Citendeleel Cidy mwa Kutweel mu Myand ya Politik Eeny?
Ha bulab butuutul, baat baleeleeb mudyobw balond Yeez Krist, i biitweej bikasakan mu myand ya politik. Bakwaabw basaasak biin mu bitendeleel byaababw bwa kusungul muut kaahand eecy kutweel mu cikong kaahand cya myand ya politik. Bafumw ba politik byaabw, badyaakal baakish baat biin mu bitendeleel biit eecy biibambil bwa kwiibatobw nyam ku mikon. Bafumw ba bitendeleel bavul badyaakal bakaam bwa biibasungul eecy bakaam bwa kwiikalobw ni myanz yitam mu myand ya politik. Ni mu bibunj bikwaabw, bitendeleel bidyobw babiikan neey, bya “biin Krist” biibyangangat ni buseeb bu bya cibunj eecy bu bya mbul-matady.
Ulaalangok bicy? Biiyij ba Yeez bady mwa kutweel mu myand ya politik eeny? Udy mwa kuhet dyaalabul mu cileejel citwaadil Yeez. Uleebel neey: “Nabiinuleej mwa kulong, bwiinun kwiikal nulong byeen.” (Jah 13:15) I cileejel kaay cidy Yeez mwiitushiil habitaatal kutweelakan mu myand ya politik?
Yeez utweelelok mu myand ya politik eeny?
Yeez kaakadyoh bend mutweelakan mu myand ya politik ya ha bulab.
Yeez kaakadyoh bend ukaam dyambulwiish kudy bafumw ba politik. Yeez waakady mulek kukookesh mbul-matady yoos ya ha bulab haakady Sataan Dyaabol ‘mumuleej makaleng moos ma ha bulab.’ (Matewus 4:8-10) a Ciisang kaahand, hatadil baat neey, Yeez waakady ni biikadil bilengel ni mukumban bwa kwiikaley mukaleng, bakaamin kumukwaat bwa bamutweej mu politik. Ki Bibl uleeleeb neey: “Hatadil Yeez ney, baat baakady mwa kwiiy kumwangat ku makand bwa kumujaadikow mukaleng aababw, wiibongolokel, waaluk ha diilund waay kaayend.” (Jah 6:15) Yeez kaakady mwiitab bwa kulong cyaakady baat bakaam bwa kulong. Waakady mulek bwa kutweelakan mu myand ya politik.
Yeez kaakadyoh bend ni mulamat butambw kaahand mu myand ya politik. Cileejel, mu mafuk maakady Yeez ha bulab, biin Yuud baakady ni kakunying kavul bwa mwaakadyobw bafut mbul-matady a biin Rom ni baakady batal bwaal oobw, bu bujit bukiish bwiibawaakanyin. Haakadyobw basak Yeez bwa aleej butamb budyey, waakady mulek bwa kwiisamb naab myand ya politik ning mwaakady citady aacy ciikal cilengel. Wiibambiil neey: “Lambulaay bya Kezaar kudy Kezaar, bya Mawej kudy Mawej.” (Mark 12:13-17) Ulekel kutweelakan mu myand ya politik ni kuleejey neey, nudy mwa kufut citady cidy bafumw ba biin Rom bakaam, bwaal i baleej ba hal a Kezaar. Mu ciisang cyaakaabumw aacy, uleejel neey, kukooyel bafumw kudy ni mukal. Muut kaakadyoh bend mwa kwangat biit bya Mawej kwiibyaakish bafumw ba mbul-matady, bu mudy lulamat eecy kuhambidil.—Matewus 4:10; 22:37, 38.
Yeez waakady mulay mbul-matady a mu diiwul, udy mwiikal Bukaleng bwa Mawej. (Luuk 4:43) Waakady mulek kutweelakan mu myand ya politik bwaal waakady mumanyik neey, i Bukaleng bwa Mawej, kabwiishoh bend bwa baan ba baat bwiikal mwa kukumbaj cidy Mawej mukat bwa bulab. (Matewus 6:10) Umanyikil neey, Bukaleng bwa Mawej kabwiish bukal mudimw haakaabumw ni makaleng ma baan ba baat, ki bwiiyiiy kuhing ha cyaab cya makaleng aam.—Danyel 2:44.
Biin Krist ba mu siyekel a kuuhal baakady batweelakan mu myand ya politik eeny?
Waakweeh. Biiyij ba Yeez baakady bakooyel diiy dindiy dya neey: ‘kanwiish ba ha bulab.’ (Jah 15:19) Balondel cileejel cindiy ni i bakabulukangan ni myand ya politik ya ha bulab. (Jah 17:16; 18:36) Hamut aababw kutweelakan mu myand ya politik, bakookooyel diiy dya Yeez—dya kudiil baat musah ni kwiibalongweesh myand ya Bukaleng bwa Mawej.—Matewus 28:18-20; Myand yilongel Bapostol 10:42.
Biin Krist ba mu siyekel a kuuhal baakady bateek kukooyel Mawej ha cyaab cya kuuhal mu shikacil aababw, ki i bamanyik cikwaabw neey, bikaam kukooyel bafumw. (Myand yilongel Bapostol 5:29; 1 Pyeel 2:13, 17) Baakady bakooyel mikenj ni bafut bitady. (Biin Rom 13:1, 7) Ning mwaakadyobw kabay batweelakan mu myand ya politik, baakady bakal mudimw ni mikenj ya mbul-matady bwa kwiilam ni bwa mbul-matady ibambulwiish.—Myand yilongel Bapostol 25:10, 11; Biin Filipw 1:7.
Mudy biin Krist balek kutweelakan mu myand ya politik leeloow
Bibl uleeleeb neey, ning Yeez ning biiyij bindiy ba kuuhal kabaakadyoh bend batweelakan mu myand ya politik. Ki bwabiny biin Krist Batemw ba Yehow ba ha bulab butuutul kabiish batweelakanoh bend mu myand ya ha bulab. Teng bu biin Krist ba mu siyekel a kuuhal, baloolong mudimw waakady Yeez mushiy—wa kudiil baat “Musah mulengel a Bukaleng.”—Matewus 24:14.