1. I kiihacil kaay kalengel katudy mwa kwiifundil hatwendend ni kukuluuh?

BU MUTWENDEND ni kukuluuh, tudy mwa kuciin hakulang neey: katuciin ni buseeb bwa kukadil Yehow mudimw bu mutucyaakady baasand. Bu mudy bwaal oobw mwa kwiikal bwa biin-biin, tudy mwa kwiikal katuciy ni makand bu kuuhal, tudy mwa kukal mudimw kaabaak ni meej ni myand yitudy bamanyik bitudy bahet mu shikacil, bwa kwambulwiish baasand bwa kukumbajobw kiihacil kaababw bwa biikal bakumban bwa kwangatobw majit makwaabw mahyaamahy. Mukul ukaady ni mafuk mavul uleeleeb neey: “Ki hanatadil neey: nakaady muut mukuluuh ni ciiciish ni hat, namanyikil neey: kwaakady baasand bakwaabw baakady ni diikand bady bakumban bwa kukal mudimw oow.”

2. I biny bitwiiyiiy kwiisambil mu ciin bwaal eecy?

² Mu ciin bwaal cishaal twaakady biisambil ha mushind udy baasand mwa kuhet dyambulwiish hadyobw bashikat bikasakan ni baat bakuluuh. Mu ciin bwaal eecy twiiyiiy kutal mudy biikadil eeby mwa kwambulwiish baat bakuluuh bwa kwambulwiishobw baasand, bu mudy: kwiihweekesh, kwiikal ni meej malengel, kufwiijanganok, ni kwakishangan kwa biit, ni kulong nook kwiiyiiy kutwaal musangal mu cisumbw.

3. Bilondeshel mukand a Biin Filipw 2:3, 4 kwiihweekesh i biny, ni i mushind kaay udy cikadil eecy mwa kwambulwiish biin Krist?

³ Bikaam baat bakuluuh biikal ni kwiihweekesh hadyobw bakaam kwambulwiish baasand. Muut udy ni kwiihweekesh utaatal bakwaabw bu bamuhitok. (Bal Filipw 2:3, 4.) Baat bakuuluh bataatal neey cikadil eecy cidy ni buseeb bwa baabw kukal  naacy mudimw mu mishind yishil-shilangan ni uhehetangan ni diiy dya Mawej. Nook, bataatal myand mu mushind mulengel bishilangan ni mwaakadyobw biiyital ku kal. (Mul. 7:10) Bu mudyobw ni myand ya buseeb yidyobw mwa kwambilobw baasand i bilengel bwaal “myand ya ha bulab yendend ni kushiituluk” ni bidy ni buseeb bwaababw kwiibidilangan ni shikacil yihyaahihy.​—1 Kor. 7:31.

4. I mushind kaay udy balombol ba bijeng baleej meej ma bwiin maakady naam biin Leevy?

⁴ Baat bakuluuh bady ni kwiihweekesh i bamanyik neey hadyobw bakuluuh kabiin mwa kulong myand bu mucyaakadyobw baasand. Cileejel, balombol ba bijeng biitut. Hadyobw bakumbaj mivw 70, bibaloolomb bwa kukal midimw yikwaabw yishil-shilangan. Kulong nook kudy mwa kwiikal ni lutat. Bady ni musangal bwa dyakatook didyobw naady dya kukadil baan-baabw mudimw. Ki mudimw waakadyobw bakat menmen, ni bacikaakaam teng kukal mudimw oow bikasakan. I bamanyik neey: i bilengel bwa baasand bakal mudimw oow. Baleeleej meej maakaabumw maakady naam biin Leevy ba mu Izaleel wa kal, baakadyobw balomb bwa kwiimanyik mudimw a Mawej wa ku tempel diib didyobw bakumbaj mivw 50. Biin Leevy bakuluuh aab baakady teng ni musangal bwa mudimw woos waakadyobw mwa kulong. Baakady ni musangal muvul bwa dyakatook dyaakadyobw naady bwa mudimw woos waakadyobw mwa kukal bwa kwambulwiish baasand. (Kkb. 8:25, 26 ) Leeloow, hady balombol ba bijeng bakumbaj mivw 70, biimamanyik mudimw  a kukumbul bisumbw bivul, ki bambambulwiish bikasakan ni bakashish cisumbw mu midimw yoos yidyok.

