1. Bilondeshel biin Ebreh 12:1, i biny bitukaakaam bwa kulong bwiitut kufik ku mushony a bulekel wa kut kwiitut kwa lubil bwa buumy?

 MU BIBL i bafwanyikijomw shikacil iitut a biin Krist ni kut kwa lubil. Bat ba lubil bafiifik bilengel ha mushony a bulekel biiyiiy kwiibah bulang bwa kuhetobw buumy bwa mwendeleel. (2 Tim. 4:7, 8) Bikaam tulong mwiitut moos bwa kutungunuk ni kut lubil, amanaman bu mutukaady habwiih menmen ni mushony a bulekel bwa lubil lwiitut. Mupostol Pool, umanyin kut bilengel lubil lwindiy bwa buumy, uleejel cyaakady cimwambulwiish bwa kuwiiney mu lubil lulongeley. Wiitwambambil bwa ‘kwimbash majit moosolol miitukaakadish . . . tutukunaay lubil batal ku kiihacil kiitut ni cisumy.’—Bal Biin Ebreh 12:1.

2. ‘Kwimbash majit moosolol’ kumvumvwiij biny?

² Hafundil Pool neey bikaam “twimbash majit moosolol,” Umvwiijil neey kakwaakadyoh bend bujit bwaakady mwiin Krist kay ni bwa kwangat eeny? Waakweeh, kaakadyoh bend ulang nook. Ki, umvwiijil neey bikaam twimbaash majit moosolol makiish ni buseeb. Bujit bwa nook budy mwa kwiitukaadish bwa kwend bilengel budy mwa kwiitukooyesh. Bwa kutaatameen, bikaam tumanyik lwang-lwang ni tulek bujit boos bukiish ni buseeb budy mwa kwiitukadish bwa kwend bilengel. Ki teng diib aady, katwiin bakat kwimbaash ha buteng majit matudy ni bwa kwangat. Cikwaabw, tut balek kwangat majit aam katwaakwiikaloh bend mu kut kwa lubil. (2 Tim. 2:5) I majit kaay matudy ni bwa kwangat?

3. a) Bilondeshel Biin Kalatih 6:5, i biny bitudy ni bwa kwangat? b) I biny bitwiiyiiy kukontonon mu ciin bwaal eecy, ni bwabiny?

³ Bal Biin Kalatih 6:5. Pool uleejel bwaal kaahand butudy ni bwa kwangat. Ufundil neey: “Muut ni muut wiiyiiy kwiiyangacil bwindiy bujit.” Inaah Pool uleeleeb bwa bujit budy naabw muut woos wa kutudy ku mees kwa Mawej, bwaal kaahand budy muut woos wa kutudy ni bwa kwiiyangacil. Mu ciin bwaal eecy, twiiyiiy kukontonon bwaal budy mu ‘bujit butudy ni bwa kwiiyangacil’ ni  mutudy mwa kwiibwangat. Cikwaabw, twiiyiiy kumanyik majit makiish ni buseeb matudy mwa kwiiy kwangat ni mushind utudy mwa kwiimimbaash. Kwiiyangacil bujit bwiitut ni kumanyik mutudy mwa kwiibwiimbaash. Kwiiyangacil bujit bwiitut bukiish ni buseeb kwiiyiiy kwiitwambulwiish bwiitut kut bilengel lubil lwiitut bwa kuhet buumy.

4. Bwabiny kabiishoh bend bikasakan menmen bwa kukumbaj mulay utulongel bwa kukadil Yehow mudimw bwa loos? (Tal cikwaabw cifwaatul.)

⁴ Mulay iitut utwambiil Yehow bwa kumukadil bwa loos. Hatulaalay Yehow bwa kumukadil mudimw, tudy biicih bwa kumuhambidil ni bwa kulong cidyey mukat. Bikaam tutungunuk ni kuvuluk mucih aaw. Kwiikal ni shikacil uheehetangan ni bitulayil Yehow i bujit butam, ki kabwiinoh bend bujit budy bwiituneemeneen biikasakan. Bidy nook, bwaal Yehow wiituhangil bwiitut kulong cidy lukat lwindiy. (Yis. 4:11) I mwiituhang ni micim ya kukaam myand ya mu spirit ni cikwaabw i mwiituhang mu ciifwaany cindiy. Bu cihet, tudy ni ni mushind a kufweej kudyey menmen ni bwiitut kwiikal ni musangal a kulong cidy lukat lwindiy. (Mis. 40:8) Cikwaabw, hatuloolong lukat lwa Mawej ni tulond Mwaan indiy,  twiiyiiy kwiikal ni “micim yibatam mund.”—Mat. 11:28-30.

