DIILONGWEESH 11

I Mushind Kaay Udy Kubal kwa Bibl mwa Kukwambulwiish?

PLAY

Ukaady mumvwok mooy kuuhal kwa kutwaadij mudimw mutam eeny? Misang yikwaabw, mudimw oow udy mwa kukwiicish mut. Bwa kumuheehej, udy mwa kumukosolol mu tubituh tukeeh-tukeeh. I bya mushind aakaabumw ni hawukaakaam kubal Bibl. Udy mwa kwiiyihanguj neey: ‘I cyaab kaay cinady mwa kutangil?’ Mu diilongweesh eedy, twiiyiiy kutal mishind yiheehel yiikal mwa kwiitwambulwiish bwa kwiikal ni musangal a kubal Bibl ni kumulong.

1. Bwabiny bikaam twiikal tubal Bibl haciibidil?

Muut uloolong Bibl haciibidil, eecy “dilongweesh dya Mawej,” wiiyiiy kwiikal ni musangal ni myand yindiy iyaay kuuhal. (Balaay Musambw 1:1-3.) Bwa kutwaadij, iikal ubalok Bibl minit yikeeh diifuk dyoos. Uw mwiibidilangan ni Diiy dya Mawej, wiiyiiy kukat kubal Bibl bikasakan.

2. I biny biwudy mwa kulong bwa kubal kwa Bibl kukwambulwiish?

Bwa kubal kwa Bibl kwiitwambulwiishekw, bikaam twiikal tubal, twiiman ni tulangil ha bitubaabal. Bikaam twiikal tubal malongweesh ma mu Bibl ni twend ni ‘kwiimambulul [“kulangiloh,” NWT, dim.].’ (Jozuweh 1:8) Bu muwubaabal Bibl, udy mwa kwiiyihanguj neey: ‘Verseh oow, uuloolongweeshok biny bwa Yehow Mawej? I mushind kaay unady mwa kukooyel verseh oow mu shikacil aam? I mushind kaay unady mwa kwambulwiish muut ni verseh eey?’

3. I biny biwudy mwa kulong bwiibuh kuhet diib dya kulong Bibl?

Udy mwa kwiikalok ni mushind a kuhet diib dya kubal Bibl eeny? Kwiishoh bend kaayeeb. Iikashishomw bwa ‘kulong mudimw bilengel ni diib diibuh.’ (Efez 5:16) Udy mwa kukaam diib diibuh kwiikal ubal Bibl diifuk dyoos. Bakwaabw badyaakal ni ciibidil cya kubal Bibl kuhacy a mashik ni bweh. Bakwaabw bamubaabal mu munyiny eecy kawul kuuhal kwa kulaal. Ki uw, i diib kaay dilengel diwudy mwa kumubal?

TWEEL MU BONDOK

Tal ciwudy mwa kulong bwa kubal kwa Bibl kukusangeej. Tal mudy kwiilongolol bilengel mwa kukwambulwiish mu kulong kwiibuh kwa Bibl.

Teng mutudy mwa kukat byaakudy kaahand, ki mutudy mwa kukat kubal kwa Bibl

4. Mwa kwiikal ni musangal hawubaabal Bibl

Kabiishoh bend biheehel bwa kutwaadij kubal Bibl. Nook, udy mwa “kwiiy kukat” kubal Bibl, teng bu mudyaakal muut ukat cyaakudy cidyey kay mwanj kudyoh. Balaay 1 Pyeel 2:2, ni isambilaay ha diijooj eedy:

Uw ubal Bibl diifuk dyoos, kwiin ulangok neey, udy mwa kwiiy kumusangeel ni kukat bwa kumubal eeny?

Talaay VIDEO bwa tal mudy baasand kaahand biiy kukat kubal Bibl. Ni isambilaay ha majooj aam.

VIDEO: Baasand Bady Bakat Kubal Diiy dya Mawej (5:33)

Mu video oomw, i lutat kaay lwaakady baasand bataatameen?
I biny byaakady biibambulwiish bwaababw kubal Bibl ha ciibidil?
I biny byaakadyobw balong bwa kukatobw kulong kwa Bibl?

Myand yidy mwa kukwambulwiish bwiibuh kutwaadij kumubal:

Sungul Bibl mujaalal uwudy mwa kumvw biheehel. Teet ni Bible: Nkudimuinu wa Bulongolodi bupiabupia yiy mwiikalok mu cileebel ciinun.
Twaadij kubal cituh cya Bibl ciwutaatal neey, cikusaasangeej. Udy mwa kuhet ngeny yikwaabw ha cyaab cya neey: “Mwa Kwiikal ni Musangal Hawubaabal Bibl.”
Iikal Ufund Biwubaabal. Kal mudimw ni kazubw kady mu mukand oomw ka neey: “Kubal Kwaam kwa Bibl.”
Kal mudimw ni aplikasiyon wa JW Library^®. Ku dyambulwiish dya aplikasiyon oow, udy mwa kubal eecy kumvw may makwaat ma mu Bibl cyaab cyoos ciwiikal aacy ku dyambulwiish dya telefon eecy byaamw bikwaabw.
Kal mudimw ni Cisakidil cidy mu Bible Nkudimuinu wa Bulongolodi bupiabupia. Mudy twaalat, tuzubw, ni kumvwiij kwa myaak ya mu Bibl bidy mwa kulengej kubal kwiibuh kwa Bibl.

5. Iilongolol bwa diilong diibuh dya Bibl

Balaay Musambw 119:34, ni isambilaay ha diijooj eedy:

Bwabiny i bilengel bwa kusambil kuuhal kwa kubal Bibl eecy kwa kulongolol diilong diibuh dya Bibl?

I biny biwudy mwa kulong bwa kulong kwa Bibl koos kwiikal kukwambulwiish? Hawuloolongolol diilong dya mu mukand oow, teet mishind yiloolond eey:

Bal cikos cya kuuhal cya diilongweesh.
Kaam ni ubal verseh ni uteet mwa kumvw mudy verseh eey yihetangan ni malongweesh mady mu mukand oow.
Eel kashony ha myaak yitam eecy byambil byaalaalabul diijooj dyoos; biikal mwa kukwambulwiish hanwiikal mwa kwiisambil haakaabumw ha diilongweesh ni mulongweesh iibuh.

Udy mumanyik eeny?

Batemw ba Yehow badyaakal bakal mudimw ni Bibl yishiil-shiilangan. Ki tudy bakat nang-nang Bible Nkudimuinu wa Bulongolodi bupiabupia bwaal i mujaalal, muheehel bwa kumvw ni ukaakal mudimw ni diijin dya Mawej.—Talaay ciin bwaal cya mu jw.org “Batemw ba Yehow Badyaakal ni Bibl Waababw Kaayaabw Eeny?”

BAAT BAKWAABW BALEELEEB NEEY: “Iibikasakan bwa kulong Bibl. Ciinoh bend ni diib eecy diikand dya kumulong.”