1-2. Yehow ubiibiikan bahambidil bindiy ba lulamat bwa kulong biny?

 MU SHIKACIL iibuh udyaakutal Yehow bu ngany? Udy mwa kuleeb ney, ‘Yehow i Taat a mim, Mawej aam, ni Mulund naany.’ Kudy myaanz yikwaabw yiwudy mwa kwaakish Yehow. Ki udy mwa kutalok Yehow bu muut udy mukwaakidil kwindiy eeny?

² Mukaleng Davih ufwanyikijil bulund budy hakacy ha Yehow ni bahambidil bindiy ba lulamat ni bulund budy hakacy ha mweeny ni mwiin kucibel. Ujoojel ney: “A Mawej [Yehow], i ngany udyobw mwa kutweej mu nzubw iibuh? I ngany udy mwa kushikat ha mulund iibuh mujilang?” (Mis. 15:1) Verseh oow wiituloolongweesh ney, tudy mwa kushaal beeny ba Yehow eecy balund nend. Wiinoow kiish mushind mutam udy Yehow wiitubiikan eeny?

YEHOW I MUKAT BWA TWIIKAL BEENY BINDIY

3. I ngany waakady mweeny a Yehow wa kuuhal, ni i mushind kaay waakady Yehow ni mweeny indiy biiyumvw bwa umw ni mukwaabw?

³ Kuuhal kwa Yehow kuhang biit byoos, waakady kaayend. Ki uhangil mwaan indiy mwaan-a-but. Yehow waakady bu Mwiin ku cibel ubiikeen mweeny mu mutand indiy, ni waakady musangal a kulong nook. Bibl uleeleeb ney Yehow waakady “nang-nang muhit kukat” mwaan indiy. Mweeny indiy a kuuhal byend “waakady usangal kuuhal kwindiy [Yehow] diib dyoos.”—Tus. 8:30, NWT.

4. I bangany bakwaabw bashaadil beeny ba Yehow mu mutand indiy?

 ⁴ Yehow uhangil banjel, wiibabiikeen bwa kwiikalobw byaabw beeny bindiy. Bibl ubiibiikan banjel ney “baan baan-balum ba Mawej” ni bady ni musangal a kwiikal ni Yehow. (Yoobw 38:7, NWT; Dan. 7:10) Bwa ciisang kaahand, beeny ba Mawej baakady teng aab baakady bashikacil nend mu diiwul. Kuunyim, uhangil baat bwa kwiikalobw byaabw beeny bindiy. Ha kal, mu bamw ba ku beeny aab mwaakady Enok, Noweh, Abraham, ni Yoobw. Bibl uleeleej ney baakady balund ba Yehow bwaal baakady bakooyel kudyey.—Kbwa. 5:24; 6:9; Yoobw 29:4; Ye. 41:8.

5. I biny bituloolongel ku may ma buprofet mady mu Ezekiyeel 37:26, 27?

⁵ Mukacy mwa mivw yivul, Yehow utungunukil ni kubiikan balund nend bwa kwiikalobw beeny bindiy. (Bal Ezekiyeel 37:26, 27.) Cileejel, tuloolongel ku may ma buprofet ma Ezekiyeel ney Mawej ukaakaam bwa bahambidil bindiy ba lulamat bady nend bulund bukasakan. Ulaalay bwa ‘kwiibashikik ku mat talal.’ Diiy dya buprofet eedy dileeleej ciisang ciikal aab bady ni kutakamin kwa kuy mu diiwul ni aab bady ni kutakamin kwa kushikat ha bulab biiyiiy kwiikal mu kaacyumw mu mutand indiy a mu cinfwaany bu “cisumbw cyaakaabumw.” (Jah 10:16) I cicy ciisang citudy eecy!

MAWEJ WIITUTAATACIL KOOS KUTUDY

6. I mushind kaay udy muut mwa kwiikal mweeny mu mutand a Yehow, ni i kweeh kudy mutand Indiy oow?

⁶ Mu ciisang cifundilobw Bibl, mutand waakady cyaab cya kushikacil, cya kweeyet mvul, cya kushikacil bwa munyiny eecy bwa mashik. Mweeny waakady mutakamin ney mwiin mutand waakady mwa kumwaak bilengel. Hatulaalambul buumy bwiitut kudy Yehow, tushaashaal beeny mu mutand indiy a mu cinfwaany. (Mis. 61:4) Tudy ni byaakudy bivul bya mu spirit, kuteekeloh ni balund neet bakwaabw bady byaabw beeny ba Yehow. Mutand Indiy kiish teng ha cyaab cyaakaabumw. Udy mwa kwiikal muman kuyoh mu cibunj cikwaabw, misang yikwaabw bwa kuy katweel mu cihwiil ni uw kuy kahetangan ni baat bakwaabw bady ni musangal a kwiikal mu mutand a Yehow. Nook, mutand a Yehow udy mwaab woos udy biin mudimw bindiy ba lulamat.—Yis. 21:3.

