IIKALAAY TENG BADIMUK!
2022: Muvw a Makab ni Mal—I Biny Bileeleeb Bibl?
Mu muvw a 2022, misah yaakady teng yileeb bwa mavit, kunyanguk kwa myand ya fwalang ni bihuh. Teng Bibl kaayend ki udy mwa kwiitumvwiij cidy myand eey yileej biin-biin.
Cileeleej biin-biin myand yidy yilongek mu muvw a 2022
Myand yidy yilongek muvw mushaal oow, yijaajaadik hatook neey tudy mu ciisang cidy Bibl ubiikan neey, “mafuk ma bulekel.” (2 Timoteh 3:1) Ciisang eecy citangil mu muvw a 1914. Tal mudy myand yidy yilongek mafuk mashaal aam yihetangan ni yaakady Bibl muman kulaay bwa ciisang citudy eecy:
“Mavit.”—Matewus 24:6.
“Mu muvw a 2022 biin mu Mput i bakab bikasakan bwa diivit.” a
Tal ciin bwaal cya neey, “Biin Russie Balwiilwiish Biin Ukraine.”
“Ciyool cya nzal.”—Matewus 24:7.
“Muvw a 2022 waakady muvw a nzal yikasakan.” b
Tal ciin bwaal cya neey, “Diivit dya mu Ukraine Dikaakaamish Ciyool cya Nzal Ciciin ha Bulab Butuutul.”
“Bihuh.”—Luuk 21:11.
“Mabenj ma tunek ni mbalang i miiy kutangulul ni lubeel lwa COVID-19 lutuutungunuk ni kuzuh baat. Biineeby bileeleej ha butook mudy mabenj mambambulukilangan miikal ni buuhund ni mudyem makabish baat.” c
Tal ciin bwaal cya neey “Baat Miliyo 6 i Bafw ku KOVID-19.”
“Myand yikwaakwaat mooy.”—Luuk 21:11.
“Cyuuy cikasakan, kulek kutow kwa mvul, koshek kwa mat ni kuzambalal kwa mwanz i biiyang biit bivul ni bikamin baat binun bivul lufw ni baat binun bivul ha bulab butuutul i bajimbaj mazub maabab.” d
Tal ciin bwaal cya neey “Ha Bulab Butuutul Cyuuy Cyendend Teng ni Kuvul.”
“Kutombok kwa baat.”—Luuk 21:9.
“Bu mudy baat biikal ni mooy bwa kunyanguk kwa myand ya fwalang amaanaaman bwa kukil kwa mishing ya biit, baakady batombokel mbul-matady yaabab mu 2022.” e
Tal ciin bwaal cya neey “Kukil kwa Mishing ya Biit ha Bulab ha Bulab Butuutul.”
I myand kaay yikal muvw wiiyiiy oow mwa kwiituletel?
Muut ning waakaabumw kiish mumanyik biin-biin ciikal mwa kulongek mu muvw a 2023. Citudy bamanyik cidy neey, Bukaleng bwa Mawej eecy mbul-matady wa mu diiwul wiiyiiy kulongolol myand ha bulab. (Danyel 2:44) Mbul-matady oow wiiyiiy kuful myand yoos yikaakaamin baat makab ni kulong bwa lukat lwa Mawej lulongek ha bulab.—Matewus 6:9, 10.
Tukuloolomb bwiibuh kulond mubel a Yeez Krist ni ‘kulek kulal tul’ bwa kutal mudy myand yiloolongek ha bulab yihwaan may ma buprofet mady mu Bibl. (Mark 13:37) Bwa kumanyik myand yikwaabw habitaatal mudy Bibl mwa kukwambulwiish uw ni mudyey mwa kukuhetesh uw ni cisak ciibuh kutakamin kulengel bwa mafuk maciiyiiy, kaam Batemw ba Yehow.
a “Mu muvw a 2022 biin mu Mput i bakab bikasakan bwa diivit” AP News kudy Jill Lawless, mu 8/12/2022.
b Program wa ha bulab butuutul utaatal myand ya byaakudy: “Ciyool cya Nzal Ciciin ha Bulab Butuutul.”
c Lawrence Gostin “Living in an Age of Pandemics—From COVID-19 to Monkeypox, Polio, and Disease X,” JAMA Health Forum 22/09/2022.
d Martina Igini: “What’s Behind the Record-Breaking Extreme Weather Events of Summer 2022?” Earth.Org 24/10/2022.
e Thomas Carothers and Benjamin Feldman: “Economic Anger Dominated Global Protests in 2022,” Carnegie Endowment for International Peace, 8/12/ 2022.