Yehow i Mawej a myand yilongolol bilengel. (1 Biin Korent 14:33) Ki bwabiny bikaam baat bindiy biikal balongolol bilengel. I mushind kaay udy cisumbw cya biin Krist cilongolol? Muut woos wa mu cisumbw, udy ni cidyey mwa kulong bwa cisumbw kwendecy bilengel?

1. I ngany udy ku mut kwa cisumbw?

‘Krist udy ku mut kwa Ekelezy [Cisumbw, NWT].’ (Efez 5:23) Bu mudyey mu diiwul, wendend ulombol midimw ya baat ba Yehow ha bulab butuutul. Yeez i muteek ‘muhik a lulamat ni udy mudimuk’​—kasumbw kakeeh ka bakul bashimat kadyobw babiikan cikwaabw neey, Kasumbw kaludik. (Balaay Matewus 24:45-47.) Teng bu bapostol ni bakul ba mu Yeruzalem ba mu siyekel a kuuhal, Kasumbw kaludik kaloolombol bisubw byoos bya Batemw bidy ha bulab. (Myand Yilongel Bapostol 15:2) Ki kabiish byumvwiij neey, bab ki bady ku mut kwa bulongolody bwiitut. Biitaatab bwa Yehow ni Diiy dindiy bibalombol, ni bakookooyel bufumw bwa Yeez.

2. Bakul bady ni mudimw kaay?

Bakul i biin Krist bashimat baloolongweesh myand ya mu Bibl ni balam baat ba Yehow hadyobw biibambulwiish ni biibakashish. Kabiishoh bend biibafut bwa mudimw ukaakalobw. Bakaakadil cisumbw mudimw ni ‘micim yilengel, bu mudy Mawej mukat, kabiy bwa lwiis lwa fwalang.’ (1 Pyeel 5:1, 2) Bakwanjok ba mudimw bambambulwiish bakul mu cisumbw. Kuunyim kwa mafuk, bady mwa kukumbaj biikadil bidyobw biibalomb bwa kushaalobw bakul.

Kasumbw kaludik kateeteek bakul bakwaabw bwa biikal balombol ba bijeng. Balombol ba bijeng bakuukumbul bisumbw bishiilangan, biibyaakish mibel ni biibikashish. Bab byaabw, bateeteek bakul ni bakwanjok ba mudimw bady bakumbaj myand yidyobw balomb mu Bibl.​—1 Timoteh 3:1-10, 12; Tiit 1:5-9.

3. Temw woos udy ni mudimw kaay?

Muut woos wa mu cisumbw ‘utuutumbish diijin dya Mawej [“Yehow,” NWT]’ hatweetweeley haciibidil mu bisangil bya cisumbw ni hadiidiiley baat musah mulengel.​—Balaay Musambw 148:12, 13.

TWEEL MU BONDOK

4. Yeez i mulombol mulengel

Yeez wiitubiibiikan ni musangal. Balaay Matewus 11:28-30, ni isambilaay ha majooj aam:

• Yeez i mukat bwa tutal bufumw bwindiy bicy?

5. Bakul baleeleej cileejel

1. Bakul bakaakashish bulund bwaababw ni Yehow ni bambulwiish bisak byaababw mu myand ya mu spirit

2. Bakul bataatacil muut woos wa mu cisumbw

3.   Bakul badiidiil baat musah haciibidil

4. Bakul baloolongweesh cisumbw. Bakul bambambulwiish cikwaabw mu mudimw a kwiiteel Nzubw a Bukaleng ni mu midimw yikwaabw

6. Tukalaay mudimw haakaabumw ni bakul

Mu Bibl mudy tubingil twa buseeb twiitusaasak bwiitut kukal mudimw haakaabumw ni bakul. Balaay Ebreh 13:17, ni isambilaay ha majooj aam:

• I bilengel bwa Bibl kwiitukashishey bwa kukooyel baat biituloolombol eeny? Bwabiny?

Balaay Luuk 16:10, ni isambilaay ha diijooj eedy:

• Bwabiny i bilengel bwa kukal mudimw haakaabumw ni bakul ning mu myand yikiish ni buseeb?

 CYA KUKWAAT

Yeez udy ku mut kwa cisumbw. Tudy ni musangal a kukal mudimw haakaabumw ni bakul bwaal bitukaakashish ni biikal cileejel citudy mwa kulond.

Bwa kuvuluk

• I ngany udy ku mut kwa cisumbw cya biin Krist?

• I mushind kaay udy bakul bambulwiish cisumbw?

• I mudimw kaay udy nend muut woos mu cisumbw cya biin Krist?