CIIN-BWAAL CYA KULONG CYA 25
MUSAMBW A 7 Yehowa, udi bukole buetu
Manyik ney Yehow i “Mawej udy ni buumy”
“Yehow udy ni buumy!”—MIS. 18:46, NWT.
BWAAL BUTAM
Tumvumvw musangal ha kumanyik ney Mawej wutuhaahambidil i “Mawej udy ni buumy.”
1. I biny byambambulwiish baat ba Yehow bwa kutungunukobw ni kumuhambidil ning mudyobw bahet makab?
BIBL uleeleeb ney: “tudy mu biisang bikasakan.” (2 Tim. 3:1) Hakufulok makab mady muut woos mwa kuhet ha bulab aah, baat ba Yehow batwiitwiilangan kabidy ni bulwiish. I biny biitwambambulwiish bwa kutungunuk ni kuhambidil Yehow ning mutudy ni makab? Bwaal tudy bamanyik ney Yehow i “Mawej udy ni buumy.”—Jer. 10:10; 2 Tim. 1:12.
2. Yehow i Mawej udy ni buumy mu mushind kaay?
2 Yehow i mumanyik tat yoos yituheehet ni iimukat teng kwiitwambulwiish. (2 Cif. 16:9; Mis. 23:4) Tut tumutal bu Mawej udy ni buumy, biiyiiy kwiitwambulwiish bwiitut kutaatameen diiteet kaay dyoos didy mwa kwiitukwaat. Tal mwaakady bwaal oobw bwa biin-biin kudy Mukaleng Davih.
3. Davih waakady ukaam kuleeb biny haleebeley ney “Yehow udy ni buumy”?
3 Davih waakady mumanyik Yehow ni umuteekel micim. Haakady balwiish bindiy bamulwiish ni Mukaleng Sawul byend, Davih ulombel Yehow dyambulwiish. (Mis. 18:6) Yehow muman kwaalabul diisambil dindiy ni mumukuuloh, Davih uleebel: “Yehow udy ni buumy!” (Mis. 18:46, NWT) Bilondeshel may aam, Davih kaakady wiitabij bituh ney Mawej udyok. Mukand mukwaabw uleeleeb ney Davih waakady muteekel Yehow micim “bu Mawej udy ni buumy ukuukuuloh baat bindiy.” Davih waakady mumanyik ney Mawej indiy waakady mumanyik byoos byaakady bimufikil ni waakady habwiih bwa kumwambulwiish. Biineeby bimukashishil bwa kutungunukey ni kukadil Yehow mudimw ni kumuh lutumb.—Mis. 18:28, 29, 49.
4. I biny bituheehet hatutaatal Yehow bu Mawej udy ni buumy?
4 Kutwiishiibw kwiitut kwa ney Yehow i Mawej udy ni buumy, kudy mwa kwiitwambulwiish bwiitut kumukadil mudimw ni cisumy. Twiiyiiy kuhet diikand bwiitut kutaatameen mateet ni kutungunuk ni kumukadil mudimw bikasakan. Cikwaabw, twiikaakal biiswiik bwa kushaal habwiih ni Yehow.
MAWEJ UDY NI BUUMY WIIYIIY KUKUKASHISH
5. Bilondeshel Biin Filipw 4:13, i biny bidy mwa kwiitwambulwiish bwiitut kuteekel Yehow hatuheehet mateet?
5 Tudy mwa kwiiy kutaatameen diiteet kay dyoos, ditam eecy dikeeh, teng tut bavuluk ney Yehow udy ni buumy ni udyok bwa kwiitukwanjok. Udy mwa kwiitwambulwiish mu diiteet kaay dyoos bwaal kakwiishoh bend bwaal budy bukasakan kudyey. I wa Bukash boos ni udy mwa kwiitwaakish diikand bwiitut kutaatamen. (Bal Biin Filipw 4:13.) Tudy ni tubingil toos twiitusaasak bwa kumuteekel micim hatuheehet mateet. Hatutaatal mudy Yehow wiitwambulwiish mu mateet makeeh, biitujaajaadikil ney wiiyiiy kabidy kwiitwambulwiish mu mateet makasakan.
