Kuhacyaamashik kwa Mudyumw diifuk dya 10/10/2022, biin Rusih bakuhil maaboomb mu bimeng bivul bya mu Ukraine, matayikil mafuk mabidy kunyim kwa biin Ukraine baman kunyang bulal budy hakacy ha Crimeh ni Rusih. Myand eey yilongekel mafuk makeeh kunyim kwa biin cidiidy baman kuleeb neey, Harmakedon udy mwa kwiiy kulongek mu mafuk makeeh oomw.

•   “Katwanjilah kufweejoh habwiih nook ni Harmakedon kacy mu diivit dya maaboomb dya mu Cubah ni Mulombol a cibunj cya Amerik John Kennedy dya longek. . . . Cishoh bend nalang neey, kudy mushind a kukalobw mudimw ni maabombw kabay mwa kukamish Harmakedon.”—Ki muleebel Joe Biden Mulombol a cibunj cya Amerik, mu diifuk 6/10/2022.

•   “Niitaatab neey: i Harmakedon, bulab butuutul budy mu buhund.”—Ki muleebel Mulombol a cibunj cya Ukraine Volodymyr Zelensky, ku BBC News hakadyobw bamwiihanguj habitaatal bihet bibiih byalaalukil ku kukal mudimw ni maaboomb, mu diifuk dya 8/10/2022.

 Kukal mudimw ni maaboomb kudy mwa kwiitufikijok ku Harmakedon eeny? I Biny bileeleeb Bibl?

 Waakweeh. Mwaak “Harmakedon” tumusaasangan mu Bibl teng ha cyaab cyaakaabumw mu Myand yisokolweel Jah 16:16. Kishooh bend diivit didy hakacy ha bis ki i diivit didy hakacy ha Mawej ni “bakaleng ba ha bulab butuutul.” (Myand yisokolweel Jah 16:14) Mawej wiiyiiy ukal mudimw ni diivit dya Harmakedon bwa kubutuley makaleng ma baan ba baat.—Danyel 2:44.

 Bwa kumanyik myand yivul habitaatal cikal Harmakedon mwa kulongel bulab, bal ciin bwaal cya neey: Mvita ya Armagedone ntshinyi?

 Waakweeh. Ning makaleng ma baan ba baat mwa kukal mudimw ni maaboomb mu mafuk kuhal ook, Mawej kaakwiitaboh bend bwa babutul bulab. Bibl uleeleeb neey:

•   “Bulab budyok buyiil.”—Muleej 1:4, NWT.

•   ‘Baat bawaakan biiyiiy kuhet bulab, ni biiyiiy kushikatoh buyiil.’—Misambw 37:29.

 Nook, diiy dya buprofet dya mu Bibl ni myand yiloolongek yileeleej neey, tudy habwiih menmen ni ciisang cidy myand ya baat mwa kushituluk ha bulab. (Matewus 24:3-7; 2 Timoteh 3:1-5) Manyik cileeleeb Bibl habitaatal mafuk maciiyiiy ku dyambulwiish dya dilong dya Bibl dya nwend nwiisamb kuy ufut fwalang.