1-2. Uw mwiikal kuy mwanj kwiikal habwiih bwa kuhet baatiisumw, bwabiny kwiin mwa kuneeken mu mikon? (Tal cifwaatul cya ha cizubw.)

 BIBY biikal neey udy mukat bwa kuhet baatiisumw, udy mwiifundil kiihacil kalengel keeh. Ukaady habwiih bwa kukumbaj kiihacil aak teng kaabaak eeny? Uw mutal neey ukaady habwiih ni bakul i bakwiitabil, kweelakanoh bend bwa kuhet baatiisumw musang uloolond. Wiiyiiy kwiikal ni mabenesh mu mudimw a Yehow.

² Cikwaabw, bakaady bakwambil neey bikaam uy kuuhal bikasakan kuuhal kwiibuh kuhet baatiisumw eeny? Eecy i uw kaayeeb ulaalang nook? Biby biikal nook, kuneekenoh bend mu mikon. Udy mwa kuy kuuhal ni udy mwa kukumbaj kiihacil ka buseeb aak, ning uw mwiikal sand eecy muut mukuluuh.

3. I biny byaakady mwiin mbul-matady wa ku Etiyopih mwiihanguj Filipw, ni i dijooj kaay ditudy mwa kwiiyihanguj? (Yil. 8:36, 38)

³ Bal Myand yilongel Bapostol 8:36, 38, NWT. Mwiin mbul-matady wa mu Etiyopih uhangujil Filipw mudiil a baat musah mulengel neey: “I cingany cikaakakesh bwa mim kuhet baatiisumw?” Muut a ku Etiyopih waakady ukaam kuhet baatiisumw, ki waakady biin-biin habwiih bwa kulong bwaal bwa buseeb oobw?

4. I mushind kaay waakady Mwiin Etiyopih muleej neey waakady mwiiswiik bwa kutungunuk ni kulong?

⁴ Muut a ku Etiyopih “waakady mwiiy ku Yeruzalem bwa kulomb Mawej.” (Yil. 8:27) Waakady nook mwiin Yuud kaahand wiitabiil citendeleel cya biin Yuud. Kakuy kulandul ulongel myand habitaatal Yehow ya mu mifund yijilang ya mu ciin Ebreh. Cikwaabw, waakady mukat kumanyik bikasakan myand yikwaabw yivul. Nook, haakady Filipw muhetangan ni mwiin mbul-matady mu njil, Filipw waakady mutal muut oow wend ni kulong biny? Waakady wend ni kubal mu mukand a muprofet Yeshaay. (Yil. 8:28) Myand yaakadyey ubal yaakady cyaakudy cya mu spirit cikasakan. Mwiin mbul-matady oow kaakady teng mukat kumanyik bituh malongweesh  makeeh mashimat ma mu Bibl; ki waakady mukat bwa kutungunuk ni kulong.

5. I biny bilongel mwiin ku Etiyopih habitaatal myand yilongeley?

⁵ Mwiin Etiyopih waakady mutam a mbul-matady wa Kandas mukaleng mwaan-mukaj wa ku Etiyopih; “mwiikal ni mudimw a kulam bihak byoos bya Kandas.” (Yil. 8:27) Nook, i muut udy ni bwa kwiikal ni bivul bya kulong ni bwa kwiikal ni majit mavul. Cikwaabw, ulongel bwa kwiikal ni diib dya kuhambidil Yehow. Kaakady bituh ni musangal a kulong myand ya biin-biin; ki waakady cikwaabw ukooyel myand yaakadyey ulong. Nook, mu mishind yoos waakady ulong lwend hakwaaluk mu Etiyopih mutal ku tempel mu Yeruzalem bwa kuhambidil Yehow. Lwend aal lwaakady lulomb kulong meeb mavul, ni kutuul makut mavul, ki muut oow waakady mukat kuhambidil Yehow ning mwaakadyeby bimulomb bwindiy kwiikashishomw bwa kulong naak.

6-7. Lukat lwa mwiin ku Etiyopih bwa Yehow lutungunukil ni kukasakan bikasakan bicy?

