Bwabiny muut waakadyobw babiikan neey ‘Muut kaahand’ udy mwa kwiiy kunyang “buuhyaan” bwindiy yiy mwiikal mubak Luut? (Luut 4:1, 6)

Mu biisang bifundilobw Bibl, muut yiy mufw kay muleloh mwaan, baat baakady ni bwa kwiiyihanguj neey: I biny byaakadyobw biiy kulong ni biit bindiy bidyey mushiy? Diijin dindiy dya mu cisak diiyiiy kujimban bwa loos eeny? May ma Mawej maheeley Moyiz maakady maalabul majooj ma nook.

I biny byaakadyobw balong ni budimy bwa muut ufwiil eecy ushaadil mulam-lam eecy udy muhaan budimy bwindiy? Mwaan aab mwaan-mulum eecy mwiin-kwaabw udy nend bulong menmen waakady mwa kulam buuhyaan bwindiy, eecy kuland, bwiin budimy aab. Kulong nook kwaakady mwa kulong bwa diijin dya muut ufwiil ditungunuk ni kwiikalok mu cisak.—Lev. 25:23-28; Kub. 27:8-11.

I mushind kaay waakadyobw mwa kulam diijin dya muut ufwiil mu cisak? Ku dyambulwiish dya maluw mady bukond uteek mukaj a mwaan aab ufwiil ku cibel bu mukaj, maluw, malongelobw bwa Luut. Muut waakady mwa kwiiy kubak mukaj mufwiish mbaayayend kay muleloh bwa kulelobw mwaan waakady mwa kulong bwa kaay diijin dya muut aaw dijimbakan mu cisak ni mwaan aaw waakady mwa kwiiy kuhyaan biit bya muut ufwiil. Bulongolody bulongolol ni lukat oobw bwaakady bulong bwa kulam cikwaabw mukaj a muut ufwiil.—Mmu. 25:5-7; Mat. 22:23-28.

Twangat cileejel cya Nowemih. Baakady bamubak kudy muut diijin dindiy Elimelek. Yiy ni baan bindiy babidy baan balum baman kufw, Nowemih waakady mushaal kay ni muut mukwaabw a mu cisak waakady mwa kwiikal bu mulamy indiy. (Luut 1:1-5) Musang umw hahingilobw mu Yuudeh, Nowemih wambiil muheel indiy Luut bwa ay akambil Booz muut wa ku baat bady mwa kwiibalam bwa kulandey cikwaabw budimy bwaabab. Waakady mwiin-kwaabw ni Elimelek waakadyobw nend bulong bwa menmen. (Luut 2:1, 19, 20; 3:1-4) Ki Booz waakady mumanyik neey mwaan aabw mukwabw, udy Bibl ubiikan neey ‘Muut kaahand,’ waakady mwiin-kwaabw waakadyobw nend bulong bwa menmen. Nook uleebel cya kuuhal bwa kwiikaley bu mulamy.—Luut 3:9, 12, 13.

Ku butambwiil, ‘Muut kaahand” waakady mukat bwa kwambulwiish. (Luut 4:1-4) Waakady mumanyik neey waakady mwa kutwaal makut mavul bwa kulandey budimy, ki waakady mumanyik cikwaabw Nowemih waakady ki muut mukuluuh menmen waakady kay ni mushind a kwiikal ni mwaan waakady mwa kwiikal hyaan a biit bya Elimelek. Biin-biin, Muut Kaahand aaw waakady wiiy kuteek budimy ni bwaakady bwiiy kwiikal cituh cya ku bwindiy, kulong nook kwaakady kwiiy kwiikal dyambulwiish dilengel.

Ki Muut Kaahand aaw ushintulwiil meej mindiy atadiley neey wiiyiiy kubak Luut. Uleebel neey: “Ciciish mwa kwiibuland bwaal nady mwa kunyang buuhyaan bwa mim.” (Luut 4:5, 6) Bwabiny waakady mushintulul meej mindiy?

Muut Kaahand aaw eecy muut mukwaabw yiy mwiikal mubak Luut ni Luut yiy mwiikal mwiiy kulel mwaan mulum waakady wiiy kuhyaan bulab bwa Elimelek. I mushind kaay waakady bwaal oobw bwiiy “kunyang” nook “buuhyaan” bwa Muut Kaahand aaw? Bibl kiin muleeboh bend, ki kudyok mishind kaahand yidy mwa kwiituleej:

• Cya kuuhal, makut maakadyey mwa kwiiy kutuul, maakady mwa kuy mu bituh, bwaal ku bulekel bwa byoos budimw aabw kabwaakadyoh bend bwiiy kwiikal bwindiy. Bwaakady bwiiy kwiikal bwa mwaan a Luut mwaan-mulum.

• Bwaal bwiibidy, waakady wiiy kwiikal ni bujit bwa kudiish ni kulam baat boos babidy: Nowemih ni Luut.

• Bwaal bwiisat, biby biikal neey Luut uleelel baan ni Muut Kaahand aaw, baakady mwa kwiiy kwabanyangan buuhyan aabw ni baan boos.

• Bwaal bwiinaay, biby biikal neey Muut Kaahand aaw kaakadyoh bend ni baan bindiy, Mwaan a Luut mwaan-mulum waakady mwa kwiiy kwiikal ni bukenj bwa kuhyaan budimy bwa baat boos babidy: bwa Elimelek ni bwa Muut Kaahand. Nook, waakady mwa kwiiy kujimbaj budimy bwindiy kudy mwaan waakadyobw biiy kwaakish diijin dya Elimelek, ki kulek yiy. Muut Kaahand aaw kaakadyoh mukat bwa buuhyaan bwindiy buhet buuhund bwa kwambulwiishey Nowemih. Waakady mukat bwa kwiitabil muut waakady mwa kwiiy, Booz, bwa kwangatey bujit aabw. Booz kalongel nook bwaal waakady mukat ‘bwa kusangul diijin dya mufw ni kulam biit bindiy.”—Luut 4:10.

Bimweekel neey Muut Kaahand waakady mukat bikasakan kulam diijin dindiy kaayend ni buuhyaan. Kwiikat kwaakady kudyaacil meej mindiy haash. Ki hamut a kulam diijin dindiy, diijin dya Muut Kaahand dijimbeen ni kadiishoh bend mu myand ya kal. Ujimbajil cikwaabw dyaakatook dya habwaah diheteley Booz dya kwiikal mu mulong a twiikululwiil mwaakady Mesih, Yeez Krist mwa kwiiy kuhatukil. (Mat. 1:5; Luuk 3:23, 32) I cihet kaay cya kaakunying bwa Muut Kaahand ulekeel dyaakatook dya kwambulwiish muut ukaakaam dyambulwiish!—Mat. 1:5; Luuk 3:23, 32.