CIIN-BWAAL CYA KULONG CYA 21
MUSAMBW A 107 Tshilejelu tshia Nzambi tshia dinanga
I mushind kaay uwudy mwa kuhet mwiin maluw mulengel?
“I ngany udy mwa kuhet mwaan-mukaj wa buseeb? Buseeb bwindiy i buhitok buseeb bwa busang.”—TUS. 31:10.
BWAAL BUTAM
Mudy May matam ma mu Bibl mwa kukwambulwiish bwiibuh kumanyik muut mulengel wa kutweel nend mu maluw, ni mudy baat bakwaabw ba mu cisumbw mwa kwambulwiish baat bacidy bajik bakaakaam bwa kutweel mu maluw.
1-2. a) I myand kaay yidy biin Krist bacidy bajik mwa kukontonon kuuhal kwa kutangobw kuseeselangan? b) “Kuseeselangan” kumvumvwiij biny? (Tal “Mwaak udyobw Bumvwiij.”)
UKAAKAAM kutweel mu maluw eeny? Ning mudy mu maluw kamuy teng musangal kaayend, biin Krist bavul bacidy bajik baasand ni bakuluuh, bakaakaam ni micim kwiiwul-kwiiwul bwa kuhetobw wa kutweel nend mu maluw. Kuuhal kwiibuh kutang kuseeselangan, anj kashish bulund bwiibuh ni Yehow, wanj wiimanyik uw kaayeeb ni wiikal mukumban bwa kukumbajil mwiin maluw neeb bikaakaamey ni wiikal muman kwiilongolol bwa maluw. a (1 Kor. 7:36) Biby biikal naak, manyik ney wiikaakal ni musangal mu maluw miibuh.
2 Ki kabidyaakal biheehel bwa kuhet mwiin maluw mulengel. (Tus. 31:10) Ning awuheehet muut uwukaakaam kumanyik bilengel, kabiish biikal biheehel bwiinun kutang kuseeselangan. b Mu ciin bwaal eecy twiiyiiy kwiisambil ha cidy mwa kwambulwiish biin Krist bacidy bajik bwa kuhetobw mwiin maluw mulengel ni kutang kuseeselangan. Twiiyiiy kulong cikwaabw mushind udy baat bakwaabw ba mu cisumbw mwa kwambulwiish aab bakaakaam kutweel mu maluw.
I BINY BIDY MWA KUKWAMBULWIISH BWIIBUH KUHET MWIIN MALUW MULENGEL
3. Bikaam mwiin Krist ucidy mujik akontonon myand kaay hadyey ukaam muut wa kutweel nend mu maluw
3 Uw ukaam kutweel mu maluw, bikaam wanj umanyik muut uwukaakaam kutweel nend mu maluw kuuhal kwiinun kutang kuseeselangan. c Bituh, udy mwa kulengulul muut wa kutweel nend mu maluw mulengel, utang kuseeselangan ni muut udy kay mukumban bwiibuh. Cya biin-biin, muut udy mwa kwiikal mwiin maluw mulengel i mwiin Krist ukaady muhet baatiisumw. (1 Kor. 7:39) Kiish baat boos bakaady bahet baatiisumw bady mwa kwiikal biin maluw balengel bwiibuh. Ijooj ney: ‘Nady mwiifundil biihacil kaay mu shikacil a mim? I biikadil kaay bilengel bidy naaby muut unakaakaam kutweel nend mu maluw? Myand yinady mutakamin kudyey, wiiyiiy kwiiyikumbajok eeny?’
4. I biny bidy baat bakwaabw balomb mu masambil madyobw balong habitaatal muut wa kutweel nend mu maluw?
4 Kakuy kulandul, uw ukaam kutweel mu maluw, usaasambil bikasakan bwa bwaal oobw. (Fili. 4:6) Ki manyikaay ney Yehow kadyaakal wanzanzok kulongolweel muut ning waakaabumw muut udyobw mwa kutweel nend mu maluw. Ki ukutaatacil ni i mumanyik muwiiyumvumvw, ni udy mwa kukwambulwiish awukaakaam muut wa kutweel nend mu maluw. Ki bwabiny, tungunuk ni kumwambil biwukaakaam kulong ni biwudy naaby diikeng. (Mis. 62:8) Lomb Yehow akwaakish lutuul ni meej. (Jak 1:5) John d mwiin-kweet wa mu Etats-Unis umvumvwiij bwa byaakadyey ulomb mu masambil uleeb ney: “Nady mwambil Yehow biikadil binakaakaam kudy muut unady mwa kutweel nend mu maluw. Nady musambil bwa kusambakeen ni muut mukumban unady mwa kutweel nend mu maluw. Nady mulomb kabidy Yehow bwa kuuyambulwiishey bwa mim kwiikal ni biikadil biikal mwa kulong bwa mim kwiikal mulum mulengel.” Tanya mwiin-kweet mwaan-mukaj wa mu Sri Lanka uleeleeb ney: “Bu munakaakaam muut mukumban wa kutweel nend mu maluw, naloolomb Yehow bwa aayambulwiish bwa mim kwiikal ni lulamat kudyey ni musangal.” Ning uw kuy mwanj kuhet muut mukumban wa kutweel nend mu maluw tooh ni kaabaak, Yehow i mulay bwa kutungunukey ni kukwaakish biit byoos bya ku nyeet ni byoos biwulaalangil meej.—Mis. 55:22.
