1. Baat bakwaabw bumvumvw bicy hadyobw biihat muut udyobw bakat mu cisumbw?

KUDYOK muut uwudy mukat udyobw biihat mu cisumbw eeny? Bwaal oobw bwiitiit bikasakan ku micim! Mwiin-kweet mwaan-mukaj Hilda uleeleeb neey: “Haakady mbaayany waakady ni lulamat mufw haanyim a tut baman kulong mivw 41 mu maluw.” “Nalaalang neey: bwaakady bwaal bubiih bweeh bunaakady ciy mumanyik neey: bwiiyiiy kulongek. * Ki haakady mwaan-a-mum mwaan-mulum mulek cisumbw, mulek mukaj ni baan bindiy, bwaakady bwaal bubiih menmen.”

2-3. Bilondeshel mukand a Misambw 78:40, 41, i mushind kaay udy Yehow umvw hady biin mudimw bindiy bamulek?

² Lang bwa mushind waakady Yehow mumvw bibiih haakady bamw ba mu banjel bamuvundamin! (Yuud 6) Ni lang bwa mushind waakadyeby biit Mawej ku micim hakutaley baat bindiy bakaciley, biin Izaleel, baakady bamuteekel teng mut mukasakan ni bamufuluj mund. (Bal Misambw 78:40, 41.) Iikal mujaadik neey: Taat iitut a mu diiwul umvumvw byend kakunying kavul hady muut uwudy mukat umulek. Umvumvw kakunying kawudy naak. Wiiyiiy ukukashish ni ukwambulwiish ni biit biwukaakaam.

³ Mu ciin bwaal eecy, twiiyiiy kwiisambil ha myand yitudy mwa kulong bwa kuhet dyambulwiish dya kudy Yehow hady muut utudy bakat ulek kumukadil mudimw. Twiiyiiy kukontonon cikwaabw, mushind utudy mwa kwambulwiish bakwaabw mu cisumbw bady ni lutat oolw. Ki kaabaak, Tutalaay meej mabiih matudy mwa kulek kwiikal naam.

4. Balel bavul bumvw bicy hady mwaan ulek Yehow?

⁴ Hady sangwiilum eecy sangwiikaj ulek Yehow, balel badyaakal teng biyihanguj cyaakadyobw mwa kulong bwa kwiibambulwiish  bwa balamat myand ya biin-biin. Haanyim aabab baman kwiihat mwaan indiy mwaan-mulum mu cisumbw, Luke wiifwiifwiij naay, uleeb neey: “I cilem cyaam. Ni naakady nalotakan bikasakan bwa bwaal oobw. Misang yikwaabw naakady nadil nalang neey: bwa mim kubaman kuh, ubaayilok.” Elizabeth, mwiin-kweet mwaan-mukaj waakady ni bwaal bwaakaabumw oobw, waakady wiiyihanguj neey: “Nady maam mubiih eeny? Natadil neey: nakaakeel bwa kulongweesh mwaan-aam myand ya biin-biin.”

5. Cilem cidy kudy ngany hady muut ulek Yehow?

⁵ Bikaam tuvuluk neey: Yehow i mwaakish woos wa kutudy cya bukish cya kwiisungwiil kwa myand. Eeby byumvumvwiij neey: tudy mwa kumukooyel eecy kulek. Baan bakwaabw baakady ni balel baababw kabay cileejel cilengel, ki bangacil dihangadik kayaabw dya kukadil Yehow mudimw ni kushaalobw bamulamat. Bakwaabw bibalongweeshel kudy balel baabab myand ya biin-biin yumvumvwangan ni may matam ma mu Bibl, ki biiyil kulek Yehow hakuluuhilobw. Ki bwabiny, bikaam muut woos wa kutudy angat kayend dihangadik ning udy mwa kukadil Yehow mudimw. (Joz. 24:15) Nook, balel bady ni kakunying, lwangaay diivit ni meej ma kulang neey: lutat oolw i lwaalukil ku cilem ciinun!

6. Sand mukwaabw umvwiil bicy haakady taat indiy mulek kukadil Mawej mudimw?

⁶ Hahicil mafuk, mulel mukwaabw wiiyil kulek kukadil Yehow mudimw ni kulekey cisak cindiy. (Mis. 27:10) Bwaal oobw budy mwa kwiit baan ku micim hadyobw batal mulel udy cileejel kudyobw ulong myand ya nook. Esther, mwiin taat indiy udyobw biihat, uleeleeb neey: “Naakady teng nadil bwaal cyaakady mumanyik neey: waakady mwa kwiiy kulek bulongolody bwa Yehow. Wangacil dihangadik dya neey: cya kukadiloh bend Yehow mudimw. Nady mukat taat aamim, ki bwabiny, hamwiihacilobw, naakady teng ni kakunying bwa shikaciI indiy. Mut waakady muuyiit bwa bwaaI oobw.”