5. I biny bidy mwa kukwambulwiish bwiibuh kukumbaj mulay iibuh wa kukadil Yehow mudimw bwa loos? (1 Jah 5:3)

⁵ I mushind kaay uwudy mwa kwangat bujit? Biit bibidy bidy mwa kukwambulwiish. Cya kuuhal, tungunuk ni kukashish lukat lwiibuh bwa Yehow. Udy mwa kulong nook hakulangil ha myand yoos yilengel yikaadyey mukulongel ni ha mabenesh madyey mukulamin. Cikwaabw, hady lukat lwiibuh bwa Yehow lukasakan, biiyiiy kuheehedyel bwa kumukooyel. (Bal 1 Jah 5:3.) Cya kulong ciibiidy, lond cileejel cya Yeez. Waakady ni musangal mu kulong lukat lwa Mawej bwaal waakady ulomb Yehow bwa kumwambulwiish ni waakady teng mutum meej mindiy ku bulang bwaakady Yehow mwa kwiiy kumuh. (Ebr. 5:7; 12:2) Teng bu Yeez, kusambil Yehow bwa kuhet diikand ni bwa kutungunuk ni kulam biin-biin mu meej kutakamin kwa buumy bwa mwendeleel. Hawukaakashish lukat lwiibuh bwa Mawej ni wiidikij mwaan indiy, wiiyiiy kuhet mushind a kukumbaj mulay iibuh wa kukadil Yehow mudimw bwa loos.

6. Bwabiny bikaam twiitacish bwa bikaakaam biin mu cisak? (Tal cikwaabw cifwaatul.)

⁶ Bujit butudy naabw mu cisak. Mu kut kwiitut kwa lubil bwa kuhet buumy, bikaam tukat Yehow ni Yeez kuhitok ni mushind utudy bakat baan beet ba mu cisak. (Mat. 10:37) Ki kabiin byumvwiij neey, tudy mwa kulengulul majit matudy naam mu cisak, bu neey majit aam maakady miitukaakesh bwa kusangeej Mawej ni Krist. Ki, bwiitut kwiikal banyishibw kudy Mawej ni Krist, bikaam twiitacish bwa kukumbaj majit matudy naam mu cisak. (1 Tim. 5:4, 8) Uw mulong nook, wiiyiiy kwiikal ni musangal muvul. Kuuyim kwa byoos, Yehow i mumanyik neey bisak biiyiiy kwiikal bilengel hady mwaan-mulum ni mukaj indiy biikal balongelangan myand ni lukat ni kaneemw, hady balel biikal bakat ni balongweesh baan baabab, ni hady baan bakooyel balel baabab.—Ef. 5:33; 6:1, 4.

7. I mushind kaay uwudy mwa kukumbaj bujit buwudy naabw mu cisak?

⁷ I mushind kaay uwudy mwa kwangat bujit bwiibuh? Ning muwudy ni bujit bwa kukumbaj mu cisak, eeyeleel mibel ya meej yidy mu Bibl hamut a kweeyeleel teng meej miibuh bwa mushind uwuyumvumvw, eecy kulong cileeleeb baat ba ha cyaab ciwudy. (Tus. 24:3, 4) Kal mudimw bilengel ni mikand yiitut mudyobw bumvwiij myand ya mu Bibl. Mu mikand yiitut yitudy naay i baleejomw citudy mwa kulong bwa mushind a kukooyel may matam mady mu Bibl. Cileejel, mu biin bwaal bilondangan “Dyambulwiish bwa Biin mu Bisak” i baleejomw myand yilengel menmen habitaatal makab masunguluk mady biin maluw, balel ni baasand batwiilangan naam leel oow. b Iikal muswiik bwa kukooyel cileeleeb Bibl, ning hiikal baan beet bakwaabw ba mu cisak kabay balong. Uw mulong nook, cisak ciibuh ciiyiiy kwiikal bilengel, ni nwiiyiiy kusangal bwa mabenesh miikal Yehow mwa kwiinuh.—1 pye. 3:1, 2.