5. Bilondeshel 1 Biin Korent 15:58, i mushind kaay udy biin Krist bacidy bajik mwa kuhet muut udy mukat Yehow? (Tal cikwaabw cifwaatul.)
5 Bibl wiitukaakashish ney “twiikal ni cisumy diib dyoos bwa kuwaakany mudimw a Fumweet.” (Bal 1 Biin Korent 15:58.) Uw mwiikal ni bivul bya kulong mu mudimw a Yehow ni uhicish diib ni biin-kweet bashiil-shiilangan, kwiish wiiy kuhet teng musangal bwa balund bawiikal mwa kuhet ki cikwaabw, mushind iibuh kusambakeen ni biin-kweet bacidy bajik bady biiswiik byaabw bwa kukadil Yehow mudimw teng bu uw. Ni uw mulong mwiibuh moos bwa kusangej Yehow wiiyiiy kuhet musangal a biin-biin.
Uw mwiikal teng ni bivul bya kulong mu mudimw a Yehow, ni uhicish diib ni biin Krist bashiil-shiilangan, udy mwa kusambakeen ni baat bakwaabw bady balengel ba kutweel naab mu maluw (Tal cikos 5)
6. Bikaam biin Krist bacidy bajik bavuluk biny hadyobw bakaam muut a kutweel nend mu maluw?
6 Waamanyik, kulong waalek bwaal bwa kukaam muut iibuh kutweel nend mu maluw bushaal bwaal bwa buseeb buvul kuhitok myand yoos ya mu shikacil iibuh. (Fili. 1:10) Musangal a biin-biin kiish waalukil ku kwiikal mu maluw eecy kwiikal mujik, ki waalaalukil ku bulund bwiibuh bulengel ni Yehow. (Mat. 5:3) Ni hawucidy mujik, udy ni mushind a kuvudij mudimw iibuh uwukaakadil Mawej. (1 Kor. 7:32, 33) Nook, long mudimw bilengel ni ciisang ciwucidy mujik eecy. Jessica mwiin-kweet mwaan-mukaj wa mu Etats Unis utweelel mu maluw ni mivw yihit ha 30 uleeleeb ney: “Bu munaakady ni cisumy mu mudimw a bukajaady, biiyambulwiishil bwa mim kwiikal ni musangal ning munaakady nakaam kutweel mu maluw.”
YANGAT DIIB BWA KULONG MUUT BILENGEL
7. Bilondeshel Tusumw 13:16, bwabiny i bya meej bwiibuh kwanj kulong muut uwukaakaam kutweel nend mu maluw bwa ciisang kaahand kuuhal kwiibuh kumuleej ney udy mumukat?
7 Udy mwa kulong biny uw ulang ney muut kaahand i mukumban bwa kwiikaley mwiin maluw neeb mulengel? Bikaam uy ukamwambil musang aakaabumw ney udy mumukat eeny? Bibl uleeleeb ney, muut mudimuk ulaalang kuuhal kwa kulong myand kaahand. (Bal Tusumw 13:16.) Biikaakal bya meej wuw mulong muut kaahand mu busok kuuhal kwiibuh kuy kamwambil ney udy mumukat. Aschwin wa mu Pays-Bas uleeleeb ney: “Muut udy mwa kukat mukwaabw lwang-lwang, ni wiiy umulek kabidy lwang-lwang. Ki uw mwangat diib divul dya kulong muut, kwiish wiiy kumukat lwang-lwang ni kuunyim wiiy umulek.” Cikwaabw, uw mulong muut, udy mwa kumanyik ney i mukumban eecy kiish mukumban bwiibuh kutweel nend mu maluw.
8. I mushind kaay udy mwiin-kweet ucidy mujik mwa kulong muut mukumban udyey mwa kutweel nend mu maluw? (Tal cikwaabw cifwaatul.)
