DIILONGWEESH 07

Yehow Udyaakal ni Buumuut ni Biikadil bya Bish?

PLAY

Hawulaalang bwa Yehow Mawej, i biny bikwiiyiiyilok mu meej? I muut udy ni buseeb, ki mwiikal neeb kuleeh teng bu mitoot eeny? Eecy ulaalangok neey, i muut udy bukash buvul kay ni buumuut, teng mudyaakal luheeh aamw eeny? Yehow udy mwa kwiikal bicy menmen? Yehow wiituleeleej biikadil bindiy mu Bibl, Diiy dindiy. Uleeleejomw cikwaabw neey, ukutaatacil.

1. Bwabiny katwiin mwa kutal Mawej?

‘Mawej i spirit.’ (Jah 4:24) Yehow kiishoh bend ni nyeet ya bwiin yitudy naay. I spirit udy mushikacil mu diiwul, cyaab citukiish mwa kutal.

2. I biikadil kaay bidy naaby Yehow?

Katwiin mwa kutal Yehow. Ki hatuloolong bwa kumumanyik, Twiiyiiy kumukat bwaal i muut a biin-biin mwiikal ni biikadil bilengel menmen. Bibl uleeleeb neey, “Mawej [“Yehow,” NWT] i mukat myand yiwaakan, kiish ulekelel baat bady bakooyel kudyey.” (Musambw 37:28) Udy cikwaabw ni “lus luvul ni mucim mutook [“lukat,” NWT],” nang-nang bwa baat bakeekeng. (Jak 5:11) ‘Yehow udy habwiih ni baat bady ni micim yiman kususik; ukuukuuloh baat babaman kukooyel ku micim.’ (Musambw 34:18) Udy mumanyikok neey, Yehow udy mwa kusangal eecy kufulul mund bwa bilong biitut eeny? Muut uloolong myand yibiih ufuufuluj Yehow mund ni umuh kakunying. (Musambw 78:40, 41) Ki muut uloolong myand yilengel, umusaasangeej.—Balaay Tusumw 27:11.

3. I mushind kaay udy Yehow uleej neey, i mwiitukat?

Ciikadil citam cidy naacy Yehow i lukat. Cya biin, “Mawej i lukat.” (1 Jah 4:8) Yehow wiituleeleej lukat lwindiy mu Bibl ni mu biit bidyey muhang. (Balaay Myand Yilongel Bapostol 14:17.) Tal cileejel cya mushind udyey mwiituhang. Imwiitwaakish mushind a kutal makal malengel, kumvw mizik yilengel, ni kulabul byaakudy bilengel. I mukat bwa twiikal ni musangal mu shikacil iitut.

TWEEL MU BONDOK

Tal cidy Yehow ukal naacy mudimw bwa kukumbaj myand yitam. Cikwaabw, tal mudy Yehow uleej biikadil bindiy bilengel menmen.

4. Spirit mujilang—i bukash buloolongesh myand bwa Mawej

Tut baat, tudyaakal tukal mudimw ni bikam biitut, ki Yehow ukaakal mudimw ni spirit indiy mujilang. Bibl uleeleeb neey, spirit mujilang kiishoh bend muut, ki i bukash budy Yehow ukal naabw mudimw bwa kulong myand. Balaay Luuk 11:13 ni Myand Yilongel Bapostol 2:17, ni isambilaay ha majooj aam:

Mawej wiiyiiy “kwaakish” muut umuloolomb spirit indiy mujilang. Ulaalangok neey, spirit mujilang i muut eecy i bukash bwa Mawej buloolongesh myand eeny? Bwabiny uleeleeb naak?

Yehow ukaakal mudimw ni spirit indiy mujilang bwa kulong myand yitam. Balaay Musambw 33:6 ni 2 Pyeel 1:20, 21, ni isambilaay ha diijooj eedy:

I myand kaay yidy Yehow mulong hakadiley mudimw ni spirit indiy mujilang?

5. Biikadil bya Yehow bitukookok kudyey

Ning mwaakady Moyiz uhambidil Mawej ni lulamat, waakady ukaam kumanyik Hang indiy bilengel menmen. Nook, Moyiz uleebel neey: “Leejaanyaak meej miibuh. Nook niiyiiy kumanyik bilengel ciwudy.” (Cimwang 33:13) Yehow uleejel Moyiz bimw biikadil bindiy. Balaay Cimwang 34:4-6, ni isambilaay ha majooj aam:

I biikadil kaay byaakady Yehow muleej Moyiz?
I biikadil kaay bya Yehow bikukookok kudyey?

6. Yehow utaatacil baat

Biin Ebreh baakady baat ba Mawej ha kal, baakady bibakwaat ku buhik mu Ejipit ni baakady bakab bikasakan. Yehow umvwiil bicy bwa mwaakady baat bindiy aab bakab? Umvwaay MAY MAKWAAT eecy balaay Cimwang 3:1-10. Ni isambilaay ha majooj aam.

MAY MAKWAAT: Yehow Waakady Utat bwa Mwaakadyobw Bakeng (2:45)

Bwaalobw bukuloolongweeshok biny bwa mushind udy Yehow umvw hadyey utal baat bakeng?—Talaay verseh wa 7 ni wa 8.
Ulaalangok neey, Yehow udy biin-biin ukaam kwambulwiish baat ni udy ni bukash bwa kulong nook eeny? Bwabiny?