Mu suuny a 7/2022, myand ya cikis yidy yitond baat yimweekekel ha bulab butuutul:

•   “Kuzuh kwa mwiin-cididy waakady baat bamanyik bikasakan wa mu Japon [kavul-a mbedy wa kal wa mu cibunj Shinzo Abe unyangil cibunj ni waakady mubungamij baat ha bulab butuutul, nang-nang bwaal ni mu cibunj oomw mudy mikenj habitaatal kulonzangan yidyobw balond ni diis dikasakan.”—10/7/ 2022, ciin bwaal cya neey The Japan Times.

•   “Baat ba mu Danemark i babungam hadyobw baat muut waakady ni but uzuh baat basat ba mu cyaab cidy baat bendendel mushing mu Copenhagen.”—4/7/2022, mu biro Reuters.

•   “Mu Afrik wa ku cyaash: Baat 15 bafwiil haakady baat kaahand balonz mat ku cyaab cya kunwiin mal ha cyaab cya mu cimeng cya Soweto.”—10/7/ 2022, mu mukand wa neey The Guardian.

•   “Baat bahit a 220 baakady bibazuh ni mat mu États-Unis bazuh, mu 4/7 ku bulekel kwa luming diib dyaakady baat mu diikish.”—5/7/2022, Myand yileej mu CBS News.

 Tudyok ni kabingil twiitusaasak bwa kwiitab neey myand ya cikis ya nook yiiyiiy kuh eeny? I biny bileeleeb Bibl?

 Bibl uleeleeb neey tukaady mu “mafuk ma bulekel,” ciisang cidy baat balong myand yibiih mu mishind yivul. (2 Timoteh 3:1, 3) Myand ya cikis ya nook yiloolong bwa baat biikal ni mooy. (Luuk 21:11) Ki, Bibl i mulay neey kwiiyiiy kwiikal ciisang ciikal myand ya cikis mwa kuh ni “Baat ba mim biiyiiy kushikat ha cyaab cya talal, kabay bangam bwaal.” (Yeshaay 32:18) I mushind kaay wiikal myand ya cikis mwa kwiiy kuh?

 Mawej wiiyiiy kubutul baat babiih ni mat maabab moos madyobw bizuhangan naam.

•   “Biin cizuj biiyiiy kwaalukomw, babiih myand biiyiiy kwiibihat [ kwiibabutul ha bulab].”—Tusumw 2:22.

•   “[Mawej] wiimaamanyik mavit moos hakaas ni hakaas ha bulab, ucibul mat ma miket, ucibul biyumby, woosh matempw ma kul naam diivit mudil.”—Misambw 46:9.

 Mawej wiiyiiy kuful myand yoos yikaakaamish cikis hakwiibalongweesh bwa kushikat mu diitalal.

•   “Ha mulund a mim mujilang woos, baat kabiish biiy kulongeloh cikwaabw bwaal bubiih eecy boonyenoh biit bya bakwaabw, bwaal kumanyikkwa Mawej kwiiyiiy kwiiwul mu cibunj bu mwanz mwiiwul mu musul.”—Yeshaay 11:9.

•   Cikwaabw leeloow, Mawej wendend ni kulongweesh baat bwa balek myand ya cikis ni kukal mudimw ni byaamw bya kuzuhangan naaby, bwaal i muleeb neey “biiyiiy kuhung bikas bya kudim naaby, ni mafum maababw, biiyiiy kuhung myeel yileeh.”—Mikah 4:3.

 Bwa kumanyik myand yivul habitaatal mulay udy mu Bibl wa mu bulongolody mwiikal mwa kushikat kabay ni mooy, bal ciin bwaal cya neey “Affranchis de la peur: est-ce possible?”

 Bwa kumanyik cikwaabw mwiikalobw mwa kuman myand ya cikis, bal ciin bwaal eecy “Ditalala divule!”