7. Yehow umvumvw bicy bwa sand mwiin mulel udyobw biihat?

⁷ Baasand, hadyobw biihat umw wa ku balel biinun, biitwiitiit byeet ku micim! Iikalaay bajaadik neey: Yehow i mutal kakunying kanudy naak bwa bwaal budy bwiinufikil. I mwiinukat ni wanyanyish munutuutungunuk ni kumukadil mudimw ni lulamat, ni tut​—biin-kween mu cisumbw, twiinusaasangeel. Vulukaay cikwaabw neey: kaciinoh bend cilem ciinun bwa mahangadik mady balel biinun bangat. Teng mudyeby biibileej mu bikos bishaal, Yehow i mwaakish woos wa kutudy kwiisungwiil kwa myand bwa kumukadil mudimw eecy kulek. Ni bikaam muut ni muut udy mwiilambul ni mutambul ‘iiyangacil bwindiy bujit.’​—Kal. 6:5.

8. I biny bidy baan-beet ba mu cisak bady ni lulamat mwa kulong hadyobw batakamin bwa muut udyobw biihat ahing kudy Yehow? (Tal kazubw ka neey: “ Hing Kudy Yehow.”)

⁸ Hady muut uwudy mukat ulek Yehow, iikal mutakamin neey: dyumw diifuk, wiiyiiy kuhing kudy Mawej. I biny biwudy mwa kulong hawucidy mutakamin aah? Long cyoos ciwudy mwa kulong bwa kukashish diitabij diibuh. Uw mulong nook, wiiyiiy kwiikal cileejel cilengel kudy baan-been bakwaabw ba mu cisak, ni misang yikwaabw kudy udyobw biihat. Cikwaabw, wiiyiiy kutal muwudy mwa kutaatameen kaakunying kawudy naak. Twiisambilayaak ha myand yikwaabw yiwudy mwa kulong bwa kukashish diitabij diibuh.

9. Teel mishind yidy mwa kukwambulwiish bwa kukashish diitabij diibuh kudy Yehow. (Tal kazubw ka neey: “ Verseh Yikaakashish Diib Didy Muut Uwudy Mukat Ulek Yehow.”)

⁹ Tungunuk ni kulam biikadil bibuh bya mu spirit. I bya buseeb bwiibuh kutungunuk ni kukashish diitabij diibuh ni dya baan-been bakwaabw ba mu cisak. I mushind kaay uwudy mwa kulong nook? Lek Yehow hakukashish hawubaabal ha ciibidil diiy dya Mawej ni ulangiloh ni hawutweetweel mu bisangil bya biin Krist. Joanna, mwiin taat indiy ni mwaanaabw mwaan-mukaj bady balek kukadil Mawej mudimw, uleeleeb neey: “Nady ni diitalal mu micim hanabaabal myand ya mu Bibl ya baat aab: Abikayil, Eseteel, Yoobw, Yozeefw, ni Yeez. Bileejel byaabab biiteeteng ku micim ni naheehetelomw meej malengel mady mwa kuukashish ku biitiit byaamw. Nady muhet cikwaabw misambw ya habwaah yikaakashish menmen.”

10. I mushind kaay udy mukand a Misambw 32:6-8 wiitwambulwiish bwa kutaatameen kakunying?

¹⁰ Ambil Yehow bwaal boos bukutootond. Hawudy ni kakunying, iikal teng umusambil. Lomb Mawej iitut udy ni lukat bwa hakwambulwiish bwa kutal myand mu mushind udyey wiiyital ni ‘wiiyiiy ukulongweesh, ukuleej njil a kulond.’ (Bal Misambw 32:6-8.) Cya biin, misang yikwaabw udy mwa kwiikal ni kakunying kavul bwa kwambil Yehow muwiiyumvumvw menmen. Ki Yehow i mumanyik menmen kakunying kawudy naak ku micim. I mukukat ni ukwaakwambil bwa umutuudil myand yiwudy naay mu micim.​—Cim. 34:6; Mis. 62:7, 8.

11. Bilondeshil mukand a Ebreh 12:11, bwabiny bikaam tuteekel Yehow micim hadyey wiitwaakish mibel ya lukat? (Tal kazubw ka neey: “ Kwiihat Muut​—Kuleeleej Mudy Yehow Mwiitukat.”)