8. Mahangadik matwangangat mady mwa kwiitulongel biny?

⁸ Bujit butudy nabw bwa mahangadik matwangangat. Yehow i mwiitwaakish bwiiyikadil bwiitut kwiisungwiil myand, ni i mukat bwa twiikal ni musangal hatwangangat mahangadik malengel. Ki tut bangat mahangadik mabiih, ha diib aady wiitoowooh ku bikaam bwa bihet byoos bitwaakahet. (Kal. 6:7, 8) Bwa kabingil aak, nook, twangangat bujit bwa makab moos matuheehet bwa mahangadik mabiih matwangangat eecy tut baleeb eecy balong bwaal kaahand bubiih. Bilondeshel myand yitudy balong, tudy mwa kuhet lutat hady mucim iitut a mund wiitulumbulwiish. Ki, kumanyik neey tudy ni cya kwangat bujit bwiitut bwa mahangadik matwangangat kudy mwa  kwiitusak bwa kutond mpekaat yiitut, kulongolol bilem bitudy balong, ni kulek kuhingulwiilomw cikwaabw bwa kulong bilem bitulongel. Kulong nook kudy mwa kwiitwambulwiish bwa kutungunuk ni kut lubil bwiitut kuhet buumy.

9. I biny biwudy mwa kulong uw mwangat dihangadik dibiih? (Tal cikwaabw cifwaatul.)

⁹ I mushind kaay uwudy mwa kwangat bujit bwiibuh? Uw mwiikal mwangat dihangadik dibiih, i biny biwudy mwa kulong, iitab shikacil uwudy nend kaabaak. Manyik neey kwiin mwa kushintulul shikacil a kal. Kukaloh bend mudimw ni diib diibuh ni diikand bwa kuteet kwiibingish kaayeeb eecy kwiilumbulwiish kaayeeb eecy kulumbulwiish bakwaabw bwa myand yibiih yiwulongel. Hamut a kulong nook, manyik bilem biibuh ni long myand yilengel yiwudy mwa kulong kaabaak. Mucim a mund yiy mwiikal ukulumbulwiish bwa bwaal bubiih buwudy mulong, iihweekesh ni ambil Yehow mu diisambil, iikal mumanyik bilengel neey udy mulong cilem, ni mulomb bwa akufwiil lus. (Mus. 25:11; 51:3, 4) Lomb lus kudy aab bawudy mulongel bibiih, ni biby biikal bya buseeb, kaam dyambulwiish kudy bakul. (Jak 5:14, 15) Hetel malongweesh ku bilem biibuh, ni iikashishomw bwa kulek kuhingulwiilomw bwa kulong myand yibiih yaakaabumw aay. Uw mulong nook, iikal mutwiishibw neey Yehow wiiyiiy kukufwiil lus ni wiiyiy kukuh dyambulwiish diwukaakaam.—Mus. 103:8-13.

10. Bilondeshel Biin Kalatih 6:4, bwabiny myand yitukaakaam kulong yikiish yiiy kulongek i bujit budy bwiituneemenen?

¹⁰ Kwiikal ni micim ya kulong myand yivul yikiish yiiy kulongek. Tudy mwa kwiiyaakish kaayeet bujit hakwiikal ni micim ya kulong myand yivul yikiish yiiy kulongek hatwiifwaafwanyikij ni bakwaabw. (Bal Biin Kalatih 6:4.) Tut biikal twiifwanyikij teng ni bakwaabw, tudy mwa kushaal biin kacik ni biin meej ma kutembangan. (Kal. 5:26) Mu kwiikashishomw bwa kulong myand yiloolong bakwaabw yitudy tut katuy mwa kuman bwa kwiiyilong, tudy mwa kwiilongel bibiih. Cikwaabw, langil ha bwaal oobw: Bibl wiitwambambil neey: “Kutakamin kudy kakuy ni cihet kubeebeedyesh micim,” nook, bikookooyesh biin-biin mu mabok menmen bwa kutakamin bwaal kaahand bukiish bwiiy kulongek! (Tus. 13:12) Kulong nook kudy mwa kulong bwa tuneeken bikasakan mu mabok ni tudy mwa kukaakal ni diikand dya kut naady lubil bwa kuhet buumy.—Tus. 24:10.

