DIILONGWEESH 01

Mushind Udy Bibl mwa Kukwambulwiish

PLAY

Tut boos tudyaakal twiiyihanguj bwa kumanyik bwabiny tudy ni buumy, citukaakabil ni citufwiifwiijil, ni bwa ciikal mwa kwiitulongekel kuuhal ook. Tudyaakal cikwaabw twiitish mut bwa myand yiitut ya ku diifuk ni ku diifuk, bu mudy: kukaam cyaakudy, cya kuvwaal eecy kwiikal ni cisak cya musangal. Baat bavul i biiy kutal neey, Bibl waalaalabul majooj maababw ma buseeb ni wiibaakakish mibel yidy mwa kwiibambulwiish mu shikacil aababw wa mafuk moos. Ulaalangok neey, Bibl udy mwa kwambulwiishok baat bawudy mumanyik eeny?

1. I majooj kaay mady Bibl waalabul?

Bibl waalaalabul majooj ma buseeb aam: Buumy butangil bicy? Bwabiny tudy ha bulab? Bwabiny baat balengel bakeekeng? I biny biloolongek hady muut ufw? Hady baat bakaam bwa kushikat talal, bwabiny kudy diivit? I biny biikal mwa kulongek ha bulab mafuk miiyiiy? Bibl wiitukaakashish bwiitut kukaam maalabul ma majooj aam, ni baat miliyo yivul i batal neey, hadyobw bahet maalabul ma majooj aam, basaasangal.

2. I mu mutah kaay mudy Bibl mwa kwiitwambulwiish mu shikacil iitut a mafuk moos?

Bibl wiitwaakaakish mibel yilengel. Cileejel, uleeleej biin mu cisak mushind a kwiikalobw ni musangal a biin-biin. Wiitwambambil citudy mwa kulong hady myand yitutond ni mutudy mwa kukat mudimw iitut. Wiiyiiy kumanyik cidy Bibl ulongweesh bwa myand eey ni myand yikwaabw yivul hatwendend ni kulong mukand oow. Wiiyiiy kwiitab neey, ‘Mukand a Mawej woos oow [myand yoos yidy mu Bibl] . . . Udy mwa kukulongweesh.’—2 Timoteh 3:16.

Mukand oow kiishoh bend uhing ha cyaab cya Bibl. Ning naak, mukand oow, wiiyiiy kukukashish bwiibuh kwiikontonween Bibl uw kaayeeb. Cikwaabw, ukukaakashish bwiibuh kubal verseh yoos yidyobw bateel mu malongweesh aam ni bwa kwiiyifwanyikij ni myand yiwuloolong mu mukand oomw.

TWEEL MU BONDOK

Tal mudy Bibl mwambulwiish baat bavul ni muwudy mwa kwiikal ni musangal hawumubaabal, ni bwabiny i bilengel muut mukwaabw akwambulwiish bwa kumumvw.

3. Mudy Bibl mwa kwiitulombol

Bibl udy bu citookej citam. Udy mwa kwiitwambulwiish bwiitut kwangat mahangadik malengel ni bwa kumanyik myand yidy yiitwindil kuuhal ook.

Balaay Musambw 119:105, ni isambilaay ha majooj aam:

Muut ufundil musambw oow, waakady utal Bibl mushind kaay?
Uw byeeb, utaatal Bibl mushind kaay?

4. Bibl waalaalabul majooj miitut

Maam kaahand, waakady mutal neey, Bibl waakady mwaalabul majooj maakady ma mwiitish mut mu mivw yivul. Talaay VIDEO, ni isambilaay ha majooj aam.

VIDEO: Hiikal Teng Mutakamin! (1:48)

Mu video oomw, i majooj kaay maakady maam oow wiiyihanguj?
Kulong Bibl kwaakady kumukwanjok mushind kaay?

Bibl wiitukaakashish bwa twiikal tujooj. Balaay Matewus 7:7, ni isambilaay ha diijooj eedy:

I majooj kaay mawudy mukat bwa Bibl aalabul?

5. Kubal Bibl kwiiyiiy kukusangeej

Baat bavul i bakat kubal Bibl ni wiibabambulwiish. Talaay VIDEO, ni isambilaay ha majooj aam.

VIDEO: Kubal kwa Bibl (2:05)

Mu video oomw, i biny byaakady baasand bakwaabw baleebok bwa kubal Bibl?
Bwabiny i biiy kukat kubal Bibl bikasakan?

Bibl uleeleeb neey, udy mwa kwiitulongweesh myand yidy mwa kwiitukashish ni yidy mwa kwiitwaakish kutakamin. Balaay Rom 15:4, ni isambilaay ha diijooj eedy:

Myand yidy Bibl ulay bwa kukashish ni kutakamin, yidy mwa kukusangeejok eeny?

6. Baat bakwaabw bady mwa kwiitukwanjok bwa kulong Bibl

Baat bakwaabw ibiiy kutal neey, kufulok kulong kwa Bibl, kumukontonon haakaabumw ni baat bakwaabw, i kwiibambulwiish. Balaay Myand Yilongel Bapostol 8:26-31, ni isambilaay ha diijooj eedy:

I mushind kaay utudy mwa kumvw Bibl?—Talaay verseh 30 ni 31.

Mwiin Etiyopih waakady mukat bwa bamwambulwiish bwa kumvweey Diiy dya Mawej. Baat bavul leeloow, i batal neey, kwiisamb myand ya mu Bibl ni baat, i kwiibambulwiish

BAAT BAKWAABW BALEELEEB NEEY: “Kulong Bibl i kuhitij kwa diib.”