1. a) Yehow i mwiitulay biny? b) ‘Kuteek micim teng kudy Yehow’ kumvumvwiij biny? (Tal “Dyumvwiij dya Cyambil Eecy.”)

 YEHOW i mulay baat boos bady bamukat myand yilengel. Mu kalung kakeeh oomw, wiiyiiy kufulok mabenj, biitiit, ni lufw. (Yis. 21:3, 4) Wiiyiiy kwambulwiish “biihweehweekesh” bady batakamin bwa kushikat ha bulab bwiikaley mwa kufutulul paradiiz. (Mis. 37:9-11) Ni wiiyiiy kulong naak bwa woos wa kutudy iikal ni musangal, bulund bwiitut nend bwiikaakal cikwaabw bulengel bweeh buhitok butudy naabw leeloow. I kutakamin kaay kulengel ook! Ki i myand kaay yiloolong bwa twiitabij neey: milay ya Mawej yiiyiiy kukumban biin-biin? Yehow uloolong teng bwaal boos budyey uleeb. Nook tudy ni kabingil kalengel ka ‘kuteek micim teng kudy Yehow.’ * (Mis. 27:14) Tuleeleej nook, hakutakamin ni kutukij koos ni musangal muvul bwa Mawej iitut ukukumbaj bwaal boos budyey uleeb.​—Ye. 55:10, 11.

2. I biny bikaady Yehow muman kulong?

² Kukaady myand yidy Yehow muman kulong kal yijaajaadik neey: ukukumbaj teng milay yindiy. Tukontononaay cileejel cyumw cya habwaah. Mu mukand a Myand yisokolweel Jah, Yehow i mulaay neey: mu mafuk miitut aam, wiiyiiy kukongakany baat ba bibunj byoos, ni biis byoos, ni bileebel byoos, wiiyiiy kulong bwa bamukadil mudimw mu kaacyumw mu kuhambidil kukiish koonyek. Leeloow, cisumbw cya baat cya habwaah eecy i “baat bavul beeh.” (Yis. 7:9, 10) Mudy baan-balum, baan-bakaj, ni baan ba biseb bishil-shilangan, bileebel bishiilangan, ni  bilel bishiilangan, baat ba mishind yoos eey bady mu cisak cidy ni diitalal, biikal mu kaacyumw ka baan ba kamuut ha bulab butuutul. (Mis. 133:1; Jah 10:16) Baat ba mu cisumbw cya baat bavul beeh aab, bady cikwaabw badiil ba baat musah ba cisumy. Bady teng habwiih bwa kwambil muut woos udy mukat kukun mat ku myand yidyobw batakamin ya mu bulongolody bulengel bweeh. (Mat. 28:19, 20; Yis. 14:6, 7; 22:17) Uw mwiikal mu baat bavul beeh aab, kakuy kulandul kutakamin kwa myand yilengel yiiyiiy kukumban i bwaal bwa buseeb buvul kuwudy.

3. Sataan udy ni kiihacil kaay?

³ Dyabol i mukat bwa tulek kutakamin myand kuuhal ook. Kiihacil kindiy i ka twiitabij neey: Yehow kiin wiitutabaleel ni kakwiitukumbajilok bend myand yidyeey mulay. Iikaleby neey: Sataan udy mwa kunyang kutakamin kwiitut, tudy mwa kwiiy kubotot mu mabok, ni tudy mwa kulek cikwaabw kukadil Yehow mudimw. Teng mutwiiyiiy kwiibital, Dyabol ukaamin bwa Yoobw halek kuteekel Yehow micim ni halek kumukadil mudimw.

4. I biny bitwiiyiiy kukontonon mu ciin bwaal eecy? (Yoobw 1:9-12)

⁴ Mu ciin bwaal eecy, twiiyiiy kukontonon mayeel maakady Sataan mukal naam mudimw bwa kusakey Yoobw bwa kulekey mucim indiy mutook. (Bal Yoobw 1:9-12.) Twiiyiiy kwiisambil cikwaabw hacitudy mwa kulongel ku cileejel cya Yoobw ni bwabiny bikaakaam tumanyik neey: Mawej i mwiitukat ni wiiyiiy kukumbaj milay yindiy.

5-6. I myand kaay yaakady yifikil Yoobw mu ciisang cyaakaabumw?

