1. I bulund kaay budy hakacy ha baat bady ni lulamat ni Yehow?

YEEZ udy byend mu cisak cya bahambidil ba Yehow, i yiy “mwaan-a-but udy ku mut kwa biit byoos bihangil Mawej,” ni ku mut kwa milul ni milul ya banjel.(Kol. 1:15; Mis. 103:20) Haakady Yeez ha bulab, uleejel neey: baat ba lulamat bady mwa kutal Yehow neey: i Taat aabab. Yeez wambiil biiyij bindiy bwa Yehow neey: i “Taat a mim, udy mwiikal Taat iinun byeen.” (Jah 20:17) Hatwiilaalambul kudy Yehow ni hatutaatambul, twiiyiiy kwiikal mu cisak cya biin-kweet baan-balum ni baan-bakaj bady ni lukat.​—Mark 10:29, 30.

2. I biny bitwiiyiiy kutal mu ciin bwaal eecy?

² Bikaakasakeen bamw bwa kutalobw Yehow bu Taat udy ni lukat. Bakwaabw kabiin bamanyik mushind a kuleej baan babw baan-balum ni baan-bakaj lukat. Mu ciin bwaal eecy, twiiyiiy kutal mushind udy Yeez mwiitwambulwiish bwa kutal Yehow bu Taat udy ni lukat, ni mutudy mwa kufweej nend habwiiy. Twiiyiiy cikwaabw kumanyik mishind yitudy mwa kwiidikij Yehow ni mushind utudy mwa kulongel biin-kweet myand.

3. I mushind kaay udy diisambil dya cileejel mwa kwiitufwenjesh habwiih ni Yehow?

³ Yehow i Taat udy ni lukat. Yeez i mukat bwa tutal Yehow mu mushind udyey umutal​—bu mulel udy ni musangal ni lukat ukookok baan kudyey biheehel, kiin bu fumw udy kay ni lukat ni wiitutuutumin diiy. Biimweekel hatook mu diisambil dyaakady Yeez mulongweesh biiyij bindiy. Utwaadijil diisambil dya cileejel ni may aam: “Taat iitut.” (Mat. 6:9) Yeez waakady mwa kwiitwambil musang aakaabumw bwa kubiikan Yehow neey: “Mwiin Bukash boos,” “Cyakahang,” eecy “Mukaleng a mivw ni mivw”​—myanz yoos eey i yimukumbanyin ni yileeleeb teng bwindiy.  (Kbwa. 49:25; Ye. 40:28 NWT; 1 Tim. 1:17) Cikwaabw, Yeez waakady mukat kukal mudimw menmen ni mwaak oow “Taat.”

4. I mushind kaay utudy bamanyik neey Yehow i mukat bwa tufweej nend habwiih?

⁴ I bikukasakeenok bwa kutal Yehow neey: i Taat udy ni lukat eeny? Ki mulaalang bamw ba kutudy. Iikal taat iitut mwiikal mwiin myand yikasakan ni kay ni meej malengel, kabiinoh bend bihehel bwa kulanga neey: taat oow i mwiitukat. Biitukaakashish ku micim bwa ku manyik neey: Yehow umvumw bilengel mu twiiyumvumvw! Ukaakaam kufweej neet habwiih. Ki bwabingany diiy dindiy ditukaakashish nook: “Fweejaay habwiih ni Mawej naak, yiy wiiyiiy kufweej habwiih neen.” (Jak 4:8) Yehow i mwiitukat ni i Taat mulengel utudy katuy banj kuhetoh.