5. I biny biwuloolongel ku cileejel cya Dan ni Katie?

⁵ Twangat cileejel cya Dan, udy mukal mudimw bu mulombol a cijeng mu mivw 23. Haakady Dan mukumbaj mivw 70, yiy ni mukaj indiy, Katie baakady bakal mudimw bu baaseb aa njil ba habwaah. I mushind kaay waakadyobw balongolol shikacil a bab? Dan uleeleeb neey: kaabaak ki bady ni mudimw muvul bishilangan ni kuuhal! Ni witaatacish bikasakan bwa midimw ya mu cisumbw. Wambambulwiish biin-kweet baan-balum bwa bakumban bwa kwiikalobw bakwanjok ba mudimw, ni uloolongweesh bakwaabw bwa biikal badiil bakwaabw musah bikasakan mu bibunj mudy baat bahetelangan ni mu lukan. Nun baat bakuluuh, ning nun biikal mu mudimw a ku diib ni ku diib eecy kanuciiyomw, bikaam nulong mudimw muvul bwa kwambulwiish bakwaabw. I mushind kaay unudy mwa kulong nook? Ibidilangan ni shikacil woos, ifundil biihacil bihyaabihy, ni imanyin teng ha myand yiwudy mwa kulong hamut a kwiimanyin ha yiwudy kuy mwa kulong.

6. Bwabiny i bya meej bwa kwiikal ni meej malengel? Twaal cileejel.

⁶ Meej mady kudy baat bady ni kwiihweekesh. (Tus. 11:2) Meej malengel masaasak muut mukuluuh bwa kulek kutakamin myand yidyey kay mwa kulong. Bu cihet, wiiyiiy kwiikal ni musangal ni utungunuk ni kukal mudimw bikasakan. Tudy mwa kufwanyikij muut udy ni meej malengel ni mwendesh a mashiny. Mwendesh a mashiny ukeekeehesh lubil bwa kuhit bilengel ha cindy. Biin-biin udy mwa kuhit mwaab aaw bikeeh-bikeeh, ki wiiy utungunuk kaabaak ni lubil mutal kuuhal. Bya mushind haakaabumw, muut udy ni meej malengel, i mumanyik diib didyey mwa “kufutulul myand bwa kuyey kuuhal” ni kiihacil kakukadiley Yehow mudimw bikasakan.​—Fili. 4:5

7. I mushind kaay uleejel Barzilayih meej malengel?

⁷ Langilaay ha cileejel cya Barzilayih waakady ni mivw 80 hamubiikeen mukaleng Davih bwa kwiikaley umw wa mu baat ba mu cihang cindiy. Bu mwaakady Barzilayih ni meej malengel, ulekel kwiitab diilomb dya mukaleng. Hamanyikiley neey: ukaady muut mukuluuh ni kaciin ni diikand, Barzilayih wambiil mwaan indiy Kimeham bwa kumuhingiley ha cyaab cindiy. (2 Sam. 19:35-37) Teng bu Barzilayih, baat bakuluuh bady ni musangal a kwaakish baasand mushind a kutungunuk ni kukal mudimw bilengel.

8. I mushind kaay udy Mukaleng Davih muleej meej malengel habitaatal kwiibak kwa nzubw a Mawej?

⁸ Cikwaabw mukaleng Davih waakady mushiy cileejel cya kwiikal ni meej malengel. Waakady mukat kwiibakil Yehow nzubw ni mucim indiy woos. Ki haakady Yehow mumwambil neey: mudimw oow biiyiiy kumulong kudy mwaan iibuh Salomon, Davih wiitabil diihangadik dya Yehow ni wambulwiishil mudimw oow ni mucim indiy woos. (1 Cif. 17:4; 22:5) Davih kaakady mulang neey: yiy ki waakady mwa kulong mudimw oow bilengel menmen, bwaal Salomon “ucidy mwaan mutofw ni meej mindiy kamiish manj kwinzuluk.” (1 Cif. 29:1) Davih waakady mumanyik neey: musangal waalalukil ku mudimw a kwiibak nzubw, i dibenesh dya kudy Yehow, kiin mivw yidy naay muut eecy diimany didy naady baloolombol. Hakwiidikij Davih, baat bakuluuh leeloow, bacidy teng bakal mudimw bikasakan ning mudy midimw yaabab mwa kushiituluk. Ni i bamanyik neey: Yehow wiiyiiy kukal mudimw ni baasand ha kwiibafiil kis bwa kutungunukobw ni kukal mudimw waakadyobw balong.

