1. I biny bidy Yehow ujaadikil bamulong a mpekaat baalaalabul micim?

 NING mudy Yehow mwiikal Cyakahang iitut, mwiitutumin a May, ni Zuj, udy cikwaabw Taat iitut a lukat udy mu diiwul. (Mis. 100:3; Ye. 33:22) Tut bamulongel mpekaat ni baalabul biin-biin micim, kiin teng ni bukash bwa kwiitufwiil lus, ki udy cikwaabw mukat kwiitufwiil lus. (Mis. 86:5) Ku dyambulwiish dya muprofet Yeshaay, Yehow umujaadikil ni lukat neey: “Biikal bubiih bwiinun busunz bu mash, bwiiyiiy butook bu neej.”​—Ye. 1:18.

2. Bikaam tulong biny tut tukaam kushikat mu diitalal ni bakwaabw?

² Bu mutukiish bawaakan, tut boos tuleeleeb ni tulong myand yifuufulwiij bakwaabw mund. (Jak 3:2) Nook, kabiin byumvwiij neey, katwiin mwa kudy naab bulund busheem. Tudy mwa kusheemej bulund naab tut tulong bukash bwa kwiikal kwiibafwiil lus. (Tus. 17:9; 19:11; Mat. 18:21, 22) Hatutaatahangan ku micim mu tumyand tukeeh, Yehow i mukat bwa tufwiilangan lus. (Kol. 3:13) Tudy ni kabingil kalengel bwa kulong nook. Kuunyim kwa byoos, Yehow ‘wiitufwiifwiil lus luvul’ ni mucim aakaabumw.​—Ye. 55:7.

3. I biny bitwiiyiiy kukontonon mu ciin bwaal eecy?

³ Mu ciin bwaal eecy, twiiyiiy kukontonon mudy baat bakiish bawaakan mwa kwiidikij Yehow ni kufwiil bakwaabw lus. I mpekaat kaay yitudy mwa kwambil bakul? Bwabiny Yehow wiitukaakashish bwa kufwiil bakwaabw lus? I biny bitudy mwa kulongel kudy biin-kweet bady bakab  bikasakan bwa mpekaat ya bakwaabw?

4. a) Hady mwiin mudimw a Yehow ulong mpekaat mutam, bikaam along biny? b) I bujit kaay budy naab bakul hadyobw bahetangan ni mulong a mpekaat?

⁴ Bikaam twambil bakul hatutaatal muut kahand ulong mpekaat mutam. Cileejel yumw ya ku mpekaat yitam i biiyileej mu mukand a 1 Biin Korent 6:9, 10. Mpekaat yitam i kutuh bibiih menmen mukenj a Mawej. Hiikaleby neey, mwiin krist i mulong mpekaat wa nook, bikaam afweej kudy Yehow Mawej mu diisambil bwa amufwiil lus, ni bikaam ay akambil bakul ba mu cisumbw. (Mis. 32:5; Jak 5:14) I bujit kaay budy naabw bakul? Teng Yehow ki udy mwa kufwiil bamulong a mpekaat lus luvul menmen, ni wiitufwiifwiil lus bwa mpekaat yiitut ku dyambulwiish dya mulambw a cya kukuul naacy baat. * Nook, Yehow i muteekel bakul micim bwa bujit budyobw naabw bwa kuhet bujaadik budy mu Diiy dya Mawej bwa kutal ning mulong a mpekaat udy mwa kushaal mu cisumbw. (1 Kor. 5:12) Bwa kukumbaj bwaal oobw, bumw bwa ku myand yidyobw balong i bwaabab kwiikashishomw bwa kwaalabul majooj maloolond aam: Mulong a mpekaat oow waakady ni meej ma kulong mpekaat eeny? Muut oow waakady musokok baat bakwaabw mpekaat indiy oow eeny? Ulongelok mpekaat oow mund mwa mafuk mavul eeny? Bwaal bwa buseeb buvul budy neey, kudyok cijaadik cileeleej neey: i mwaalabulok biin-biin mucim indiy eeny? Kudyok cijaadik cya biin-biin cileeleej neey: Yehow i mumufwiil lus eeny?​—Yil. 3:19.