7. Bwaabiny tudy mwa kuleeb ney baat biin lulamat bakaady bafw bacidy teng beeny mu mutand a Yehow? (Tal cikwaabw cifwaatul.)

⁷ Tudy mwa kuleeb bicy bwa biin lulamat  bakaady bafw? Bacidy teng beeny mu mutand a Yehow eeny? ing! Bwaabiny tuleeleeb naak? Bwaal ucidy teng naab mu meej. Yeez umvwiijil ney: “Moyiz uleebel hatook ney, bafw biiyiiy kusanguk. Bwaal ha cyaab cileeleebey bwa diifuuk dilaalakuk mudil, ubiibiikan Mawej [Yehow] ney ‘Mawej a Abraham, Mawej a Izak, Mawej a Jakobw.’ Ki Mawej naabw kiish Mawej a bafw, i Mawej a baat batal. Bwaal kudy Mawej, baat boos i batal.”—Luuk 20:37, 38.

MYAND YILENGEL YITUHEEHET NI BUJIT BUTUDY NAABW

8. I mabenesh kaay maheehet baat ba Yehow hakwiikal mu mutand indiy?

⁸ Mutand a Yehow ulaalam beeny bindiy ku myand yidy mwa kwiibanyangil bulund bwindiy naab, ni wiibaakaakish kutakamin kwa biin-biin mu mafuk maciiyiiy. Tut bashaal habwiih ni Yehow, Sataan kiish mwa kwiitulongeloh bend bwaal bubiih. (Mis. 31:23; 1 Jah 3:8) Mu bulongolody buhyaabuhy, Yehow wiiyiiy kutungunuk ni kulam balund nend ba lulamat kiish teng ku buuhund bwa mu spirit ki ni ku lufw.—Yis. 21:4.

9. I biny bidy Yehow ukaam bwa beeny bindiy balong?

⁹ I dyaakatook diidiin dya kwiikal mweeny mu mutand a Yehow, bwaal tudy mwa kudy nend bulund bulengel bwa mwendelel. Tut tukaam bwa kutungunuk ni kwiikal beeny bindiy, bikaam twiikal ni biikadil kaay? Muut yiy mukubiikan kwindiy, wiiyiiy kukaam bwiibuh kumanyik cidyey ukaam bwiibuh kulong. Cileejel, udy mwa kwiikal ukaam bwa uvuul bilaat kuuhal kwiibuh kutweel mu nzubw, nook udy mwa kulong nook mu uw kaayeeb. Tut byeet, tukaakaam kumanyik cidy Yehow ulomb aab bakaakaam kutungunuk ni kwiikal beeny mu mutand indiy. Lukat lutudy naalw bwa Yehow lwiitusaasak bwiitut kulong mwiitut moos bwa “kulong myand yimuleelengeleel.” (Kol. 1:10) Ning tut tutal Yehow bu mulund neet, tudy bamanyik ney i Taat iitut, Mawej iitut ni i muwaakanyin kaneemw. (Mis. 25:14) Kabiish bikaam tuvulamin cidyey ni bikaam twiikal teng tumuneemek bikasakan. Kaneemw kakasakan kiitwambambulwiish bwa tulek biikadil bidy mwa kumunyingalaj. Tukaakaam biin-biin “kwend ni kwiihweekesh” ni Mawej iitut.—Mik. 6:8, NWT.

YEHOW WAAKADY ULONGEL BIIN IZALEEL MYAND KAY NI KABOW

10-11. I mushind kaay waakady Yehow mulongel biin Izaleel myand mu cyanganyik cya Sinaay, ni i mushind kaay udy bwaal oobw buleej ney Yehow kiish ni kabow?

¹⁰ Yehow kiishoh bend ubowolol beeny bindiy. (Rom 2:11) Tudy mwa kumanyik mudy Yehow kay ni kabow kuhicil ku mushind waakadyey ulongel biin Izaleel myand mu cyanganyik cya Sinaay.

¹¹ Yiy muman kukuuloh baat bindiy mu Ejipit, Yehow unoonenoh balambul ba milambw bwa kukalobw mudimw ku mutand. Waakishil biin Leevy midimw yikwaabw ya kukalobw ku mutand mujilang oow. Yehow waakady utacil baat baakady bakal mudimw ku mutand mujilang oow, eecy baakady bashikacil nend habwiih kuhitok bakwaabw eeny? Waakweeh! Yehow kiish ni kabow.

12. Bilondeshel Cimwang 40:38, i mushind kaay waakady Yehow muleej ney kiish ni kabow kuhicil ku mushind waakadyey mulongel biin Izaleel myand mu cyanganyik? (Tal cikwaabw cifwaatul.)