⁶ Mwiin ku Etiyopih ulongel myand ya biin-biin ya buseeb yaakady yihyaayihy kudyey ku dyambulwiish dya Filipw. Bwaal bwaakaabumw bwa ku myand ya biin-biin bwaakady neey Yeez i Mesih. (Yil. 8:34, 35) Byaakady biteng biin-biin mwiin mbul-matady oow ku micim bwa hamanyikiley cyaakady Yeez mulong bwindiy. I biny bilongeley hamanyiney kulong myand eey? Waakady mwa kushaal teng mwaakadyey, mwiin Yuud kaahand waakady mwiitabij citendeleel cya biin Yuud waakadyobw baneemek. Hamut a kulongey nook, lukat lwindiy bwa Yehow ni Mwaan Indiy lukasakeen. Myand yilongeley yaakady yimusak bwa kwangatey diihangadik dya buseeb mu shikacil bwa kuhet baatiisumw ni bwa kwiikaley mwiiyij a Yeez Krist. Filipw utadil neey muut oow waakady habwiih, ni yiy kumubaatizey.

⁷ Uw mulond cileejel cya muut wa ku Etiyopih, udy mwa kwiilongolol byeeb bwiibuh kuhet baatiisumw. Udy mwa kuleeb ni kutwiishiibw kwa biin-biin neey: “I cingany cikaakakesh bwa mim kuhet baatiisumw?” Tukontononaay mushind uwudy mwa kulong byeeb myand yaakaabumw yilongel muut wa ku Etiyopih: Waakady mutungunuk ni kulong, waakady ukooyel byaakadyey ulong, ni utungunukil ni kukashish lukat lwindiy bwa Mawej.

8. I biny biwudy ni bwa kulong bilondeshel may mady mu Jah 17:3?

⁸ Bal Jah 17:3. May ma Yeez aam kamiish makwambulwiishok bwiibuh kwangat diihangadik dya kulong Bibl eeny? Bwaal oobw i bwa biin-biin bwa bavul ba kutudy. Ki may maakaabumw aam miitwambambil cikwaabw bwa kutungunuk ni kulong eeny? Cya biin. Twiiyiiy kutungunuk ni kulong bwa “kumanyik . . . Mawej [aakaabumw a biin-biin].” (Mul. 3:11) Kaabaak ni buyiil, wiiyiiy kutungunuk teng ni kulong. Hatuloolong bikasakan, twiiyiiy kwiikal habwiih menmen ni Yehow.—Mus. 73:28.

9. Bikaam tulong biny hatumaman kulong malongweesh matam ma mu Bibl?

 ⁹ Hatutwaatwaadij kulong myand habitaatal Yehow, tuloolong teng malongweesh matam ma mu Bibl. Mu mukand utuminey biin Ebreh, mupostol Pool uleebel bwa malongweesh matam neey: “Myand ya ku butambwiil ya musah a Mawej.” Kaakadyoh bend mwangat “may ma butambwiil ma musah a Krist” ni buseeb bukeeh; Ki hamut a kulongey nook, uleejel neey maakady bu mabeel macyaamwaamw mwaan mutofw. (Ebr. 5:12; 6:1) Ki waakady mwambil biin Krist boos bwa kutungunuk ni kulong myand yivul hakulek kwiimanyin teng ha malongweesh matam aam ma butambwiil ni bwa kulong mu bondok myand ya biin-biin ya mu Diiy dya Mawej. Udyok ni micim ya kulong malongweesh ma mu bundok menmen ma mu Bibl eeny? Udy mukatok bwa kutungunuk ni kukasakan mu diitabij, ni bwa kutungunuk ni kulong myand habitaatal Yehow ni myand yidyey mulongolol eeny?

10. Bwabiny bidy mwa kukasakeen baat bakwaabw bwa kulong?

¹⁰ Nook, bwa bavul ba kutudy i lutat bwa kulong. Uw utaatal bicy? Mu kalaas, udy mulong bwa kubal ni kulong bilengel eeny? Utadil neey kulong kwaakady kukuhetesh musangal ni udy mulong myand yivul eeny? Eecy, udy mwa kuleeb neey kwiishoh bend ni diimany divul dya myand yidy mu mikand eeny? Biby biikal nook, manyik neey kwiin teng uw kaayeeb. Ki manyik neey, Yehow udy mwa kukwambulwiish. I muwaakan ni i Mulongweesh mulengel weeh udyok.

11. I mushind kaay udy Yehow uleej neey ‘i yiy Mulongweesh mutam wiituloolongweesh’?

¹¹ Yehow wiibiibiikan kaayend neey: “i yiy wiinuloolongweesh [Mulongweesh iibuh mutam].” (Ye. 30:20, 21) I Mulongweesh ututukijil baat mu diis, mulengel, ni umvumvw. Utaatal myand yilengel yidy naay balony bindiy. (Mus. 130:3) Ni kiishoh bend wiitulomb yivul yitudy mwa kulong. Vuluk neey, i mukwaakish boong, cya bukish cilengel cyeeh. (Mus. 139:14) I mwiitwaakish micim ya kulong. Cyakahang iitut i mukat bwa tutungunuk ni kulong buyiil—ni twiikal ni musangal hakulong nook. Nook i bya meej bwa ‘kwaalakan teng kwaalakan’ myand ya biin-biin teng kaabaak. (1 Py. 2:2) Ifundil bihacil biwudy mwa kukumbaj, ni iikal ubal ni ulong Bibl ha ciibidil. (Joz. 1:8) Ku dyambulwiish dya Yehow, wiiyiiy kuhet micim ya kubal ni kulong myand yindiy bikasakan menmen.