5. I mabenesh kaay maalalukil ku mudimw ukaakal bakul?

⁵ Hady bakul bahetangan ni mulong a bibiih, kiihacil kaabab kady neey, cidyobw baswiik cihetangan ni cidyobw baswiik mu diiwul. (Mat. 18:18) Kulong nook, kudy mwa kwambulwiish cisumbw bicy? Bwaal oobw bujaajaadik neey, bamulong a bibiih bady kabay baalabul micim yaabab bady mwa kulongel mikook ya buseeb ya Yehow bibiih, hadyobw bashaal mu cisumbw. (1 Kor. 5:6, 7, 11-13; Tiit 3:10, 11) Bidy mwa kwambulwiish cikwaabw mulong a mpekaat bwa kwaalabuley micim ni bwa Yehow kumufwiiley lus. (Luuk 5:32) Bakul basaasambidil muut udy mwaalabul micim yindiy ni baloolomb dyambulwiish kudy Yehow bwa ahetulul cikwaabw bulund bwindiy nend.​—Jak 5:15.

6. Muut yiy mwiikal mwiihat mu cisumbw, Yehow udyok mwa kumufwiil lus eeny? Umvwiij.

⁶ Lang ket neey: muut kiin mwaalabul mucim indiy hadyobw bahetangan ni bakul. Bwa bwaal oobw, biiyiiy kumwiihat mu cisumbw. Bakul kabakumubwiikidiloh bend bihet bya myand yibiih yidyey mulong. Yehow i mwiitabil bwa makokesh ma mbul-matady malumbulwiish ni manyook muut woos utuutuh ku mukenj—ning yiy mwaalabul mucim eecy kay mwaalabul. (Rom 13:4) Cikwaabw, muut yiy mumanyik neey, waakady mulong bibiih ni waalabul biin-biin mucim indiy ni ulek bilong bindiy bibiih, Yehow i mukat bwa kumufwiil lus. (Luuk 15:17-24) I cya biin-biin ning yiy mwiikal mulong mpekaat yitam menmen.​—2 Cif. 33:9, 12, 13; 1 Tim. 1:15.

7. I mushind kaay utudy mwa kufwiil muut lus udy mwiitulongel bibiih?

⁷ Tudy ni dyanyish bwa kumanyik neey, Yehow wiiyiiy kufwiil eecy kaakwiiy kufwiil mulong a bibiih lus! Cikwaabw, kudy bwaal bukwaabw budy kabuy bukaam bwa twangat diihangadik. I bwaal kaay? Mu myand yikwaabw, muut udy mwa kwiikal mwiitulongel bibiih​—misang yikwaabw mwiitulongel bibiih menmen—​ki udy mwa kuleej mudyey mulong bibiih ni wiitulomb bwa tumufwiil lus. Mu myand yikwaabw, muut kiin mwa kulong nook. Biby biikal nook, bikaam twangat diihangadik dya kufwiil muut aaw lus ni kwiikashishomw  bwa kulek kushaal teng bamufulwiil mund. Biin-biin, bidy mwa kwangat diib ni kwiikashishomw kwiitut, aman-aman biby biikal biituteng ku micim. Cibumb cya Muteetekel cya 15/9/1994, (mu Tshiluba) cileeleeb neey: “Hawufwiifwiil biin-biin mulong a mpekaat lus, kulong nook kakwiin kumvwiij neey: baashikat ha mpekaat indiy. Bwa mwiin Krist, kufwiilangan lus kumvumvwiij: kushiy bwaal oobw mu bikam bya Yehow ni mucim aakaabumw. I nzuj muwaakan udy ku mut kwa biit byoos bidyey muhang, ni wiiyiiy kulumbulwiish myand mu mushind muwaakan ha ciisang cikumban.” Bwabiny Yehow wiitukaakashish bwa kufwiilangan lus ni bwiitut kumuteekel micim ha kushiy myand mu bikam bindiy​—bwa yiy alumbulwiish myand mu mushind muwaakan?

8. Mushind udy Yehow wiitufwiil lus, wiitusaasak byeet bwa kulong biny?

⁸ Hatufwiifwiilangan lus tuleeleej mutwanyanyish Yehow. Mu kasumw kahand, Yeez ufwanyikijil Yehow ni fumw kahand waakady mulek kufucish umw wa ku biin mudimw bindiy diibanz dyaakadyey naady. Cikwaabw, mwiin mudimw waakadyobw bafwiil lus oow, ukaakeel bwa kufwiiley byend mwiin mudimw nend waakady ni diibanz dya makut mindiy makeeh. (Mat. 18:23-35) I biny byaakady Yeez ukaam kwiitulongweesh? Tut twanyish ni mucim woos lus luvul ludy naalw Yehow bwiitut, twiiyiiy kwiikal ni micim ya kufwiil bakwaabw lus. (Mis. 103:9) Kukaady kuhit mivw yivul kacy Cibumb cya Muteetekel cyaaleeb neey: “Ning bwa misang yivul yitufwiifwiil biin-kweet lus, kabiinoh bend byeelekeen ni mushind udy Yehow wiitufwiil lus ni lus ludyey wiituleej ku dyambulwiish dya Krist.”

