CIIN-BWAAL CYA KULONG CYA 20
MUSAMBW A 67 ‘Ambila bantu Dîyi dia Nzambi’
Tungunuk ni kudiil baat musah bwa lukat!
“Bwaal bikaam ney kuuhal-a-hal Musah Mulengel iikal wa kudiil baat ba bis byoos.”—MARK 13:10.
BWAAL BUTAM
Mudy lukat lwiitusak bwiitut kulong mudimw a bukajaady ni cisumy ni muuy iitut woos.
1. I biny bitudy balong mu cisangil citam cya ku muvw cya mu 2023?
MU CISANGIL citam cya ku muvw a cya mu 2023, tuhetelomw butook habitaatal myand yitudy biitabij ni tumvwiilomw misah yisaasangej habitaatal mudimw iitut a bukajaady. Tumanyikil ney bamw baat bady mwa kuhet mushind a kutweelobw mu baat ba Yehow ning kuunyim kwa kubutuk kwa Babiloon Mutam. Tumanyikil cikwaabw ney kutangil mu suuny a 11/2023, kabakulomboh bend baakajaady ba Bukaleng bwa kutwaalobw lwaapool lwa byoos bidyobw balong mu mudimw aababw a bukajaady. Myand yidyobw bashiitulul eey, yileeleejok ney mudimw iitut a bukajaady ukaady ni buseeb bukeeh eecy kaciish wa kulong lwang-lwang bu kuuhal eeny? Waakweeh, kabiish naak!
2. Bilondeshel Mark 13:10, bwabiny diifuk dyoos dihiihiit eedy diloolong bwa mudimw iitut a bukajaady iikal wa kulong lwang-lwang?
2 Diifuk dyoos dihiihiit eedy diloolong bwa mudimw iitut a bukajaady iikal wa kulong lwang-lwang menmen. Bwabiny? Bwaal i kushaal diib dikeeh bwa bulekel kwiiyobw. Tukontononaay cyaakady Yeez muman kuleeb bwa mudimw a bukajaady ku mafuk ma bulekel. (Bal Mark 13:10.) Bilondeshel bwaal budyobw balond mu Matewus, Yeez uleebel ney mwiin musah mulengel oow biiyiiy kumudiil baat ba ha bulab butuutul kuuhal kwa “bulekel” kwiiyobw. (Mat. 24:14) Mwaak oow uleeleej bulekel bwa myand yoos yibiih ya mu bulongolody bwa Sataan. Yehow i muman kusungul “diifuk ni diib” diikal myand eey mwa kulongek. (Mat. 24:36; 25:13; Yil. 1:7) Diifuk dyoos dihiihiit eedy, twendend tufweej habwiih ni ciisang aacy. (Rom 13:11) Hatucidy biimanyinok aah, bikaam tutungunuk ni kudiil baat musah teng ni hady bulekel bwiiy.
3. I biny bitusaasak bwiitut kudiil baat musah?
3 Kudy dijooj dya buseeb dikaakaam bwiitut boos kulangiloh: Bwabiny tudiidiil baat musah mulengel? Bwaal tudy ni lukat. Hatudiidiil baat musah, tuleeleej mutudy bakat musah mulengel, mutudy bakat baat ni cidy cihitok byoos tuleeleej mutudy bakat Yehow ni diijin dindiy. Tukontononaayaak myand eey.
TUDIIDIIL BAAT MUSAH BWAAL TUDY BAKAT MUSAH MULENGEL
4. I mushind kaay utumvumvw hatuheehet musah mulengel?
4 Langil ha mushind uwiiyumvwiil haakady bwaal bulengel bukulongekel mu shikacil iibuh. Misang yikwaabw mwiin cisak ciinun waakady mulel mwaan eecy muut waakady mukwaakish mudimw uwaakady ukaam biin-biin. Kakuy kulandul micim yiibuh yizukil bwiibuh kudiil biin mu cisak ciibuh ni balund neeb musah mulengel oow. Bikulongekelok nook hawumvwiil musah muhit kulengel wa ku misah yoos, musah a Bukaleng bwa Mawej eeny?