⁵ Yoobw waakady ni shikacil mulengel weeh. Waakady ni bulund bulengel ni Yehow. Waakady ni cisumbw cya baat bavul, cisak cya musangal, ni bihak bivul menmen. (Yoobw 1:1-5) Ki diifuk dikwaabw, Yoobw ujimbajil biit habwiih ni byoos. Cya kuuhal, ujimbajil bihak bindiy. (Yoobw 1:13-17) Cikwaabw, baan bindiy boos baakadyey mukat bafwiil. Lang bwa diiteet dikasakan diheteley ciisang aacy. Balel badyaakal bahet kakunying hady umw wa ku baan baabab ufw. Lang bwa ciit citam cihetel Yoobw ni mukaj indiy ku micim umvwiilobw neey: baan baabab boos diikumy i bafw. Biman kumutond naak, Yoobw uyawiil cinkoocy cindiy ni umb wiiyumb haash!​—Yoobw 1:18-20.

⁶ Kuunyim Sataan ubeedyeshel Yoobw ni lubeel lukasakan ni lulongel bwa kiikal ni buseeb kudy baat. (Yoobw 2:6-8; 7:5) Kuuhal kwa Yoobw kubeeley, baat bavul baakady bamuneemek bikasakan. Baakady bay kudyey bwa kuhet mibel. (Yoobw 31:18) Ki habeedyeley bamulekedyeel. Bamulekedyeel kudy baan baabw, balund nend ba ha micim, ni cikwaabw, kudy biin mudimw bindiy baakady bashikacil ku cibel kwindiy!​—Yoobw 19:13, 14, 16.

7. a) I biny byaakady Yoobw mumanyik bwa makab maheteley, ki ulekeel bwa kulong biny? b) I mushind kaay udy mwiin Krist mwa kutaatameen makab ma bwiin matutaatal ha cifwaatul eecy?

⁷ Sataan ukacil bwa Yoobw iitab neey: waakady ukab bwaal waakady mufulwiij Yehow mund. Cileejel, Sataan ukadil mudimw ni ciheeh cikasakan bwa kwiiwulecy nzubw mwaakady baan ba Yoobw diikumy bashikat bend ni kudy haakaabumw byaakudy ni musangal. (Yoobw 1:18, 19) Cikwaabw, ulongel bwa mudil alukil mwiiwul kiin teng bwa kubutul bimun bya Yoobw, ki bwa kubutul cikwaabw biin mudimw bindiy baakady biiyilam. (Yoobw 1:16) Biin-biin bu mwaakady ciheeh ni mudil byaaluk mu diiwul, Yoobw ulangil neey: byaakady byaalukil kudy Yehow Mawej. Bu cihet, Yoobw wiitabijil neey: udy mwa kwiikal misang yikwaabw mulongel Yehow bibiih. Ning biby biikal nook, Yoobw ulekeel bwa kuleeb bibiih bwa Taat indiy udy mu diiwul. Yoobw waakady mumanyik neey:  Yehow waakady mu mulongel myand yilengel yivul mukacy mwa mivw yivul. Nook, ulangil neey: bu mwaakadyey ni musangal bwa myand yilengel yiheteley, byaakady bikaam cikwaabw akat bwa iikal ni musangal hady myand yibiih yimufikil. Ki bwabiny uleebel neey: “Diijin dya Mawej diy lutumb.” (Yoobw 1:20, 21; 2:10) Ning mwaakady Yoobw mujimbaj fwalang yindiy, baan bindiy ni makand mindiy ma Nyeet, waakady teng mushaal ni lulamat kudy Yehow. Ki Sataan ukaamin mushind mukwaabw wa kumukabish.

8. I biny bikwaabw bilongel Sataan bwa kuteet Yoobw?

⁸ Sataan ukadil mudimw ni diyeel dikwaabw bwa kuteet Yoobw; waakady musak balund basat ba makos bwa kukooyesh Yoobw mu mabok ni may kaahand bwa iital kay ni buseeb. Baat aab baleejel neey: makab mahetel Yoobw i cijaadik cileejel neey: waakady mulong myand yivul yibiih. (Yoobw 22:5-9) Cikwaabw, balongel bwa kumwiitabijiij neey: ning mwaakadyey mulongel Yehow myand yivul yilengel, kwiikashishomw kwindiy koos bwa kusangeej Mawej kakwaakadyoh bend ni buseeb. (Yoobw 4:18; 22:2, 3; 25:4) Bwa bwaal oobw, balongel bwa Yoobw alek kwiitab neey: Mawej i mumukat, kaakwiiy kumutabaleeloh ni kabyaakadyoh bend ni buseeb bwindiy kumukadil mudimw. May maabab maakady mwa kulong bwa Yoobw iyumvw neey: kaakadyoh bend ni bwaal bwaakadyey mwa kutakamin mu shikacil indiy.