9. I bangany bady Yehow ufwiil lus? (Matewus 6:14, 15)

⁹ Baat bafwiifwiilangan lus biiyiiy kwiibafwiil byaab lus. Yehow ufwiifwiil lus aab bafwiifwiilangan byaab lus. (Mat. 5:7; Jak 2:13) Yeez uleejel bwaal oobw hatook halongweeshel biiyij bindiy mushind a kusambil. (Bal Matewus 6:14, 15.) Tuheehetel dilongweesh dyaakaabumw eedy ku cyaakady Yehow mwambil mwiin mudimw indiy Yoobw. Muut a lulamat oow bakaady bamutah bibiih ku micim ni may mabiih kudy balund nend basat aab Elifaz, Bilidad, ni Sofar. Yehow wambiil Yoobw bwa kwiibasambidil. Kuunyim kwa Yoobw muman kwiibasambidil, Yehow wiibafwiidil kis.​—Yoobw 42:8-10.

10. I mu mushind kaay utudy mwa kwiilongel bibiih hatushaashaal balamin muut cinj? (Efez 4:31, 32)

¹⁰ Tut balam cinj twiiloolongel bibiih kayeet. Cinj cidy teng bu bujit budy bwiitunemenen, Yehow i mukat bwa twiicilek bwiitut kwiikal ni diitalal. (Bal Efez 4:31, 32.) Yehow wambambil woos wa kutudy neey: “lek cinj, kwiikal bend mufulul-fulul mund.” (Mus. 37:8) I bya meej tut balond mubel oow. Tut balam cinj bwa muut kahand udy mwiitulongel bibiih tudy mwa kwiilongel tut kayeet bibiih hakuhet mabeenj ma ku nyeet ni lutat mu meej. (Tus. 14:30) Hatushaashaal ni cinj bwa muut kahand, kaciin cimulongeloh bend bibiih teng bu mulung utunwaan kayeet udy kaay ulongel bibiih oow udy mwiitulongel bibiih. Nook, hatufwiifwiil bakwaabw lus, twiiloolongel bilengel tut kaayeet. (Tus. 11:17) Tuheehet diitalal dya mu meej ni dya mu micim, ni twiiyumvumvw bakumban bwa kutungunuk ni kukadil Yehow mudimw.

11. I biny bidy Bibl uleeb habitaatal kuhingijilangan cinding? (Biin Rom 12:19-21)

¹¹ Yehow i yiy uhiihingijilangan cinding. Yehow kiishoh bend mwiitwiitabil bwa kuhingijil muut udy mwiitulongel bibiih cinding. (Bal Biin Rom 12:19-21.) Mutudy ni kutal kwiitut kukiish kuwaakan kudy ni mikal, katwiinoh bend bakumban bwa kulumbulwiish bilumbw mu mushind muwaakan, teng bu Mawej. (Ebr. 4:13) Ni mu biisang bikwaabw, kwiiyumvw kwiitut kudy mwa kulong bwa tulumbulwiish myand mu mushind mubiih ni kulong bwa bitukasakeen bwa kumanyik bwaal bulengel butudy mwa kulong. Ku dyambulwiish dya spirit mujilang, Yehow  wambiil Jak bwa kufundey neey: “Bwaal muut udy ni cinj kiishoh bend ulong myand yiwaakan ku mees kwa Mawej.” (Jak 1:20) Twiikal batwiishibw neey, Yehow wiiyiiy kulong teng myand yiwaakan ni wiitujaajaadikil neey, wiiyiiy teng kulumbulwiish myand mu mushind muwaakan.

