CIIN-BWAAL CYA KULONG CYA 26
MUSAMBW A 8 Yehowa udi tshinyemenu tshietu
Long bwa Yehow iikal Diibw diibuh dya muland
“Teng Mawej iitut kaayend i yiy diib dya muland. Kakwiiishoh bend Mawej mukwaabw, teng yiy.”—1 SAM. 2:2.
BWAAL BUTAM
Bwa kumanyik bwaabiny babiibiikan Yehow ney diibw dya muland ni mushind utudy mwa kwiidikij biikadil bindiy.
1. Davih ufwaafwaanyikij Yehow ni biny mu Misambw 18:46?
TUDY mu bulongolody mudy myand yitudy katuy batakamin mwa kwiitukwaat, yitukaamin makab eecy yishiitulul shikacil iitut woos. Tudy ni musangal muvul bwaal tudy mwa kuteekel Yehow micim bwa kwiitwambulwiishey! Mu ciin-bwaal cishaal, biituvulwiijil ney Yehow i Mawej udy ni buumy ni udy teng habwiih bwa kwiitwambulwiish. Hadyey wiitwambulwiish, bitujaajadikil ney “Yehow udy ni buumy!” (Bal Misambw 18:46, NWT.) Kuunyim kwa Davih muman kuleeb may aam, ubiikeen Mawej ney: “Diibw dyaam dya muland.” Bwaabiny Davih ufwanyikijil Yehow Mawej udy ni buumy ni diibw dya muland, ciit cidy kaciy ni buumy?
2. Bwaabiny bikaam tumanyik cyaakady Davih mubiikeen Yehow ney: “Diibw dyaam dya muland”?
2 Mu ciin-bwaal eecy, twiiyiiy kutal bwaabingany babiibiikan Yehow ney diibw dya muland ni cidy bwaal oobw bwiitulongweesh habimutaatal. Twiiyiiy kumanyik cikwaabw mutudy mwa kumuteekel micim bu diibw diitut dya muland. Bulekel bwa byoos, twiiyiiy kwiisamb bwa mishind yitudy mwa kwiidikij biikadil bya Yehow.
BWAABINY BABIIBIIKAN YEHOW NEY DIIBW DYA MULAND?
3. I mushind kaay udy Bibl ukal mudimw ni mwaak “diibw dya muland”? (Tal ha cizubw.)
3 Bibl ukaakal mudimw ni mwaak “diibw dya muland” bwa kwiitwambulwiish bwiitut kumanyik biikadil bidy naaby Yehow. Mwaak oow udy mu verseh yimutuutumbish bu Mawej udy kay ni wa kumufwanyikij nend. Verseh a kuuhal ubiibiikan Yehow bu “diibw dya muland” udy mu May Mumbulul 32:4. Aan uleebel mu diisambil ney: “Teng Mawej iitut kaayend i yiy diib dya muland. Kakwiiishoh bend Mawej mukwaabw, teng yiy.” (1 Sam. 2:2) Habakuk ubiikeen Yehow ney: “Diibw dya mim dya muland.” (Hab. 1:12) Mufund a Musambw 73 ubiikeen Mawej ney: “diibw dya muland dya mucim aam.” (Mis. 73:26, NWT) Ning Yehow byend wiibiikeen ney diibw dya muland. (Ye. 44:8) Tutalaay biikadil bisat biloolong bwa Yehow iikal bu Diibw diitut dya muland ni citudy mwa kulong bwa iikal “Diibw diitut dya muland.”—Mmu. 32:31, NWT.