¹² Mwiin Izaleel woos waakady mwa kudy bulund bukasakan ni Yehow ning yiy mwiikal umukadil mudimw eecy kay umukadil mudimw ku mutand mujilang, hiikal habwiih ni mutand eecy kay habwiih nend. Cileejel,  Yehow ulongel mwindiy moos bwa cis cituutul ciikal ni mushind a kutal cishim cya diilelemb a miish ni cikeek a mudil byaakady ha mut ha mutand. (Bal Cimwang 40:38.) Haakady mwiish ukil mwiiwul bwa kuleej cyaab ciyaayobw, ning baakady kuleeh ni mutand baakady bumutal ni bakongakany biit byaababw byoos, batukun mitand, batang kulond kwaakady baat boos bay. (Kub. 9:15-23) Baat boos baakady mwa kumvw haakady bihuuny bibidy bya arjan bidil bikasakan bwa kwiibaleej ney, dya lwend dibaawaan. (Kub. 10:2) Cya biin, kushikacil habwiih ni mutand mujilang kakwaakady kumvwiij ney muut i mudy bulund bukasakan ni Yehow. Ki mwiin Izaleel woos waakady mwa kwiikal mweeny a Yehow ni kwiikal mutwiishiibw ney, waakady mwa kumulombol, ni kumulam. Bya mushind aakaabumw leel, ning tut bashikacil kweeh, Yehow i mwiitukat, wiitutaatacil ni wiitulaalam.

BILEEJEL BILEELEEJ MUDY YEHOW KAY NI KABOW

13. I mu mushind kaay udy Yehow uleej leel ney kiish ni kabow?

¹³ Bamw biin mudimw ba Mawej leel i bashikacil habwiih ni biroh bitam biloolombol mudimw a Baatemw ba Yehow ha bulab butuutul eecy habwiih ni biroh bya Filiyal. Bakwaabw baloolong midimw myaab eey. Nook, baat ba nook bady mwa kukal midimw yivul ha byaab eeby ni bahetangan ni biin-kweet baloolombol. Bakwaabw bakaakal mudimw bu balombol biin lwend eecy mudimw mukwaabw wa habwaah wa ku diib ni ku diib. Ning biby kabiy naak bwiibuh, iikal mujaadik ney udy teng mweeny a Yehow ni i mukat beeny bindiy boos. I mukumanyik bilengel ni ukwaakaakish byoos biwukaakaam. (1 Py. 5:7) Yehow waakaakish woos wa ku biin mudimw bindiy byaakudy bya mu spirit, biit bidyey ukaam ni umulam.

14. I cileejel kaay cikwaabw cya mudy Yehow kay ni kabow?

 ¹⁴ Cileejel cikwaabw cileeleej mudy Yehow kay ni kabow leel, i hadyey mulong bwa baat boos bahet Bibl. Ku butambwiil, Bibl waakady mufund mu bileebel bisat: Ciin Ebreh, Ciin Arameyeh, ni Ciin Krek. Baat babaabal Bibl mu bileebel bimufundilobw ku butambwiil, bady mu bulund bukasakan ni Yehow kuhitok aab bady kabay mwa kulong naak eeny? Waakweeh, kabiish naak.—Mat. 11:25.

15. I biny bileeleej mudy Yehow kay ni kabow? (Tal cikwaabw cifwaatul.)

¹⁵ Yehow kiishoh bend wiitwanyish bwa tulaas tutudy balong eecy bwa bileebel bitudy bamanyik. Hamut ha kwaakishey teng aab bady balong tulaas tuvul meej, i mwiimaakish baat boos ba ha bulab butuutul ning biikal balong tulaas tuvul eecy kabay balong. Bibl Diiy dindiy, i biidyaalabul mu bileebel binun bivul, nook, baat ba ha bulab butuutul bady mwa kumanyik malongweesh madyomw ni kulong mwa kudy nend bulund.—2 Tim. 3:16, 17.

TUNGUNUK NI KUSANGEJ YEHOW

16. Bilondeshel Myand Yilongel Bapostol 10:34, 35, i mushind kaay utudy mwa kutungunuk ni kusangej Yehow?

¹⁶ I dyaakatook diidiin dya mudy Yehow mwiitwaak bu beeny mu mutand indiy a mucinfwaany. Yehow i mulengel myand ni kiish ni kabow. Waakaak woos wa kutudy kay utal kudyey waaluk, cis cindiy, mivw yidyey naay, tulaas tudyey mulong, ciseb cindiy, cyaab cidyey mushikacil, iikal mwaan-mulum eecy mwaan-mukaj. Ki teng aab bakookooyel ku may mindiy ki badyey ubal bu beeny bindiy.—Bal Myand Yilongel Bapostol 10:​34, 35.

17. I kweeh kutwiikal mwa kuhetel myand yikwaabw habitaatal kwiikal beeny mu mutand indiy?

¹⁷ Teng mudyeb bibiilej mu Misambw 15:​1, Davih wiihangujiil ney: “A Mawej [Yehow], i ngany udyobw mwa kutweej mu nzubw iibuh? I ngany udy mwa kushikat ha mulund iibuh mujilang?” Yehow ukadil mudimw ni Davih bwa kwaalabul majooj aam. Mu ciin-bwaal ciloolond, twiiyiiy kwiisambil ha yimw myand yisunguluk yiituloolombobw bwiitut kulong bwa kutungunuk ni kusangej Yehow.