1. I mushind kaay utwiiyumvumvw bwa mudy Yehow mwiitwiitabil bwa twiikal tumusambil?

 TUDY bahet dyaakatook dilengel dyeeh​—dya kufweej habwiih ni Hang a diiwul ni bulab mu diisambil. Lang ket neey: Tudy mwa kwambil Yehow myand yoos yidy mu micim yiitut ha diib dyoos ni mu cileebel kaay cyoos kabiiy bikaam neey: tumumanyish. Tudy mwa kumusambil hatudy mu lupitaady tubeel eecy mu nzubw a lukan, batwiishibw neey, Taat iitut a lukat wiitumvumvw. Tudy ni dyanyish divul bwa cya bukish eecy.

2. I mushind kaay waakady Mukaleng Davih muleej neey: waakady wanyish dyaakatook dyaakadyey naady dya kusambil?

² Mukaleng Davih wanyishil dyaakatook diheteley dya kusambil Mawej. Waakady mumbil Yehow musambw uleeb neey: “Hamb yaam yikil kuwudy bu mwiish a bufw.” (Mis. 141:1, 2) Mu ciisang cya Davih, manansh majilang maakadyobw bakal naam mudimw mu kuhambidil kujilang kudy balambul ba milambw maakady malongolol bilengel menmen. (Cim. 30:34, 35) Hady Davih muleeb bwa manansh waakady ukaam bwa iikal mwiilongolol bilengel kubikaley mwa kwambil Taat indiy a mu diiwul. Ki mudyeby bikaam bwa tulong byeet. Tukaakaam masambil miitut masangeej Yehow.

3. i mushind kaay utudy mwa kusambil Yehow, ni bwabiny kulong naak?

³ Hatusaasambil Yehow bikaam twiikal ni kaneemw kavul. Langil ha myand yital bu mu bilot yitadil Yeshaay, Ezekiyeel, Danyel, ni Jah. Myand yital bu mu bilot eey i yishilangan, ki yileeleeb bwaal bwaakaabumw. Yiy yoos yileeleej mudy Yehow mwiikal Mukaleng mutam ukeekeemesh. Yeshaay ‘utadil [Yehow] Mawej mushikat mu kwaas a bukaleng muleeh weeh.’  (Ye. 6:1-3) Ezekiyeel utadil Yehow mushikat ha ditempw dindiy dya mu diiwul, mwiikal mukungomw kudy “citookej . . . bu cya mwanzakongol.” (Ezek. 1:26-28) Danyel utadil “munun” muvwaal bizang bitook, ni kwaas indiy a bukaleng waakady ulakuk malak-lak ma mudil. (Dan. 7:9, 10) Jah utadil Yehow mushikat mu kwaas mujingomw kudy ciit kaahand cikal bu mwanz-a-kongol waakady uheny bu diibw dya emerood. (Yis. 4:2-4) Kulangil kwiitut ha lutumb lwa Yehow lukish kufwaanyikij, kwiituvuuvulwiij dyaakatook ditudy bahet dya kufweej kudyey mu diisambil ni buseeb bwa kumusambil ni kaneem kavul. Ki bikaam tumusambil bicy?

4. I biny bituloolongel ku may ma butambwiil ma diisambil dya cileejel matusaasangan mu Matewus 6:9, 10?

⁴ Bal Matewus 6:9, 10. Mu mwiisamb indiy a Mulund, Yeez ulongeshel biiyij bindiy mushind a kusambil usaasangeej Mawej. Kuunyim wiibambiil neey: “kavwaay munudy mwa kulomb Mawej,” Yeez uleejel cya kuuhal myand ya buseeb yihehetangan buludy-ludy ni myand yidy Yehow mulongolol: bwa diijin dya Mawej diikal dijilang kudy baat; kwiiy kwa Bukaleng bwiikal mwa kubutul balwiish boos ba Mawej; ni myand yilengel yidyey mulongolweel bulab ni bukwaah baat. Hakuteel myand eey mu masambil miitut matuloolong, tuleeleej mudy lukat lwa Mawej lwiikal ni buseeb kutudy.

5. Bidyok bilengel bwiitut kwambil Yehow mu diisambil myand yitudy naay eeny?

⁵ Mu cituh ciloolong cya diisambil dya cileejel, Yeez uleejel neey: i bilengel kusambil bwa myand yitudy naay. Tudy mwa kusambil Yehow bwa iitwaakish byaakudy bya ku diifuk, bwa kuvulaminey myand yiitut yibiih, bwa kwiitulamey ku mateet, ni bwa kwiitukuley mu bikam bya mubiih. (Mat. 6:11-13) Hatumuloolomb biit eeby, tuleeleej mutudy bamweeyeeleel ni tumuleeleej neey, tukaakaam dyambulwiish dindiy ni tudy bakat bwa kumusangeej.

