CIIN BWAAL CYA KULONG CYA 10
Bwabiny Bikaam Kuhet Baatiisumw?
“Muut woos wa kunudy ahet baatiisumw.”—YIL. 2:38.
MUSAMBW A 34 Nengende ne muoyi wanyi mutoke
KADYOOSH a
1-2. I biny bidyaakal bilongek hady baat bahet baatiisumw, ni bikaam ukontonon biny?
UKAADY mutalok cisumbw cya baat bakaakaam kuhet baatiisumw eeny? Umvumvw bwa kumanyik kutwiishiibw kudyobw naak mu may maabab hadyobw baalabul majooj mabidy kuuhal kwa kuhetobw baatiisumw. Utaatal neey biin mu cisak cyaabab ni balund baabab bady ni musangal muvul bwaabab. Hady baat baheehet baatiisumw bahatuk mu mwanz, umvumvw baat bakushil bikash ni biikal ni musangal ku mees kwaabab. Luming loos oolw, baat bavul baloolong nook, biilambul kudy Mawej, ni bashaal Batemw ba Yehow Mawej bady bahet baatiisumw.
2 Ki uw ulaalang neey? Uw ulang bwa kuhet baatiisumw, udy muut a buseeb buvul bwaal “ukaakaam Mawej.” (Mis. 14:1, 2) Ciin bwaal eecy i cifund bwiibuh ning uw mwiikal sand eecy muut mukuluuh. Ki bwa aab ba kutudy baakady baman kuhet baatiisumw i bakat cikwaabw bwa kukashish dihangadik diitut ditwangacil bwa kukadil Yehow mudimw buyiil. Nook twiisambilaay ha tusat twa ku tubingil tuvul twiitusaasak bwa kukadil Yehow mudimw.
UDY MUKAT MYAND YA BIIN-BIIN NI YIWAAKAN
Sataan i mutangalaj myand ya makos habitaatal diijin dya Yehow mukacy mwa mivw yivul ni ucituutungunuk ni kulong nook (Tal cikos 3-4)
3. Bwabiny biin mudimw ba Mawej i bakat myand ya biin-biin ni yiwaakan? (Misambw 119:128, 163)
3 Yehow i mwambil baat bindiy bwa ‘kukat myand ya biin-biin.’ (Zak. 8:19) Yeez wambiil biiyij bindiy bwa kukaam myand yiwaakan. (Mat. 5:6) Bwaal bumvumvwiij neey bikaam twiikal bakat bikasakan bwa kulong myand yidy yilengel ni yiwaakan ku mees kwa Mawej. Udy mukat myand ya biin-biin ni yiwaakan eeny? Tudy batwiishibw neey udy mwiiyikat. Udy mukin makos ni myand yoos yibiih. (Bal Misambw 119:128, 163.) Muut udy ni makos uleeleej buumuut bwa Sataan, mukaleng a bulab oobw. (Jah 8:44; 12:31) Kamw ka ku biihacil bya Sataan i ka kuleeb myand ya makos habitaatal diijin dijilang dya Yehow Mawej. Sataan i mumwangalaj makos habitaatal Mawej kacy hamutombokeley mu Eden. Uteetel bwa kusak baat bwa kulangobw neey Yehow udy ni bwiiminy ni i kalombol ukiish uleeb myand ya biin-biin ni i mwiimin baat hakulek kwiibakish biit bilengel. (Kbwa. 3:1, 4, 5) Makos ma Sataan habitaatal Yehow i matungunuk ni kusak baat bwa kulang bibiih habitaatal Mawej. Hady baat bangat dingadik dya kulek “kukat myand ya biin-biin,” Sataan udy mwa kwiibasak bwa kulongobw myand yoos yikiish yiwaakan ni yibiih.—Rom 1:25-31.
