1. Paradiiz a mu spirit i biny, ni bikaam twiiswiik bwa kulong biny?

 LEELOOW, kudy Paradiiz a mu cinfwany udy mwiiwul teh ni baat baloolong myand yileng. I mwiiwul teh ni baat miliyoh ni miliyoh bady mu diitalal diidiin. Baat bakaady mu Paradiiz oow, i biiswiik bwa kulek kwaalukomw. Bakaakaam cikwaabw bwa baat bavul biiy batweel mu cyaab cya habwaah eecy. I cyaab kaay aacy? I Paradiiz a mu spirit! a

2. I biny bikeekemesh habitaatal Paradiiz a mu spirit?

² Cikeekemesh i cya neey Yehow i muhang cyaab cya mu cinfwany cidy baat bashikat mu diitalal ni mu kaacyumw eecy mu bulongolody bubiih bwa Sataan mudy buuhund ni baat bakinangan oomw. (1 Jah 5:19; Yis. 12:12) Mawej iitut a lukat i mutal myand yoos yibiih yiloolongek mu bulongolody oobw ni uloolong bwa biin mudimw bindiy biiyumvw mu diitalal, bwa kutungunukobw ni kumukadil mudimw ni musangal. Mu diiy dindiy bumvumvwiij Paradiiz a mu spirit bu ‘cyaab cya kusokotel’ ni bu “luhang lwa mitond lumyaamin mwanz bilengel.” (Ye. 4:6; 58:11) Ku dyambulwiish dya mabenesh ma Yehow, baat bady bashikat mu Paradiiz oow, biiyumvumvw ni musangal ni ku mat talal mu mafuk makasakan ma bulekel aam.—Ye. 54:14; 2 Tim. 3:1.

3. I mushind kaay waakady may mady mu Yeshaay 65 makumban mu ciisang cya Izaleel wa kal?

³ Yehow ukadil mudimw ni muprofet Yeshaay bwa kumvwiij shikacil wiikal nend aab biikal mu Paradiiz a mu spirit. Udy mwa kuhet dyumvwiij eedy mu Yeshaay 65 ukumbeen bwa musang a kuuhal mu muvw a 537 K.K.Y. Ciisang aacy, biin Yuud baakady baalabul micim yaababw bahatukil mu buhik mu Babiloon baahingomw mu cibunj cyaababw. Yehow ubeneshel baat bindiy ni wiibambulwiishil bwa kwiibakululobw cibunj cilengel cya Yeruzalem  cyaakadyobw biihul ni bwa kwiibakululobw tempel cyaab citam cyaakadyobw bahambidil Yehow mu Izaleel.—Ye. 51:11; Zak. 8:3.

4. I mushind kaay udy Yeshaay 65 mukumban mafuk miitut aam?

⁴ May ma buprofet ma Yeshaay makumbeen bwa musang mwiibiidy ku butambwiil bwa muvw a 1919 B.B., haakady bahambidil ba Yehow ba mafuk miitut aam bahatuk mu Babiloon mutam. Kutangil teng ha ciisang aacy, Paradiiz a mu spirit utangil kwaalabal ha bulab butuutul ku bikeeh ku bikeeh. Bakajaady ba Bukaleng ba cisumy balongel bisumbw bivul ni baakady baleej biikadil bya bwiin Krist. Baan-balum ni baan-bakaj baakady balong myand ya cikis ni bulongavy, “baakady bavwaal buumuut buhyaabuhy bwaakady buhang bilondeshel lukat lwa Mawej.” (Ef. 4:24) Cya biin, mabenesh mavul mady Yeshaay muleeb miiyiiy kukumban mu mafuk maciiyiiy mu bulongolody buhyaabuhy. Ki ning leeloow, Paradiiz a mu spirit wiituheehetesh mabenesh mavul. Tutalaay mudy Paradiiz a mu spirit wiitwambulwiish ni bwabiny kabiish bikaam neey twaalukomw.

