I baalel mu 1955 ni nady kasuland ka baan-balum basat. Nady mukasakeen kucyaash kwa Finland, mu taawuny ubiibiikanobw leeloow neey, Vantaa.

Maam aamin uhetel batiisumw ni kushaaley Temw a Yehow mivw yikeeh kuuhal kwa kuulelobw. Ki taat kaakady mukat myand ya biin-biin ni kaakady wiitabil maam bwa kwiitulongweeshey Bibl eecy bwa kuy neet mu bisangil bya cisumbw. Nook maam waakady wiitulongweesh malongweesh ma butambwiil ma mu Bibl haakady taat kayoh.

Kacy ku butofw bwaam, nangacil dihangadik dya kulamat teng Yehow. Cileejel, hanacyaady ni mivw mwandamuteket, mulongweesh iitut waakady muufulwiil mund bwaal cyaakadyoh bend mukat kudy verilättyjä (Mikat yilong ni mash ya mu Finland). Uukwaacil ni cikam cyaakaabumw ku mishik bwa kuutubuley mukan ku makand bwa neey aafindik katuh ka mukat aaw kaakadyey mukwaat ku cikam cikwaabw katung ku somw. Nakushiil cikam ku somw waahon.

Hanaakady ni mivw 12, taat aamim ufwiil. Nook naakady mwa kutweel mu bisangil bya cisumbw. Biin-kweet ba mu cisumbw baakady baatabalel bilengel ni biineeby bilongel bwa mim kuy kuuhal mu spirit. Natangil kubal Bibl diifuk dyoos ni naakady nalong mikand yiitut ya biin-Krist ni cisumy. Biibidil bilengel bya kwiilongel eeby biiyambulwiishil bwa mim kuhet batiisumw ni mivw 14, mu diifuk dya 8/8/1969.

 Hanamanyin kalaas, natangil kulong mudimw a bu seb a njil bwa ha ciibidil. Kuunyim kwa yeng yiikeeh, nayiil ha cyaab cyaakadyobw bakaam bakajaady bavul ku Pielavesi, habwiih ni hakacy ha cibunj cya Finland.

Ku Pielavesi, i kuk kunahetelengan ni sangiikaj wiiyil maacimen aam unady mukat, Sirkka. Naakady mumukat biin-biin bwaal waakady ni kwiiwheekesh ni mukat Yehow bikasakan. Kaakadyoh bend ukaam kuy lutumb eecy ukaam biit bivul bya ku nyeet. Tut boos twaakady tukaam bwa kulong cidy cilengel bwiitut mu mudimw a Yehow ni twaakady biitwaal bwa kulong mudimw woos waakadyobw biitulomb bwa kulong. Tutweelel mu maluw mu diifuk dya 23/3/1974. Hamut iitut kusangal mu suuny a mulow a maluw, tuyiil kakal mudimw ku Karttula, cyaab cyaakadyobw bakaam bakajaady ba Bukaleng bavul.

Teng ku butambwiil bwa maluw miitut, Yehow waakady mwiituleej neey wiiyiy kwiitwaakish biit bya ku nyeet bitudy naaby diikeng tut bakaam cya kuuhal-hal Bukaleng bwindiy. (Mat. 6:33) Cileejel, ku Karttula, katwaakadyoh bend ni mashiny. Kuuhal, twaakady tulong lwend ni diikal. Ki mu ciisang cya mashik, muneet waakady uhweek ni muush mwa cijeng. Byaakady bikaam bwiitut kwiikal ni mashiny bwa kudiil baat ba mu teritwaar mutam wa cisumbw musah. Ki katwaakadyoh bend ni makut ma kuland naam mashiny.

Mu ciisang citwaakady katuy batakamin, yaay aamim wiiyil kwiitukumbul. Wiitwaakishil mashiny mindiy. Muman kuland ni mikand ya mashiny. Twaakady ni bwa kusumb teng kasolony. Bulekel bwa byoos tuhetel mashiny matwaakady tukaam.

Yehow uleejel neey, waakady mwangat bujit bwa kwiitwaakish biit bya ku nyeet bitwaakady tukaam. Mudimw iitut waakady wa kuteek myand ya Bukaleng ha cyaab cya kuuhal.