Baat ba Mawej bataatal Yehow bu Diibw dya muland diibalaalam (Tal cikos 3)
4. Bilondeshel Misambw 94:22, i mushind kaay udy Yehow mwiikal cisokotel?
4 Yehow i cisokotel. Teng bu mudy diibw ditam mwa kwiikal cyaab cidy muut mwa kuy kasokotel mvul a ciheeh, Yehow wiitulaalam hatudy mu biisang bikasakan mu shikacil iitut. (Bal Misambw 94:22.) Wiitwambambulwiish bwiitut kulam bulund bwiitut nend ni wiitujaadikil ney makab matudy naam leel kamakwiitutatish buyiil. Ni ulaalay cikwaabw ney mu mafuk maciiyiiy wiiyiiy ufulok byoos bitukaakaamin kaakunying ni makeng.—Ez. 34:25, 26.
5. I mushind kaay udy Yehow mwa kushaal diibw diitut dya muland dya kusokotel?
5 Umw mushind utudy mwa kulong bwa Yehow ashaal Cisokotel ciitut, i hatumusaasambil. Hatusaasambil, Yehow wiitwaakakish “diitalal dya Mawej” dilaalam micim ni meej miitut. (Fili. 4:6, 7, NWT) Tutalaay cilongel Artem, mwiin-kweet mwaan-mulum umbilobw mu nzubw a lukan bwa diitabij dindiy. Baakady bamumb majooj misang ni misang kudy muut a mucim mubiih utuminobw waakady umulongesh myand ku makand ni umuhweekesh milong. Artem uleebel ney: “Naakady numvw bibiih haakady muut aaw uuyumb majooj. . . . Naakady teng nasambil Yehow, namulomb diitalal dya mu micim ni meej. Ning mwaakady muut oow uukabish, nashaadil mwiihooy. . . . Kudyambulwiish dya Yehow, naakady bu mwiiman ha ciman cya mabw.”
6. Bilondeshel Yeshaay 26:3, 4, bwaabiny tudy mwa kuteekel Yehow micim?
6 Yehow i waakuteekel micim. Teng mudy diibw dya muland kadiy dinyekan, Yehow udy teng habwiih neet bwa kwiitwambulwiish. Tudy mwa kumuteekel micim bwaal yiy i “Diibw dya muland dya biisang byoos.” (Bal Yeshaay 26:3, 4.) Wiiyiiy kwiikal teng ni buumy bwa kuwaakany milay yindiy, kumvw masambil miitut ni kwiitwaakish bitukaakaam. Tudy cikwaabw mwa kuteekel Yehow micim bwaal udy ni lulamat kudy aab bamuloolongel mudimw. (2 Sam. 22:26) Kaakuvulaminoh bend byoos bituloolong, ni wiiyiiy kwiituh bulang.—Ebr. 6:10; 11:6.
7. Twiiyiiy kuhet biny tut bateekel Yehow micim? (Tal cikwaabw cifwaatul.)
7 Yehow ushaashaal Diibw diitut dya muland hatumuteetekel micim. Tudy bajaadik ney hatukookooyel kudyey ning mu biisang bikasakan, wiiyiiy kwiitubenesh. (Ye. 48:17, 18) Misang yoos hatutaatal mudy Yehow wiitwambulwiish, twiiyiiy kumuteekel micim bikasakan. Twiikaakal bajaadik ney Yehow ki wiikal mwa kwiitwambulwiish bwa kutaatameen diiteet kaay dyoos ning dikasakan bicy. Misang yivul mu myand yitudy katuy ni muut wa kwiitwambulwiish, tudyaakutal mudy Yehow waakuteekel micim. Vladimir uleeleeb ney: “Mafuk manalongel mu nzubw a lukan maakady mahit kulengel bwa bulund bwa mim ni Mawej. Nalongel mwa kuteekel Yehow micim bikasakan bwaal waakady teng yiy kaayend waakady mwa kuuyambulwiish bwa kutaatameen makab.”
Tuloolong bwa Yehow iikal diibw diitut dya muland hatumuteeteekel micim (Tal cikos cya 7)
8. a) Bwaabiny tudy mwa kuleeb ney Yehow kiish ushiituluk? b) Bilondeshel Misambw 62:6, 7, I biny bituheehet hady Yehow diibw diitut dya muland?