Hatumvwiil musah mulengel bwa musang a kuhaal, tumvwiil musangal ni tukaamin kudiil muut woos musah oow! (Tal cikos 5)
5. Wiiyumvwiilok bicy hawaakady mumvw bwa musang iibuh a kuuhal myand ya biin-biin yidy mu diiy dya Mawej? (Tal cikwaabw bifwaatul.)
5 Vuluk muwaakady mwiiyumvw hawaakady mumvw bwa musang iibuh a kuuhal myand ya biin-biin yidy mu diiy dya Mawej. Umanyikil ney Taat iibuh a mu diiwul I mukukat ni ukaakaam bwiibuh kutweel mu cisak cya baat bamuhaahambidil, badyey mulay bwa kwiibamanyin makab ni mal ni bwiibuh kwiikal mutakamin bwa kutal mwiikal baat bawudy mukat ni baat bakwaabw bavul mwa kuhetulul buumy mu bulongolody buhyaabuhy. (Mark 10:29, 30; Jah 5:28, 29; Rom 8:38, 39; Yis. 21:3, 4) Myand ya biin-biin eey yikutengel ku micim bikasakan. (Luuk 24:32) Ukacil myand yiwaakady ulong ni waakat bwa kwiiyambiloh bakwaabw!—Fwanyikij ni Jeremih 20:9.
6. I biny biwuloolongel ku bwaal bwa Ernest ni Rose?
6 Tukontononaay bwaal oobw. Mwiin-kweet mwaan-mulum Ernest b waakady ni mivw yit ku diikumy hafwiil taat indiy. Ernest uleeleeb ney: “Naakady niijooj ney: ‘I muy mu diiwul eeny? Eecy wiiyiiy kufw buyiil eeny?’ Naakady numvw bibiih hanaakady natal baan bakwaabw biikal ni baataat aababw.” Ernest waakady ni cibidil cya kuy mu nkit, ut bin ha lukit lwa taat indiy ni usambil ney: “A Mawej, bwa lus nakaakaam kumanyik kudy taat aamim muy.” Hakumbajiley mivw 17 kuunyim kwa lufw lwa taat indiy, Ernest wiitabil bwa kulong Bibl ni mucim aakaabumw. Umvwiil musangal hamanyikiley ney, bafw kabiish bamanyik ciit ning cyaakaabumw, bady teng bu muut udy mulaal tul tukasakan, ni Bibl ulaalay ney bafw biiyiiy kusanguk. (Mul. 9:5, 10; Yil. 24:15) Bulekel bwa byoos uhetel maalabul ma majooj maakady mamwiitish mut mukacy mwa mivw yivul! Ernest waakady ni musangal bwa myand ya biin-biin ya mu Bibl yaakadyey ulong. Mukaj indiy, Rose, utangil byend kulong Bibl ni ukacil myand yaakadyey ulong. Bahetel batiisumw mu 1978. Batangil kwambil biin mu cisak cyaababw, balund naab ni baat bakwaabw baakady biibakun mat myand ya biin-biin ya buseeb yaakadyobw balong. Bu cihet, Ernest ni Rose bambulwiishil bat bahit ha 70 bwa kuhetobw baatiisumw.
7. Bilondeshel Luuk 6:45, i biny biloolongek hady lukat lwa myand ya biin-biin ya mu Bibl lwaas mij mu micim yiitut?
7 Cya biin-biin, hady lukat lutudy naalw bwa myand ya biin-biin ya mu Bibl lwaas mij mu micim yiitut, lwiitusaasak bwa kwiiyambiloh baat bakwaabw. (Bal Luuk 6:45.) Twiiyumvumvw teng bu biiyij ba Yeez ba mu siyekel a kuuhal baleebel ney: “Katwiishoh bend mwa kulek bwa kwambil baat bitutadil ni mees ni bitumvwiil ni mat.” (Yil. 4:20) Tudy bakat myand ya biin-biin bikasakan ni tudy bakat kwiiyambil baat bavul kuk mushind.