Hatwaakady mu kalaas ka ba seb a njil mu 1978, Raimo Kuokkanen, a waakaabumw wa ku balongweesh wiitwambiil bwa kwiiwuj formileer bwa kuy ku kalaas ka Kalaad. Nook tutangil kulong angleh bwiitut kwiikal bakumban bwa kuy katweelomw. Ki mu 1980, katuy ning banj kwiiwuj formileer aaw, biitubiikeen bwa tut kuy kakal mudimw ku biroh bya filiyal wa mu Finland. Ciisang aacy naabw biin ku Betel kabaakady mwa kwiiwuj formileer bwa kuy ku  Kalaad. Ki twaakady tukaam kukadil Yehow mudimw cyaab cyaakadyey yiy mutal neey i cilengel bwiitut ki kiish cyaab citwaakady tut tutal neey i cicy cidy cilengel. Nook twiitabil bwa kuy ku Betel. Ki tutungunukil ni kulong Angleh mu mushind a neey hakwaamweek mushind iitut kwiiwuj formileer a kuy ku Kalaad twiiwuj.

Kuunyim kwa mivw yikeeh, Kasumbw Kaludik kaleebel neey, biin ku Betel bady mwa kwiiwuj formileer a kuy Kalaad. Twiiwujil formileer musang aakaabumw, kiish neey bwaal katwaakady bakat ku Betel ki bwaal twaakady bakat kwiitwaal bwa kuy kakal mudimw cyaab cyoos cyaakadyobw bakaam bakajaady bavul tut biikal ni mushind a kulong nook. Biitubiikeen mu kalaas ka Kalaad ka 79 kahwiil mu suuny a 9/ 1985. Biitutumin mu Colombie.

Mu Colombie, biitutumin bwa musang a kuuhal ku biro bya filiyal. Naakady niikashishomw bwa kulong mudimw a mim bilengel, ki kuunyim kwa muvw aakaabumw utulongel ku filiyal, nalangil neey bikaam biitushiitulul. Bwa musang a kuuhal ni waakaabumw mu shikacil aam, nalombel bwa kwiitushiitulwiilobw mudimw. Kuunyim biitutumin bu baamisiyoneer mu taawuny a Neiva, mu province a Huila.

Nadyaakal teng mukat mudimw a bukajaady. Bu munaakady kaayaany seb a njil mu Finland, naakady nadiil baat musah misang yikwaabw kutangil kuhacy teng ni kawul. Bu mutwaakady biin maluw bahyaabahy, mim ni Sirkka twaakady tuhicish diifuk dituutul mu mudimw a bukajaady. Hatwaakady tukadiil baat musah mu teritwaar ya kuleeh, twaakady misang yikwaabw tulaal mu mashiny miitut. Hatwaakady tulong nook byaakady biitukeeheshelok lwend ni tuhet mushind a kutang mudimw diifuk dyaakady dilond kuhacy ni bweh.

Bu mutwaakady tulong mudimw bu baamisiyoneer ha cyaab aacy, tumvwiil cikwaabw musangal wa bwiin utwaakady nend kuuhal bwa mudimw a bukajaady. Cisumbw ciitut ciyiil kuuhal, ni biin-kweet baan-balum ni baan-bakaj ba mu Colombie biituleejel kaneemw, lukat ni kwaan.

Habwiih ni Neiva kwaakady taawuny yikwaabw mwaakady kamuy Baatemw. Naakady niitish mut bikasakan bwa mushind waakady musah mulengel mwa kufik ha byaab aaby. Ki bu mwaakady balongavy bal diivit byaab aaby, byaakady bikasakan bwa muut waakady kay mwaan a ngand kuyoh. Nook natangil kusambil bwa muut ning waakaabumw wa mu bibunj eeby ashaalok Temw. Naakady nalang neey muut wa mu taawuny eey waakady mwa kushikacil mu Neiva bwindiy kulong myand ya biin-biin. Nasambiil cikwaabw neey kuunyim kwa yiy muman kuhet baatiisumw ni mushimat mu spirit, ahingomw kwaababw bwa kudiil baat musah. Cyaakady mumanyik neey Yehow wakaady ulangil baat aab meej mahitok ni manaakady nibalangil.