4. I mushind kaay udy Yehow uleej neey i “Mawej a biin-biin”? (Tal cikwaabw cifwaatul.)
4 Yehow i “Mawej a biin-biin,” ni i mukat kulongweesh myand ya biin-biin kudy aab bady bamukat. (Mus. 31:5, NWT) Hakulong nook, wiibambambulwiish bwa kaay biitaboh bend makos ma Sataan. Yehow uloolongweesh byend biin mudimw bindiy bwa kwiikalobw biin bujaalal ni bawaakan. Nook wiibambambulwiish bwa kwiiyumvwobw neey bady ni buseeb ni cikwaabw biikal ni diitalaal dya mu micim. (Tus. 13:5, 6) Ki mudyey mulong bwiibuh hawudy mulong Bibl eeny? Udy mulong ni mumanyik neey njil ya Yehow i yilengel yeeh bwa baat boos ni bwiibuh kaayeeb. (Mis. 77:13, NWT) Ki bwabiny udy mukat kulong myand yidy yiwaakan ku mees kwa Mawej. (Mat. 6:33) Udy mukat bwa kujingunwiin bakwaabw myand ya biin-biin, ni bwa kujaadik neey myand yidy Sataan muleeb habitaatal Mawej iitut, Yehow, i ya makos. I mushind kaay uwudy mwa kulong nook?
5. I mushind kaay uwudy mwa kut nyam ku mikon myand ya biin-biin ni yiwaakan?
5 Udy mwa kukat may aam mu shikacil, ma neey: “Naleeleek myand ya makos ya Sataan, ni nady mukat myand ya biin-biin. Nady mukat Yehow bu Fumw a mim, ni nady mukat kulong myand yidy yiwaakan ku mees kwindiy.” I mushind kaay uwudy mwa kulong nook? Fweej habwiih ni Yehow hakumusambil ni iilambul kudyey hakumulay bwa kumukadil mudimw buyiil ni kuunyim uleeb hatook mukan mwiibuh ciwudy mwiitabij hakuhet baatiisumw. Lukat lwa myand ya biin-biin ni yiwaakan i kak kabingil kakasakan kasaasak muut bwa kuhet baatiisumw.
UDY MUKAT YEEZ KRIST
6. I tubingil kaay tudy mu Misambw 45:4 tukusaasak bwa kukat Yeez Krist?
6 Bwabiny udy mukat Yeez Krist? Manyik tumw tubingil tulengel tudy mu Misambw 45:4. (Bal.) Yeez i mukat myand ya biin-biin, kwiihweekesh, ni myand yiwaakan. Uw mukat myand ya biin-biin ni yiwaakan, byumvumvwiij biin-bin neey udy mukat cikwaabw Yeez Krist. Langok bwa mushind waakady Yeez ujingunwiin baat bakwaabw myand ya biin-biin ni yiwaakan. (Jah 18:37) Nook, i mushind kaay udy Yeez muleej mudyey mukat kwiihweekesh?
7. I biny bikusaasangeej bwa habitaatal kwiihweekesh kwa Yeez?
7 Yeez i muleej mudyey mukat kwiihweekesh ku dyambulwiish dya cileejel cindiy. Cileejel, uhaah teng Taat indiy lutumb loos, kiitabiloh bend bwa kumutumbishobw. (Mark 10:17, 18; Jah 5:19) Umvumvw bicy bwa kwiihweekesh kwaakady naak Yeez kwa mushind oow? Kabiin bikusakok bwa kukat Mwaan a Mawej ni bwiibuh kumulond eeny? Biin-biin bidy mwa kukusak bwa kulong nook. Bwabiny Yeez waakady ni kwiihweekesh? Bwaal i mukat ni wiididikij Taat indiy, udy ni kwiihweekesh. (Mis. 18:35; Ebr. 1:3) Kwiish mukatok kulond Yeez, udy mwiidikij biikadil bya Yehow mu mushind muwaakan eeny?
8. Bwabiny tudy bakat Yeez Mukaleng iitut?
8 Tudy bakat Yeez Mukaleng iitut bwaal i Kalombol udy mukumban menmen. Yehow kaayend i mulongweesh Mwaan indiy ni i mumusungul bwa kwiikaley Mukaleng. (Ye. 50:4, 5) Cikwaabw, lang bwa mushind waakady Yeez mukat baat bindiy. (Jah 13:1)Bu mudy Yeez mwiikal Mukaleng iibuh, i muwaakan bwiibuh kumukat menmen. I mumvwiij neey ubiibiikan aab bady bamukat biin-biin—aab badyey ubiikan neey balund nend—baleeleej mudyobw bamukat hadyobw bakooyel ku may mindiy. (Jah 14:15; 15:14, 15) I dyaakatook didiin dya kwiikal mulund a Mwaan a Yehow!