9. I biny byambulwiishil Yoobw bwa kwiikal ni micim yikasakan ni diikand?

⁹ Langil ket ha bwaal oobw. Yoobw i mushikat mu but, mwiikal teng ni biitiit. (Yoobw 2:8) Balund nend batutungunuk ni kuleeb neey: kiin muut mulengel ni kakwiinoh bend bwaal bulengel budyey mulong budy ni buseeb. Makab maakady mamunemeneen teng bu mabw ma bujit, ook mwiikal ni kaakunying kiikiin bwa baan bindiy bady bafw baakadyey mukat menmen. Cya kuuhal, Yoobw i mushikat mwiihoy teng nyeh. (Yoobw 2:13–3:1) Iikaleby neey: balund ba Yoobw bumvumvwiij kwiiwooy kwindiy bu cimanyin cya neey: Yoobw ukaakaam kulek Cyakahang indiy, badiidingomw. Diib dyaakady Yoobw mushikat mu but, ujudil​—mees ni waatal balund bindiy ba makos—​ni kuleebey neey: “Ning bicy, teng ni munaafw, najaajaadik teng ney ciish ni bwaal!” (Yoobw 27:5) I biny byambulwiishil Yoobw bwa kwiikaley ni micim yikasakan menmen  ni diikand ning muheteley makab moos aam? Cikwaabw, haakadyey mubotot menmen mu mabok, waakady mutakamin neey: Mawej indiy a lukat wiiyiiy teng kumwambulwiish. Waakady mumanyik neey: ning yiy mwa kufw, Yehow wiiyiiy kumusangul.​—Yoobw 14:13-15.

10. Bwaal bwa Yoobw bwiituloolongweesh biny?

¹⁰ Bwaal bwa Yoobw bwiituleeleej neey: Sataan kiin mwa kwiitusak kumakand bwiitut kulek Yehow, ni Yehow i mumanyik myand yoos yihiihitakan mu shikacil. Mwiisamb a Yoobw udy mwa kwiitwambulwiish cikwaabw bwa kumvw bilengel myand yiheteley mu shikacil. Tukontononaay mamw malongweesh masunguluk matudy mwa kulongel ku cileejel cya Yoobw.

11. Tut tutungunuk ni kuteekel Yehow micim, i kutwiishiibw kaay kutudy mwa kwiikal naak? (Jak 4:7)

¹¹ Yoobw uleejel neey: tut batungunuk ni kuteekel Yehow micim, tudy mwa kutaatameen makab moos ni tudy mwa kucimun ni musangal bulwiish bwa Sataan. Ki i cihet kaay citwiiyiiy kuhet? Diiy dya Mawej ditujaajaadikil neey: Dyabol wiiyiiy kwiituciin.​—Bal Jak 4:7.

12. I mushind kaay waakady Yoobw mukasakan micim bwa kusanguk kwaakadyey mutekemen?

¹² Bikaam twiikal ni diitabij dikasakan mu kusanguk kudy Mawej mulay. Teng mudyeby bileej mu ciin bwaal cishaal, Sataan ukaakal teng mudimw ni mooy a lufw ni wiikashishomw bwa kwiitusak bwa tulek lulamat lwiitut kudy Yehow. Mu bwaal bwa Yoobw, Sataan uleejel neey: Yoobw wiiyiiy kulong bwaal boos, ning bwa kulekey kukadil Yehow mudimw, bwa kukuuley buumy bwindiy. Sataan waakady mwiin makos. Ning mu ciisang cikasakan cyaakady cimweek neey: Yoobw ukaady habwiih ni kufw, ushaadil teng ni lulamat teng kudy Yehow. Kuteekel kwindiy kwa micim mu bulengel bwa Yehow ni diitekemen dikasakan dyaakadyey naady ni kumanyik kwa neey: Yehow wiiyiiy ulongolol myand kumwambulwiishil bwindiy kutaatameen. Yoobw waakady ni diitabij dya neey: Yehow yiy mwiikal kaay mulongolol myand ha ciisang cyaakadyey ni buumy, wiiyiiy teng kwiiyilongolol ni wiiyiiy kumusangul mu mafuk maciiyiiy. Kutakamin kwaakusanguk kwaakady bwaal bwa biin-biin ku mees kwa Yoobw. Biby biikal neey: kutakamin i bwaal bwa biin-biin ku mees kwiitut, ning tut ni makab mady mwa kulong bwa tufw, katwiin mwa kulek lulamat lwiitut kudy Yehow.