8 Yehow kiish ushiituluk. Yehow udy teng bu diibw dya muland ditam dikiish dinyekan. Buumuut bwindiy ni kiihacil kindiy kabiish bishiituluk. (Mal. 3:6) Haakady Adam ni Eev bamutombokel, Yehow kaakadyoh bend mushiitulul kiihacil kindiy bwa baat. Teng mufundil mupostol Pool, Yehow “kiishoh bend mwa kwiidingomw yiy kaayend.” (2 Tim. 2:13) Biineeby byumvumvwiij ney ning bwaal kaay bulongek eecy baat balong bicy, Yehow kiish mwa kwiiy kushiitulul ning bicy biikadil bindiy, kiihacil kindiy, eecy may mindiy matam. Bu mudy Yehow kaay ushiituluk, tudy bajaadik ney wiiyiiy kwiitwambulwiish mu biisang bikasakan ni wiiyiiy kuwaakany milay yindiy mu mafuk maciiyiiy.—Bal Misambw 62:6, 7.
9. I biny biwuloolongel ku bwaal bwa Tatyana?
9 Hatulaalangil ha biikadil bya Yehow ni ha kiihacil kindiy bwa bulab ni bwa baat, biitwambambulwiish bwiitut kumuteekel micim ni bwiitut kulong bwa iikal Diibw diitut dya muland. Kulong nook kudy mwa kwiitwambulwiish bwiitut kushaal batuukij mu biisang bya makab ni tushaal ni lulamat. (Mis. 16:8) Ki cilongekel mwiin-kweet mwaan-mukaj dindiy Tatyana waakadyobw bakwaat ni balamin ku cibel kwindiy bwa diitabij dindiy. Uleeleeb ney: “Niyumvwiil kaayaany. Ku butambwiil byaakady bikasakan menmen, naakady niiyumvw teng mukooyel.” Ki hatangiley kulang bwa Yehow ni kiihacil kindiy bwa baat, umanyikil bwaabiny byaakady ni buseeb bwa kutaatameeney diiteet aady, biineeby bimwambulwiishil bwa kutuukijey ni bimuheel bukash bwa kushaal ni lulamat. Uleeleeb cikwaabw ney: “Kumanyik bwaabiny myand eey yaakady yiifikil kuyambulwiishil bwa mim kuvuluk ney i bwa Yehow hady myand eey yiifikil. Biineeby biiyambulwiishil bwa mim kulek kulang bwa mim kaayaany.”
10. I mushind kaay udy Yehow mwa kushaal diibw diitut dya muland teng kaabaak?
10 Mu kalung kaakeeh oomw, twiiyiiy kuhet mateet miikal mwa kulong bwiitut kuteekel Yehow micim bikasakan kuhitok ni kuuhal. Nook bidy ni buseeb teng kaabaak bwiitut kukashish diitabij diitut kudy Yehow ni kwiikal bajaadik ney wiiyiiy kwiitwambulwiish bwiitut kushaal ni lulamat kudyey mu shikacil kaay yoos. I mushind kay utudy mwa kulong naak? Bal myand yidyobw balond mu Bibl ni yidyobw balond kudy Baatemw ba mafuk miitut aam. Tal mwaakady Yehow mwambulwiish baat bindiy. Langil bikasakan ha miisamb eey. Kulong nook kudy mwa kukwambulwiish bwiibuh kulong bwa Yehow iikal Diibw diibuh dya muland.
IIDIKIJ BIIKADIL BYA YEHOW
11. Bwaabiny bikaam twiidikij biikadil bya Yehow? (Tal cikwaabw kazubw ka ney: “ Kihacil kady biin-kweet baan-balum bacidy ba sand mwa kwiifundil.”)