6. I biny bilongekel Davih hacyaakadyey sand byaakady bimusak bwa kuteekel Yehow micim bikasakan?
6 Tutaalaay myand yibidy yilongel bwa ateekel Yehow micim bikasakan. Hacyaakady David sand ulam mikook ya taatend, nyam a Urs ni nyam a Tambw yiiyil yaakwaat mikook. Misang yoos yibidy aay, Davih wiihacil nyam aay ni diikim dyoos wiiyizuh wangat mikook. Davih kalangiloh bend ney waakady mulong myand eey ku bukash bwindiy, bwaal waakady mumanyik ney Yehow waakady nend. (1 Sam. 17:34-37) Davih kavulamiinoh bend myand eey, ni haakadyey ulangiloh, waakady mutwiishiibw ney Mawej udy ni buumy waakady mwa kumwaakish diikand mu mafuk maciiyiiy.
7. Davih waakady mutum meej ku biny, ni bwaabiny bimwambulwiishil bwa kuley diivit ni Koliyat?
7 Hacyaakady Davih sand, uyiil ha cibanz bwa katal basalaay ba biin Izaleel. Usangeen ney basalaay baakady baciin mwiin Filisiteh muleeh dindiy Koliyat uhatukil bwa “kuyobol basalaay biin Izaleel.” (1 Sam. 17:10, 11, NWT) Basalaay baakady bumvw mooy bwaal baakady biimanyin ha byaakadyey uleeb ha cibanz ni bul bwaakadyey. (1 Sam. 17:24, 25) Davih naabw waakady utal myand mu mushind mukwaabw. Yiy waakady mumanyik ney haakady Koliyat usek cilwiil cya biin Izaleel, waakady usek “basalaay ba Mawej udy ni buumy.” (1 Sam. 17:26) Davih waakady mutum meej mindiy kudy Yehow. Waakady mujaadik ney, Mawej umwambulwiishil hacyaakadyey mulamy a mikook aaw, waakady mwa kumwambulwiish kabidy mu bwaal oobw. Bu mwaakadyey mutwiishiibw bwa dyambulwiish dya Mawej, David ulwiil diivit ni Koliyat ni biin-biin ucimwiin!—1 Sam. 17:45-51.
8. I mushind kaay utudy mwa kutum meej kudy Yehow hatuheehet mateet? (Tal cikwaabw cifwaatul.)
8 Tut byeet tudy mwa kucimun mateet, tut bavuluk ney Mawej udy ni buumy udy neet. (Mis. 118:6) Tudy mwa kukashish dyeeyeleel diitut kudyey hakukontonon myand yikaadyey mulongoh ha kal. Bal myand ya mu Bibl yidy mwa kukuvulwiij mwaakady Yehow mukuuloh bahambidil bindiy. (Ye. 37:17, 33-37) Cikwaabw, kontonon lwaapool yidy mu sit iitut jw.org yileeleej mudy Yehow wambulwiish biin-kweet mafuk aam. Ni vulukok biisang bidyaakal Yehow mukwambulwiish. Misang yikwaabw udy mwa kulang ney Yehow kiish mwanj kukulongeloh bwaal bukeekemesh bu mudy kukukuuloh kudy Tambw eecy kudy Urs. Cidy ni buseeb i cya ney, Yehow i mukulongel myand yivul mu shikacil iibuh! I mukukok kudyey bwiibuh kushaal mulund nend. (Jah 6:44) Ning kaabaak, teng bwaal Yehow i mukukwanjok ki bwaabiny ucimukaakadil mudimw ni leel. Bwaabiny kwiish mwa kulombok Yehow bwa kukuvulwiijey biisang byaalabwiiley masambil miibuh, bikuheeley biwaakady ukaam ha diib eecy bikwambulwiishiley mu biisang bikasakan? Kulangil ha myand ya nook, kwiiyiiy kukashish kutwiishiibw kwiibuh kwa ney Yehow wiiyiiy kutungunuk ni kukwambulwiish mu biisang bikasakan.
Mateet matuheehet mataatal mushind udy Yehow ulang (Tal cikos cya 8-9)
9. Bilondeshel Tusumw 27:11, i biny bitudy mwa kuvuluk hatuheehet mateet?
9 Kutal Yehow bu muut a Biin-bin, kwiiyiiy kwiitwambulwiish bwiitut kutal makab mu mushind mulengel. Mushind kaay? Tutaatang kwiimatal bu cilumbw citam hakacy ha Yehow ni Sataan. Dyaabol ulaalang ney tut bahet makab twiiyiiy kulek Yehow. (Yoobw 1:10, 11; bal Tusumw 27:11.) Hatushaashaal ni lulamat kudy Yehow ning mu makab, tuleeleej mutudy bamukat, ni mudy Dyaabol mwiin makos. Wendend ni kutwiilangan ni bulwiish bwa mbulmatady eeny? Myand ya makut yikutaatacish eeny? Mudimw iibuh a buukajaady kiish wend bilengel eecy udy ni lutat lukwaabw eeny? Biby biikal naak, manyik ney myand eey yikwaakaakish mushind iibuh kusangej mucim a Yehow. Manyik cikwaabw ney, kiish mwa kulek bwiibuh kuhet mateet makuhit diikand. (1 Kor. 10:13) Wiiyiiy kukuh diikand bwiibuh kwiimataatameen.
