Myand ya cidiidy i yikabulul baat bavul ha bulab butuutul. Bilondeshel myand yijoojolol mu 2022 mu bibunj 19 kudy Pew Research Center,“ bya ha lukam 65 bya baat bakuluuh i baleeb neey, kudy lukun lutam eecy luhit kutam hakacy ha baat batwaatw bisumbw bya myand ya cidiidy bishil shilangan nyam ku mikon.”

 Udy mutalok mudy biin myand ya cidiidy bakabulul baat menmen ha cyaab ciwudy eeny? Bwabiny baloolong naak? Kudyok mushind a kuman myand eey? Tutalaay ciileeleeb Bibl bwa myand eey.

 Bibl ulayil kal bwa ciisang ciitut eecy haakadyey uleeb bwa “mafuk ma bulekel” neey, baat bavul kaabakwiikaloh bend ni meej ma kushikat mu kaacyumw.

•   “Vuluk bilengel ney kwiiyiiy kwiikal biisang bikasakan mu mafuk ma bulekel. Bwaal baat biiyiiy kwiikat bab kaayaabw, . . . Biiyiiy kwiikal ni micim yikasakan.”—2 Timoteh 3:1-3.

 Ning mudy baat bavul balong mwaabab mwoos bwa kut mbul-matady nyam ku mikon, iyikaakal bwa kwangat bahangadik malengel. Baat bady ni lungeny lushiilangan ni lwa bakwaabw balaalang neey, i bikasakan eecy kabish mwa kulongek bwaababw kukal mudimw haakaabumw bwa kuman myand yidyobw naay. Myand eey yijaajadik cyaakady Bibl muman kuleeb kal.

•   ’Muut udyaadyaatakany mukwaabw bwa kumushiy mu mal.’—Muleej 8:9.

 Ki Bibl wiituleeleej mbul-matady mulombol kudy muut wiikal mwa kuman myand yikaakamin baat makab leeloow .

 Bibl wiituleej muut aakabumw udy mukumban utukaakaam wiikal mwa kuman myand yidy naay baat eey: Yeez krist. Yeez udy ni bukash ni bukookesh ni ukaakaam kuteek baat mu kaacyumw ni kwiibashikik talal ha bulab butuutul.

•   “Ha ciisang cindiy, muut muwaakan wiiyiiy kuzambalal bu ciilong, wiiyiiy kushikat talal.”—Misambw 72:7.

•   •“Bis bikwaabw byoos biiyiiy kumukadil mudimw.”—Misambw 72:11.

 Yeez i mukaleng mulengel bwaal utaatacil baat ni mukat bwa kwiibambulwiish , nang nang aab baloolongelobw myand ni kabow.

•   “Ing, wiiyiiy kukuuloh mulam-lam umubiibiikan, ni cimon-a-mal udy kay ni wa kumukwanjok. Wiiyiiy kwiikal ni lus lwa muhuuyil ni mulam-lam, wiiyiiy kukuuloh buumy bwaababw. Wiiyiiy kwiibahatul mu cikis ni mu kukab.”—Misambw 72:12-14.

 Tukuloolomb bwiibuh kumanyik myand yivul habitaatal Bukaleng bwa Mawej, mbul-matady wa mu diiwul udy Yeez ulombol. Tal mushind uwudy mwa kutw Bukaleng oobw nyam ku mikon, ni muwudy mwa kuhet mabenesh malaalukilok.

•   Tal video wa neey, Bukaleng bwa Mawej i Biny?

•   Bal ciin bwaal cya neey,“Bukaleng bwa Nzambi mbulamatadi udi kayi ni nkosa mishiku.”