12. Bwabiny i bya meej bwiitut kulong shikacil a Yeez ni kulangil ha mudimw waakadyey nend hatwiiloolongel?

¹² Iikal ni ciibidil cya kuhitij diib ha shikacil a Yeez ni mudimw indiy a Mawej. I bya buseeb bwiitut kwiidikij menmen Yeez tut bakat kukadil Yehow mudimw, amanaman mu biisang bikasakan eeby. (1 Py. 2:21) Yeez wambiil biin-biin biiyij bindiy habitaatal myand yiikalobw mwa kutwiilangan naay. (Luuk 14:27, 28) Cikwaabw, waakady mujaadik neey biiyij bindiy ba biin-biin baakady mwa kwiiy kushaal ni lulamat kudy Mawej, teng bu mulongeley. (Jah 16:33) Kulong myand yidyobw baleej ya mu shikacil, ni kwiifundil biihacil bwa kumwiidikij mu shikacil iibuh diifuk dyoos.

13. Bikaam tutungunuk ni kulomb biny kudy Yehow, ni bwabiny?

¹³ Diimany kaayaady kadiishoh bend dikumban. Kabingil kaloolong bwiibuh kukaam diimany i bwiibuh kwiikal ni mushind a kulong myand yivul habitaatal Yehow ni bwiibuh kwiikal ni biikadil bu mudy lukat ni diitabij mu myand yindiy. (1 Kor. 8:1-3) Hatuututungunuk ni kulong, tutungunuk ni kulomb Yehow bwa iituvudijilok micim ya kwiitabij. (Luuk 17:5) Waalaalabul ni lukat ku masambil ma nook. Diitabij dya biin-biin didy dishimatil ha diimany dijaalal dya Mawej iitut diiyiiy kukwambulwiish bwiibuh kuy kuuhal ha kulong myand yivul.—Jak 2:26.

14. I mushind kaay waakady mupostol Pyeel mumb kashony ha buseeb bwa kukooyel myand yituloolong? (Tal cikwaabw cifwaatul.)

¹⁴ Mupostol Pyeel uleejel bikasakan neey i bya buseeb hady biiyij ba Krist batungunuk ni  kukooyel myand yidyobw balong. Uleebel bwa bwaal budyobw balond mu Bibl habitaatal Noweh. Yehow wambiil Noweh neey ku dyambulwiish dya mvul a muvumby [mvul a ku bututul nend], Waakady mwangat diihangadik dya kubutul baat babiih ciisang aacy. Kumanyik bituh neey mvul a kubutul nend baat wiiyiiy kutoh kakwaakady teng kukumban bwa kukuuloh Noweh ni biin mu cisak cindiy. Manyik neey Pyeel waakady uleeb bwa ciisang cyaakady mvul a kubutul nend baat kay mwanj kutang kutoh ni “ku mafuk maakady Noweh usong bwaat.” (1 Py. 3:20) Ing, Noweh ni biin mu cisak cindiy bakooyedyel myand yaakadyobw balong mu Diiy dya Mawej hakusongobw bwaat, nook bwaakady bwaat butam. (Ebr. 11:7) Kuunyim Pyeel ufwanyikijil cyaakady Noweh ulong ni mutudy mwa kulong bwa kuhet baatiisumw, ufundil neey: “Baatiisumw, uheehetangan ni bwaal oobw, wiinukukuuloh byeen kaabaak.” (1 Py. 3:21) Mu mushind kaahand, tudy mwa kufwanyikij mudimw utukaakal kaabaak ni mushind udy muut wiiloongolol bwa kuhet baatiisimw ni mudimw waakady Noweh ni biin mu cisak cindiy balong mukacy mwa mivw yivul bwa kusong bwaat. I mudimw kaay uwudy ni bwa kulong bwiibuh kwiikal habwiih bwa kuhet baatiisumw?