8 I mushind kaay uwudy mwa kulong muut mukwaabw mu busok? Udy mwa kumanyik buumuut bwa muut bilengel ni biikadil bindiy hadyey mu bisangil bya biin Krist eecy mukacy mwa baat. I bangany bady balund nend, ni i biny bidyaakalobw biisamb? (Luuk 6:45) Biihacil bindiy i bifwaananganok ni byaam eeny? Udy mwa kwiisamb ni bakul ba mu cisumbw cindiy eecy biin Krist bakwaabw bashimat ba mu cisumbw bady bamumanyik bilengel. (Tus. 20:18) Udy mwa kwiihanguj habitaatal luumw lwindiy ni biikadil bindiy. (Luuk 2:11) Hawuloolong muut, waamanyik bwa kulong waamunyingalaj. Neemek mushind udyey wiiyumvw hakulek kukaam kumanyik myand yoos ha
Kuuhal kwiibuh kwambil muut ney nady mukukat, anj mulong mu busok bwa ciisang kaahand (Tal cikos cya 7-8)
9. Kuuhal kwiibuh kumb muut uwudy mutal ney i mukumban bwiibuh kutweel nend mu maluw diiy, bikaam wiikal mutwiishiibw bwa bwaal kaay?
9 Udy mwa kulong muut mutancy bul kaay kuuhal kwiibuh kuleej ney udy mumukat? Uw mumb muut diiy lwang-lwang, udy mwa kulang ney kudyaakal ulangiloh bilengel kuuhal kwiibuh kwangat dihangadik. (Tus. 29:20) Ki muut yiy muman kujingunun ney udy mumukat uw naabw unengesh myand bwa kumwambil, udy mwa kulang ney udyaakal weelakan bikasakan kuuhal kwa kwangat dihangadik. (Mul. 11:4) Manyik ney kuuhal kwiibuh kumb muut diiy kabiish bikaam ney wiikal mutwiishiibw ney wiiyiiy kumubak bwaal. Ki bikaam wiikal mutwiishiibw ney ukaady habwiih bwa kutweel mu maluw, ni muut aaw i mukumban bwa kwiikaley mwiin maluw neeb mulengel.
10. I biny biwudy mwa kulong uw mujingunun ney muut kaahand i mukukat uw naabw kuy mumukat?
10 Uw mujingunun ney muut kaahand i mukukat, udy mwa kulong bicy? Biby biikal ney uw kwiish wiiyumvw bu mushind udyey wiiyumvw, kaam ushind a kumuleej bwaal aabw hatook mu myand yiwuloolong. Kabyaakwiikaloh bend bilengel uw mufikish muut ku kulang ney kudy mushind iinun kuseeselangan biby naabw kabiy naak.—1 Kor. 10:24; Ef. 4:25.
11. Uw mwiikal ukaam kuseeselangan eecy kutweel mu maluw, bikaam ulangil bikasakan ha bwaal kaay?
11 Mu bibunj bikwaabw, balel ba muut eecy baat bakuluuh i bab basuusungwiil biin-kwaabw bacidy bajik muut wa kutweelobw nend mu maluw. Mu bibunj bikwaabw naabw, biin mu cisak eecy balund i bab basuusungwiil muut ucidy mujik muut wa kutweelobw nend mu maluw ni balongolol myand bwa muut aaw asambakeen ni mukaj aaw bwa kutal ning i bakat bwa kutang kuseeselangan. Bab bakulomb bwa kulongolol myand bwa muut atang kuseeselangan ni mukwaabw eecy babakangan, langil ha cidy mulum ni mukaj bakaam ni bidyobw bakat. Uw mutal ney muut kaahand i mukumban bwa kwiikal mwiin maluw mulengel bwa mulund neeb eecy bwa mwaaneen, long bwa kumanyik buumuut bwindiy bilengel, biikadil bindiy ni cidy ni buseeb nang-nang tal ning i mudy bulund bukasakan ni Yehow. Kudy bulund bukasakan ni Yehow, kudy ni buseeb buvul kuhitok kwiikal ni makut, kwiikal mulong tulaas tuvul eecy kwiikal muy lutumb. Ki manyik ney, mwiin-kweet mwaan-mulum eecy mwaan-mukaj ucidy mujik i yiy wangangat dihangadik dya kutweel mu maluw eecy kulek.—Kal. 6:5.
I MUSHIND KAAY UWUDY MWA KUTANG KUSEESELANGAN?