MAWEJ UDY NI BUUMY WIIYIIY KUKUH BULANG
10. I biny biikal Mawej udy ni buumy mwa kulongel bamuhaahambidil?
10 Yehow wiiyiiy kuh baat bamuhaahambidil bulang. (Ebr. 11:6) Wiitwaakaakish musangal ni diitalal kaabaak ni wiiyiiy kwiituh buumy bwa mwendelel mu mafuk maciiyiiy. Tudy bajaadik biin-biin ney Yehow ukaakaam kwiituh bulang ni udy ni bukash bwa kulong nook. Kutwiishiibw ook, kwiitusaasak bwiitut kulong bivul mu kuhambidil kwiitut teng bu biin mudimw ba lulamat ba Mawej ba kal. Ki cilongel Timoteh.—Ebr. 6:10-12.
11. Bilondeshel 1 Timoteh 4:10, bwaabiny Timoteh ukadil mudimw muvul mu cisumbw?
11 Bal 1 Timoteh 4:10. Timoteh waakady mutakamin kudy Mawej udy ni buumy. Ki bwaabiny, ukadil mudimw muvul bwa Yehow ni bwa baat bakwaabw. I biny bilongeley? Mupostol Pool umukashishil bwa kushaaley mulongweesh mulengel mu mudimw a buukajaady ni mu cisumbw. Umwambiil cikwaabw bwa kwiikaley cileejel cilengel kudy bakuluuh ni batofw. Ni umuheel midimw yikasakan bu mudy wa kwaakish baat mibel ya buludy-ludy ciby ni lukat. (1 Tim. 4:11-16; 2 Tim. 4:1-5) Timoteh waakady mutwiishiibw ney, ning mwaakady bamw kabay batal mudimw waakadyey ulong eecy bamwaan, Yehow waakady wiiy kumuh bulang.—Rom 2:6, 7.
12. I biny bidy mwa kusak bakul bwa kwiikalobw ni bivul bya kulong mu mudimw aababw? (Tal cikwaabw cifwaatul.)
12 Leel, bakul biikal bajaadik ney Yehow i mutal ni wangangat mudimw aababw mulengel ni buseeb. Hakufulok mudimw a kulam mikook, kulongweesh ni kudiilangan musah, bakul bavul bambambulwiish mu midimw ya lwiibak ni ya kwambulwiishangan hadyok bihuh. Bakwaabw bakaakal mudimw mu Tusumbw twa kukumbul babeel, eecy mu Komiteh utatalangan ni baamingang. Bakul i bamanyik ney, cisumbw i cya Yehow ki kaciishoh bend cya muut. Ki bwaabiny bakaakal mudimw muvul mu cisumbw bajaadik ney Mawej wiiyiiy kwiibah bulang bwa byoos biloolongobw.—Kol. 3:23, 24.
Mawej udy ni buumy wiiyiiy kukuh bulang bu muwuloolong mudimw muvul mu cisumbw (Tal cikos cya 12-13)
13. Yehow umvumvw bicy bwa bituloolong mu mudimw indiy?
13 Baat boos kabiish mwa kushaal bakul. Ki woos wa kutudy udy ni cidyey mwa kuh Yehow. Mawej iitut waanaan byoos bitumuhwaah hatuloolong mwiitut moos bwa kumukadil mudimw. Utaatal byoos bitutwaatwaal mu mudimw indiy ha bulab butuutul biikal bikeeh eecy bivul. Usaasangal hatumbumb cikam kwiiwul bwa kutwaal dyaalabul ni hatuleelengulul myand yiitufuufuluj mund ni tufwiilanganok lus. Ning uw ulang ney biwuloolong aaby i bikeeh, manyik ney Yehow wangangat ni buseeb biwudy mwa kulong. I mukukat bwa biwuloolong aaby ni wiiyiiy kukuh bulang.—Luuk 21:1-4.