6. Tudy mwa kusambilok teng bwa myand yidyobw baleej mu diisambil dya cileejel eeny? Umvwiij.

⁶ Yeez kaakadyoh bend mukat bwa biiyij bindiy biikal teng bambulul may ma diisambil ma cileejel aam teng mudyem. Mu masambil makwaabw maakady Yeez mulong, uleejel myand yishiil-shilangan yaakady ni buseeb bwindiy  ha ciisang aacy. (Mat. 26:39, 42; Jah 17:1-26) Bya mushind aakaabumw, tudy mwa kusambil habitaatal myand yidy yitutond. Tudy mwa kusambil bwa kuhet meej, ni bwa kumanyik citudy mwa kulong. (Mis. 119:33, 34) Hatukaady habwiih bwa kulong mudimw mukasakan udyobw bitwaakish, tudy mwa kusambil bwa kuhet dyambulwiish ni bwa kumanyik mushind utudy mwa kumulong. (Tus. 2:6) Balel bady mwa kusambil bwa baan baabab, baan bady mwa kusambil bwa balel baabab, ni tut boos tudy ni mushind a kulong nook ni bikaam tusambil bwa balony biitut ba Bibl ni batudiidiil musah. Ki, hatusaasambil kabiin bikaam teng twiikal tulomb Yehow biit.

7. Bwabiny bikaam twaakish Yehow lutumb mu diisambil?

⁷ Bikaam tuvuluk bwa kwaakish Yehow lutumb mu masambil miitut. Kakwiin muut udy muwaakanyin lutumb bu Mawej iitut. I “mulengel, ufwiilangan lus.” Udy cikwaabw “mwiin lus ni mutukij mu diis, mwiiwul teh ni lukat ni bulamat.” (Mis. 86:5, 15) Biin-biin tudy ni kabingil kalengel kakwaakish Yehow lutumb bwa cidyey ni bwa bidyey ulong.

8. Tudy mwa kufwiijok Yehow bwa myand kaay yikwaabw? (Misambw 104:12-15, 24)

⁸ Bwaal bukwaabw butudy mwa kulong bwiitut kwaakish Yehow lutumb mu masambil miitut, i hatumufwiifwiijok bwa myand yilengel yidyey mwiitulongel. Cileejel, tudy mwa kumufwiijok bwa makal malengel meeh mady naam bilong, bwa byaakudy bisheem bishil-shilangan bidy kabiy bih, ni bwa musangal a kwiikal ni cikong cya balund balengel. Taat iitut a lukat wiitwaakakish biit eeby ni bikwaabw, teng bwa twiikal ni musangal. (Bal Misambw 104:12-15, 24.) Bwaal bukwaabw budy ni buseeb buvul budy neey: tufwiifwiijok Yehow bwa byaakudy bivul bya mu spirit bidyey wiitwaakish ni bwa kutakamin kulengel kweeh kutudy naak bwa mafuk maciiyiiy.

9. I biny bidy mwa kwiitwambulwiish bwiitut kuvuluk bwa kwiikal kufwiijok Yehow? (1 Biin Tesalonik 5:17, 18)

⁹ Bidy mwa kwiikal biheehel menmen bwa kuvulamin bwa kufwiijok Yehow bwa myand yoos yidyey wiitulongel. I biny bidy mwa kukwambulwiish bwa kwiiyivuluk? Udy mwa kutal mulong-long a myand yiwudy mufund yiwuleebel mu diisambil, yiwudy mwa kutalulul miisang  ni miisang bwa kumanyik mushind udy Yehow mwaalabul masambil miibuh. Kuunyim long diisambil bwa kumufwiijok bwa mudyey mukwambulwiish. (Bal 1 Biin Tesalonik 5:17, 18.) Langil ha bwaal oobw: Tudyaakal ni musangal ni twanyish hady bakwaabw biitufwiijok. Hatuvuuvuluk bwa kufwiijok Yehow bwa mudyey wiitwaalabul ku masambil miitut, umvumvw musangal. (Kol. 3:15) Ki, kudy kabingil kakwaabw ka buseeb buvul menmen kiitusaasak bwa twiikal tufwiijok Mawej iitut.