13. I biny bituloolongel ku mateet maakady Sataan muteet naam Yoobw?

¹³ Bikaam tudimukil bikasakan makab maakady Sataan mukal naam mudimw bwa kuteet Yoobw bwaal i mam makab maakaabumw madyey ukal naam mudimw leeloow. Tal mudy Sataan mufund a nganomw uleeb: “biit byoos bidy naaby muut [kiin teng Yoobw] udy mwa kwiibitwaal bwa kukuuleyoh buumy bwindiy.” (Yoobw 2:4, 5) Mu bwaal oobw, Sataan uleeleej neey: katwiinoh bend bakat biin-biin Yehow Mawej ni twiiyiiy kumulek biby bimweek neey: kudy bwaal butudy mwa kulong bwa kukuuloh buumy bwiitut. Sataan uleeleeb cikwaabw neey: Mawej kiish mwiitukat ni kakwangatoh bend ni buseeb kwiikashishomw kwiitut bwa kumusangej. Kwiikal bamanyik matey mady naam Sataan, kwiitwambambulwiish bwiitut kutal neey: Sataan i mwiin makos ni katwiin mwa kwiimiitab ki tudy batakamin teng kudy Yehow.

14. Makab mady mwa kwiitwambulwiish bwa kulong biny? Twaal cileejel.

¹⁴ Bikaam tutal makab bu mushind utudy mwa kuhetelok byeet dilongweesh. Makab maakady Yoobw mutaatameen mamwambulwiish bwa kumanyik bilem kaahand byaakadyey naaby ni mushind waakadyey mwa kwiibilongolol. Cileejel, makab mamulongweeshel bwa kwiikaley ni kwiihweekesh kuvul. (Yoobw 42:3) Tudy mwa kuhetelok byeet malongweesh mavul hatudy mu ciisang cya makab. Mwiin-kweet Nikolay, * uleeleeb neey: hakadyobw bamumb mu nzubw a lukan ning mwaakadyey ni mabenj makasakan, uleeleeb neey: “Mu nzubw a lukan mudy teng bu cyaamw ciitwambambulwiish bwa kutal mabenj mady mund mwiitut matudy katuy mwa kutal ni mees, ni bya mushind aakaabumw mu nzubw a lukan i mumwambulwiish bwa kumanyik biikadil bya bwiin Krist byaakady bikaam bwa alongolol.” Diib ditumaamanyik bilem bitudy naaby, tudy mwa kulong mwiitut moos bwa kwiibilongolol.

15. Bikaam tukun ngany mat, ni bwabiny?

 ¹⁵ Bikaam tukun teng Yehow mat, ki katwiimakunoh bend balwiish biitut. Yoobw waakady mukun bikasakan Yehow mat haakadyobw biisamb nend. Mawej waakady mweelesh Yoobw meej, hakumwiihanguj biin-biin neey: ‘Udy mumanyikok bukash bunady mulong naabw biit byoos eeny? Nady mumanyik myand yoos yidy yikufikil. Ulaalangok neey: ciin mwa kukutabaleelok eeny?’ Yoobw waalabwiil ni kwiihweekesh ni dyanyish divul bwa bulengel bumuleejel Yehow. Uleebel neey: “Naakady mu kumanyikil teng kubyaakady baat baleeb, ki kaabaak, nabakutal kaayany ni mees maam.” (Yoobw 42:5) Yoobw ucyaakady misang yikwaabw mushikat mu but, waakady ni nyaw nyeet yoos, ni haleebeley may aam, ucyaakady ni kaakunying bwa baan bindiy bafwiil. Ning naak, Yehow uleejel Yoobw lukat lwindiy ni kumujaadikiley neey: waakady mu mwanyish.​—Yoobw 42:7, 8.