9. Baatiisumw a Yeez i mufwaanangan ni wa Krist bicy?
9 Dyumw dya ku may ma Yeez i dya neey biiyij bindiy bahet baatiisumw. (Mat. 28:19, 20) I mushiy cileejel. Mu mishind kaahand, baatiisumw indiy i mushilangan wa biiyij bindiy. (Tal kazubw ka neey: “ Baatiisumw a Yeez i mushilangan ni wa Biiyij Bindiy Bicy?”) Ki mu mishind yikwaabw, udy teng wa mushind aakaabumw. Haheteley baatiisumw, Yeez uleejel kaayend neey waakady mukat bwa kulong lukat lwa Taat indiy. (Ebr. 10:7) Bya mushind aakaabumw, hady biiyij ba Yeez bahet baatiisumw i cimanyin cya hatook cileeleej neey i biilambul kudy Yehow Mawej. Kaabaak, bwaal bwaabab butam budyobw naabw mu shikacil aabab i kulong cidy lukat lwa Yehow, kulek cidy lukat lwaabab. Nook bendend ni kulond cileejel cya Fumw aabw.
10. Bwabiny bikaam lukat lwiibuh bwa Yeez lukusak bwiibuh kuhet baatiisumw?
10 Wiitaatab neey Yeez i Mwaan a diimung wa Yehow ni udy ni musangal wa neey i Mukaleng udy Mawej musungul bwa kwiitulombol. Udy mumanyik neey Yeez i muut muwaakan, ni i mwiidikij mu mushind muwaakan Taat indiy. Udy mulong ni udy mumanyik neey waakady mudiish baakady ni nzal, ukashishil baakady bakooyel mu mabok ku micim, ni ondahil cikwaabw baakady babeel. (Mat. 14:14-21) Udy mutal mudyey ulombol cisumbw cindiy leeloow. (Mat. 23:10) Ni uw mumanyik neey i Mukaleng, manyik neey Bukaleng bwa Mawej bwiiyiiy kulong bwa myand yiikal yilengel mu mafuk maciiyiiy. I mushind kaay uwudy mwa kuleej neey udy mumukat? Hakulond cileejel cindiy. (Jah 14:21) Udy mwa kutwaadij kulong nook, hakwiilambul kudy Yehow ni hakuhet baatiisumw.
UDY MUKAT YEHOW MAWEJ
11. I kabingil kaay katam kasaasak muut bwa kuhetey baatiisumw, ni bwabiny tuleeleeb nook?
11 I kabingil kaay katam menmen kasaasak muut bwa kuhet baatiisumw? Yeez uleebel bwa dyumvwiij dya Diiy didy dihitok may moos ma Mawej neey: “Kat Mawej [Yehow] iibuh ni mucim iibuh woos, ni muuy iibuh woos, ni meej miibuh moos, ni makand miibuh moos.” (Mark 12:30) May aam maleeleej muwudy mukat Mawej bikasakan eeny?
Yehow i Humb a biit byoos bilengel biwudy mukat ni biwiiyiiy kukat (Tal cikos cya 12-13)
12. Bwabiny udy mukat Yehow? (Tal cikwaabw cifwaatul.)
12 Kudy tubingil tuvul menmen tusaasak muut bwa kukatey Yehow. Cileejel, udy mufik kukumanyik bwa neey i “Humb a buumy” i yiy Mutwaal a “bukish boos bwa mulow ni kuh koosolol kulengel.” (Mis. 36:9; Jak 1:17) Ciit cyoos cilengel ciwuheehet cyaalalukil kudy Taat iitut udy ni lukat, wakaakishangan biit.
13. Bwabiny cya kukuul naacy baat i cya bukish cilengel cyeeh?
13 Cya kukuul naacy baat i cya bukish cilengel cyeeh cidy Yehow mwiitwaakish. Bwabiny tudy mwa kuleeb naak? Lang ket bwa bulund bulengel budy naabw Yehow ni Mwaan indiy. Yeez uleebel neey: “Taat a mim i muukat” ni “nady mukat Taat.” (Jah 10:17; 14:31) Bulund bwaabab bwiiyil kukasakan menmen haakadyobw haakaabumw mukacy mwa mivw yivul menmen. (Tus. 8:22, 23, 30) Kaabaak, lang ket bwa kaakunying kaakady naak Mawej hiitabiley bwa Mwaan indiy akab ni afw. Yehow i mukat baat—ni uw byeeb—udy ni lukat luvul bwaal ukacil bwa kutwaal Mwaan indiy waakadyey mukat bu mulambw bwa uw ni baat bakwaabw nuhet mushind a kwiikal ni buumy buyiil. (Jah 3:16; Kal. 2:20) Kiin aak i kabingil katam kiitusaasak bwa kukat Mawej.