9. I mushind kaay uleejel mwiin mu Komiteh wa Filiyal meej malengel?

⁹ Mafuk miitut aam mwiin-kweet Shigeo, i  muleej meej malengel. Hakumbajiley mivw 30, mu muvw 1976, bamubiikeen bwa kuyey kukal mudimw mu Komiteh wa Filiyal. Mu muvw a 2004 wiiyiil mulombol a Komiteh wa Filiyal. Hahicil mafuk, utadil neey: kacyaakadyoh bend ni hat ya kukal mudimw indiy ni kumukumbaj bilengel. Waakady usambil bikasakan ni kutaley neey: i bilengel kwiikalok mwiin-kweet sangwiilum udy mukumban bwa kwiikal mulombol a Filiyal. Shigeo kaciin kabidy mulombol a Komiteh wa Filiyal, ki ucitutungunuk ni kwambulwiish biin-kweet bakwaabw ba mu Komiteh wa Filiyal bwa kukalobw mudimw bilengel. Teng mu tubiibital mu cileejel cya Barzilayih, cya Mukaleng Davih, ni cya Shigeo, muut udy ni kwiihweekesh ni meej malengel, wimamanyin ha myand yikaady baasand bamanyik ki kiin wimanyin ha yidyobw batununguk ni kulong, kaakwiibataloh bend bu baat bakutembangan nend ki wiiyiiy kwiibatal bu bakal ba mudimw haakaabumw nend.​—Tus. 20:29.

10. I mushind kaay udy bakuluuh batal baasand mu cisumbw?

¹⁰ Baat bakuluuh bataatal baasand bu bya bukish bya kudy Yehow, ki bwabingany bibafwiifwiijok. Bu mudy diikand dyaabab dyend ni kukeeh, baat bakuluuh banyanyish bikasakan baasand bacidy ni diikand ni bady bakat kukadil Yehow mudimw ni kwambulwiish cisumbw.

11. I mushind kaay udy mukand a Luut 4:13-16 umvwiij mabenesh maalalukil ha kwiitab ni dyanyish dyambulwiish dya baasand?

¹¹ Bibl uleeleeb bwa Nowemih neey: i cileejel cilengel cyeeh cya muut mukuluuh udy mwiitab ni dyanyish dyambulwiish dya sand. Cya kuuhal, Nowemih wambiil muheel indiy Luut bwa kuhingey kwaabab. Nook, haakady Luut ukashish teng bwa kuyobw ni maam-a-mbaayend Nowemih ku Betelehem, Nowemih wiitabil ni musangal dyambulwiish  dya Luut. (Luut 1:7, 8, 18) Ni i musangal kaay uhetelobw boos babidy! (Bal Luut 4:13-16.) Kwiihweekesh kwiiyiiy kusak baat bakuluuh bwa kulondobw cileejel cya Nowemih.

12. I mushind kaay waakady mupostol Pool muleej dyanyish dindiy?

¹² Mupostol Pool waakady mwanyish dyambulwiish diheteley. Cileejel, ufwiijilok biin Krist ba mu Filipw bwa biit byaakadyobw bamutumin. (Fili. 4:16) Mupostol Pool uleejel dyanyish bwa mwaakady Timoteh mumwambulwiish. (Fili. 2:19-22) Ni waakady mufwiijok Mawej bwa baat boos baakady biiy kumukashish diib diiyiilobw nend mu lukan mu cibunj cya Rom. (Yil. 28:15) Pool waakady muut wa diikand divul, ulongel ngend yivul mu kudiil baat bavul musah ni mu kukashish bisumbw. Cikwaabw waakady wiihweekesh ni wiitab dyambulwiish dya biin-kweet baan-balum ni baan-bakaj.

13. I mushind kaay udy baat bakuluuh mwa kuleej baasand dyanyish?

¹³ Nun bakuluuh nudy mwa kuleej baasand bady mu cisumbw ciinun dyanyish mu mishind yivul. Bab bakat bwa kukwambulwiish bwa kukufikish ha cyaab kahand, bwa kukusumbil biit, eecy bwa kukwambulwiish ni biit bikwaabw biwukaakaam, iitab ni dyanyish dyambulwiish dyaabab. Tal dyambulwiish aady bu mushind udy Yehow ukuleej lukat lwindiy. Nudy mwa kushaal balund bamenmen ni baat bawambambulwiish. Hambulwiish teng balund biibuh bacidy baasand bwa bay kuuhal mu myand ya mu spirit, ni iibambil musangal uwudy nend bwa kutal mudy baasand bakumbaj myand yilomb bwa kukal midimw yivul mu cisumbw. Ni hawuhihitij naabw diib divul ha kwiibambil myand yinudy balong mu shikacil iinun. Nun balong nook, “nwiiyiiy kufwiijok” Yehow bwa baasand badyey mukok mu cisumbw ku dyambulwiish dya diiy dindiy.​—Kol. 3:15; Jah 6:44; 1 Tes. 5:18.