Mafuk makeeh bituh natangil kulong Bibl ni sangwiilum mukwaabw dindiy Fernando González. Waakady mushikacil mu Algeciras cyumw cya ku bibunj mwaakady kamuy Baatemw aamw. Fernando waakady wend kilometre 50 bwa kwiiy ku mudimw mu Neiva. Waakady ulongolol bilengel dilong dyoos dya Bibl, ni utangil kutweel bisangil byoos. Luming lwaakaabumw ni kutang kulongey Bibl, Fernando utangil kusangish baat ba mu taawuny aababw aaw, wiibalongweesh byaakadyey ulong mu dilong dindiy dya Bibl.

 Fernando muman kutang kulong Bibl, uhetel baatiisumw kuunyim kwa suuny 6 mu suuny a 1/1990. Kuunyim ushaadil seb a njil wa ha ciibidil. Bu mwaakady mu Algeciras Temw aakaabumw, biro bya filiyal byaakady kaabaak ni mushind a kutumomw baaseb a njil ba habwaah. Mu suuny 2 mu 1992 balongel cisumbw mu taawuny aamw.

Fernando waakady mudiil teng biin mu taawuny aababw musah mulengel eeny? Waakweeh! Habakiley, yiy ni mukaj indiy bayiil mu San Vicente del Caguán, taawuny mukwaabw mwaakady kamuy Baatemw. Kwiinaak bajuudilok cisumbw. Mu 2002, bateekel Fernando mulombol a cijeng. Yiy ni mukaj indiy Olga bacituutungunuk ni kulong mudimw oow teng ni leeloow.

Nady muhetel ku myand eey diilongweesh dya neey, bidy ni buseeb bwa kusambil bwa myand yisunguluk yitaatal mudimw iitut a Mawej. Yehow uloolong bitudy katuy mwa kulong. Bulekel bwa byoos, bitwaanaanun i bindiy, kabiishoh bend biitut.—Mat. 9:38.

Mu 1990 biitutumin bwa kuy kakal mudimw bu mulombol mwiin lwend. Cijeng ciitut cya kuuhal cyaakady mu Bogotá, mu cimaamend a bukaleng. Tumvwiil mooy neey katwaakadyoh bend mwa kuman kulong mudimw oow bilengel. Mim ni mukaj aam twaakady baat biituh katuy ning ni dimany dimw dya habwaah. Katwaakadyoh bend biimbindil kushiikat mu taawuny mutam mudy baat biikal ni bivul bya kulong. Yehow ukumbajil mulay indiy udy mu biin Filipw 2:13 wa neey: Bwaal i “Mawej kaayend ukaakal teng kukal mudimw mukacy mwiinun, bwiinun kufik ku kukat ni ku kulong bilengel byoos bidyeh muhangadik.”

Kuunyim, biitutumin mu cijeng cya mu taawuny wa Medellín, utubaman kutel ku butambwiil. Baat baakady bimbindil myand ya cikis yaakady yilongek mu njil ni kabicyaakadyoh bend biibakemesh. Cileejel, diifuk dikwaabw hanaakady nalombol dilong dya Bibl mu nzubw mukwaabw, baat bakwaabw batangil kulonzangan hanj. Naakady teng bu waakufw ki mulony a Bibl utungunukil ni kubal cikos kay ukem. Hamanyiney kubal uulombel, bwindiy kuhatukey. Kuunyim kwa kalung kakeeh, wiiyiilok ni baan batofw babidy ni uleeb ni lutuul loos neey, “fwiilanyaayok lus, byaakady bikaam neey nakangat baan baam aab.”

Kwaakady biisang bikwaabw bitwaakady mu buuhund. Diifuk dikwaabw twaakady tudiil baat musah ku ciibel ni ku ciibel natadil mukaj aam wend wiiy kuuhal kwaam wend ni kut lubil mumvw mooy. Uleeb neey muut ubaalonz. Naakem. Ki kuunyim tumanyikil neey, muut waakady ulonzangan oow kaakadyoh bend ukaam kulonz Sirkka; ki waakady ulonz muut waakady habwiih nend wend uhit.

Kuunyim kwa mafuk, mooy utwaakady nend bwa myand ya cikis uhwiil. Tuhetel mucim mukasakan ku dyambulwiish dya mucim mukasakan waakady Baatemw ba ha cyaab aacy baleej haakadyobw batwiilangan ni myand ya nook ni yikwaabw yihit ni yiineey. Tuleebel neey bu mudy Yehow mwiibambulwiish, udy mwa kwiitwambulwiish byeet. Twaakady teng tulond mibel ya bakul ba ha cyaab aacy, tushaal badimuk ni tushiy myand yikwaabw mu byaal bya Yehow.