14. I kiihacil kaay kawudy mwa kwiikal naak mu shikacil iibuh?
14 Lukat lwiibuh bwa Yehow i lwiiy kukasakan bwaal udy mulong myand yivul bwa kumumanyik. Biin-biin udy mukat kwiikal menmen habwiih nend leeloow ni buyiil. Ni udy ni mushind a kulong nook. Ukukaakashish ni lukat bwa ulong myand yimusaasangeej. (Tus. 23:15, 16) Udy mwa kulong naak kiin teng mu may ki cikwaabw mu bilong. Shikacil uwiiyiiy kwiikal nend wiiyiiy kuleej neey udy mukat biin-biin Yehow. (1 Jah 5:3) I kiihacil kalengel keeh kawudy mwa kwiikal naak mu shikacil iibuh.
15. I mushind kaay uwudy mwa kuleej neey udy mukat Yehow?
15 I mushind kaay uwudy mwa kuleej neey udy mukat Yehow? Cya kuuhal, umwamwambil mu diisambil dya habwaah ha kumulay bwa kumukadil teng yiy Mawej aakaabumw a biin-biin. (Mis. 40:8, NWT) Cikwaabw, uleeleeb hatook mukan mwiibuh ciwudy mwiitabij hakuhet baatiisumw. Teng mutubaman kulong mu bikos bya ku butambwiil bya mu ciin bwaal eecy, tubatal neey baatiisumw i ciisang cya musangal ni cya buseeb mu shikacil iibuh. Utwaatwaadij ni shikacil muhyaamuhy, kiin bwiibuh kaayeeb, ki bwa Yehow. (Rom 14:8; 1 Py. 4:1, 2) Bwaal oobw budy mwa kumweek bu diihangadik ditam dya kwangat, ni i diihangadik ditam. Ki diloolong bwiibuh kuhet mushind a kwiikal ni shikacil mulengel weeh. Mushind kaay?
16. Bilondeshel Misambw 41:12, i biny bidy Yehow wiiy kulongel aab bakaakal mudimw ni shikacil aabab bwa kumukadil mudimw?
16 Yehow i muut wakaakishangan biit bikasakan. Ning uw mumwaakish ciit kaay, wiiyiiy kukuh teng biit bivul menmen. (Mark 10:29, 30) Wiiyiiy kukuh bulang bwiibuh bwiikal ni shikacil mulengel menmen, ni udy cikwaabw ni kiihacil mu bulongolody bubiih oobw. Ni diifuk aady i butambwiil. Shikacil wa diifuk diwuheehet baatiisumw kiishoh bend ni bulekel. Udy mwa kutungunuk ni kukadil Taat iibuh udy ni lukat buyiil. Lukat ludy haakacy iibuh ni Taat iibuh lwiiyiiy kutungunuk ni kukasakan, ni wiiyiiy kwiikal kaabaak ni buumy mafuk mavul, wiiyiiy kwiikalok buyiil.—Bal Misambw 41:12, NWT.
17. I biny biwudy mwa kwaakish Yehow bidyey kay mwanj kwiikal naaby?
17 Hawiilaalambul kudy Mawej ni uhet baatiisumw, wiiyiiy kwiikal ni dyaakatook dya kwaakish Taat iibuh ciit kaahand cidy ni buseeb biin-biin. I mukwaakish biit byoos bilengel, biisang bilengel bya musangal. Ciwudy mwa kulong, udy mwa kwaakish Mwiin diiwul ni bulab ciit kaahand cidyey kay mwanj kwiikal naacy—i bwiin kuleeb neey, lukat lwiibuh lwa kumukadil mudimw ni lulamat. (Yoobw 1:8; 41:11; Tus. 27:11) Wiinoow i biibiin shikacil mulengel menmen uwudy mwa kwiikal nend! Kakuy kulandul, lukat lwiibuh bwa Yehow i kabingil kalengel keeh kasaasak muut bwa kwangatey diihangaadik dya kuhet baatiisumw.