11 Tubaatal mudy Yehow mwiileej mudyey bu diibw dya muland. Kaabaak tutalaay mutudy mwa kwiidikij biikadil bindiy. Tut biikashishomw bwa kwiidikij biikadil bya Yehow, tudy mwa kukashish biin-kweet. Cileejel Yeez uheel Simon diijin ney Kefas (didyobw balabul ney: “Pyeel”), dyumvumvwiij ney: “Diibw.” (Jah 1:42) Diijin eedy dyaakady dileej ney waakady mwa kwiiy kukashish cisumbw ni kwiicishimatish. Baleeleeb bwa bakul ba mu cisumbw ney bady bu “muvweebel a diibw dya muland ditam.” Biineeby bileeleej mudyobw balam aab bady mu cisumbw boos. (Ye. 32:2) Tut boos tudy mwa kukashishangan bamw ni bakwaabw tut biidikij biikadil bya Yehow.—Ef. 5:1.
12. Leej mishind yitudy mwa kwiikal cisokotel bwa bakwaabw.
12 Iikal cisokotel. Misang yikwaabw tudy mwa kwiikal bakumban bwa kwaakish biin-kweet cyaab cya kusokotelobw hadyok bihuh, bimvund eecy diivit. Bu mudy mafuk ma “bulekel” mend ni kubiih teng kubiih, twiiyiiy kuhet mishind yivul yiitut kwambulwiishangan. (2 Tim. 3:1) Tudy mwa kukashish biin-kweet ku micim ni kwiibaleej lukat lukaakaamobw. Umw mushind a kulong nook, i hakwiisamb naab hadyobw biiy mu bisangil ni kwiibakashish. Tukaakaam bwa mu cisumbw mwiikal cyaab cya kuleejelangan lukat ni kukashishilangan. Tudy mu bulongolody mudy baat balongelangan myand ni mucim mubiih ni bakat kunyingalajangan. Nook hady biin-kweet biiy mu bisangil, tudy bakat bwa biiyumvw ney tudy biibakat ni twiibakaakashish.
13. I mushhind kaay udy bakul mwa kushaal cisokotel bwa bakwaabw? (Tal cikwaabw cifwaatul.)
13 Bakul bady mwa kwiikal cisokotel bwa bakwaabw mu ciisang cya makab. Hadyok bihuh ni mabenj, bakul baloolongolol myand lwang-lwang bwa kwambulwiish biin-kweet. Biibaloolombol ni biibakashish ni may ma mu Bibl. Biin-kweet biiyiiy kwiiyumvw biilekelel bwa kulomb dyambulwiish kudy mukul udyobw bamanyik ney wiiyiiy kwiisamb naab bilengel ni wiiyiiy kwiibakun mat ni ukaam bwa kumvw bilengel mudyobw biiyumvw. Biikadil bya nook byambambulwiish bakwaabw bwa kwiiyumvobw mudyobw biibakat ni biikaakal biheehel bwa kulondobw buludik bwa mu Bibl budy mukul mwa kwiibakish.—1 Tes. 2:7, 8, 11.
Bakul bataatacil biin-kweet bady mu biisang bikasakan (Tal cikos cya 13) a
14. I mushind kaay utudy mwa kuleej ney tudy baat ba kuteekel micim?
14 Iikal waakuteekel micim. Tudy bakat bwa bakwaabw biituteekel micim nang-nang mu biisang bya makab. (Tus. 17:17) I biny bitudy mwa kulong bwa bakwaabw biituteekel micim? Tudy mwa kwiikashishomw bwa kuleej biikadil bya Mawej diib dyoos bu mudy kuwaakany bitulaalay ni kuneemek diib. (Mat. 5:37) Tudy mwa kwambulwiish bakwaabw ni biit bikaakaamobw. Cikwaabw, twiikalaay bajaadik ney tuloolong midimw yidyobw biitwaakish bilondeshel may ma kulond matuheehet.