5. Bilondeshel mukand a Luuk 10:22, i mushind kaay udy Yeez wiitwambulwiish bwa kufweej habwiih ni Yehow?

⁵ Yeez udy mwa kwiitwambulwiish bwa kufweej habwiiy ni Yehow. Yeez i mumanyik Yehow bilengel menmen ni uleeleej biikadil bindiy mu mushind mulengel, uleebel neey: “Woos ubaaman kuutal, i muman kutal Taat.” (Jah 14:9) Teng bu yaay iitut, Yeez wiituloolongweesh mushind a kuneemek ni kukooyel Taat iitut, mwa kulek myand yidy kayiy yimusangeej, ni mwa kuhet dyanyish kudyey. Ki shikacil a Yeez ha bulab, uleejel menmen mudy Yehow mwiikal ni bulengel ni lukat. (Bal Luuk 10:22) Tutalaayaak mushind udy Yehow uleej biikadil bindiy.

6. I mu myand kaay yisunguluk yaakady Yehow mukun Yeez mat?

⁶ Yehow ukuukun baan bindiy mat. Tutalaay mushind waakady Yehow mukun Mwaan indiy a dimung mat. Yehow waakady umvw biin-biin masambil maakady Mwaan indiy ulong haakadyey ha bulab. (Luuk 5:16) Yehow waakady umvw masambil ma Yeez, nang-nang haakdyey ni mahangadik ma buseeb ma kwangat, cileejel haakadyey ukaam kusungul bapostool bindiy 12. (Luuk 6:12, 13) Yehow waakady umvw masambi ma Yeez nang-nang haakadyey mu ciisang cya makab. Kuuhal kwa kumuhangilobw, Yeez uusambiil Taat indiy ni mucim woos bwa makab maakadyey mwa kuhet. Yehow kaakady teng umvw masambil ma Mwaan indiy, ki utumin cikwaabw mwanjel bwa kukashish  Mwaan indiy udyey mukat mu mabok.​—Luuk 22:41-44.

7. I mushind kaay utudy bamanyik neey: Yehow ukuukun masambil ma biin mudimw bindiy mat?

⁷ Leeloow, Yehow utuutungunuk ni kukun masambil ma biin mudimw bindiy mat, ni wiibaalaalabul mu ciisang cikumban ni mu mushind mulengel weeh. (Mis. 116:1, 2) Tutalaay mushind waakady mwiin-kweet mwaan-mukaj wa mu Endiyeh mutal mwaakady Yehow mwaalabul masambil mindiy. Waakady mutat bikasakan ni waakady musambil Yehow ni mucim woos bwa bwaal oobw. Ufuufund neey: “Program a TV^® wa JW wa suuny 5/2019 waakady uleeb bwa mushind a kuhit bilengel ni makab ni kakunying, waakady mufik ha diib dilengel bwa mim. Waakady dyaalabul ku masambil maamim”

8. Teel mishind yileeleej neey: Yehow waakady mukat Yeez.

⁸ Yehow i mwiitukat ni wiitulaalam, teng mwaakadyey mukat Yeez ni mumulam mu makab maakadyey muhet mu mudimw waakadyey nend ha bulab. (Jah 5:20) Yehow waakady mwambulwiish Yeez bwa kulam diitabij dindiy dikasakan, umukashishil mu mabok bwa makab maheteley, wambulwiishil Yeez ni biit byaakadyey ukaam bwa kwiikaley ni buumy. Yehow ukashishil Mwaan indiy ha mwambiley neey: i mumukat ni i mumuteekel micim. (Mat. 3:16, 17) Bu mwaakadyey muteekel teng Taat indiy wa mu diiwul udy ni lukat micim, Yeez kiitadiloh bend neey: waakady kayend.​—Jah 8:16.

9. I biny bitujaajaadikil neey: Yehow i mwiitukat?

⁹ Teng bu mwaakady Yehow muleej Yeez lukat, tudy batal mudyey wiituleej byeet lukat oolw mu mishind yivul. Lang ket bwa mudy Yehow mwiitukok kudyey, ni mwiitwaakish cisak cya mu spirit cidy ni lukat ni ciikal mu kaacyumw bwiitut kwiikal ni musangal ni bwa kwiitwambulwiish bwa myand yitukaakaam. (Jah 6:44) Cikwaabw, Yehow wiitwaakaakish byaakudy bya mu spirit bwa ku kashish diitabij diitut. Ni wiitwambambulwiish cikwaabw ni biit bya ku nyeet bitukaakaakm diifuk dyoos. (Mat. 6:31, 32) Hatulaalangil bikasakan ha mushind udy Yehow mwiitukat, twiiyiiy kumukat bikasakan.