UKAADY HABWIIH BWA KUHET BAATIISUMW EENY?
18. I majooj kaay mawudy mwa kwiiyihanguj?
18 Nook, i mushind kaay uwudy mwa kwaalabul ku diijooj eedy, wiiyiiy kuhet baatiisumw eeny? Teng uw ki udy mwa kwaalabul. Ki bidy mwa kwiiy kukwambulwiish uw mwiihangujok neey: ‘Bwabiny ciin mwanj kuhet baatiisumw?’ (Yil. 8:36) Vulukaay tubingil tusat tutudy bakontonon. Cya kuuhal, udy mukat myand ya biin-biin ni myand yiwaakan. Iyihanguj neey: ‘Nady mukat kutal diifuk diikal muut woos mwa kwiisamb myand ya biin-biin ni ulong myand yiwaakan eeny?’ Bwaal bwiibidy, udy mukat Yeez Krist. Iyihanguj neey: ‘Nady mukat Mwaan a Mawej bu Mukaleng a mim, ni nady mukat kulond cileejel cindiy eeny?’ Bwaal bwiisat, ku myand yoos, udy mukat Yehow. Iyihanguj neey: ‘Nady mukat kusangeej Yehow hakumukadil mudimw bu Mawej aam eeny?’ Uw mwaalabul neey Ing ku majooj aam, nook i kabingil kaay kawudy naak kakusaasak bwiibuh kulek kuhet baatiisumw?—Yil. 16:33.
19. Bwabiny kabiin bikaam wiikal ni kweelekan habitaatal kuhet baatiisumw? Twaal cileejel. (Jah 4: 34)
19 Uw mwiikal ni kweelakan bwiibuh kuhet baatiisumw, tukontonon cileejel cyaakady Yeez mukal naacy mudimw. (Bal Jah 4:34.) Manyik neey waakady mufwanyikij kulong lukat lwa Taat indiy ni cyaakudy. Bwabiny? Bidyaaj i bilengel bwiitut. Yeez waakady mumanyik neey bwaal boos budy Yehow wiitwambil bwa kulong i bulengel bwiitut. Yehow kiin mukat bwa tulong bwaal kaahand budy mwa kwiitulongel bibiih. Yehow i mukat bwa uhet baatiisumw eeny? Ying, i mukat. (Yil. 2:38) Nook iikal mujaadik neey kukooyel ku diiy dya kuhet baatiisumw kwiiyiiy kukuhetesh musangal. Uw mwiikal kuy ni kweelakan bwa kudy cyaakudy cilengel cyeeh, bwabiny kweelakan bwa kuhet baatiisumw?
20. I biny bitwiiyiiy kukontonon mu ciin bwaal ciloolond?
20 Bwabingany baat bakwaabw kabiish banj kuhet baatiisumw? Baat bavul bady mwa kwaalabul mu mushind oow: “Ciish mwanj kwiikaloh bend habwiih.” Bwaal bwa biin-biin budy neey: diihangadik bwa kwiilambul kudy Yehow ni kuhet kwa baatiisumw i dihangadik dya buseeb buvul diwudy mwa kwangat. Nook bikaakaam kulang bilengel habitaatal dihangadik aady ni biloolomb diib ni kwiikashishomw bwiibuh kwiikal mukumban bwa kuhet baatiisumw. Ki uw mwiikal biin-biin ni micim ya kuhet baatiisumw, i biny biwudy mwa kulong kaabaak bwiibuh kwiilongolol? Twiiyiiy kukontonon dyaalabul dya dijooj eedy mu ciin bwaal ciloolond.
MUSAMBW A 28 Mua kudia bulunda ne Yehowa
a Baatiisumw i bwaal bwa buseeb budy mulony woos wa Bibl ni bwa kulong. I biny bidy mwa kusak mulony a Bibl bwa kulongey nook? I lukat. Ki lukat bwa kabingil kaay ni bwa ngany? Mu ciin bwaal eecy, twiiyiiy kuhet maalabul ni twiiyiiy kwiisamb bwa shikacil udy biin Krist bady bahet baatiisumw mwa kwiikal nend.