¹¹ Iitab dihangadik dya bakul. Kwiihat muut mu cisumbw i bumw bwa ku myand ya mu bulongolody bwa Yehow. Mibel ya lukat yitwaatwaaley i mushind mulengel weeh uleeleej neey: utaatacil  muut woos, ni bamulong a bibiih byaabw. (Bal Ebreh 12:11.) Bamw baat mu cisumbw bady mwa kuleeb bibiih neey bakul kabiinoh bend bangat mahangadik malengel hadyobw balumbulwiish muut eecy bamwiihat. Baat ba nook, kabiin bakat kuleeb myand yibiih ya muut udyobw balumbulwiish oow. Katwiinoh bend ni bijaadik byoos. Nook, i bya meej, bwa kuteekel bakul micim bwa mudyobw biikashishomw bwa kulumbulwiish bwaal boos hakulond may matam ma mu Bibl ni baluulumbulwiish mu diijin “dya Mawej.”​—2 Cif. 19:6.

12. I musangal kaay udy bakwaabw bahet hadyobw bat dihangadik dya Yehow dya kwiihat muut nyam kumikon?

¹² Hawutwaatw dihangadik dya bakul nyam ku mikon dya kwiihat muut uwudy mukat mu cisumbw, udy mwa kumwambulwiish bwa kuhingomwey kudy Yehow. “Cikong cya biin cisak batwaat dihangadik eedy nyam ku mikon kabiin bitaboh bend bwa kwiikal habwiih ni mwaan-aabab udyobw biihat ukaady mukuluuh,” ki muleeleeb Elizabeth, utukaady bateel. “Ki haanyim a yiy muman kuhingomw kudy Yehow, wiitabil neey: waakady mukumbanyin kumwiihatobw. Haanyim a mafuk, uleejel dyanyish bwa malongweesh maheteley. Naakady mwiiy kumanyik neey: mubel a Yehow udy teng ni buseeb,” ki muleeleebey. Mbaayend, Mark, uleeleeb byend nook: “Hahicil mafuk mavul, sangwiilumw iitut waakady muuyambil neey: nakaakaam kuhingomw mu bulongolody bwaal tudy balong menmen citwaakady mwa kulong. Nady ni musangal muvul mudy Yehow mwiitwambulwiish bwa kumukooyel.”

13. I biny bidy mwa kukwambulwiish bwa kuhit bilengel ni myand yidy yikutond?

¹³ Ambil balund bawudy muteekel micim myand yiwudy naay. Dyang bulund ni biin Krist bakaady bashimat bady mwa kukwambulwiish bwa kwiikal ni meej malengel. (Tus. 12:25; 17:17) Joanna, utukaady baman kuteel, uleeleeb neey: “Bwa myand yitootond mu mucim, niiyuumvumvw kaayany. Ki hanambiil balund banaakady muteekel micim, baakady bayambulwiish bwa kuhit naay bilengel.” Nook, i biny biwudy mwa kulong iikal muut mu cisumbw mukufuluj mund?

14. Bwabiny bikaam ‘tutungunuk ni kufwiilangan lus ni tuvulamin buyiil myand yibiih yituloolongelangan’?

¹⁴ Iikal utukij mu diis hawudy ni baan-been baan-balum ni baan-bakaj. Biin-biin bidy neey: katwiin mwa kutakamin neey muut woos udy mwa kulong teng myand yilengel. (Jak 3:2) Tut boos tudy bamulong a bibiih, kukemoh bend hady muut ukuleeb eecy uhatul may mady mwa kukwiit ku micim. Vuluk mubel utwaadil mupostol Pool wa neey: “Fwiilanganaay lus ni vulaminaay buyiil myand yibiih yinuloolongelangan ciisang cyoos cidy muut wa mukacy mwiinun mwiikal cilumbw ni mukwaabw.” (Kol. 3:13) Mwiin-kweet mwaan-mukaj mwiin mwaanaabw udyobw biihat umvumvwiij neey: “Yehow i muyambulwiish bwa kufwiil biin-kweet lus baloolong bwaal bulengel bwa kwiiy kuukashish ning mudyeby biiyiit ku micim.” I biny bidy biin mu cisumbw boos mwa kulong bwa kwambulwiish biin mu cisak bady ni lulamat?

15. I biny bidy mwa kwambulwiish biin mu cisak bady ni muut udyobw biihat mafuk aam?

¹⁵ Shikat bilengel ni biin mu cisak bady ni lulamat. Mwiin-kweet mwaan-mukaj Miriam waakady ni kakunying bwa kuy mu bisangil diib diihacilobw mwaan-aabw mwaan-mulum. “Naakady naciin bwa ciikal baat mwa kuleeb. Ki, kwaakady balund balengel baakady bumvw byaabw kakunying kanaakady naak, kabaakadyoh bend baleeb bibiih bwa yaay waakadyobw biihat. Nibafwiifwiijok, ni cyaakadyoh bend kaayaany waakady ni kakunying.” Mwiin-kweet mwaan-mukaj uleeleeb neey: “Haanyim a baman kwiihat mwaan a mim mwaan-mulum, balund ba buseeb biiyil kwiitukashish. Bakwaabw baleebel neey: kabaakady bamanyik cya kuleeb. Bakwaabw badidil naany ni bakwaabw baakady baafundil mukand bwa kukashishobw. Nook, baakady baayambulwiish!”