TUDIIDIIL BAAT MUSAH BWAAL TUDY BIIBAKAT
8. I biny bitusaasak bwa kudiil baat musah mulengel? (Tal kazubw ka ney: “ Kat baat —Iibaalabul bashaal Biiyij.”) (Tal cikwaabw cifwaatul.)
8 Teng bu Yehow ni Mwaan indiy, tudy bakat baat. (Tus. 8:31; Jah 3:16) Twiiteeteek ha cyaab cya aab bady ‘kabay ni Mawej’ ni ‘kabay ni cidyobw batakamin.’ (Ef. 2:12) Bady ni bilumbw bivul ni tudy ni cidy mwa kwiibambulwiish bwa kuman bilumbw byaababw—musah mulengel a Bukaleng bwa Mawej. Bu mutudy biibakat ni twiiteek ha cyaab cyaababw, tuloolong cyoos citudy mwa kulong bwa kwiibadiil musah mulengel. Musah a buseeb oow udy mwa kwiibakish kutakamin ni udy mwa kwiibambulwiish bwa kuhet shikacil mulengel teng kaabaak ni wiibakish kutakamin kwa “buumy bwa biin-biin”—i bwiin kuleeb ney buumy bwa mwendelel mu bulongolody buhyaabuhy bwa Mawej.—1 Tim. 6:19.
Bu mutudy bakat baat ni twiiteek ha cyaab cyaababw, tuloolong cyoos citudy mwa kulong bwa kwiibadiil musah mulengel (Tal cikos cya 8)
9. Bilondeshel Ezekiyeel 33:7, 8, tudiidimush baat bwa myand kaay habitaatal mafuk maciiyiiy ni bwabiny?
9 Lukat lutudy bakat naalw baat lwiitusaasak bwa kwiibadimush bwa bulekel bwa bulongolody bubiih oobw bukaady habwiih. (Bal Ezekiyeel 33:7, 8.) Tumvumvwiil baat boos lus ni biin mu cisak ciitut bady kabay bakadil Yehow mudimw. Baat bavul i bashikat bituh kabay bamanyik ney kwiiyiiy kwiikal “mal miimiin matukanjil kutaloh kacy Mawej waahang bulab ni ku leel, ni mal ma bwiin nook kamiish miiy kwiikalok ning cikwaabw.” (Mat. 24:21) Tudy bakat bwa bamanyik myand yiikal mwa kulongek mu ciisang cya dilumbulwiish ciiyiiyobw kubutul bitendelel bya makos ni bulongolody bubiih oobw mu diivit dya Harmakedon. (Yis. 16:14, 16; 17:16, 17; 19:11, 19, 20) Tusaasambil bwa baat bavul bumvw myand yitwiibambambil ni bangat dihangadik dya kukadil Yehow mudimw haakaabumw neet teng kaabaak. Ki tudy mwa kuleeb bicy bwa aab bakiish biitukun mat ning bab biikal biin mu cisak ciitut batudy bakat?
10. Bwabiny bidy ni buseeb bwiitut kutungunuk ni kudimush baat bwa myand yiikal mwa kulongek?
10 Teng mudyobw biibyumvwiij mu ciin-bwaal cishaal, Yehow wiiyiiy kukuuloh ku lukat lwindiy baat biikal mwa kushiitulul bikadil byaababw iikalobw mwa kutal Babiloon Mutam ubutuk. Biby biikal naak bidy ni buseeb buvul bwiitut kutungunuk ni kudimush baat teng kaabaak. Manyik ney: Citwiibambambil kaabaak cidy mwa kwiibaakish ciit kaahand ciikalobw mwa kuvuluk cikwaabw. (Fwanyikij ni Ezekiyeel 33:33.) Misang yikwaabw bady mwa kulangil ha myand yitukaady biibambil, biiy kukadil Yehow mudimw haakaabumw neet kuuhal kwa diifuk eedy kadiy dyanj kufik.Teng bu jaamw a mu Filipw waalabwiil micim ‘hazakeel bulab bikasakan,’ misang yikwaabw bamw bady kabay biitab musah leel biiyiiy kuhet mushind a kushiitululobw micim kuunyim kwa kubutuk kwa Babiloon Mutam kwiikal mwa kushiishimuny baat.—Yil. 16:25-34.