16. Bilondeshel mukand a Yeshaay 49:15, 16, i biny bitudy mwa kulam mu meej hatutwiitwiilangan ni makab?

¹⁶ Cikwaabw leeloow, baat bady mwa kwiitutuk ni bitulongel myand teng bu neey: katwiin ni buseeb. Bady mwa kwiitwendeshel lumw lubiih eecy kuleeb bibiih bwa bulongolody bwiitut ni ‘kwiitudingidilomw myand yoos ya makos.’ (Mat. 5:11) Dilongweesh diituheehetel ku bwaal bwa Yoobw didy neey: Yehow i mumanyik neey: twiiyiiy kushaal ni lulamat kudyey hatutwiitwiilangan ni makab. Yehow i mwiitukat ni kakuvulaminoh bend baat bady batakamin kudyey. (Bal Yeshaay 49:15, 16.) Kukunoh bend mat ku myand ya makos yidyobw bakudingidilomw naay kudy balwiish ba Mawej! James, mwiin kweet mwaan-mulum wa mu cibunj cya Turkey mwiin mu cisak cyaakadyobw batwiilangan ni makab makasakan, uleeleeb neey: “Tutadil neey: kukun mat ku makos madyobw badingidil naak baat ba Mawej,  kwaakady mwa kulong bwa tubotot mu mabok. Nook, tutumin meej miitut ku Bukaleng bwa Mawej butwaakady batakamin ni tushaadil ni cyuuy mu mudimw a Yehow. Bu cihet, tutungunukil ni kwiikal ni musangal.” Teng bu Yoobw, tukuukun Yehow mat! Myand ya makos yidy balwiish biitut biitudingidil naay, kayiish mwa kwiitukaakeesh bwa kutakamin myand yidy Yehow mwiitulay.

17. I biny bitudy balongel ku cileejel cya baan-balum ni baan-bakaj ba lulamat badyobw baleej mu mukand a Ebreh shapitil a 11?

¹⁷ Yoobw i umw wa ku biin mudimw ba Yehow bashaadil ni mucim mukasakan ni diikand mu ciisang cya makab ni mal miimiin. Mu mukand indiy waakadyey mufundil biin Ebreh, mupostol Pool uleebel bwa mulong-long a baakwaabw bavul, hakwiibabiikan neey: “baakajaady bavul.” (Ebr. 12:1) Bab boos bahetel makab miimiin meeh; ki, mushikacil aabab bashaadil biin-biin ni lulamat kudy Yehow. (Ebr. 11:36-40) Kutaatameen kwaabab ni mudimw mukasakan ulongelobw kabyaakady ni buseeb eey? Waakweeh! Ning mwaakadyobw kabay batal kukumban kwa milay ya Mawej yoos mu ciisang cyaakadyobw ni buumy, batungunukil teng ni kutakamin kudy Yehow. Ni bwaal baakady batwiishibw neey: Yehow waakady mwiibanyish, ni baakady cikwaabw batwiishibw neey: malay moos ma Mawej miiyiiy kukumban biin-biin. (Ebr. 11:4, 5) Cileejel cyaabab cidy mwa kwiitukashish bwiitut kwiiswiik bwa kutungunuk teng ni kutakamin kudy Yehow.

18. Udy mwiiswiik bwa kulong biny? (Ebreh 11:6)

¹⁸ Leeloow myand ya mu bulongolody oobw yendend yibiih teng kubiih. (2 Tim. 3:13) Sataan ucituutungunuk teng ni kuteet baat ba Mawej. Ning mudyobw bitukabish mu kwiitudingidil myand, tudy mwa kushaal biswiik bwa kukadil Yehow mudimw bikasakan, batwiishibw neey: “tudy batakamin kudy Mawej udy ni buumy.” (1 Tim. 4:10) Vuluk neey: bwaal bwiiyil Mawej kulongel Yoobw ku bulekel bujaajaadik neey: “Mawej [Yehow] udy ni lus luvul ni mucim mutook.” (Jak 5:11) Tudy mwa kushaal byeet ni lulamat kudy Yehow, batwiishibw neey: wiiyiiy ‘kuh bamukaakaam bulang bwindiy.’​—Bal Ebreh 11:6.