Mulambw a Yeez udy mwa kukwambulwiish
Muvw woosoow, Batemw ba Yehow ni baat miliyo ivul baabiibikanobw ha bulab butuutul bakookongakeen bwa kuvuluk Lufw lwa Yeez teng mutuminey diiy bwa kulong. (Luuk 22:19) Civulukil eecy ciiyiiy kukwambulwiish bwiibuh kumvw buseeb budy naab cyaakady Yeez mulong hatwaadiley buumy bwindiy bwa baat boos. Cituleeleej cikwaabw mudy mulambw indiy mwa kwiitwambulwiish mu shikacil iitut teng kaabaak ni mafuk maciiyiiy.—Jah 3:16.
Ning uw mutweel eecy kuy mutweel mu civulukil muvw oow, i mushind kaay udy mulambw wa lufw lwa Yeez mwa kukwambulwiish? Yeez ulongweeshel neey bikaam tulong myand yibidy ya buseeb eey:
1. Long bwa kumanyik myand yitaatal Mawej ni Yeez. Mu diisambil diilongeley kudy Taat indiy wa diiwul, Yeez uleebel neey: “Bwiin buumy bwa mwendelel oobw i bwa kumanyikobw, uw Mawej a biin-biin, Mawej aakaabumw, ni kumanyikobw Yeez Krist uwutumin.”—Jah 17:3.
2. Kooyel myand yiwuloolong. Yeez uleebel neey bikaam tukooyel malongweesh mindiy mu shikacil iitut. Cileejel, mu mwiisamb indiy wa ha mulund ulombel muut woos bwa ‘umvw myand [yindiy] ni iiyilong.’ (Luuk 6:46-48) Bya mushind aakaabumw, uleebel musang mukwaabw neey: “Kaabaak nubaamanyik myand eey, nudy biin dyaakatook anwiikal nulong nook.”—Jah 13:17.
Udy mukatok kumanyik bivul habitaatal Mawej ni Yeez eeny? Ukaakaamok mibel yidy mwa kukwambulwiish bwa kukooyel biwuloolong eeny? Tal myand yidy mwa kukwambulwiish bwa kumanyik myand yivul:
Kulong kwa Bibl
Kulong kwiitut kwa Bibl kwa nwend nwiisamb iikwambulwiish baat bavul bwa kukontonon myand ya mu Bibl ni kwiiyikooyel mu shikacil aabab.
Bwa kumanyik myand yivul habitaatal kulong ookw, tal diibij diileeleej mudy kulong ookw kulongek.
Tal video wa neey Tukulaalangil Kulong kwa Bibl Kulengel bwa kutal mudy kulong kwa Bibl kulongek ni Batemw ba Yehow.
Bisangil bya Batemw ba Yehow
Batemw ba Yehow bakookongakeen misang yibidy luming loos ha byaab byaabab bya kuhambidil biibiibikanobw neey, Nzubw a Bukaleng. Mu bisangil eeby, tuloolongomw myand ya mu Bibl ni mushind utudy mwa kwiiyikooyel mu shikacil iitut.
Baat boos bady mwa kutweel mu Bisangil eeby ni kabiish bikaam wiikal temw bwa kutweelomw. Bilondeshil shikacil wa ha cyaab ciwudy, udy mwa kutweel mu bisangil ku Nzubw a Bukaleng eecy kwiibilond ku Byaamw bya kwiisamb batalangan.
Tal video wa neey, I Biny Biloolongek ku Nzubw a Bukaleng? Bwa kuhet kadyoosh ka myand yiwiikal mwa kutal ku bisangil eeby.
Bwa kumanyik cisangil ciloolongek habwiih ni cyaab ciwudy, tal diibij dya bisangil bya Batemw ba Yehow.
Biin bwaal ni video bidy mu sit wa enternet wa JW
Biin bwaal bivul ni video bidy mu sit oow, bidy mwa kukwambulwiish bwa kumanyik myand yivul habitaatal malongweesh ma Yeez ni buseeb budy naab mulambw a lufw lwindiy.
Cileejel, bwa kumanyik mudy lufw lwa muut aakaabumw mwa kwambulwiish baat miliyo ivul bal ciin bwaal cya neey, “Jesus sauve: comment?” ni “Bua tshinyi Yezu wakakenga ni kufua?” eecy tal video wa neey, Yeez Ufwiil Bwabiny?