IIKALAAY TENG BADIMUK!
Bulab Bwendend Teng ni Koonyek—i Biny Bileeleeb Bibl?
“Baat baloolong myand yivul yinyanyang bulab. Bimeng bitam i bibwiikil kudy mwanz. Cyuuy cikasakan cya munyiny. Biheeh bikasakan bitwaatwaal mooy. Kukaakal kwa mwanz ha byaab bivul. Kujimban kwa mitond ni nyam ya mishind ni mishind. Myand eey kayishoh bend yifwiikakaj eecy bahitijoh bituh ni kuleeb. I myand yidy biin siyans biitwambil bwa bihet byalaalukil mu kukal mudimw bibiih ni kasolony.”—I mwiisamb wa kudy António Guterres, mulombol a bulongolody bwa bibunj biikong, habitaatal Kasumbw ka biin meej mat ba mbul matady yishiil-shilangan bwa ha bitaatal Kufutuluk kwa Mivw, lwaapool luhatul mu 4/4/2022.
“Biin siyans baleeleeb neey: mu mivw yiciyiiy kuhal, koonyek kuswiikakaj ku kufutuluk kwa mivw kwiiyiiy kunyang menmen byaab bya kulamin nyam 423 [mu Etats Unis], biiyiiy kunyanguk bwa kushituluk kwa mivw, nang-nang byaab bya kulamin nyam bidy mwa kwiiy kunyanguk menmen bwa bukash bwa cyuuy. Myand yibiih yidy mwa kulongek i yifwanakan ni yitubaabal mu Bibl: mudil ni kutangalak kwa mwanz, kwiihul kwa tuubuk-koony ni kukasakan kwa cyuuy.”—“Kutangalak kwa mwanz mu Yellowstone, Cijingidik cya myand yibiih yikal mwa kulongek,” The New York Times, 15/6/2022.
Tudy mwa kumanok makab mataatal mivw aam eeny? Iikaleby naak, i ngany wiikal mwa kwiimaman? Tutalaay cidy Bibl uleeb biin-biin.
Baleebel kal bwa kunyanguk kwa mimvw
Bibl uleeleeb neey: Mawej wiiyiiy “kubutul aab boonyoony bulab.” (Myand yisokolweel Jah 11:18) Verseh wa mu Bibl oow wiituloolongweesh myand yisat:
1. Bilong bya baat biiyiiy koony bikasakan bulab.
2. Koony kwa bulab kwiiyiiy kwiikal ni bulekel.
3. I Mawej, kabishoh bend baat, biiyiiy kuman makab ma mivw ya ha bulab.
Bulab bwiitut oobw bwiiyiiy kulengel kuuhal ook
Bibl uleeleeb neey: “bulab budy teng mwiin mudyebw aamw miin mafuk moos aam.” (Muleej 1:4) I cyaab ciiyiiy kushikatil baat.
“Baat bawaakan biiyiiy bashikat ha bulab, biiyiiy kushikatomw buyiil.”—Misambw 37:29.
Bulab bwiitut oobw bwiiyiiy kwiikal teng mwa kadyebw kuuhal.
“Cyanganyik ni bulab buum iikalaay ni musangal! Bulab buum busangal butooy bilong.”—Yeshaay 35:1.