10. Mushind udy Yehow ulongel baan-beet baan-balum ni baan-bakaj myand, wiitusaasak bwa kulong biny?

¹⁰ Yehow i mukat baan-beet baan-balum ni baan-bakaj. Ki misang yikwaabw bidy mwa kwiitukasakeen bwiitut kuleej mutudy bakat baan-beet ba mu spirit. Tudy baalukil mu byaab bishiil-shilangan, ni bakasakeen mu shikacil yishiil-shiilang. Ni tuut boos tuloolong bilem, ni tufuufulwiij bakwaabw mund. Cikwaabw, woos wa kutudy udy mwa kulong myand bwa cisak ciitut cya mu spirit ciikal ni lukat. I mushind kaay utudy mwa kulong nook? Hatwiidiidikij Taat iitut ni hatuloolongel biin-kweet myand ni lukat. (Ef. 5:1, 2; 1Jah 4:19) Tutalaay mushind utudy mwa kulongel ku cileejel cya Yehow.

11. I mushind kaay udy Yeez mwiituleej “lus luvul” ludy naalw Yehow?

¹¹ Yehow wiituleeleej “lus luvul.” (Luuk 1:78) Muut udy ni lus luvul umvumvw micim yimwiit hadyey utal baat bakeng; ukaakaam mushind udyey mwa kwiibambulwiish ni kwiibakashish. Mushind waakady Yeez ulongel baat myand, waakady uleej mwaakady Yehow wiitacish bwa baat. (Jah 5:19) Diifuk dikwaabw, hatadiley baat “milul ni milul, umvwiil lus, bwaal baakady bakooy, bahomw ni kuhomw bu mikook kayiy ni waakwiiyilam.” (Mat. 9:36) Yeez kaadyoh teng mufwiil baat lus. Ki ulongel bwaal kahand bwa kwiimbambulwiish. Wondahil babeel ni kwambulwiishey baakady “bakooy ni kwangat kwa majit.”​—Mat. 11:28-30; 14:14.

12. Twaal cileejel cya mushind utudy mwa kuleej mwiin-kweet lus.

¹² Kuuhal kwiitut kuleej biin-kweet baan-balum ni baan-bakaj lus, bikaam tutal makab madyobw naam. Cileejel, mwiin-kweet mwaan-mukaj  udy mwa kwiikal ubeel bikasakan, ni kiin uleeboh bend bwa lutat lwindiy oolw, ki wiiyiiy kwiikal ni musangal hady muut wiiy umwambulwiish. Udy mwa kwiikalok ni mushind a kukumbajil biin mu cisak cindiy bikaakaamobw eeny? Tudyok mwa kumwiihikil byaakudy eecy kumukwanjok ku midimw yindiy ya mu nzubw eeny? Eecy misang yikwaabw mwiin-kweet mwaan-mulum wa mu cisumbw ciitut udy mwa kwiikal mujimbaj mudimw waakadyey ulong. Tudyok mwa kumwambulwiish ni tufwalang mu mushind udy baat kabay mwa kumanyik teng ni diib diikaley mwa kuhet mudimw mukwaabw eeny?

13-14. I mushind kaay utudy mwa kuleej neey: tudy bakishangan ba biit teng bu Yehow?

¹³ Yehow i mwaakishangan a biit. (Mat. 5:45) Kabiin bikaam twindil teng baan-beet baan-balum ni baan-bakaj bitulomb dyambulwiish kuuhal kwiitut kwiibaleej lus. Teng bu Yehow, tudy mwa kwangat diihangadik dya kwiibambulwiish. Wiituhahatwiil diib diifuk dyoos katuy tumulomb bwaal! Ni uteetemeshel baat boos diib, kiin teng aab bamufwiifwiijok. Wiitaatabok neey: hady Yehow wiitwaakish bitukaakaam wiituleeleejok lukat eeny? Tudy bakat Yehow bikasakan bwaal i mulengel ni i mwaakishangan a biit!