TUDIIDIIL BAAT MUSAH BWAAL TUDY BAKAT YEHOW NI DIIJIN DINDIY
11. Bilondeshel Myand yisokolweel Jah 4:11, i mushind kaay utuhwaah Yehow lutumb, kukalakany ni bukash? (Tal cikwaabw bifwaatul.)
11 Kabingil katam ka buseeb kiitusaasak bwa kudiil baat musah i ka ney, tudy bakat Yehow Mawej ni diijin dindiy dijilang. Tutaatal mudimw iitut a bukajaady bu mushind a kuh Mawej utudy bakat lutumb. (Bal Myand yisokolweel Jah 4:11.) Twiitaatab ney: “[Yehow] Mawej iitut udy muwaakan bwa kukuh lutumb, kukalakany ni kukuleej bukash.” Tumuhwaah lutumb ni kukalakany hatuleeleej baat bakwaabw cijaadik cya ney I yiy “ubahangil biit byoos” ni tudy ni buumy bwa bwaal bwindiy. Tumuhwaah bukash bwiitut hatukaakal mudimw ni diib diitut, ni bukash bwiitut ni biit byoos bitudy naaby bwa kudiil baat musah bilondeshel shikacil iitut. (Mat. 6:33; Luuk 13:24; Kol. 3:23) Mu kuleeb kulengel tudy bakat kwiisamb myand ya Mawej utudy bakat. Twiiyumvumvw cikwaabw biin diibanz bwa kwambil baat bakwaabw diijin dindiy ni cidyey. Bwabiny?
Twaakaakish Yehow bukash bwiitut hatukaakal mudimw ni diib diitut, ni bukash bwiitut ni biit byoos bitudy naaby bwa kudiil baat musah bilondeshel shikacil iitut (Tal cikos cya 11)
12. I mushind kaay utudy mwa kumanyikish diijin dijilang dya Yehow mu mudimw a bukajaady?
12 Lukat lutudy naalw bwa Yehow lwiitusaasak bwiitut kumanyikish diijin dindiy dijilang. (Mat. 6:9) Biineeby byumvumvwiij ney, tudy bakat kwambil baat ney myand yaakady Sataan mudingilomw Yehow i ya makos. (Kbwa. 3:1-5; Yoobw 2:4; Jah 8:44) Hatudiidiil baat musah, tudyaakal bakat kwambil baat bady bakat kwiitukun mat cidy Yehow menmen. Tudy bakat bwa muut woos hamanyik ney, ciikadil cindiy citam i lukat, mushind indiy a kulombol i mujaalal ni muwaakan ni Bukaleng bwindiy bwiiyiiy kuman makab ni buhetesh baat diitalal ni musangal mu kalung kakeeh oomw. (Mis. 37:10, 11, 29; 1 Jah 4:8) Hatuleeleeb luumw lwa Yehow mu mudimw a bukaajady, tumaamanyikish diijin dindiy. Tudy cikwaabw ni musangal bwaal tuloolong cidy cikumban bwiitut kulong bu Baatemw ba Yehow. Bwabiny tuleeleeb naak?
