Yeez waakady ulongweesh baat bwa bashikat talal ni bakwaabw. Cileejel, wambiil bapostol bindiy neey: “Kanulang bend ney nady mwiiy kushikik baat talal; ki nady mwiiy kwiibasoomakany. Bwaal nady mwiy kusoomakany mwaan mwaan-mulum ni taatend, mwaan mwaan-mukaj ni maamend, muheel ni maam a mbaayend.” (Mat. 10:34, 35) I biny byaakady Yeez ukaam kuleeb?

Yeez kaakadyoh bend ukaam kwaabulul biin mu bisak, ki waakady mumanyik neey: malongweesh mindiy maakady mwa kwaabulul biin mu bisak bikwaabw. Nook, aab bakaakaam kushaal biiyij ba Krist ni kuhet baatiisumw, bikaam bamanyik myand yiikal mwa kwiibafikil bwa dihangadik didyobw bangat. Bab batwiilangan ni bulwiish bwa kudy mulund naabw ukiish Temw a Yehow eecy baat bakwaabw ba mu cisak, bady mwa kuhet lutat bwa kushaalobw ni lulamat ku malongweesh ma Krist.

Bibl ukaakashish biin Krist bwa “kushikat talal ni baat boos.” (Rom 12:18) Ki malongweesh ma Yeez mady mwa kwiikal bu “mweel a diiy” mu bisak bikwaabw. Bwaal bumweemweek hady mwiin mu cisak wiitab malongweesh ma Yeez hady ook bakwaabw biimalek eecy biimalwiish. Mu bwaal oobw, baan baabw​—aab bady bashikat nend mu nzubw aakaabumw​—bashaashaal balwiish “balwiish” ba oow uloolong myand ya biin-biin.​—Mat. 10:36.

Biiyij ba Krist bady mu cisak cya baat bady mu bitendeleel bishil-shilangan batwiitwiilangan misang yikwaabw ni shikacil yiteeteet lukat lwaabab bwa Yehow ni Yeez. Cileejel, biin mu cisak ciitut bady kabay Batemw ba Yehow bady mwa kwiitwenzej bwa kusangeel diifest dya bukw aa bitendeleel. Hadyobw bakaam kwangat dihangadik kuuhal kwa diteet, i ngany udyobw mwa kusangeej? Yeez uleebel neey: “Woos udy mukat taatend ecy maamend ni lukat luhitok ludyey muukat mim, kiish muwaakan kwiikal muut aam.” (Mat. 10:37) Cya biin, Yeez kaakadyoh bend uleeb neey, bwa kwiikal muwaakan kudyey, biiyij bindiy baakady mwa kukat bikeeh balel baabab. Ki, waakady wiibalongweesh mwaakadyobw mwa kwangat dihangadik dya kulong myand yaakady ni buseeb buvul mu shikacil aabab. Iikaleby neey, baan beet ba mu cisak bakiish Batemw ba Yehow bitulwiilwiish bwa mutwiikaakashishomw bwa kuhambil Yehow, tutuutungunuk teng ni kwiibakat, ki tudy bamanyik neey lukat lwiitut bwa Mawej i bwaal butudy mwa kuteek ha cyaab cya kuuhal.

Biin-biin, bulwiish bwa biin mu cisak ciitut i bwaal budy mwa kwiitwaakish kaakunying kavul. Cikwaabw, ki bikaam biiyij ba Yeez bavuluk may mindiy aam: “Woos udy kay wangat mutond indiy a makab ni mal ni kay uulond, kiish muwaakan kwiikal muut aam.” (Mat. 10:38) Cikwaabw, biin Krist bataatal bulwiish bwa biin mu cisak bu mam ma ku makab mady biiyij ba Yeez bataatameen. Ciisang cidyobw balong nook, i batakamin neey: bilong byaabab bilengel bidy mwa kusak baan baab ba mu cisak bakiish Batemw ba Yehow bady mwa kushitulul meej maabab ni bakat bwa kulong Bibl.​—1 Py. 3:1, 2.