12. I mushind kaay utudy mwa kuteekel Yehow micim mu kulumbulwiish kwindiy kuwaakan?

¹² Kufwiilangan lus kuleeleej mutudy bateekel Yehow micim mu kulumbulwiish kwindiy kuwaakan. Hatushiishiy myand mu bikam bya Yehow, tuleeleej neey, tudy bateekel Yehow micim ni bamanyik neey, wiiyiiy kufulok myand yoos yibiih yikamish kudy mpekaat. Mu bulongolody bwindiy buhyaabuhy budyey mulay, “naak kabiish biiy kuvuluk cikwaabw myand ya kal, kabiish biiy ning kwiiyilang.” (Ye. 65:17) Ki hiikaleby neey, iibiitutah ku micim menmen, kudyok mushind a kulek kushaal ni cinj ni kwiilumbulwiish bwa muut aaw eeny? Tukontononaay mushind waakady baat bakwaabw balong nook.

13-14. I biny biwudy mulongel ku kufwiilangan kwa lus kwa Tony ni José?

¹³ Biin-kweet biin Krist bavul baan-balum ni baan-bakaj bangacil diihangadik dya kufwiilangan lus ning mwaakady bilong bya bakwaabw biibatah ku micim menmen. I mabenesh kaay mahetelobw halongelobw naak?

¹⁴ Mafuk mavul kuuhal kwa kulongey myand ya biin-biin, Tony, * udy mushikacil mu cibunj cya Philippines, umanyikil neey: mwaan indiy mwiinaay sangilum wa ku baan bindiy citeem bamuzuhil kudy muut diijin dindiy José. Ciisang aacy, Tony waakady muut waakady mukat bilumbw menmen, muut a cikis, ni waakady mukat kuhingijilangan cinding. Bakwaacil José ni kumumbobw mu lukan bwa cilong cya cikis cilongeley. Ki, hiiyilobw kuhatul José mu lukan, Tony waakady mwiicih bwa kwiiy kumukaam ni kumuzuh. Umwiihacijil ni but bwa kukumbajey kiihacil kindiy aak. Mu kwindil bwa kukumbajey kiihacil kindiy, Tony utwaadijil kulong Bibl ni Batemw ba Yehow. Uleeleeb neey: “Bu munaakady nalong Bibl, nalongel neey: bikaam nafutulul shikacil aam, ni nalekeel kwiikal cikwaabw ni cinj.” Ciisang aacy, Tony wiiyil kuhet batiisumw ni kushaaley mukul mu cisumbw. Lang ket bwa bwaal bwaakadyey kay mweelel meej hamanyikiley neey: José ushaadil byend  mwiin mudimw a Yehow uhetel baatiisumw! Hahetelanganobw boos babidy, baakady bakidilangan ni musangal, ni Tony wambiil José neey: waakady mu mufwiil lus. Tony uleebel neey: cilong cya kufwiil José lus, cimuheteshel musangal muvul waakadyey kay mwa kumvwiij mwaakadyey wiiyumvw. Cya biin, Yehow waakady mubenesh Tony bwa lukat lwindiy lwa kufwiilangan lus.

15-16. Cileejel cya Peter ni Sue i cikulongweesh biny habitaatal kufwiilangan lus?

¹⁵ Mu muvw a 1985, Peter ni Sue baakady batweel mu cisangil ku Nzubw a Bukaleng hatayikil bomb. Muut mukwaabw waakady muteek bomb mu Nzubw a Bukaleng! Sue waakady mukab bwa bit biheteley byaakady binyang lumon lwindiy ni lumvw lwindiy. Cikwaabw, kacyaakadyoh bend umvw kunuuk kwa biit. * Peter ni Sue baakady teng biyihanguj neey: ‘i muut kaay wa nook udy mulong bwaal bubiih oobw?’ Mivw yivul yiman kuhit, bakwaacil mumb a bomb waakady kaay mwiin mudimw a Yehow oow, bamukosweel cibaw cya lufw hakumumbombw mu nzubw a lukan. Hajoojelobw Peter ni Sue ning baakady bafwiil muut oow lus, Peter ni Sue baleebel neey: “Yehow wiituloolongweesh neey: kutungunuk ni kulangil ha biitiit bitudy naaby ni hakwiikal ni cinj kudy mwa kwiitulongel bibiih kunyeet, ku micim ni mu meej. Nook, ku butambwiil menmen, tulombel Yehow bwa kwiitwambulwiishey bwa kulek kushaal ni cinj ni kwiilumbulwiish, ni bwiitut kwiikal bilengel mu shikacil.”