SHAAL HABWIIH NI MAWEJ UDY NI BUUMY
14. I mushind kaay udy kushaal habwiih ni Yehow kwiitwambulwiish bwiitut kushaal ni lulamat? (Tal cikwaabw cifwaatul.)
14 Tut tutal Yehow bu muut a biin-biin, biikaakal biheehel bwiitut kushaal ni lulamat kudyey. Ki cilongel Yozefw. Wiiswiikil ni mucim aakaabumw bwa kulek kwend masandy. Waakady utal Yehow bu muut a biin-biin ni kaakady mukat kumunyingalaj. (Kbwa. 39:9) Bwa kwiiyey muut a biin-biin kutudy, bikaam twiikal ni diib dya kumusambil ni diitut kwiilongel Diiy dindiy. Nook, bulund bwiitut nend bwiiyiiy bukasakan. Teng bu Yozefw, tut bady bulund bukasakan ni Yehow, katwiish mwa kwiiy kulong bwaal kaahand budy mwa Kumunyingalaj.—Jak 4:8.
Kufweej habwiih ni Mawej udy ni buumy kwiiyiiy kukwambulwiish bwiibuh kushaal ni lulamat (Tal cikos cya 14-15)
15. Bilondeshel Biin Ebreh 3:12, i diilongweesh kaay dituheehetel ku cyaakady cilongekel biin Izaleel haakadyobw mu cyanganyik?
15 Boos bavuuvulamin ney Yehow i Mawej udy ni buumy bady mwa kufweej kuleeh nend biheehel. Tutalaay cilongekel biin Izaleel haakadyobw mu cyanganyik. Baakady bamanyik ney Yehow udyok, ki batangil kweelakan ney ning waakady mwa kwiibambulwiish, baafik ni kukwiijooj ney: “Mawej [Yehow] udy mukacy mwiitut oomw eecy kiishomw?” (Cim. 17:2, 7) Ki bwaabiny batombokel Mawej. Biin-biin katwiish bakat kulond cileejel cyaababw cibiih.—Bal Biin Ebreh 3:12.
16. I biny bidy mwa kuteet diitabij diitut?
16 Biin hanwaah, baloolong bwa biitukasakeen bwiitut kushaal habwiih ni Yehow. Bavul baleeleeb ney Mawej kiinok. Misang yikwaabw, aab baleelek mikenj ya Mawej bamweemweek bu bady ni shikacil mulengel. Hatutaatal bwaal bwa nook bulongek, diitabij diitut didy mwa kuhet diiteet. Ning mutwiitaatab ney Mawej udyok, tudy mwa kutang kweelakan ney ning wiikaakal mwa kwiitwambulwiish. Mufund a Musambw 73 wiiyumvwiil byend nook ciisang kaahand. Utadil baat baakady kabay bakooyel ku May ma Mawej biikal teng ni shikacil mulengel. Nook, utangil kwiiyihanguj ning byaakady ni buseeb bwa kukadil Mawej mudimw.—Mis. 73:11-13.
17. I biny biikal mwa kwiitwambulwiish bwiitut kushaal habwiih ni Yehow?
17 I biny byambulwiishil mumb a misambw bwa kushiitulul meej mindiy? Ulangil ha ciikal mwa kufikil baat baleelek kuteekel Yehow micim. (Mis. 73:18, 19, 27) Ukontonween cikwaabw musangal uheehet muut hadyey ukadil Mawej mudimw. (Mis. 73:24) Tut byeet tudy mwa kulangil ha mishind yikaady Yehow mwiitubenesh. Kulang ni mwaakady mwa kwiikal shikacil iitut tut biikal katuy tukadil Yehow mudimw. Kulong nook, kudy mwa kwiitwambulwiish bwiitut kushaal teng ni lulamat ni kuleeb bu mumb a misambw ney: “Ki musangal a mim, i kwiikal habwiih neeb.”—Mis. 73:28.
18. Bwaabiny kabiish bikaam tuciin mufuk maciiyiiy?
18 Tudy mwa kutaatameen makab kaay moos mu mafuk ma ku bulekel aam, bwaal ‘tukaakadil Mawej a biin-biin udy ni buumy mudimw.’ (1 Tes. 1:9) Mawej iitut i muut a biin-biin wambambulwiish boos bamukaakadil mudimw. Uleejel naak haakadyey ni biin mudimw bindiy ba kal, ni udy neet leeloow. Mu kalung kakeeh oomw, tutweetweel mu mal miimiin miikal mwa kulongek ha bulab butuutul. Ki katwaakwiimataatameenoh bend kaayeet. (Ye. 41:10) Tut boos “tudy mwa kujaadik ni micim yikasakan ney: ‘Mawej [Yehow] i yiy uukwaakwanjok mim, ciishoh bend ni cinaciiciin.’”—Ebr. 13:5, 6.
MUSAMBW 3 Bukole buetu, ditekemena dietu, tshieyemenu tshietu