MUDY BAAT BADY MU PARADIIZ A MU SPIRIT BIIYUMVW

5. Teng mudyeby bileej mu Yeshaay 65:13, I biny biituloolong musangal mu Paradiiz a mu spirit?

⁵ Bady ni makand ma nyeet ni biibakaakashish. May ma buprofet ma Yeshaay maleeleej kushiilangan kutam kudy hakacy ha shikacil a baat bady mu Paradiiz a mu spirit ni aab bady kabayomw. (Bal Yeshaay 65:13.) Yehow waakaakish bahambidil bindiy byoos bidyobw bakaam bwa kushaalobw habwiih nend. Tudy ni spirit mujilang indiy, diiy dindiy didyey mufundish, ni byaakudy bivul bya mu spirit, nook tudy mwa ‘kudy, . . . kun, . . . [ni] kusangal.’ (Fwanyikij ni Myand Yisokolweel Jah 22:17.) Myand yiloolongek mu mushind mushiilangan menmen bwa baat bady kabay mu Paradiiz a mu spirit “bady ni nzal . . . , ni min ya mwanz . . . , [ni] bumvw mu mut teh.” Ni kabiishoh bend bamanyik Mawej.—Amos 8:11.

6. I mushind kaay udy Yowel 2:21-24 uleej bya bukish bikwaabw bidy Yehow wiitwaakish, ni i mushind kaay udyeby mwa kwiitwambulwiish?

⁶ Mu may ma buprofet ma Yowel i bateelomw biit bu mudy: tet, viny ni diisaby dya oliiv bwa kuleej neey Yehow waakaakish baat bindiy biit bidyobw bakaam ni cikam cilekelel kuteekeloh ni byaakudy bya mu spirit. (Yowel 2:​21-24) Uloolong nook kuhicil ku Bibl, ku mikand yiitut yumvumvwiij Bibl, sit iitut a internet, bisangil biitut ni bihwiil bya Rejon ni bya cijeng. Tudy mwa kudy byaakudy bya mu spirit eeby diifuk dyoos, nook twiiyumvumvw ni makand ma nyeet malengel ni biitukashish ku micim.

7. Bilondeshel Yeshaay 65:14, i biny biloolong bwa twiikal ni ‘micim yibatam mund’?

⁷ Bady ni musangal ni biiyumvumvw bilengel. Baat ba Mawej bady mwa “kumb bilabul” bwaal bady ni dyanyish divul bwa Yehow. (Bal Yeshaay 65:14.) Myand ya biin-biin ni malay makaakashish bidy mu Diiy dya Mawej, ni kutakamin kwiitut kukasakan kudy kushimacil ha mulambw a Krist wa cya kukuul naacy baat, biloolong bwa twiikal ni “micim yibatam mund.” Kwiisambil ha myand eey ni biin-kweet baan-balum ni baan-bakaj ba mu spirit kwiitwaakaakish musangal iimwiin weeh!—Mis. 34:8; 133:1-3.

8. I myand kaay yibidy ya buseeb yidy mu paradiiz a mu spirit?

⁸ Lukat ni kaacyumw bidy mukacy mwa baat ba Yehow, i yiy myand yibidy ya buseeb yidy mu paradiiz a mu spirit. ‘Ciit ciitukwaakwanjok bwiitut kwiikal baswiikakan’ eecy, ciitwambambulwiish bwiitut kulangil ha mushind wiikal shikacil mu bulongolody buhyaabuhy mwiikal baat ba Yehow bakatangan bikasakan ni biikal mu kaacyumw kuhitok ni leel. (Kol. 3:14) Mwiin-kweet mwaan-mukaj mwiin Krist umvumvwiij bwa cyaakadyey mutal kudy baat ba Yehow haakadyey muhetangan naab bwa musang indiy a kuuhal uleeb neey: “Cyaakadyoh  bend mumanyik mwa kwiikal ni musangal ning mu cisak cyaam. Musang a kuuhal unatadil baat baleejangan lukat, i mu Baatemw ba Yehow.” Muut woos ukaakaam kwiikal ni musangal a biin-biin eecy ukaam kwiiyumvw bilengel bikaam atweel mu paradiiz a mu spirit. Ning biin mu bulongolody oobw balang biny bwa biin mudimw ba Yehow, bady ni diijin dya lutumb ni luumw lulengel mu cisak cindiy cya ha bulab butuutul.—Ye. 65:15.