14. I mushind kaay waakady Mukaleng Davih muleej mwaakadyey mwaakishangan a biit?

¹⁴ Tutaatal mu cileejel cya Mukaleng Davih cikadil cikwaabw cya buseeb cidy bakuluuh mwa kuleej​—kwakishangan kwa biit. Davih utwaadil bihak bindiy bwa kwambulwiish mudimw a lwiibak lwa nzubw a Mawej. (1 Cif. 22:11-16; 29:3, 4) Ulongel nook, bwa kwambulwiish ku midimw yoos yiikal mwa kulongek ning mwiikal baat mwa kubiikan neey: Nzubw a Mawej mwiibak kudy Salomon. Diib ditudy katuy ni diikand dya nyeet bwa kwiidit mu midimw ya lwiibak ya Mawej, tudy mwa kutungunuk ni kwambulwiish ku midimw yikwaabw ku dyambulwiish dya biit byoos bitutwaatwal eecy fwalang yoos yitudy bakat bwa kutwaal. Ni tudy mwa kwambulwiish baasand bwa kuhetobw myand yivul ku diimany ditukaady naady dya mivw yivul.

15. I biit kaay bya buseeb byaakady Pool mwaakish Timoteh?

¹⁵ Bwa cikadil cya kwaakishangan biit, twangataay cileejel cya mupostol Pool. Ubiikeen Timoteh bwa kamutwaaley mu mudimw a bu misiioneer, ni mupostol Pool uleejel sangwiilum oow mishind ya kudiil naay baat musah ni kwiibalongweesh ni lukat loos. (Yil. 16:1-3) Bulongweesh bulengel bwa Pool bwambulwiishil Timoteh bwa kwiikal mudiil a baat musah ni kwiikal mulongweesh mulengel. (1 Kor. 4:17) Timoteh byend ukadil mudimw ni mishind yaakady Pool ukal naay mudimw bwa kwambulwiish bakwaabw.

16. Bwabiny Shigeo waakady mulongweesh bakwaabw?

¹⁶ Baat bakuluuh leeloow kabiin baciin kukal mudimw bwa kwambulwiish baasand bwa bakadil Mawej mudimw mu cisumbw. Cileejel, mu mivw yivul, Shigeo, udyobw baleej mu bikos bishaal eeby, ulongweeshel baasand bakwaabw ba mu Komiteh wa Filiyal. I mulong nook ni kiihacil ka kwambulwiish midimw ya  Bukaleng mu cibunj cidyey mushikacil. Bu cihet, hakumbeen diib, mwiin-kweet mwaan-mulum waakadyobw balongweesh bilengel, waakady mukumban bwa kuhing ha cyaab cindiy bu mulombol a Komiteh wa Filiyal. Shigeo utungunukil ni kwambulwiish baasand baan-balum ni diimany didyey muhet mu mivw 45 mu mudimw waakadyey ukal mu Komiteh wa Filiyal. I musangal kaay wa kwiikal ni baat ba nook bu Shigeo mukacy mwa baat ba Mawej!

17. Mu dyumvwangan ni mukand a Luuk 6:38, i biny bidy baat bakuluuh mwa kwaakish bakwaabw?

¹⁷ Nun biin-kweet bakaady bakuluuh nuleeleej mudy kukadil Yehow mudimw ni diitabij ni mucim mutook biikal mushind mulengel weeh mu shikacil. Mu myand yinuloolong, nuleeleej munudy bikashishomw bwa kulong may matam ma Bibl ni kwiimakooyel mu shikacil iinun. Nudy ni diimany bwa myand yinukaady balong, ki biikaam cikwaabw nwiibidilangan ni shikacil yihyaahihy. Nun baat bakuluuh babatambul mafuk mashaal aam, nudy ni bivul bya kulong; nudy mwa kwambil baat bakwaabw bwa musangal unudy bahet ha kumanyik Yehow ning munukaady baat bakuluuh. Baasand biikaakal ni musangal a kukun mat ku myand yilengel yinwiibaloolondel ni malongweesh manukaady bahet. Nun ‘nwaakishangan biit’ bwa diimany divul dinukaady naady, Yehow wiiyiiy kunufiil kis menmen.​—Bal Luuk 6:38.

18. I mushind kaay udy baat bakuluuh ni baasand bambulwiishangan?

¹⁸ Bu munudy bakuluuh ba buseeb bafweefweej habwiih ni baasand, nwiikaakal nukashishangan. (Rom 1:12) Muut woos udy ni ciit cya buseeb buvul cidy mukwaabw kay naacy. Baat bakuluuh bady ni meej ni diimany didyobw bahet mu shikacil aabab. Baasand bady ni diikand. Hady baasand ni bakuluuh bakal mudimw haakaabumw bu balund, baakaakish Taat iitut udy mu diiwul udy ni lukat lutumb ni i diibenesh bwa cisumbw cyoos.