¹⁶ Byaakady biheehel bwaabab kufwiil muut lus eeny? Kabiin teng misang yoos. Peter ni Sue batuutungunuk baleeb neey: “Misang yikwaabw hady Sue ukab bwa myand yibiih yidyobw bamulongel, tumvumvw cikwaabw bibiih. Ki katwiin tutungunuk ni kulam bwaal oobw mu meej, nook, twiibufuuful mu meej musang umw. Biin-biin, tudy mwa kuleeb mund-mund neey: mumb a bomb oow yiy mwiiy kushaal mwiin-kweet, twiiyiiy kumwaakidil. Bwaal oobw i bwiitulongweesh neey: may matam ma mu Bibl miitushiishiy biin-biin biiyiikadil; kukooyel may matam ma mu Bibl kudy mwa kwiitushiy biiyiikadil mu mushind utudy katuy mwa kweelel meej! Tukaakasakan cikwaabw ku micim hatumaamanyik neey: mu kalung kakeeh oomw, Yehow wiiyiiy kufulok myand yoos yibiih.”

17. Cileej cya Myra i cikulongweeshok biny habitaatal kufwiilangan kwa lus?

 ¹⁷ Myra ulongel myand ya biin-biin haakadyey mu man kwiikal ku maluw, waakady ni baan baan-balum. Mbayend kaakadyoh bend wiitab myand ya biin-biin. Mu ciisang aacy, waakady wend masandy ni waakady mulek biin mu cisak. Myra uleeleeb neey: “Haakady mbaayany muulek ni baan biitut babidy, numvwiil kaakunying kadyaakal bavul bumvw hadyobw biibalek kudy muut udyobw bakat​—bitah ku micim, bileej kulek kwiikal ni diitabij, bitwaal kaakunying, ni kwiiyumvw bu mukamishah bilumbw ni cinj.” Nook, haakady maluw mafw, naakady mushaal teng ni kaakunying bwa cyaakadyey muulongel. Myra utuutungunuk ni kuleeb cikwaabw neey: “Natungunukil ni kukabakan ni kwiikal ni cinj mukacy mwa Masuuny mavul, natadil neey: mushind unaakady niiyumvw utengel bulund bwaam ni Yehow ni bwa bakwaabw.” Kaabaak Myra uleeleeb neey: kaciin ni cinj ni kiin mukat bwaal bubiih bwaakady bulongekel mbaayend. I mutakamin neey: diifuk dikwaabw mbaayend wiiyiiy ufweej habwiih ni Yehow. Myra i mutum teng meej mindiy ku myand yiciiyiiy. Bu mudyey maam wiikaakashishil baan, i mukashish baan bindiy babidy aab bwa kwiikalobw biin mudimw ba Yehow. Leeloow Myra udy ni musangal bu mudyey mwiin mudimw a Yehow ni baan bindiy babidy ni bisak byaabab.

18. Bu mudy Yehow Zuj a bulab Butuutul i biny bitudy bajaadik biikaley mwa kulong?

¹⁸ Tuheehet diitalal hatumaamanyik neey: katwiin ni bwa kwangat diihangadik bwa mwiikalobw mwa kulumbulwiish baat! Bu mudy Yehow zuj a bulab butuutul, wiiyiiy kwiitwambulwiish mu mudimw indiy a buseeb oow. (Rom 14:10-12) Bikaam tumuteekel micim ni bajaadik neey: wiiyiiy teng ulumbulwiish bilumbw mu mushind uheehetangan ni may mindiy habitaatal cidy cilengel ni cidy cibiih. (Kbwa. 18:25; 1 Bak 8:32) Kaakwiiy kulongoh bend bwaal bubiih ning bwaakaabumw!

19. Kulumbulwiish kuwaakan kwa Yehow kwiiyiiy kukumbaj myand kaay?

¹⁹ Tucidy teng batakamin ciisang cikal Yehow mwa kufulok myand yoos yibiih yituheehet bwa mpekaat yituheehet bu mutudy baat bakiish bawaakan. Ciisang aacy, mabenj matudy naam moos ni biitiit bitumvumvw kabyaadyaakwiikalok cikwaabw. (Mus. 72:12-14; Yis. 21:3, 4) Cikwaabw myand eey kayakwiitwiiyiloh bend mu meej. Hatucidy bimanyin ciisang cilengel eecy, i mushind kaay utudy mwa kuleej dyanyish kudy Yehow bwa mushind udyey mwiitwaakish mushind utudy mwa kumwiidikij bwa kufwiil bakwaabw lus.