9. I biny bidy Yeshaay 65:16, 17 ulay bwa myand yiitukaakabish leeloow?

⁹ Biiyumvumvw biilekelel ni micim yibatam mund. Yeshaay 65:14 uleeleeb bwa aab baleelek kutweel mu paradiiz a mu spirit neey: ‘basoosok bwa malang-lang madyobw naam mu micim [ni] badiidil bahomw boos.’ Ki tudy mwa kuleeb bicy bwa myand yoos yikaakabish baat ba Mawej? Bulekel bwa byoos makab aam “biiyiiy kwiimavulamin [ni] miiyiiy kuy kuleeh ni mees [ma Mawej].” (Bal Yeshaay 65:16, 17.) Yehow wiiyiiy kuful myand yoos yiitukaakabish ni bulekel bwa byoos, katwiish twiiy tuvuluk kabidy mwaakadyey yiitulong ku micim.

10. Bwabiny wanyanyish dyaakatook dya kwiikal ni biin-kween baan-balum ni baan-bakaj? (Tal cikwaabw cifwaatul.)

¹⁰ Ning kaabaak, twiiyumvumvw micim yibatam mund hatudy mu bisangil biitut bya biin Krist mwaab utuhiihicish diib ni biin-kweet ni tuvulamin myand yoos yiitwiitiitish mut ya mu bulongolody bubiih oobw. Tut byeet twambambulwiish bakwaabw bwa kwiiyumvobw micim yibatam mund hatwiibaleeleej lukat, musangal, diitalal, myand yilengel ni kutalal myand bidy mu diimum dya spirit mujilang a Mawej. (Kal. 5:​22, 23) Tudy ni dyanyish divul bu mutudy mu bulongolody bwa Mawej! Boos bashaashaal mu paradiiz a mu spirit biiyiiy kutal mwiikal mulay Mawej wa “diiwul dihyaadihy ni bulab buhyaabuhy” mwa kuwaakan.

11. Bilondeshel Yeshaay 65:18, 19, i mushind kaay udy paradiiz a mu spirit udy Yehow muhang wiitutal?

¹¹ Bady ni musangal muvul ni baanaan. Yeshaay umvumvwiij bwabiny bikaam ‘tusangal ni twiikal nu musangal’ mu paradiiz a mu spirit. I Yehow udy muhang cyaab eecy. (Bal Yeshaay 65:18, 19.) Kabiish bikemesh bwiitut kuleeb neey Yehow ukaakal neet mudimw bwiitut kwambulwiish baat bwa kwaalukobw mu malongolody ma baat ma mu bulongolody bubiih oobw, mady kamay miibalongweesh myand ya biin-biin habitaatal Mawej, bwiitut kwiibambulwiish bwa kutweelobw mu paradiiz iitut mulengel a mu cinfwany oow! Tudy ni musangal bwa mabenesh mutuheehet bu mutudy mu bulongolody buloolongweesh myand ya biin-biin, ni biineeby biitusaasak bwiitut kwiiyambiloh baat bakwaabw.—Jer. 31:12.

12. Wiiyumvumvw bicy bwa malay mady mu Yeshaay 65:20-24, ni bwabiny?

 ¹² Tudy cikwaabw ni dyanyish ni musangal bwa kutakamin kutudy naakw bu mutudy mu paradiiz a mu spirit. Lang ket bwa myand yoos yiwiiyiiy kutal ni kulong mu bulab buhyaabuhy bwa Mawej! Bibl ulaalay neey: “Kabiish biiy bataanomw mwaan . . . ufw ucidy mutook-took, eecy munun kay ununah ununahilomw.” Twiiyiiy ‘twiibak mazubw ni twiiyiiy tulaalomw [ni] twiiyiiy tukun mviny, ni twiiyiiy tudy tumum twa yiy.’ ‘Katwiishoh bend twiiy tumon mal bwa bituh-bituh’ bwaal biiyiiy ‘kwiitufwiil kis kudy Yehow.’ I mwiitulay shikacil mulengel a musangal mwiikal ni kiihacil ka biin-biin. ‘Ning bab kabay banj kubiikan,’ wiiyiiy kumanyik bikaakaam woos wa kudyobw ni ‘waakaakish boos bady batal bikaakaamobw.’—Ye. 65:20-24; Mis. 145:16.