10. Bilondeshel 1 Pyeel 2:21, bwabiny tudy ni kabingil ka kufwiijok Yehow bwa mudyey mwiitutumin Yeez ha bulab?

¹⁰ Bal 1 Pyeel 2:21. Bikaam tufwiijok Yehow bwa mudyey mwiitutumin Mwaan indiy a lukat bwa kwiitulongweeshey. Tuloolong bikasakan bwa kumanyik Yehow ni habitaatal mushind utudy mwa kumusangeej hakulong shikacil a Yeez. Tut tuleej diitabij mu mulambw a Krist, tudy mwa kushaal mu bulund bulengel ni Yehow Mawej ni kushikat nend talal.​—Rom 5:1.

11. Bwabiny tusaasambil Yehow mu diijin dya Yeez?

¹¹ Tufwiifwiijok Yehow hatumusaasambil hakuhicil kudy Mwaan indiy. Yehow ukaakal mudimw ni Yeez bwa kwaalabuley milombw yiitut. Yehow ukuukun mat ku masambil matuloolong mu diijin dya Yeez. Yeez uleebel neey: “Niiyiiy kwiinuh cyoos cinwiikal mwa kulomb mu diijin dya mim, bwa Taat atumbil mu Mwaan.”​—Jah 14:13, 14.

12. I kabingil kaay kakwaabw kiitusaasak bwa kufwiijok Yehow bwa Mwaan indiy?

¹² Yehow wiitufwiifwiil lus ku mpekaat yiitut kudyambulwiish dya mulambw a Yeez wa cya kukuul naacy baat. Diiy dya Mawej dileeleeb neey: Yeez i wiitut “mutam a balambul ba milambw ya Mawej udy [mushikat] mwiiwul ku ciiludy cya kwaas a bukaleng a Mawej wa bukash buhit kutam.” (Ebr. 8:1) Yeez i yiy ‘wiituleeleebeloh kudy Taat.’ (1 Jah 2:1) Tufwiifwiijok bikasakan Yehow bwa mudyey mwiitwaakish Mutam a Balambul ba milambw yindiy wiitumvumvw ku bibiih bituloolong ni i yiy ‘wiituleeleebeloh’! (Rom 8:34; Ebr. 4:15) Tudy baat bakiish bawaakan, nook, kabuy bwa mulambw a Yeez katwaakadyoh bend mwa kufweej kudy Yehow mu diisambil. Biin-biin tudy mwa kufwiijok Yehow bwa cya bukish cya buseeb cidyey mwiitwaakish​—tuleeb neey, cya bukish cya Mwaan indiy udyey mukat!

13. Bufuk kuuhal kwa lufw lwindiy, mushind kaay uleejel Yeez neey: waakady mukat biiyij bindiy?

¹³ Bufuk kuuhal kwa kufweey, Yeez waakady musambil bufuk butuutul bwa biiyij bindiy, ulomb Taat indiy bwa “kwiibalam bwa ney, kabahon mu bikam bya Mubiih.” (Jah 17:15) Yeez waakady ni lukat luvul bwaabab! Nook, ning haakadyey mumanyikey neey kubamushaadil kalung kakeeh bwindiy kukabey bikasakan; waakady teng utabaleel biiyij bindiy.

14. I mushind kaay utudy mwa kuleej neey: tudy bakat biin kweet baan-balum ni baan-bakaj?

¹⁴ Bwa kwiidikij Yeez, katwiin mwa kwiimanyin teng ha myand yiitut. Hamut a kulong nook, bikaam twiikal ni ciibidil cya kusambil bwa biin-kweet baan-balum ni baan-bakaj. Tut tulong nook, tukokooyel diiy ditwaadil Yeez dya kukatangan ni tuleeleej Yehow mutudy bakat bikasakan biin Krist neet. (Jah 13:34) Kusambil bwa biin-kweet baan-balum ni baan-bakaj kakwiishoh bend kuhitij kwa diib. Diiy dya Mawej diitwambambil neey: “kulomb kuloolombobw Mawej ni mucim aakaabumw kudy muut muwaakan, kudy ni bukash buvul.”​—Jak 5:16.

15. Bwabiny biin-kweet bakaakaam bwa twiikal twiibatelok mu masambil miitut?

¹⁵ Biin Krist neet bakaakaam bwa twiikal twiibasambidil bwaal batwiitwiilangan ni makab  mavul. Tudy mwa kulomb Yehow bwa iibambulwiish bwa bataatameen mabenj, bihuh, mavit, mal madyobw biibamweesh, eecy makab makwaabw. Tudy mwa kusambil cikwaabw bwa biin-kweet baan-balum ni baan-bakaj bakaakal mudimw bikasakan bwa kwambulwiish aab bady mu diikeng. Udy mwa kwiikal mumanyikok baat bakaakab ni makab ma bwiin nook. Bwabiny kwiin mwa kwiibateelok mu masambil miibuh? Tuleeleej mutudy ni lukat lwa biin-biin lwa baan ba kamuut hakulomb Yehow bwa ibambulwiish bwa bataatameen makab.

