Majooj ma babaabal
Bwaabiny bamw baat bady mwa kuleeb ney Misambw 12:7 uleeleeb bwa “may ma Yehow” (mu verseh 6) hady ook Bible Nkudimuinu wa Bulongolodi bupiabupia uleeb ney uleeleeb bwa “baacimon-a-mal” (mu verseh 5)?
Bilondeshel verseh yidy ku mut ni yidy kuush, bimweemweek ney verseh oow uleeleeb bwa baat.
Mu Misambw 12:1-4, tubaabalomw ney “baat baleeleeb myand ya biin-biin ibaman kujimbakan mukacy mwa baat.” Kaabaak tutalaay Misambw 12:5-7 [NWT], uleeleeb ney:
“‘Ki Mawej Yehow uleeleeb ney: ‘Kaabaakoow bwa hamut ha baacimon-a-mal bakaakabishobw.’
Ni bwa balam-lam badiidilakan
Najuujuuk,
‘Nakuuloh aab badyobw kabay babal ni buseeb.’
May ma Yehow imatook.
Bu arjan muhicil mu mudil, mutoot mutookesh bikuuk cisambwiibidy.
Uw a Yehow wiiyiiy kwiibalam.
Wiiyiiy kulam woos waakudyobw buyiil ku biin baat ba micim yibiih aabw.”
Verseh 5 uleeleeb bwa ciikal Mawej mwa kulongel “bacimon-a-mal.” Wiiyiiy kwiibakuuloh.
Verseh 6 uleeleeb ney “may ma Mawej imatook bu arjan muhicil mu mudil,” may aam maleeleej mutwiiyumvw bwa Diiy dya Yehow.—Mis. 18:30; 119:140.
Kaabaak tutaalay verseh uloolond, Mis 12:7, [NWT] uleeleeb ney: “Uw a Mawej Yehow wiiyiiy kwiibalam; wiiyiiy kulam woos waakudyobw ku biin baat ba micim yibiih aab.” Myaak “kwiibalam” ni “waakudyobw” ileeleej biny?
Bwaal verseh 7 uleeleeb bwa “may ma Yehow,” bamw bady mwa kulang mwaak “waakudyobw” uleeleej may ma Mawej. Ni tudy bamanyik ney Mawej ulamin Bibl ning mwaakady balwiish balong mwaababw moos bwa kumubutul.—Ye. 40:8; 1 Py. 1:25.
Nook, cidyobw baleeb mu verseh 5 i cya biin-biin. Yehow utuutungunuk ni wiiyiiy kutungunuk ni kwambulwiish ni kukuuloh “bacimon-a-mal” ni “bakaakabishobw.”—Yoobw 36:15; Mis. 6:4; 31:1, 2; 54:7; 145:20.
Mu verseh a 7, myaak “Kwiibalam” ni “waakudyobw” yileeleej biny?
Hatumvumvw musambw oow bilengel, bimweemweek ney myaak “Kwiibalam” ni “waakudyobw” yileeleej baat.
Ku butambwiil kwa Misambw 12:1, Davih uleeleeb bwa ‘biin lulamat’ baakadyobw badingomw kudy baat babiih. Kuunyim, tubaabalomw ney Yehow wiiyiiy kubutul aab baleelebakan myand yibiih eey. Musambw oow wiitujaajadikil ney tudy mwa kuteekel Mawej micim ney wiiyiiy kukuuloh baat bindiy bwaal may mindiy imatook.
Verseh wa 7 uleeleeb ney Yehow wiiyiiy “kwiibalam” mwamw ney, baacimon-a-mal badyobw bakabish kudy baat babiih.
Myaak “kwiibalam” ni “waakudyobw” baakady biiyifund mu verseh oow mu mifund ya Ciin Ebreh yaakady baat bateekel micim. Bibl wa Septante wa mu Ciin Krek ukaakal mudimw ni mwaak “tut” misang yibidy mu verseh a 7 uleeleej biin lulamat bakaakabishobw ni bamweemweeshobw mal. Bulekel bwa byoos, verseh a 7 uleeleeb ney “woos wa” ku biin lulamat aab biiyiiy kumulam “ku biin baat ba micim yibiih aab,” batuutumbish biikadil byonyek. (Mis. 12:7, 8) Mu mifund ya mu ciin Ebreh yidyobw balaabul mu Ciin Arameyeh, verseh a 7 uleeleeb ney: “Uw, A MAWEJ, wiiyiiy ulam baat bawaakan, wiiyiiy kwiibalam buyiil ku biin baat ba micim yibiih aab. Baat babiih banyunyunguluk ha byaab byoos bu misund yinwaan mash ma baan ba baat.” Biineey biitujaajaadikil ney Misambw 12:7 kiish uleeb bwa May ma Mawej.
Ki verseh oow, waakaakish ‘biin lulamat’ kutakamin kwa ney Mawej wiiyiiy kwiibakuuloh”