15. I mushind kaay utudy mwa kuleej neey tudy baalabul biin-biin micim yiitut?

¹⁵ Bwaal bwa kuuhal butudy ni bwa kulong i kwaalabul biin-biin micim yiitut bwa mpekaat yiitut. (Yil. 2:37, 38) Hatwaalaalabul biin-biin micim yiitut, twiiyiiy kwiikal ni bilong bileeleej neey tudy baalabuk biin-biin. Ukaady mulek kulong myand yidy kayiy yisangeej Yehow, bu mudy bulongavy, kun kwa fwaak, eecy may mabiih eeny? (1 Kor. 6:9, 10; 2 Kor. 7:1; Ef. 4:29) Uw kuy mwanj kulong cikwaabw nook, tungunuk ni kwiikashishomw bwa kwiikal ni biikadil bilengel. Ambil muut uloolong neeb Bibl, eecy jooj bakul ba mu cisumbw bwa bakwambulwiish eecy bakuleej ciwudy mwa kulong. Uw mwiikal sand ni mwiikal kwiinun, tungunuk ni kwiihanguj balel biibuh bwa bakwambulwiish bwa kulek biikadil bibiih bidy mwa kukukaakesh bwiibuh kuhet baatiisumw.

16. I biny bitudy ni bwa kulong tut bakat kuhambidil Yehow ha ciibidil?

¹⁶ I bya buseeb cikwaabw bwa kwiikal ni ciibidil cya kulong myand ya mu spirit. Mu myand oomw mudy kutweel mu bisangil bya biin Krist ni kutwaal maalabul hatudyomw. (Ebr. 10:24, 25) Ni  Hawutaatal neey ukaady mukumban bwa kudiil baat musah, iikal mutwiishibw bwa kwiikal ni ciibidil cya kulong nook, hawudy wiidit bikasakan mu mudimw ukukuuloh buumy bwa baat oow, wiiyiiy kwiikal ni musangal bwa kwiikal kumulong. (2 Tim. 4:5) Uw mwiikal sand eecy uw mwiikal kwiinun, iyihanguj neey: ‘Balel baam i bakat kuvulwiij bwa kutweel kwa mu bisangil eecy bwa kwiikal kuy mu mudimw a bukajaady eeny? Eecy naloolong bilondeshel lukat lwaam?’ Hakwangat diihangadik dya kulong myand ya nook uw kaayeeb, uleeleej neey udy ni diitabij ni udy mukat Yehow Mawej ni udy ni dyanyish bwa myand yidyey ukulongel. Biin eeby i ‘bilong bya baat bady balamat Mawej,’ nook bya bukish eecy milambw yinulaalambul Yehow. (2 Py. 3:11; Ebr. 13:15) Bya bukish byoos bitutwaatwaal ni mucim aakaabumw, bisaasangeej Yehow Mawej iitut. (Fwanyikij ni 2 Korent 9:7.) Tuloolong myand ya nook bwaal yituheehetesh musangal hatwaakaakakish Yehow cidy cilengel bwiitut.

17-18. I ciikadil kaay cya buseeb ciiyiiy kukwambulwiish bwiibuh kuy kuuhal ni kiihacil ka kuhet baatiisumw, ni i mushind kaay mwiikalecy mwa kwiiy kukwambulwiish? (Tusumw 3:3-6)

¹⁷ Hawutuutungunuk ni kuy kuuhal bwa kufik ni kukuhet baatiisumw, wiiyiiy kuhet makab. Baat bakwaabw bady mwa kukusek bwa diitabij dihyaadihy diwukaady naady; bady mwa kukulwiish cikwaabw eecy bady mwa kukukengesh. (2 Tim. 3:12) Hawulwaal diivit bwa kucimun ciikadil cibiih, udy mwa kukab bwa hawudy mwa kutungunuk ni kucilong misang kaahand. Eecy udy mwa kumvw cikwaabw bibiih hakwiikal ni micim kwiiwul-kwiiwul eecy mumvw bibiih bwa hawucidy kuy mwanj kukumbaj kiihacil kiibuh. I biny biikal mwa kukwambulwiish bwiibuh kutaatameen? Lukat bwa Yehow i ciikadil cya buseeb.

¹⁸ Lukat lwiibuh bwa Yehow i ciikadil cilengel cyeeh, ciikadil cilengel menmen ciwudy naacy. (Bal Tusumw 3:3-6.) Lukat luwudy naalw lukasakan bwa Mawej ludy mwa kukwambulwiish bwa kuhit bilengel ni makab mawutwiitwiilangan naam mu shikacil iibuh. Bibl udyaakal teng uleeb bwa lukat lwa bulamat lwa Yehow ludyey uleej biin mudimw bindiy. Ciikadil eecy lukat lwa bulamat cyumvumvwiij neey kakwiiy kulekoh bend bwa kukat biin mudimw bindiy. (Mus. 100:5) Mawej i mukuhang ku ciifwaany cindiy. (Kbwa. 1:26) I mushind kaay uwudy mwa kwiidikij lukat lwa mushind oow?