12. Uw ukaam kuseeselangan ni muut i mushind kaay uwudy mwa kumwambil?
12 Biby biikal ney ukaakaam kutang kuseeselangan ni muut kaahand, udy mwa kumwambil bicy? e Udy mwa kulongolol bwiibuh kwiisamb nend ku telefon eecy ha cyaab cidyaakal baat bashikacil. Mwambil hatook ney nady mukukat bikasakan. (1 Kor. 14:9) Biby biikal bikumban, mwaakishok diib bwa kulangiley ha bwaal aabw bwa kutaley mushind a kukwaalabul. (Tus. 15:28) Biby biikal ney muut aaw kiish habwiih bwiinun kutang kuseeselangan, neemek mushind udyey wiiyumvw.
13. Bilondeshel biin Kolos 4:6, i biny biwudy mwa kulong muut yiy mukuleej ney i mukukat bwiinun kubakangan nend?
13 Udy mwa kulong bicy muut yiy mukukat? Misang yikwaabw muut aaw i mwiikashishomw bwa kukwambiley, nook teng waamanyik bwa kumwaalabul bilengel ni kaneemw. (Bal Biin Kolos 4:6.) Biby biikal ney ucidyok ni mafuk bwiibuh kutal ning udy mwa kutang kuseeselangan ni muut, bikaam kumwambil. Long mwiibuh moos bwa kumwaakish dyaalabul kuuhal kwa diib. (Tus. 13:12) Uw kuy mukat, mwambil bilengel hatook mushind uwiiyumvumvw. Tal mwaakady Hans mwiin-kweet mwaan-mulum wa mu Autriche, mwaalabul mwiin-kweet mwaan-mukaj waakady mumwambil mwaakadyey wiiyumvw bwindiy, uleeleeb ney: “Namwambiil dihangadik dyaam hatook ciby mu mushind mulengel. Naakady mumwaalabul lwang-lwang bwaal cyaakady mukat ney atungunuk ni kutakamin myand ya makos. Bwa bwaal oobw, naakady ki mudimuk bwa mushind unaakady namulongel myand.” Ki uw mwiikal byeeb mukat muut aaw, iisambaay bwa mushind unwiiyumvumvw ni bwa myand yinwiikal bakat kulong mu kuseeselangan kwiinun. Myand yinwiikal mwa kulong mu kuseeselangan kwiinun yidy mwa kushiilangan ni ya baat bakwaabw bilondeshel bilelel bya cyaab cinudy bashikacil eecy myand yikwaabw.
I MUSHIND KAAY UDY BAKWAABW MWA KWAMBULWIISH BIIN KRIST BACIDY BAJIK?
14. I mushind kaay utudy mwa kwambulwiish biin Krist bacidy bajik mu kwiisamb kwiitut?
14 I mushind kaay udy woos wa kutudy mwa kwambulwiish biin Krist bacidy bajik bakaakaam kutweel mu maluw? Bwaal bwa kuuhal, i kwiikal badimuk bwa myand yituleeleeb. (Ef. 4:29) Twiiyihangujaay ney: ‘Neeleelok bilel ni bajik biibataatah ku micim, eecy biibasaasak bwa kutweelobw mu maluw eeny? Hanadyaakutal mwiin-kweet mwaan-mulum ni mwaan-mukaj bacidy bajik biisamb, nadyaakal nalang ney biisaasamb teng ya maluw eeny?’ (1 Tim. 5:13) Cikwaabw katwiish mwa kulong bwaal budy mwa kulong bwa biin Krist bacidy bajik biiyumvw ney kabiish ni buseeb bwaal kabiish banj kutweel mu maluw. Hans utubaaman kuteel uleeleeb ney: “Biin-kweet bakwaabw bambambilangan ney, bwabiny kwiish umonangan? Ucidy mwaan mutofw eeny.’ May ma nook, maloolong bwa baat bacidy bajik biiyumvw kabay ni buseeb ni miibasak bwa kutweel mu maluw.” I bilengel bwa kwiikal kukaam mishind yivul ya kwiikal kumb biin Krist bacidy bajik kaalumbandy!—1 Tes. 5:11.
15. a) Bilondeshel diiy ditam didy mu Biin Rom 15:2, bikaam twanj tukontonon biny kuuhal kwiitut kwambulwiish muut bwa kuhetey muut wa kutweeley nend mu maluw? (Tal cikwaabw cifwaatul.) b) I diilongweesh kaay dya buseeb diwubaahetel ku film oow?