¹⁴ Teng bu Taat iitut a mu diiwul, biin-kweet bavul baan-balum ni baan-bakaj i bangat dihangadik dya kwiikal bakishangan ba biit. Cileejel, mu muvw a 2013, ciheeh cikasakan Haiyan cilongel myand yitam mu cibunj cya Philippines. Nzubw yivul ya Batemw yibukukil ni biit bivul bijimbeen. Ki cisak cya baan-babw ba mu spirit ba bulab butuutul cyaakady ciilongolol bwa kwiimbambulwiish. Bavul batwaadil fwalang yaababw eecy bavul bayiil kalongolol ni kwiibakulul mazubw habwiih ni 750 habwiih ni muvw mutuutul! Mu cihuh cikasakan cya COVID 19, Batemw ba Yehow i bakal mudimw bikasakan bwa kwambulwiish baan-baabw ba mu spirit. Hatuloolong myang lwang-lwang bwa kwambulwiish biin mu cisak ciitut cya mu spirit, tuleeleej mutudy biibakat.

15-16. Bilondeshel mukand a Luuk 6:36, i mushind kaay utudy mwa kwiidikij Taat iitut a mu diiwul?

¹⁵ Yehow udy ni lus luvul ni uvuuvulaminok bubiih bwiitut. (Bal Luuk 6:36) Diifuk dyoos tutaatal mudy Taat iitut a mu diiwul wiitufwiil  lus. (Mis. 103:10-14) Biiyij ba Yeez kabaakadyoh bend bawaakan; cikwaabw, waakady mwiibalongel myand ni lus ni kuvulaminey bilem byaababw. Cikwaabw, ukacil bwa kutwaal buumy bwindiy bu mulambw bwa bavulamin bubiih bwiitut. (1Jah 2:1, 2) Kwiish wiiyumvwok habwiih ni Yehow ni Yeez bwa mudyobw ni lus luvul ni bavulamin mpekaat iitut eeny?

¹⁶ Tukaakashish lukat lutudy naalw mu cisak ciitut cya mu spirit ‘hatufwiifwiilangan lus.’ (Ef. 4:32) Biin-biin, bidy mwa kwiikal misang yikwaabw bikasakan bwa kufwiil bakwaabw lus. Nook , bikaam twiikashishomw bwa kwiikal ni cikadil eecy. Mwiin-kweet mwaan-mukaj kahand utadil ciin bwaal cya Cimbumb cya Muteetekel cya neey: “Tufuilangane luse ne muoyo mujima” cyaakady cimwambulwiish *. Uleeleeb neey: “Ciin bwaal eecy i ciyambulwiish bwa kufwiil bakwaabw lus. I bumvwiijomw neey: kufwiil bakwaabw lus kakwiin kumvwiij kubwiikil mees ha myand yibiih yidy muut ulong eecy kulengulul buhund budy mwa kulongek. Ki kufwiilangan lus kumvwiij kulek kuvuluk myand yibiih yidyobw bitulongel, ki, i kukaam diitalal.” Hatufwiifwiil biin-kweet lus ni mucim woos, tuleeleej mutwiidiidikij Taat iitut, Yehow.

17. Bilondeshel mukand a Matewus 5:16, i mushind kaay utudy mwa kutumbish Taat iitut a mu diiwul?

¹⁷ I dyakatook divul dya kwiikal mu kaacyumw mu cisak cya ha bulab butuutul cidy ni lukat. Tudy bakat bwa baat biiy bahambidil neet aakaabumw Mawej iitut. Bu mutudy ni bwaal oobw mu meej, bikaam twiikal badyumuk bwa kaay twaalongel baat ba Yehow eecy Taat iitut a mu diiwul bibiih. Twiikaakashishomw bwa kwiikal ni biikadil bilengel biikal mwa kukok baat bwa kukunobw musah mulengel mat.​—Bal Matewus 5:16.