16. I mushind kaay udy cisumbw mwa kutungunuk ni kwambulwiish biin cisak cidy ni muut udyobw biihat?

¹⁶ Tungunuk ni kwambulwiish biin mu cisak bady ni lulamat. Bakaakaam twiibalongel myand ni lukat ni kwiibakashish. (Ebr. 10:24, 25) Haanyim a mafuk, biin mu cisak bady ni baat badyobw biihat bumvwiil byaabw neey i biihat mu cisumbw, bwaal baat kabaakady biisamb naabw kabidy bu kuuhal. Kanulangoh bend naak! Bikaam kufwiijok ni kukashish baasand biin balel bakaady balek biin-biin. Maria, mwiin mbaayend udyobw biihat ni mulek cisak, uleeleeb neey: “Bamw ba ku balund naany biiyil ku nzubw ni kwiihikobw ni kuyambulwiishobw bwa kulongweesh baan-baam. Bumvwiil kakunying kanakady naak ni badidil haakaabumw naany. Baakady baleebelok haakady baat baleeb bibiih bwa mim. Baakady baayambulwiish bikasakan!”​—Rom 12:13, 15.

17. I biny bidy bakul mwa kulong bwa kwambulwiish baat bady ni kakunying?

¹⁷ Bakul, kalaay mudimw ni mushind woos bwa kukashish biin cisak bady ni lulamat. Nudy ni bujit butam bwa kukashish baan-beet batuhahambidil naab bady ni muut udyobw bakat mulek Yehow. (1 Tes. 5:14) Iikal ni ciibidil cya kwiibakashish kuuhal ni haanyim a bisangil bya biin Krist. Iikal wiibakumbul ku nzubw yaababw ni usambil naab. Iikal uy naab mu mudimw a kudiil baat musah, eecy hady mafuk mahit, wiibalangulok bwa biiy batweelok mu kuhambidil kwa mu cisak. Bikaam balamy  ba mu spirit baleej mikook ya Yehow yidy ni kakunying lus, lukat, ni kwiibambulwiish ni bikaakaamobw.​—1 Tes. 2:7, 8.

18. Bilondeshel mukand a 2 Pyeel 3:9, Yehow i mukat bwa bamulong a bibiih balong biny?

¹⁸ Yehow “kiishoh bend mukat bwa muut ning waakaabumw abutuk; ki i mukat bwa ney baat boos bafik ku kulek kulong myand yibiih.” (Bal 2 Pyeel 3:9.) Ning mudy muut mwa kulong mpekaat mutam, buumy bwindiy budy teng ni buseeb ku mees kwa Mawej. Langil a buseeb budy Yehow mufut​—mulambw a cya kukuul nacy baat wa Mwaan indiy udyey mukat​—utwaadiley bwa bamulong a bubiih. Yehow i mukat bwa baat bady bamulek bahing kudyey. I mutakamin neey: biiyiiy teng kuhingomw, teng bu mutudy mwa kwiibital mu kasumw katwaadil Yeez ka mwaan ujimbeen. (Luuk 15:11-32) Baat bavul bady balek biin-biin biiyil kuhingomw kudy Taat aabab a mu diiwul udy ni lukat. Ni cisumbw cibaakaak ni musangal woos. Elizabeth, utukaady bateel, uhetel musangal hahingilomw mwaan indiy mu cisumbw. Halangiley ha bwaal oobw, uleeleeb neey: “Naakady mwanyish menmen boos baakady biitukashish bwa tut kulek kukooyel mu mabok neey: kakuhingomw cikwaabw.”

19. Bwabiny bikaam tutungunuk ni kuteekel Yehow micim?

¹⁹ Tudy mwa kuteekel teng Yehow micim. Kiinoh bend wiitwaakish may ma kulond mady mwa kwiitukaamin buhund. Udy ni lukat ni i Taat udy ni lus luvul udy mukat boos bady bamukat ni bamuhahambidil. Iikal mutwiishiibw neey: Yehow kiin ukulekoh bend mu ciisang ciwudy ni kakunying. (Ebr. 13:5, 6) Mark utukaady bateel uleeleeb neey: “Yehow kaakadyoh bend mwiitulek.” “Kiin neet kuleeh mu ciisang cya makab.” Yehow wiiyiiy kutungunuk teng ni kwiitwaakish ‘bukash bwaalaalukil kudyey.’ (2 Kor. 4:7) Ing, udy mwa kushaal ni lulamat ni mutakamin teng ni diib diikal muut uwudy mukat mwa kuhingomw kudy Yehow.