaay!” Muut udy mudimuk wanjanj umanyik myand ya buuhund yidy mwa kunyang bulund bwindiy ni Yehow, ni wiikakashishoomw  bwa kwiiyewuk. Yiy mulong nook, ututungunuk ni kushaal mu lukat lwa Mawej.—Tus. 22:3; Yuud 20, 21.

8. I mubel kaay waakishil mupostol Pool biin Krist?

⁸ Mupostol Pool wambiil biin Krist bwa kwiikalobw badimuk. Cileejel, wambiil biin Krist ba mu Efez neey: “Naak dimukaay mu kushikat kwiinun. Kanwiikal bend bu baat babul meej, ki nwiikal bu baat bady ni meej.” (Ef. 5:15, 16) Sataan udy teng utungunuk ni kwiituteet bwa kunyang bulund bwiitut ni Yehow, ki bwabiny Bibl wiitubeebel neey: “ki iikashishaayomw bwa kujingunun mudy Mawej mukat bwiinun kulong” tut balong nook tudy bwa kwiilam ku mateet moos ma Sataan.—Ef. 5:17.

9. I mushind kaay utudy mwa kutal lukat lwa Yehow bwiitut?

⁹ Bibl kiin mwiituleejoh bend myand yoos yidy mwa kunyang bulund bwiitut ni Yehow. Bikaam twiikal ni ciibidil cya kwangat mahangadik ha myand yidyobw kabay baleeb buludy-ludy mu verseh ya mu Bibl. Bwa kwangat mahangadik meej, bikaam tutal, eecy tumanyik, cidy “lukat lwa Yehow.” Tudy mwa kulong nook hakubal Diiy dya Mawej ha ciibidil ni hakulangiloh. Tut bumvw menmen cidy lukat lwa Yehow, ni tut biikal ni tut biikashishomw bwa kwiikal ni “meej ma Krist,” cikwaabw hatwiikal mwa kwend “bu baat bady ni meej,” ning tut biikal katuy ni mikenj yisunguluk yidy mwa kwiituleej citudy mwa kulong. (1 Kor. 2:14-16) Misang yikwaabw i biheehel bwa kumanyik myand kaahand ya buuhund yitudy mwa kweehuk; ki misang yikwaabw kabiishoh bend biheehel.

10. Bikaam tweehuk myand ya buuhund kaay?

¹⁰ Mu myand yikwaabw ya buuhund yitudy mwa kweehuk mudy cikwaabw kuzab ni kwaalakan kwa muut mukwaabw, bukanwaay, budyaavy, kuleeb kwa myand yitaatah bakwaabw ku micim, bu mudy kuhitij luleng hakutal myand ya cikis, kutal bifwaatul bya baat kabay bizang, ni myand yikwaabw ya bwiin nook. (Mis. 101:3) Mulwiish iitut, Dyabol, wendend ukaam teng mishind yidyey mwa kunyang bulund bwiitut ni Yehow. (1 Py. 5:8) Tut katuy badimuk, Sataan udy mwa kukun mu meej miitut ni mu micim yiitut teet ya kacik, ya kuleek kwiikal ni bujaalal, bulongavy bwa kudy, lukun, kwiiyumb kwa mwiiwul, ni kwiilumbulwiish. (Kal. 5:19-21) Kuuhal-hal, kwiish mwa kutal neey meej ma nook madyok ni buuhund. Ki tut katuy biimaful musang umw, miiyiiy kutungunuk ni kukasakan bu mutond a luleng ni mady mwa kukulongel bibiih.—Jak 1:14, 15.

11. I buuhund kaay butudy katuy banj kutal butudy ni bwa kweehuk, ni bwabiny?

¹¹ Buuhund butudy mwa kudimukil i cikong cya balund cibiih. Tukontononaay bwaal oobw. Ukaakal mudimw ni muut udy kay Temw a Yehow. Udy mukat bwa neey unukaakal nend mudimw iikal uleeb bilengel bwa Batemw ba Yehow, nook iikal nend bilengel ni iikal umwambulwiish. Udy mwa kukatok cikwaabw bwa kudyok cyaakudy ni muut oow. Kaabaak, wiikaakal ni ciibidil cya kudy nend cyaakudy. Misang yikwaabw, wiisaasamb ha kuleeb myand ya busenj. Ku butambwiil, kwiishoh bend mwiiyikat. Ki hahiihit mafuk, wiiyiiy kwiibidilangan byeeb ni mushind a kwiisamb myand ya naak yiwaakady kuy mukat. Nook , diifuk dikwaabw, muut unukaakal nend mudimw ukubiibiikan bwiibuh kun nend mal kuunyim kwa mudimw, ni wiitaatab bwa kulong naak. Kaman-a-kaman, utwaatwaadij kulang teng bu muut uloolong nend mudimw. Kabyaakwangatoh bend mafuk mavul bwiibuh kutwaadij kulong myand yaakaabumw ya bwiin yiloolong unuloolong nend mudimw. Cya biin, tudy bilengel ni tuneeneemek baat boos, ki bikaam twiikal bamanyik neey baat batusuusungul bwa kutuhitij naabw diib bady mwa kwiiy kwiitwenzej bikasakan bwiitut kwiikal kulong myand teng bu baat. (1 Kor. 15:33) Tut biikal badimuk, teng bu mwaakady Yeez mwiitwambil bwa kulong, twiiyiiy kulek bwa kwiikal mu  cikong cikiish kaciy ni buseeb cya baat bady kabay bakat kukooyel mikenj ya Yehow mu shikacil aabaab. (2 Kor. 6:15) Twiiyiiy kutal buuhund budyok ni mushind a kwiibweehuk.