13. I mushind kaay udy Yeshaay 65:25 umvwiij mudy baat bashiitulul shikacil aababw hadyobw batang kukadil Yehow mudimw?

¹³ Bady ku mat talal kabay bangam bwaal. Ku dyambulwiish dya spirit a Mawej, baat bavul baakady balong myand ya cikis eecy yikiish yijaalal, i bashiitulul shikacil yaababw mu mushind ukeekemesh. (Bal Yeshaay 65:25.) I biikashishomw bikasakan bwa kulekobw biikadil byaababw bibiih eeby. (Rom 12:2; Efez. 4:22-24) Cya biin, baat ba Mawej bacidy teng baat bakiish bawaakan, ki bwabiny bitufiifikil bwiitut kulong bilem. Ki Yehow i muswiik “baat boos” bady bamukat ni bakat baat naabw mu kaacyumw, ki bwabiny bady mu diitalal dya biin-biin ni mu kaacyumw. (Tiit 2:11) Teng Mawej mwiin bukash boos i yiy udy mwa kulong cishim cya nook!

14. I mushind kaay udy may mady mu Yeshaay 65:25 makumban mu bwaal bwa mwiin-kweet kaahand?

¹⁴ Baat bady mwa kushiitulul buumuut bwaababw biin-biin eeny? Langil ket ha bwaal oobw. Sangwiilum mukwaabw bamukwaacil misang ni misang hacyaakadyey ni mivw 20 bwa myand ya cyendend, ni myand ya cikis. Bamumbiil mu bulok bwaal waakady mwiib mashiny ni bwa myand yikwaabw yitam yibiih. Waakady teng habwiih bwa kutang diivit ni muut. Humvwiiley myand ya biin-biin bwa musang indiy a kuuhal ni mutang kutweel bisangil bya Baatemw ba Yehow, waakady mutwiishiibw neey waakady muhet kiihacil kady naak buumy, ka kuhambidil Yehow—mu paradiiz a mu spirit. Kuunyim kwa yiy muman kuhet baatiisumw ni mushaal temw, waakady teng ulangil ha mushind waakady Yeshaay 65:25 mumukumbanyin. Muut waakady mwiin cikis bu tambw, ushaadil mwiin diitalal bu mukook.

15. Bwabiny tudy bakat kubiikan baat bakwaabw bwa biiy batweel mu paradiiz a mu spirit mutudy, ni i mushind kaay utudy mwa kulong nook?

¹⁵ Yeshaay 65:13 utaatang ni may aam: “Yehow mukaleng a diiwul ni bulab uleeleeb neey.” Verseh a 25 naabw uhwaah ni may aam: “I mim Mawej [Yehow] uleeleeb naak.” May mindiy madyaakal teng makumban. (Ye. 55:10, 11) Paradiiz a mu spirit udyok biin-biin leeloow. Yehow i muhang cisak cya bahambidil bindiy mu mushind a habwaah. Bu mutudy mu cisak eecy, tudy mu diitalal dya bii-biin ni katwiish ni ciitut kwangam mu bulab bwa cikis oobw. (Mis. 72:7) Bwa bwaal oobw tudy bakat kwambulwiish baat bavul bwa kwiiyobw mu cisak ciitut cya biin Krist cya ha bulab butuutul. Tuloolong nook hatwiitwaatwaal mu kwaalabul baat bwa kushaalobw biiyij.—Mat. 28:19, 20.