16. Bwabiny bikaam twiikal tusambil bwa biin-kweet biituloolombol?

¹⁶ Biin-kweet baloolombol cisumbw bady ni dyanyish divul hatwiibateeteel mu masambil miitut ni masambil aam miibambambulwiish. Mupostol Pool waakady ukaam byend bwa bakwaabw bamusambidil. Ufundil neey: “nuulombeloh ni mim byaany, bwa Mawej aayaakish may ma biin-biin hanakaakaam kuleeb, ni bwa mim kuleeb bituh ni mucim mukasakan hanambambil baat myand yaakady yisokot yidy Mawej musokolweel mu Musah Mulengel.” (Ef. 6:19) Leeloow, tut byeet tudy ni biin-kweet bavul bakaakal mudimw mukasakan bwa kwiitulombol. Tuleeleej mutudy biibakat hatuloolomb Yehow bwa iibat nyam ku mikon ku midimw yidyobw bakal.

17-18. I diib kaay didyobw mwa kwiitwambil bwa tusambil bwa bakwaabw, ni bikaam tuvuluk biny?

¹⁷ Mu biisang bikwaabw, badyaakal biitwambil bwa kusambil bwa bakwaabw. Cileejel, mwiin-kweet mwaan-mukaj uloolombol dilong dya Bibl udy mwa kulomb mwiin-kweet mwaan-mukaj udy mumutwaalok bwa kusambiley. Mwiin-kweet mwaan-mukaj uyaay kamutwaalok udy mwa kwiikal kay mumanyik bilengel mulony a Bibl, nook, udy mwa kukat bwa kulong diisambil dya bulekel hadyobw baman kulong. Mu mushind oow, udy mwa kumanyik bilengel bidyey mwa kuleeb mu diisambil bwa kwambulwiish mulony.

¹⁸ Bady mwa kulomb mwiin-kweet mwaan-mulum bwa asambil mu cisangil cya mudimw a bukajaady eecy mu cisangil cya cisumbw. Bikaam biin-kweet baan-balum baheehet dyaakatook eedy, bavuluk kiihacil kady naak cisangil aacy. Diisambil kiin bwaal bwa kubel cisumbw eecy kudimwiij. Bwa bisangil bivul bya cisumbw, musambw ni diisambil byangangat  minit yitaan, nook, kabiin bikaam bwa mwiin-kweet mwaan-mulum udyobw bakish bujit bwa kusambil “avudij may,” nang-nang ku butambwiil bwa cisangil.​—Mat. 6:7.

19. I biny bidy mwa kwiitwambulwiish bwa kwiikal biilongolol ku diifuk dya kulumbulwiish kwa Yehow?

¹⁹ Bikaam diisambil diikal bwaal bwa buseeb buvul mu shikacil iitut bu mutwendend ni kufweej mu diifuk dya kulumbulwiish kwa Yehow. Bwa bwaal oobw, Yeez uleebel neey: “Kanulaalaay bend. Lombaay Mawej diib dyoos, bwiinun kuhet diikand bwa kweehuk mu myand yoos yidy mwa kwiinwiiyil.” (Luuk 21:36) Ing, kwiikal ni ciibidil cya kusambil kwiiyiiy kwiitwambulwiish bwa kutungunuk ni kwiikal batal mu myand ya mu spirit ni kiihacil ka neey, diifuk dya Mawej kadilong bend diitushushumuj.

20. I mushind kaay udy masambil miitut mwa kwiikal bu manansh manuunuk bilengel?

²⁰ I myand kaay yitubiisamb mu ciin bwaal eecy? Tudy batal buseeb budy naabw diisambil. Myand ya buseeb buvul yitudy mwa kuleeb mu diisambil yitaatal kiihacil kady naak Yehow. Tufwiifwiijok cikwaabw Mwaan a Mawej ni bwa Bukookesh bwindiy, ni tusambil bwa biin-krist neet batuhahambidil naabw. Biin-biin, tudy mwa kusambil bwa biit bitudy naaby dikeng bya ku nyeet ni bya mu spirit. Hatulaalang ni meej ha bitudy mwa kuleeb mu masambil miitut, tuleeleej mutudy bangat ni buseeb dyaakatook dilengel didiin eedy. Bikaam may miitut miikal bu manansh manuunuk bilengel matwaakakish Yehow​—madyey “mukat.”​—Tus. 15:8.