DIILONGWEESH 17

Yeez Waakady ni Buumuut ni Biikadil bya Mushind Kaay?

PLAY

Hatubaabal myand yidy Yeez muleeb ni mulong ha bulab, tumaamanyik biikadil bidy mwa kwiitufweej habwiih nend ni kwiitufweej habwiih ni Taat indiy, Yehow. I biikadil kaay aaby? Ni i mushind kaay uwudy mwa kulond mu diikas dya Yeez?

1. I mushind kaay udy Yeez uleej hatook buumuut bwa Taat indiy?

Haakady Yeez mu diiwul, waakady mushikat ni Taat indiy a lukat mivw yivul ni waakady mulongel myand yivul kudyey. Waakady ulang, wiiyumvw ni ulong myand teng bu Taat indiy. (Balaay Jah 5:19.) Cya biin, Yeez uleeleej hatook buumuut bwa Taat indiy menmen, haleebeley neey: “Woos ubaaman kuutal, i muman kutal Taat.” (Jah 14:9) Bu muwuloolong bwa kumanyik buumuut bwa Yeez, wiiyiiy kumanyik bilengel Yehow. Cileejel, mushind waakady Yeez umvwiil baat lus, uleeleej mudy Yehow umvw bwiibuh.

2. I mushind kaay waakady Yeez muleej neey, i mukat Yehow?

Yeez uleebel neey: “Bikaam baat ba ha bulab bamanyik ney, nady mukat Taat ni naloolong myand teng muuyambambil Taat bwa kulong.” (Jah 14:31) Haakadyey ha bulab, Yeez waakady muleej mwaakadyey mukat Taat indiy bikasakan bwa hakumukooyel ning mwaakadyeby bikasakan bwa kulong nook. Cikwaabw, Yeez waakady mukat kwiisamb myand ya Taat indiy ni bwa kwambulwiish baat bakwaabw bwa bady nend bulund.—Jah 14:23.

3. I mushind kaay waakady Yeez muleej neey, i mukat baat?

Bibl uleeleeb bwa Yeez neey: ‘musangal indiy i wa kwiikal mukacy mwa baat.’ (Tusumw 8:31) Uleejel lukat lwindiy haakadyey ukashish baat ni wiibambulwiish. Ulongel bishim bwa kuleej mudyey ni bukash ni mudyey umvwiil baat lus. (Mark 1:40-42) Waakady ulongel baat myand yilengel kay ni kabow. May mindiy maakady makashish baat baakady bamukun mat ni miibakish kutakamin. Yeez waakady mwiitab bwa kukeng ni kufw, bwaal waakady mukat baat. Ki i mukat menmen baat baloolond malongweesh mindiy.—Balaay Jah 15:13, 14.

TWEEL MU BONDOK

Manyik myand yivul yitaatal buumuut bwa Yeez. Ni tal muwudy mwa kuleej lukat ni kwaakishangan biit bu mwaakadyey ulong.

4. Yeez i mukat Taat indiy

Cileejel cya Yeez cituloolongweesh mutudy mwa kukat Mawej iitut. Balaay Luuk 6:12 ni Jah 15:10; 17:26. Kuunyim kwa nun baman ni kubal verseh yoos eey, isambilaay ha diijooj eedy:

I mushind kaay utudy mwa kuleej neey, tudy bakat Yehow?

Yeez waakady mukat Taat indiy wa mu diiwul ni waakady teng wiisamb nend mu diisambil

5. Yeez waakady muleej mwaakadyey mukat baat

Yeez waakady utacil baat bikasakan bihitok mwaakadyey utat bwindiy. Ning haakadyey ukooy, waakady teng ukal mudimw ni diib dindiy ni bukash bwa kwambulwiish baat. Balaay Mark 6:30-44, ni isambilaay ha majooj aam:

I mu mishind kaay yaakady Yeez uleej neey, waakady utacil baat?—Talaay verseh 31, 34, 41, ni 42.
I biny byaakady bisak Yeez bwa kwambulwiish baat?—Talaay verseh 34.
Bu mudy Yeez uleej buumuut bwa Yehow, bituleeleejok biny habitaatal Yehow?
I mu mishind kaay yitudy mwa kwiidikij Yeez bwa mwaakadyey utacil baat bakwaabw?

6. Yeez i mwaakishangan a biit

Yeez waakady waakishangan biit ning mwaakadyey kay ni biit bivul, bitukaakashish byeet bwa twiikal twaakishangan biit. Balaay Myand Yilongel Bapostol 20:35, ni isambilaay ha diijooj eedy:

Bilondeshel Yeez, i biny bidy mwa kwiitwaakish musangal?

Talaay VIDEO, ni isambilaay ha diijooj eedy.

VIDEO: “Waakaakishangan Biit udy ni Musangal Muvul”—Katuh (4:00)

I mu mishind kaay yitudy mwa kwaakishangan biit ning tut katuy ni biit bivul?

Udy mumanyik eeny?

Bibl wiituloolongweesh bwa kusambil Yehow mu diijin dya Yeez (Balaay Jah 16:23, 24.) Hatusaasambil nook, tuleeleej neey, tudy biitab myand yidy Yeez mwiitulongel yidy mwa kwiitwambulwiish bwa kushaal balund ba Yehow.

BAAT BAKWAABW BALEELEEB NEEY: “Mawej kiin utatoh bend bwa mutukaakab.”

Kacy Yeez waaleej buumuut bwa Taat indiy, i mushind kaay udy bilong bindiy bileej neey, Yehow wiitutaatacil?

CYA KUKWAAT

Yeez i mukat Yehow ni baat. Bu mudy Yeez mufwaanakan ni Taat indiy, hawumaamanyik myand yimutaatal, wiiyiiy kumanyik cikwaabw myand yivul yitaatal Yehow.