18. I biny bidy mwa kwiitwambulwiish bwa kudiil baat musah ni mucim mukasakan?

¹⁸ Misang yikwaabw, baat bituhoohooholol eecy bitukeekengesh bwaal tukookooyel Taat iitut a mu diiwul. I biny bitudy mwa kulong hatumvumvw mooy bwa kwambil baat bakwaabw myand yitud biitabij? Twiikal bajaadik  neey: Yehow ni Mwaan indiy biiyiiy kwiitwambulwiish. Yeez waakady mujaadikil biiyij bindiy neey: kabakutatoh bend bwa mushind wiikalobw mwa kulumbulul eecy bwa ciikalobw mwa kuleeb. Bwabiny? “Bwaal biiyiiy kwiinwaakish cya kuleeb diib aady,” ki mumvwiijil Yeez, “bwaal kanwiishoh bend baanun biiyiiy kulumbulul, ki, i spirit a Taat iinun wiiyiiy kulumbulwiil mukan mwiinun.”​—Mat. 10:19, 20, NWT.

19. I biny byaakady byambulwiish Robert bwa kudiil baat musah ni mucim mukasakan?

¹⁹ Twangat cileejel cya Robert. Ciisang cikwaabw hacyaakadyey mulony a Bibl muhyaamuhy mu cibunj cya Afrik wa kucyaash, waakady ni diimany dikeeh dya myand ya mu Bibl. Uyiil kalumbulul ku tumilaady bwabiny kaakadyoh bend mukat kutweel mu mudimw a busalaay. Waakady ni mucim mukasakan ni mukulumbulul kwindiy, waakady mumvwiij zuj neey: kaakady mukat kutweelakan mu myand ya ha bulab bwaal waakady mukat biin Krist nend. Waakady mukat cyaab cyaakadyey naacy mu cisak cya mu spirit! Zuj umujoojel musang umw neey: “Baan-been i bangany?” Robert kaakadyoh bend mu manyik cya kwaalabul, musang umw uvulukil verseh wa diifuk aady. Verseh waakady wa mu Matewus 12:50: Uleeleeb neey: “Bwaal woos uloolong cidy Taat a mim udy mwiiwul mukat, i yiy mwaaneet mwaan-mulum, mulookej aam ecy maam a mim.” Ning mwaakady Robert mulony a Bibl muhyaamuhy, spirit a Yehow umwambulwiishil bwa kwaalabul ku diijooj aady ni ku majooj makwaabw maakadyey kay mweelel meej. Yehow waakady musangal bikasakan bwa cyaakady Robert mulong! Yehow usaasangal cikwaabw hatumuteeteekel micim hakudiil baat musah ni mucim mukasakan mu biisang bya makab.

20. Bikaam twiiswiik bwa kulong biny? (Jah 17:11, 15)

²⁰ Tutungunukaay ni kwangat ni buseeb dyakatook ditudy naady dya kwiikal mu cisak cya mu spirit cidy ni lukat. Tudy ni Taat mulengel weeh ni baan-beet baan-balum ni baan-bakaj bavul bady bitukat. Bikaam twiikal teng tuleej dyanyish bwa myand eey. Sataan ni biin mudimw bindiy bady biitukin baloolong bwa twiitab neey: Taat iitut a mu diiwul kinoh bend mwiitukat. Bwaal bulengel, Yeez i musambil bwa diitabij diitut, ni waakady ulomb Taat indiy bwa cisak ciitut cishaal mu kaacyumw. (Bal Jah 17:11, 15) Yehow waalabwiil diisambil aady. Teng bu Yeez, katwiin mwa kulandul lukat ni dyambulwiish byaalalukil kudy Taat iitut a mu diiwul. Twiiswiikaay bwa kutungunuk ni kwiikal habwiih ni cisak ciitut cya mu spirit.