13. Bilondeshel Yeshaay 43:10-12, bwabiny tudy ni musangal hadyobw biitubikan ney Baatemw ba Yehow?
13 Yehow wiitubiibiikan ney: “baakajaady” bindiy. (Bal Yeshaay 43:10-12.) Mivw yivul yiman kuhit, Kasumbw Kaludik katumin mukand uleeb ney: “Buneemaat butam budy naabw muut woos wa kutudy i hadyobw bamubiikan ney: Temw a Yehow.” c Bwabiny tuleeleeb naak? Tutalaay cileejel eecy. Lang ket ney i bakufundomw ney udy mulong bwaal kaahand bubiih. Nook ukaakaam muut udy mwa kujaadik ney, bwaal aabw i bwa makos ni udy muut mulengel udy kay mwa kulong bwaal bwa nook. Wiiyiiy usungul ngany? Cya biin-biin wiiyiiy usungul muut uwudy mumanyik ni uteekel micim udy ni luumw lulengel ni udy baat bakwaabw mwa kwiiy kwiitab. Bu mudy Yehow mwiitusungul bwiitut kwiikal Baatemw bindiy, uleeleej ney imwiitumanyik bilengel ni wiituteeteekel micim bwiitut kujaadik ney i Mawej aakaabumw a biin-biin. Twiiyunvumvw ni buneem bu mutudy Baatemw bindiy. Ki bwabiny tudy ni mishind yivul ya kwambil baat ney, myand yibiih yidyobw baleeb habimutaatal i ya makos. Hatuloolong nook, tuloolong cidy diijin diitut dileeb bwiitut kulong: Tudy Baatemw ba Yehow!—Mis. 83:18; Rom 10:13-15.
TWIIYIIY KUTUNGUNUK NI KUDIIL BAAT MUSAH TENG NI KU BULEKEL
14. I bwaal kaay bulengel bwiikal mwa kulongek mu kalung kakeeh oomw?
14 Tudy ni musangal a kutal ciikal mwa kulongek mu kalung kakeeh oomw! Ku dyambulwiish dya Yehow, tudy batakamin bwa kutal mwiikal baat bavul beeh mwa kwiitab myand ya biin-biin kuuhal kwa mal miimiin kutangem. Tudy cikwaabw ni musangal bwaal ning mu ciisang cikasakan cya mal miimiin, twiiyiiy kutal baat bahatuk mu bulongolody bwa Sataan ni biiy bwiitut kuh naabw Yehow lutumb haakaabumw!—Yil. 13:48.
15-16. I biny bitwiiyiiy kutungunuk ni kulong ni twiiyiiy kwiibilong teng ni ku ciisang kaay?
15 Kaabaak, tudy ni mudimw a buseeb a kulong, utwiikal katuy mwa kulong cikwaabw. Tudy ni dyaakatook dya kudiil baat ba ha bulab butuutul musah mulengel a Bukaleng bwa Mawej. Ni bikaam tutungunuk ni kudimush baat bwa ciikal mwa kulongek mu kalung kakeeh oomw. Bikaam baat bamanyik ney bulekel bwa bulongolody bubiih myand oobw bwendend bufweej habwiih lwang-lwang. Nook iikal diifuk dya dilumbulwiish difik, biiyiiy kumanyik ney musah utwaakady twiibadiil waakady waalukil kudy Yehow Mawej.—Ez. 38:23.
16 Tudy biiswiik bwa kulong biny? Bwa lukat lutudy naalw bwa musah mulengel, bwa baat neet ni kuhitok byoos bwa Yehow Mawej ni diijin dindiy, twiiyiiy kutungunuk ni kudiil baat musah ni cisumy cyoos, lwang-lwang teng ni iikal Yehow mwa kuleeb ney “Kubaah!”
MUSAMBW A 54 “Njila nyeye eu”
a Cisangil citam cya ku muvw cilongekel mu diifuk dya 7/10/2023, ku nzubw a cihwiil wa Baatemw ba Yehow ku Newburgh mu New York, mu cibunj cya Etats-Unis. Cituh cya kuuhal cya program oow biicileejel mu program a TV wa JW wa suuny a 11/2023 ni ciibiidy biicileejel mu suuny a 1/2024.
b Tal ciin bwaal cya ney: “Bible utu ushintulula bantu—Mandamuna a mu Bible mimpe adi umvuika avua ankemesha,” mu Cibumb cya Muteetekel cya mu diifuk dya 1/2/2015.