15 I biny bitudy mwa kulong tut tulang ney mwiin-kweet mwaan-mulum ni mwiin-kweet mwaan-mukaj kaahand bady mwa kulong maluw malengel? Bibl wiitubeebel ney twiikal tutalok myand ya bakwaabw. (Bal Biin Rom 15:2.) Baat bavul bacidy bajik kabadyaakal bakat bwa baat bakwaabw biibaleej waakutweelobw nend mu maluw, nook bikaam twiineemek bwa kulek kutweel mu myand yaabend. (2 Tes. 3:11) Bakwaabw naabw bady mwa kukaam bwa ney twiibambulwiish, ki kabiish bikaam tutweel mu myand yaabend hadyobw kabay biitulomb bwa kulong nook. f (Tus. 3:27) Baat bacidy bajik bakwaabw naabw bakaakaam ney biibaleej mu mushind udy kay umweek. Lydia, mwiin-kweet mwaan-mukaj mujik wa mu Allemagne uleeleeb ney: “Udy mwa kubiikan mwiin-kweet mwaan-mulum ni mwiin-kweet mwaan-mukaj hamw ni biin-kweet bakwaabw bavul. Kulong mu mushind wa ney mwiin-kweet mwaan-mulum aaw ni mwiin-kweet mwaan-mukaj aaw bahet mushind a kusambakeen ni kuhicishok diib haakaabumw, ciby kwiibalekeel myand yoos mu byaal byaababw bwa biiyangacil dihangadik kaayaabw.”
Biin Krist bacidy bajik baheehet mushind a kusambakeen mukacy mwa cisumbw cya baat (Tal cikos cya 15)
16. Bikaam biin-kweet biin Krist bacidy bajik bavuluk biny?
16 Muut woos wa kutudy ook, mujik eecy mubak udy mwa kwiikal ni shikacil a musangal! (Mis. 128:1) Nook, biby biikal ney ukaakaam wa kutweel nend mu maluw ki kuy mwanj kumuhet, tungunuk ni kwiimanyin nang-nang ha mudimw uwukaakadil Yehow. Mwiin-kweet mwaan-mukaj wa mu Macao dindiy Sin Yi uleeleeb ney: “Hawufwaafwanyikij ciisang ciwiikal mwa kuhitij ni mwiin maluw neeb mu Paradiiz, ciisang ciwudy muhicish mu bujik cimweemweek ciihiihy menmen. Ki bwabiny bikaam tusangal ni ciisang eecy ni tukal naacy mudimw bilengel.” Ki i biny biwudy mwa kulong uw mwiikal muman kuhet wa kutweel nend mu maluw ni nun baman kutang kuseeselangan? Mu ciin-bwaal ciloolond, twiiyiiy kwiisambil ha mushind udy kuseeselangan kwiinun mwa kwiinwambulwiish bwiinun kwangat mahangadik ma meej.
MUSAMBW A 137 Bakaji ba lulamatu ne bakaji bena Kristo
a Cidy mwa kukwambulwiish bwiibuh kutal ning ukaady mukumban bwa kutweel mu maluw, tal mu jw.org ciin bwaal cya ney: Fréquenter (partie 1) : Suis-je prêt ?
b MWAAK UDYOBW BUMVWIIJ: Mu ciin bwaal eecy ni ciloolond, “kuseeselangan” kumvumvwiij ciisang cidy mwaan-mulum ni mwaan-mukaj balongangan bwa kumanyikangan bwa kutal ning bady mwa kushikat bilengel mu maluw. Mu bibunj bikwaabw naabw hadyobw baleeb bwa kuseeselangan, i kusambakeen eecy kulongangan bilengel ni muut eecy i kukatangan. Kuseeselangan kutaatang hady mwaan-mulum ni mwaan-mukaj baleej hatook ney i bakatangan, ni kutuutungunuk teng ni hadyobw bangat dihangadik dya kutweel mu maluw eecy kwiimanyik kuseeselangan.
c Mu bikos biloolond twiikaakal tuteel muut mulengel wa kutweel nend mu maluw bu mwiin-kweet mwaan-mulum. Cya biin, may matam aam, mataatal kabidy biin-kweet baan-bakaj.
d Majin makwaabw i mashiitulul.
e Bilondeshel bilel bya myaab yikwaabw, i mwiin-kweet mwaan-mulum wambambil mwiin-kweet mwaan-mukaj bwa kutang kuseeselanganobw. Ki mwiin-kweet mwaan-mukaj byend, udy mwa kwambil mwiin-kweet mwaan-mulum ney tutang kuseeselangan nady mukukat. (Luut 3:1-13) Bwa kumanyik myand yikwaabw yivul, tal ciin bwaal cya ney “ Les jeunes s’interrogent . . . comment lui dire ce que je ressens pour lui ?” mu Reveillez-vous! wa 22/10/2004.
f Tal mu jw.org film wa ney Mu batshimunyi ba mvita ya ditabuja . . . Mudi bena Kristo batshidi bajike.