19. I mushind kaay uwudy mwa kufwiijok bikasakan Yehow bwa myand yoos yidyey mukulongel? (Biin Kalatih 2:20)

¹⁹ Iikal ni ciibidil cya kwanj kufwiijok. (1 Tes. 5:18) Diifuk dyoos, iyihangujok neey: ‘I mushind  kaay udy Yehow muuleej neey i muukat?’ Ni iikal mutwiishibw bwa kufwiijok Yehow mu masambil miibuh, iikal uteelok myand yisunguluk yikaadyey mukulongel. Tal neey Yehow ukuloolongel myand yilengel bwaal i mukukat, teng bumutadil byend mupostol Pool habitaatal Yehow. (Bal Biin Kalatih 2:20.) Iyihanguj neey: ‘Nady mukatok bwa kumuleej byaany neey nady mumukat eeny?’ Lukat lwiibuh bwa Yehow lwiiyiiy kukwambulwiish bwa kutungunuk ni kukasakeen mateet ni kutaatameen makab ni musangal. Lwiiyiiy kukusak bwiibuh kutungunuk ni kuhambidil Yehow ha ciibidil, hakuleej Taat iibuh neey udy mumukat diifuk dyoos.

20. I biny biwudy ni bwa kulong bwa kulay Yehow mu diisambil bwa kumukadil mudimw, ni diihangadik eedy didy ni buseeb kaay?

²⁰ Ciisang aacy, lukat lwiibuh bwa Yehow lwiiyiiy kukusak bwa kulong diisambil dya habwaah. Wiiyiiy kulay Mawej mu diisambil neey udy mukat kumukadil mudimw. Vuluk neey, hawiilaalambul kudy Yehow, udy ni kutakamin kulengel kweeh: Udy mwa kushaal kudyey buyiil. Mucih iibuh kudy Yehow i wa kumukadil mudimw mu biisang bilengel ni bibiih. Kabiinoh bend bikaam bwa uw kumulay cikwaabw. Cya biin, twiikal bamanyik neey hatwiilaalambul kudy Mawej bwa kumukadil mudimw, twendend ni kwangat diihangadik ditam ni kakuy bilel. Ki langil ha bwaal oobw: Wiiyiiy kwangat mahangadik mavul mu shikacil iibuh, mamw ma ku mamw i malengel menmen, ki kakwiin diihangadik dilengel diwiikal mwa kwangat didy mwa kuhitok dya kulambul buumy bwiibuh kudy Yehow. (Mus. 50:14) Sataan wiiyiiy kulong bwa lukat lwiibuh kudy Taat iibuh luneeken, i mutakamin neey kwaakwiiy kushaaloh bend ni lulamat kudyey. Kwiitaboh bend bwa acimun! (Yoobw 27:5) Lukat lwiibuh lukasakan bwa Yehow lwiiyiiy kukwambulwiish bwiibuh kuvuluk mulay iibuh a kukadil Yehow mudimw buyiil ni lwiiyiiy kukasakan ni lwiiy kulong bwa ushaal habwiih menmen ni Taat iibuh udy mu diiwul.

21. Bwabiny tuleeleeb neey baatiisumw kiishoh bend bulekel ki i butambwiil bwa shikacil mukwaabw?

²¹ Uw mwiikal muman kwiilambul kudy Yehow mu diisambil bwa kumukadil mudimw, ambil bakul ba mu cisumbw ciwudy habitaatal kulong bwaal bukwaabw bwa buseeb bwiiyiiy kulond. Nook, iikal teng muvuluk neey, baatiisumw kiishoh bend bwaal bwa bulekel ki i bwaal bwa butambwiil. I butambwiil bwa shikacil wa kukadil Yehow mudimw ukiish ni bulekel. Nook kashish lukat lwiibuh bwa Taat iibuh teng kaabaak. Ifundil biihacil bidy mwa kulong bwa lukat lwiibuh lwiikal lukasakan menmen diifuk dyoos. Kulong nook kwiiyiiy kukusak bwiibuh kuhet baatiisumw. Diifuk aady diiyiiy kwiikal diifuk dilengel dyeeh! Ki diifuk aady diiyiiy kwiikal butambwiil bwa shikacil mukwabw. Lukat lwiibuh bwa Yehow ni bwa Mwaan indiy lutungunuk teng ni kukasakan mu micim buyiil!