Cya biin, myand yikwaabw kayaakadyoh bend ni buuhund bu mutwaakady tulang. Diifuk dikwaabw  hanaakady mukakumbul nzubw mukwaabw, numvwiil hanj bu may ma baamaam babidy bend baboyangan. Cyaakadyoh bend mukat katal mudy baat bakokangan, ki mwiin ku cibel uuyambiil bwa mim kuhatukil mu lutand. Aas yaakady selembw yibidy yaakady “yikokangan” yiidikij biin mutumb.

Mu 1997, baateekel mulongweesh mu kalaas ka kulongweesh myand yitaatal mudimw a bukajaady. b Nadyaakal teng mukat kutweel mu tulaas twa myand ya Mawej, ki cidyaakaloh mwanj kulang meej neey nady mwa kuhet dyaakatook dya kwiikal mulongweesh mu kamw ka kudyet.

Kuunyim nalongel mudimw bu mulombol a distrik. Hafudilebok mudimw a distrik, nahingilomw mu cijeng. Mukacy mwa mivw yihit ha 30, naakady nakal mudimw bu mulongweesh ni mulombol a cijeng. Nahetel mabenesh mavul mu midimw eey. Ki byoos eeby kabyaakadyoh bend biheehel. Iimanaay niinumvwiij.

Naakady muut a diikand. Biineeby biiyambulwiishil bwa mim kutaatameen myand yikasakan. Ki misang yikwaabw naakady niikashishomw ni cisumy civul menmen bwa kulongolol myand mu bisumbw. Haakady mushind umweek, naakady nabel bakwaabw bikasakan bwa kwiikalobw ni lukat ni meej malengel ni biin-kwaabw. Mu biisang bya nook, naakady nakaakal bwa kuleej biikadil eeby.—Rom 7:21-23.

Misang yikwaabw naakady niiyumvw mukooyel mu mabok bwa bilem byaam. (Rom 7:24) Ciisang cikwaabw nasambiil Yehow naamwambil neey byaakady bilengel nalek mudimw a bu misiyoneer nahingomw mu Finland. Ku maakawul, natweelel mu bisangil bya cisumbw. Malongweesh makaakashish manahetel maajaadikil neey bikaam nashaal mu mudimw aam ni natungunuk ni kulongolol bilem byaam. Kacy teng ku diifuk aady, biitengel ku micim bwa mwaakady Yehow mwaalabul hatook diisambil dyaam. Nady ni dyanyish divul bwa mushind udyey muuyambulwiish bilengel bwa mim kucumun bilem byaam.

Mim ni Sirkka tudyaakal twiiyumvw biin diibanz kudy Yehow bwa dyaakatook didyey mwiitwaakish dya kukal mudimw a ku diib ni ku diib mu shikacil iitut. Nady cikwaabw ni dyanyish divul bwa mudyey muuyaakish mukaj udy muukat ni muuleej lulamat mu mivw yoos eey.

Mafuk makeeh aam nakuukumbaj mivw 70 ni niiyiiy niimanyik mudimw a bulongweesh ni wa buumulombol a cijeng. Ki biineeby kabiishoh bend biikooyesh mu mikon. Bwabiny? Bwaal nady mutwiishiibw biin-biin neey cyaakaakish Yehow lutumb i mudimw utumukaakadil ni kwiihweekej ni lutumb lutumuhwaah lwaalaalukil mu micim mwiiwul teh ni musangal ni lukat ni dyanyish. (Mik. 6:8; Mark 12:32-34) Bwitut kwaakish Yehow lutumb, kabiish bikaam neey teng baat boos batal bituloolong.

Analaalang bwa midimw yinady mulong, nataatal neey ciiyiheteloh bend bwaal naakady ni buseeb kuhitok bakwaabw eecy ciheteloh bend dyaakatook eedy bwaal neey naakady ni dimany divul. Kabiishoh bend naak, Yehow uuyaakishil midimw eey bwa bukish bwindiy. I muuyaakish dyaakatook eedy ning munady ni bilem. Nady mujaadik neey nady mufik kukukumbaj midimw eey ni dyambulwiish dya Yehow. Ki mushind udy kubul kwaam kwa diikand kwaakish bukash bwa Mawej lutumb.—2 Kor. 12:9.