11. I biny bidy mwa kukwambulwiish bwa kulek kwiikal ni micim ya kulong myand yivul yikiish yiiy kulongek?

¹¹ I mushind kaay uwudy mwa kwimbaash bujit aab? Kukaamoh bend bwa kulong myand yivul yihit ha yidy Yehow ukomb. Kiin ukaamoh bend bwa umwaakish ciit ciwudy kuy naacy. (2 Kor. 8:12) Iikal mutwiishibw neey Yehow kiinoh bend ufwanyikij myand yiwuloolong ni yiloolong bakwaabw. (Mat. 25:20-23) Wangangat ni buseeb mudimw uwumukaakadil ni mucim aakabumw, lulamat lwiibuh, ni kutaatameen kuwudy naak. Ni kwiihweekej manyik neey: bidimw biwukaady naaby, makand miibuh ma nyeet ni shikacil uwudy nend bidy mwa kukukaakesh bwa kulong myand yivul kaabaak. Teng bu Barzilayih, udy mwa kulek kwiitab majit makwaabw hady bidimw biibuh eecy makand miibuh ma nyeet kamay makumban bwa kwiimakumbaj. (2 Sam. 19:35, 36) Teng bu Moyiz, iitab bwa bakwambulwiish ni akiish baat bakwaabw majit hadyeby bikumban. (Cim. 18:21, 22) Kwiihweekesh kwa nook kudy mwa kukwambulwiish bwa kaay wiikal ni micim ya kulong myand yikiish yiy kulongek bwaal udy mwa kukooyel bikasakan mu mabok mu kut kwa lubil bwa kuhet buumy.

12. I bujit bwiitut hady bakwaabw bangat mahangadik mabiih eeny? Umvwiij.

¹² Kwangat bujit bwa mahangadik mabiih mady bakwaabw bangat. Katwiin bwa kwangacil bakwaabw mahangadik; ni katwiin teng mwa kwiibalamin bihet bya myand yaababw yibiih  yidyobw balong. Cileejel, sangwiilum ni sangikaj udy mwa kwiiy kwangat dihangadik dya kulek kukadil Yehow mudimw. Dihangadik eedy didy mwa kwiiy kuhetesh balel bindiy kaakunying kavul, balel biilulumbulwiish bwa dihangadik dibiih dya mwaan aabab, biitaatab bwa kwangat bujit bukasakan oobw. Kabwiishoh bend bujit budy Yehow ukaam bwa bahet.—Rom 14:12.

13. I biny bidy mulel mwa kulong bwa bwaal bubiih budy mwaan indiy mulong?

¹³ I mushind kaay uwudy mwa kwimbaash bujit aabw? Manyik neey Yehow i mwiitwaakish tut boos buyiikadil bwa kwiisungwiil myand. I mulong bwa muut woos asungul kaayend cidyey mwa kulong. Mu kulong nook, tudy mwa kusungul ning tudy mwa kumukadil mudimw. Yehow i mumanyik neey kwiinoh bend mulel muwaakan; i mukat bwa ulong myand yilengel menmen yiwudy mwa kuman. Hady mwaan iibuh wangat dihangadik dya kulong bwaal kaahand, i bujit bwindiy kaayend, ki kabwiinoh bend bujit bwiibuh. (Tus. 20:11) Cikwaabw, udy mwa kutungunuk ni kulangil ha bilem biwudy mulong uw bu mulel. Biby biikal naak, ambil Yehow bwa mushind uwiiyumvumvw ni mulomb bwa akufwiil lus. I mumanyik neey kwiin mwa kuhingomw cikwaabw bwa kwiikal ni shikacil uwaakady nend ni kwiin mwa kushintulul cikwaabw myand yiwulongel. Teng diib aady, kiin ukaamoh bend bwa mwaan iibuh atungunuk ni kwaanun byaakadyey mukun. Manyik neey: mwaan iibuh yiy mwiikashishomw bwa kuhing kudy Yehow, wiiyiiy kumwaak ni cyuuy civul.—Luuk 15:18-20.

