Baafwaafwanyikij neey, baat bat bu ku miliyar yitan biiyiiy batal ndund ya kufwiil bwa kuhet diikoh dya ha bulab butuutul yiizaazabobw kutangil mu diifuk dya 20/11 teng ni ku diifuk dya 18/12/2022. Baat bavul i batakamin neey, diizab eedy diiyiiy kwiibakish mishind yivul ya kwiiyumvobw bilengel ni mu kacyumw haadyobw bend ni kwiidital.

•   “Diizab didy ni bukash bwa kushiitulul myand ya bulab. Didy ni bukash bwa kusak baat ku kulong bwaal kaahand. Didy ni bukash bwa kukong baat mu kacyumw mu mushind wa habwaah.”—Nelson Mandela, mulombol wa kal wa cibunj cya Afrik wa kucyaash.

•   “Diizab dya ndund. . . diitwaatwaal kutakamin, dikong baat mu kacyumw ni diibakish musangal ni dibaakookong bwa kukatangan ning bab bikal bashilangan.”—Gianni Infantino, mulombol wa FIFA. a

 Diizab dya kufwiil bwa diikoh mu ndund ya ha bulab butuutul ni mazab makwaabw, i makumbajok kihacil ka maam eeny? Baat badyok mwa kushikat talal ni mu kacyumw eeny?

 Diizab dya kufwiil bwa kuhet diikoh mu ndund ya ha bulab butuutul dya muvw oow kadyaakadyoh bend dilekel teng ha kuzab kwa ndund bituh. Mazab aam imakaamish miisamb ya myand ya mu shikacil ya baat ni mu myand ya cididy habitaatal maneemat ma baat, kubowoololangan kwa biseb ni kushilangan kudy hakacy ha balam-lam ni bahet.

 Ning naak, baat bavul bady ni musangal wa kutal mazab ma ha bulab butuutul bu mudy dya kufwiil bwa kuhet diikoh mu diizab dya ndund dya ha bulab butuutul. Nook, baat i bakat bwa mazab aam miibakong mu kacyumw. Ki kacyumw aak kakishoh bend ka buyiil. Civul mazab aam, makaakamish biikadil bikaakabulul baat ni masak baat ku bilong bidy Bibl uleeb neey, bileeleej “mafuk ma bulekel.”—2 Timoteh 3:1-5.

 Mu Bibl mudy kutakamin kwa biin-biin bwa kacyumw ka ha bulab butuutul. Ulaalay neey, baat boos ba ha bulab biiyiiy kwiikal mu kacyumw ikal bul-matady wa mu diiwul ubiibikanobw neey, “Bukaleng bwa Mawej”ukookesh—Luuk 4:43; Matewus 6:10.

 Mukaleng wa Bukaleng oobw,Yeez Krist, wiyiiy kushikik baat talal ha bulab butuutul. Bibl uleeleeb neey:

•   “Muut muwaakan wiiyiiy kuzambalal bu cilong, wiiyiiy kushikat talal.”—Musambw 72:7.

•   “Wiiyiiy kukuuloh mulam-lam umubiibiikan. . . Wiiyiiy kwiibahatul mu cikis ni mu kukab.”—Musambw 72:12, 14.

 Leeloow, malongweesh ma Yeez i maakong baat miliyoh yivul ba mu bibunj 239 mu kacyumw. I balong bwa kulek kukin baat bakwaabw. Bwa kumanyik myand yivul, bal biin-bwaal bya neey,“Mua kuimanyika lukuna.”