MWA KWAMBULWIISH BAKWAABW BWA KUTWEELOBW MU PARADIIZ A MU SPIRIT

16. I biny bidy mwa kwambulwiish baat bwa kutweelobw mu paradiiz a mu spirit?

¹⁶ Muut woos wa kutudy udy ni mudimw mutam wa kukok baat bwa kutweelobw mu paradiiz a mu spirit. Tudy mwa kukumbaj mudimw oow teng tut biidikij Yehow. Kiish ulongesh baat myand ku bukol bwa kutweelobw mu bulongolody bwindiy. Ki hamut ha kulong nook, “ukookok” baat kudyey mu mushind mulengel. (Jah 6:44; Jer. 31:3, NWT) Baat ba micim yilengel bady  balong habitaatal lukat lwa Yehow ni buumuut bwindiy bulengel, i bafweej nend habwiih biheehel. I mushind kaay udy biikadil biitut bilengel ni bilong biitut bilengel mwa kukok baat mu paradiiz a mu spirit?

17. I mushind kaay utudy mwa kukok baat bakwaabw mu paradiiz a mu spirit?

¹⁷ Umw mushind utudy mwa kukok baat mu paradiiz a mu spirit i kulongel biin-kweet myand mu mushind mulengel ni lukat. Hadyaakal baat beeny batweel mu bisangil biitut bya cisumbw, tukaakaam neey baleeb may ma bwiin maleebel baat baakady kabay biin kwiitabij batweelel mu bisangil bya cisumbw cya biin Korent wa kal baleeb neey: “I biin-biin Mawej udy mukacy mwiinun.” (1 Kor. 14:24, 25; Zak. 8:23) Cya biin bikaam tutungunuk ni kulond mubel wa neey, “shikataay talal mukacy mwiinun.”—1 Tes. 5:13.

18. I biny bidy mwa kukok baat mu bulongolody bwiitut?

¹⁸ Bikaam twiikal teng twiikashishomw bwa kutal biin-kweet biin Krist baan-balum ni baan-bakaj bu mudy Yehow wiibatal. Tuloolong nook hakwiimanyin ha biikadil bilengel bidyobw naaby, ki hakulek kwiimanyin ha bilem byaababw biikal mwa kujimban mafuk kuuhal ook. Tudy mwa kuman bilumbw kaay byoos bidy mukacy mwiitut ni meej ma lukat hakwiikal ‘baat balengel myand, biiteeteek ha cyaab cya bakwaabw, ni bafwiifwiilangan lus ni mucim aakaabumw.’ (Ef. 4:32) Nook paradiiz a mu spirit wiiyiiy kukok baat bady bakat bwa biibalongel myand mu mushind aakaabumw oow. b

 SHAAL MU PARADIIZ A MU SPIRIT

19. a) Teng mudyeby bileej mu kazubw ka neey “ Bayiil baaman biiyok,” i biny bidy bamw baleeb hadyobw bahingomw mu paradiiz a mu spirit? b) Bikaam twiikal biiswiik bwa bwaal kaay? (Tal cikwaabw cifwaatul.)

¹⁹ Tudy ni dyanyish divul bwa paradiiz iitut a mu spirit! I mulengel weeh ni mudy baat bavul batuutumbish Yehow kuhitok ni kuuhal. Tudy bakat kutungunuk ni kuleej dyanyish bwa paradiiz udy Yehow mwiituhangil. Muut woos ukaakaam neey bamukashish bwa kwiikaley bilengel ni micim yibatam mund kay mwangam bwaal, bikaam atweel mu paradiiz a mu spirit ni kaalukomw bend! Ki bikaam twiikal badimuk bikasakan bwaal Sataan wendend ulong cyoos cidyey mwa kulong bwa iitudingomw bwiitut kwaalukomw. (1 Py. 5:8; Yis. 12:9) Katulongoh bend twaamuhengel mushind a kulongey nook. Bikaam twiikashishaayomw menmen bwiitut kulam bulengel, bukezuk, ni diitalal bya mu paradiiz a mu spirit.