12. I biny byaakady biiyij ba Yeez balong haakadyobw biimanyin bulekel bwa bulongolody bwa myand?

¹² Yeez waakady mukat bwa biiyij bindiy biikal ni bivul bya kulong hacidyobw biiman bulekel bwa bulongolody bwa myand eey. Yeez wiibakishil mudimw a kulong. Wiibambiil bwa kudiilobw musah mulengel kudy aab baakady “ku Yeruzalem, mu bulab bwa Yuudeh ni bwa Samarih, teng ni hakaas ni hakaas ha bulab.” (Yil. 1:6-8) Biiyij ba Yeez bahetel biin-biin mudimw mutam a kulong! Baakady biikashishomw bwa kukal mudimw bilengel ni diib dyaabaab bwa kudiil baat bakwaabw musah.

13. Bwabiny bikaakaam tukal mudimw bilengel ni diib diitut? (Kolos 4:5)

¹³ Bal Biin Kolos 4:5. Bwiitut kwiikal badimuk, bikaam twiikontonon bikasakan habitaatal mushind utukaakal mudimw ni diib diitut. “Dyaakaby [myand yidy muut kay mutakamin]” didy mwa kufikil muut woos wa kutudy. (Mul. 9:11) Tudy mwa kufw diib ditudy katuy belel meej.

14-15. I mushind kaay utudy mwa kukal mudimw bilengel ni diib diitut? (Biin Ebreh 6:11, 12) (Tal cikwaabw cifwaatul.)

¹⁴ Tudy mwa kukal mudimw bilengel ni diib  diitut bwa kulong bwa kumanyik lukat lwa Yehow ni bwa kukashish bulund bwiitut nend. (Jah 14:21) Bikaam bwa ‘kukasakan micim, kanuzakal bend. Iikalaay ni cisumy diib dyoos bwa kuwaakany mudimw a Fumweet.’ (1 Kor. 15:58) Nook hiikal bulekel mwa kufik, ning biby biikal bulekel bwa buumy bwiitut eecy bulekel bwa bulongolody bubiih oobw, katwaakumvwoh bend bibiih bwa mudimw utudy bakadil Yehow.—Mat. 24:13; Rom 14:8.

¹⁵ Leeloow, Yeez utuutungunuk ni kulombol biiyij bindiy hacidyobw badiil baat musah ha bulab butuutul habitaatal Bukaleng bwa Yehow. I mukumbaj mulay indiy. Ku dyambulwiish dya bulongolody bwa Yehow, Yeez wiituloolongweesh mwa kudiil baat musah ni ku dyambulwiish dindiy tudy ni bya kulong naaby bitukakaam bwa kulongweesh baat musah mulengel. (Mat. 28:18-20) Tuloolong cidy Yeez ukaam bwiitut kwiikashishomw bwa kudiil baat bakwaabw musah ni kwiibalongweesh ni kwiikal bakazamuk teng ni hatucidy biimanyin ciisang ciiyiiy Yehow kubutul bulongolody bubiih bwa myand oobw. Hakukooyel mubel udy mu Biin Ebreh 6:11, 12, tukaakaam neey woos wa kutudy iikal mutakamin ni “Iikashishomw teng ni ku bulekel.”—Bal.

16. Tudy biiswiik bwa kulong biny?

¹⁶ Yehow imuhangadij diib diiyiiyey kubutul bulongolody bwa Sataan. Hady diifuk aady diifik, Yehow wiiyiiy kukumbaj milay yindiy yifundishiley mu Diiy dindiy. Ki misang yikwaabw tudy mwa kulang neey bulekel bwa bulongolody oobw kabwiinoh bend bufik kabaak. Ki, myand yileebel Yehow bwa diifuk dindiy “yiiyiiy teng kulongek.” (Hab. 2:3) Nook, twiikalaay biiswiik bwa ‘kutal kudy Mawej [Yehow],’ni biikal ‘batakamin kudy Mawej [iitut] wiitukukuuloh.’—Mik. 7:7.