Bilondeshel 1 Biin Korent 15:8, Pool uleebel neey: “Kuunyim kwa kwiibamweekel bab boos uumweekedyeel byaany, ki mim naabw nady bu mwaan a kabish.” Kal kal, baakady biitumvwiij neey Pool waakady uleeb bwa bwaal bwiiyiley kumanyik hatadiley mu bwaal butal bu mu cilot bwa Yeez mu butumby mu diiwul. Byaakady teng bu neey bamwaakishil lumw hamuleeleelobw, eecy hamusangwiilobw, bwa kwiikal ni buumy bwa mu spirit kuuhal kwa diib, mu mivw nkam ni nkam kuuhal kwa kusanguk kwa nook kakuy kkwanj kulongek. Ki, kuunyim kwa kulong verseh oow cikwaabw byaakady bikaam kulongolol kumvw kwiitut kwa verseh oow.

Biin-biin bidy neey Pool uleeleeb hiinaah bwa cilongekel haalabwiiley micim. Ki i biny byaakadyey ukaam kuleeb haleebel neey waakady “bu mwaan a kabish”? Kudy mishind yivul.

Kwaalabul kwindiy kwa micim kulongekel musang umw ni waakady mwiiyumvw muzaazikok ku micim. Mwaan a kabish udyaakakal ushishumuj baat hadyobw bamulel. Teng bu Sawul (wiiyiil kushaal Pool) ulongel lwend mutal ku Damas bwa kakengesh biin Krist baakady ha cyaab aacy, kaakadyoh bend mutakamin neey bwa kutal bwaal bwa kutal bu mu cilot bwa Yeez waakady musanguk. Kwaalabul kwa micim kwa Pool i bwaal bwakady bukemesh kiin teng teng Pool ki kukemeshel cikwaabw biin Krist baakadyey uy bwa kukabish baat mu cimeng aacy. Cikwaabw, bwaal oobw bwaakady bumutond bikasakan ni kacyaakadyoh bend utal bwa ciisang cikeeh.​—Myand Yilongel Bapostol 9:1-9, 17-19.

Waakady mwaalabul micim ha “ciisang ciibiih.” Mwaak wa mu ciin Krek udyobw baalabul neey “mwaan a kabish” bady mwa kumwaalabul cikwaabw neey “mwaan mulel ha ciisang cibiih.” Mu Bibl wa Yeruzalem i baleebomw neey: “Nook byaakady bu neey baakady baalel ciisang cyaakady muut ning waakaabumw kay mwa kutakamin.” Ciisang cyaalabwiil Pool micim, Yeez waakady muhingomw kal mu diiwul. Bishilangan ni aab baakady Pool uleeb mu verseh yitubaman kutal, kaakadyoh bend mutal Yeez usangukil diib dyaakadyey wend uy mu diiwul. (1 Kor. 15:4-8) Haakady Yeez mumweekel Pool cisang cyaakady kay mutakamin umwaakishil dyaakatook dya kutal Yeez kuunyim kwa yiy muman kusanguk, ning haakadyeby bimweek neey byaakady mu “ciisang cibiih.”

Waakady wiisamb bwindiy ni meej ma kwiihweekesh. Bilondeshel bamw bamany ba myand ya mu Bibl, cyambil cidy Pool mukal naacy mudimw cidy mwa kwiikal ni dyumvwiij dikwaabw dihweeweekesh muut. Biby biikal neey Pool waakady ni dyumvwiij aady mu meej, waakady mumanyik neey kaakady mukumbanyin dyaakatook dimwaakishilobw. Biin-biin, utungunukil ni kuleebey neey: “nady mukeeh ku bapostol boos, ku kuleeb kulengel, ciishoh bend mufwaanyin kumubiikanobw ney mupostol, bwaal nakabishil Ekeleziy a [cisumbw cya] Mawej. Teng bwa bukish bwa Mawej ki munaakady mwiin munadyoomw.”​—1 Kor. 15:9, 10.

Nook, bimweemweek neey Pool waakady uleeb bwa bwaal bwaakadyey kay mutakamin ni bulongekel musang umw bwa mwaakady Yeez mumumweekel, diib dyaakadyey kay mweelel meej bwa kwaalabuley mucim indiy, eecy kaakadyoh mukumbanyin bwa kutal bwaal bukekemesh bwa nook bumusokolweelobw. Nook, bwaal oobw bwaakady ni buseeb buvul ku mees kwa Pool. Bumuleejel neey biin-biin neey basangwiil Yeez ku bafw. Kakuy kwiihanguj, waakady teng uleeb bwa ciisang cyaakadyey kay mutakamin eecy haakadyey udiil baat bakwaabw musah habitaatal kusanguk kwa Yeez.​—Myand Yilongel Bapostol 22:6-11; 26:13-18.