15. I myand kaay yilengel yidy biin mu cisumbw bahet hady bakul biikal baakuteekel micim?
15 Biin mu cisumbw baheehet myand yilengel hady bakul biikal baakuteekel micim. Mu mushind kaay? Hady biin-kweet bamanyik ney bady mwa kubiikan bakul diib kaay dyoos didyobw bakaam dyambulwiish, biibambambulwiish bwa kwiiyumvobw bilengel. Biin-kweet biiyumvumvw mudyobw biibakat hadyobw bamanyik ney bakul bady teng habwiih bwa kwiibambulwiish. Hady bakul bakal mudimw ni Bibl ni mikand yiitut bwa kutwaal mubel ki kabay bamutwaal bilondeshel meej maababw, biin-kweet biiyiiy kwiibateekel micim bikasakan. Cikwaabw, biin-kweet bateetekel bakul bady kabay bambil bakwaabw myand yaababw micim ni bawaawaakany myand yidyobw baleeb.
16. I biny bituheehet tut ni baat bakwaabw hatuloolong cidy cilengel ku mees kwa Mawej?
16 Long cidy ciwaakan ku mees kwa Yehow. Hatukookooyel kudy Yehow mu myand yoos, ni hatwangangat mahangadik mashimacil ha may matam ma mu Bibl, twiiyiiy kwiikal bileejel bilengel kudy bakwaabw. Hatuloolong diiy dya Mawej, ni tukashish diitabij diitut kudy Yehow, twiiyiiy kushaal ni lulamat kudyey ni ku may mindiy matam. Twiiyiiy tumanyik malongweesh ma makos ni ngeny yikiish yihetangan ni meej ma Yehow ni katwaakwiiyoh bend kwiiyilond. (Ef. 4:14; Jak 1:6-8) Diitabij ditudy naady kudy Yehow ni mu milay yindiy diitwambambulwiish hatuheehet misah yibiih. (Mis. 112:7, 8) Tudy cikwaabw bakumban bwa kwambulwiish aab bataataatameen mateet.—1 Tes. 3:2, 3.
17. I biny byambambulwiish bakul bwa kwambulwiishobw bakwaabw bwa kwiikalobw batuukij mu diis ni kwiikalobw ni diitabij dikasakan kudy Yehow?
17 Bikaam bakul biikal ni kacy-kacy mu biikadil byaababw, ni meej majaalal, ni bulongam, ni kulang kwa meej. Baan-balum aab bambambulwiish bakwaabw bwa kwiikalobw batuukij ni bwa kwiikalobw ni diitabij dikasakan mu cisumbw ‘hakulond diiy dya Mawej bu mwiidilongweeshelobw.’ (Tiit 1:9; 1 Tim. 3:1-3) Kuhicil ku cileejel cyaababw ni ku mushind udyobw balam mikook, bakul bambambulwiish baakajaady bakwaabw, batweetweel mu bisangil, badiidiil baat musah, ni biiloolongel hacibidil. Hady biin-kweet bahet myand yiibiitiitish mut, bakul bady mwa kwiibavulwiij bwa kuteekelobw Yehow micim ni kwimanyin ha milay yindiy.
18. Bwaabiny tudy bakat kutumbish Yehow ni kufweej habwiih nend? (Tal cikwaabw kazubw ka ney: “ Mushind a kufweej habwiih ni Yehow.”)
18 Tut baman kukontonon biikadil bilengel bya Yehow, tudy mwa kuleeb bu mukaleng Davih ney: “Angat lutumb a Yehow, diibw dyaam dya muland.” (Mis. 144:1, NWT) Tudy mwa kuteekel Yehow micim misang yoos. Mu shikacil iitut woos, ning tut banunah, tudy bajaadik ney wiiyiiy kutungunuk teng ni kwiitwambulwiish bwiitut kushaal nend habwiih ni tudy mwa kuleeb ney: “I Diibw dyaam dya muland.”—Mis. 92:14, 15.
MUSAMBW A 150 Kebayi Nzambi bua anusungile
a DYUMVWIIJ DYA BIFWAATUL: Mwiin-kweet mwaan-mukaj wiisaasamb ni bakul mwiilekelel hadyey ku Nzubw a Bukaleng.