14. Bwabiny kwiilumbulwiish kukahit menmen i bujit butudy ni bwa kwimbaash?

¹⁴ Kwiilumbulwiish kukahit menmen. Hatuloolong mpekaat, tudy mwa kwiilumbulwiish, ki mudyeby naak. Ki, Yehow kiin mukatoh bend bwa tutungunuk ni kwiilumbulwiish bikasakan. I bujit butudy ni bwa kwimbaash. I mushind kaay utudy mwa kumanyik neey twiilulumbulwiish bikasakan? Tut batond mpekaat utudy balong, biifwiij naay ni baalabul micim yiitut, ni tut tulong citudy mwa kulong bwa kulek kuhingulwiilomw bwa kulong cikwaabw mpekaat utulongel, bikaam twiikal ni diitabij neey Yehow i mutufwiil lus. (Yil. 3:19) Kuunyim kwa tut baman kulong myand eey, Yehow kiinoh bend mukat bwa tutungunuk  ni kwiilumbulwiish. I mumanyik neey tut batungungul ni kulong nook, biiyiiy kwiitulongel bibiih ku micim. (Mus. 31:10) Tut bahomw ni kaakunying, tudy mwa kulek kut lubil bwa kuhet buumy.—2 Kor. 2:7.

15. Bilondeshel 1 Jah 3:19, 20, i biny bidy mwa kukwambulwiish bwa kuhit bilengel ni kaakunying kavul? (Tal cikwaabw cifwaatul.)

¹⁵ I mushind kaay uwudy mwa kwimbaash bujit aabw? Uw mutungunuk ni kwiilumbulwiish bikasakan, tum meej kudy Mawej bwaal i yiy “udy mwa kuvulaminok buyiil.” (Mus. 130:4) Hadyey ufwiil lus aab balaalabul biin-biin micim yaabab, i muleeb neey: ‘Niiyiiy kuvulaminok buyiil bibiih byaababw.’ (Jer. 31:34) Byumvuumvwiij neey Yehow kakwiiyoh bend kuvuluk cikwaabw mpekaat ya kal yiwulongel. Ki kutaloh bend neey makab mawudy naam kaabaak bu cijaadik cileeleej neey kiinoh bend mukufwiil lus. Ni kwiilongeloh bend bibiih bwa myand yibiih yiwulongel ha kal bwaal udy mwa kwiikal mujimbaj yimw ya ku majit mawaakady naam mu cisumbw. Yehow kiin utungunuk bend ni kulangil ha mpeekaat yitulongel kal, ha mpeekat yiibuh, ni bikaam kabiin tutungunuk ni kulong nook.—Bal 1 Jah 3:19, 20.

16. Teng bu bat ba lubil, bikaam tumanyik biny?

¹⁶ Bu mutwendend ni kut lubil bwiitut kuhet buumy, bikaam ’tutukun lubil [bwiitut] kuhet diifut.” (1 Kor. 9:24) Tudy mwa kulong nook hatumvumvw kushilangan kudy hakacy ha majit matudy ni bwa kwangat ni matudy ni bwa kwimbaash. Mu ciin bwaal eecy, tubiisambil teng ha bileejel bikeeh bituh habitaatal majit matudy ni bwa kwangat ni matudy ni kwimbaash. Ki majit makwaabw bady mwa kwiikal biimaleej. Yeez uleebel bwa katuhit “kutum meej ku kudy ni ku kun kwa maal, ni ku kulang kwa biit bya ha bulab.” (Luuk 21:34) Verseh eey ni yikwaabw yidy mwa kukwambulwiish bwiibuh kumanyik myand yiwudy mwa kulongolol mu kut kwiibuh kwa lubil bwiibuh kwiikal ni kiihacil ka kwiikal ni buumy.

17. Bwabiny bikaam twiikal batwiishibw neey twiiyiiy kuwiin mu kut kwiitut kwa lubil bwa kuhet buumy?

¹⁷ Twiikal batwiishibw neey twiiyiiy kuwiin mu lubil lwiitut bwa kuhet buumy bwaal Yehow wiiyiiy kwiitwaakish diikand ditukaakaam. (Ye. 40:29-31) Ki bwabiny, kukooyel bend bwa kut lubil! Iidikij mupostol Pool, utwiil lubil bikasakan bwa kuhet diifuk diikaley mwa kwiiy kuhet didyobw biibateekel kudy Mawej. (Fili. 3:13, 14) Kakwiin muut ning waakaabumw udy mwa kut lubil ool bwiibuh, ki ku dyambulwiish dya Yehow udy mwa kuman bwa kut lubil ool. Yehow udy mwa kukwambulwiish bwiibuh kwangat majit miibuh ni bwa kwimbaash majit makiish ni buseeb. (Mus. 68:19) Uw ni Yehow, wiiyiiy kuman bwa kut lubil ni cisumy ni wiiyiiy kuwiin!