Yeez waakady mulongweesh neey, bikaam babatiiz biin Krist. (Balaay Matewus 28:19, 20.) Baatiisumw umvumvwiij biny? Ni i biny bitudy mwa kulong bwa kukumbaj kiihacil aak?

1.Baatiisumw umvumvwiij biny?

Mwaak oow “baatiisumw” i mwaalukil ku mwaak wa ciin Krek umvumvwiij “kutweej” mu mwanz. Haakadyobw babatiiz Yeez, bamutweejel mu mwanz mu musul a Yurdaan, ni kuunyim “utuutukil mu mwanz.” (Mark 1:9, 10) Teng bu Yeez, hadyobw babatiiz biin Krist ba biin-biin, bibatweetweej mu mwanz, i bwiin kuleeb neey, batweej muut woos mu mwanz.

2. Hadyobw babatiiz muut, bileeleej biny?

Hady muut uhet baatiisumw, uleeleej mudyey muman ni kulay Yehow bwa kumukadil mudimw. I mushind kaay udy muut mwa kwiicih kudy Mawej? Kuuhal kwa muut kuhetey baatiisumw, uloolong diisambil ha cyaab cindiy kaayend wambil Yehow neey, i mukat kumukadil mudimw buyiil. Ulay neey, teng Yehow ki unady mwa kuhambidil ni bwaal bwa buseeb budyey mwa kulong mushikacil indiy i kulong cidy Mawej mukat. ‘Kiin mwa kuteek myand yindiy kuuhal . . . ki uloolond’ malongweesh ma Yeez ni cileejel cindiy. (Matewus 16:24) Hady muut wiicih kudy Mawej ni uhet baatiisumw, bulund bwindiy ni Yehow bukaakasakan ni ufweefweej habwiih ni bahambidil bakwaabw ba Mawej.

3. Bikaam ulong biny kuuhal kwiibuh kuhet baatiisumw?

Kuuhal kwiibuh kuhet baatiisumw, bikaam ulong bwa kumanyik Yehow ni ukashish diitabij diibuh kudyey. (Balaay Ebreh 11:6.) Hady diimany ni diitabij biibuh bikasakan, wiiyiiy kukat Yehow bikasakan. Biiyiiy kukusak cikwaabw bwa kudiil baat musah ni kwiikal ni shikacil uheehetangan ni mikenj ya Mawej. (2 Timoteh 4:2; 1 Jah 5:3) Hady muut ‘ulong myand bu mudy lukat lwa Mawej [Yehow],’ ni ulong mafuk moos myand yileelengeleel Mawej, biiyiiy kumusak bwa kwiicih kudyey ni kuhet baatiisumw.​—Kolos 1:9, 10. a

 TWEEL MU BONDOK

4. Cituloolongel ku baatiisumw a Yeez

Balaay Matewus 3:13-17 bwa kutal mwaakadyobw babatiiz Yeez. Ni isambilaay ha majooj aam:

• Hacyaakady Yeez mwaan mutofw, baakady bamubatiiz eeny?

• I mushind kaay waakadyobw babatiiz Yeez? Baakady bamwiitulwiil bituh mwanz ha mut eeny?

Yeez waakady mutwaadij mudimw waakady Mawej mumwaakish kuunyim kwa yiy muman kuhet baatiisumw. Balaay Luuk 3:21-23 ni Jah 6:38, ni isambilaay ha diijooj eedy:

• Kuunyim kwa Yeez muman kuhet baatiisumw, i mudimw kaay waakadyey ulong mu shikacil indiy?

5. Baatiisumw i kiihacil kalengel kawudy mwa kukumbaj

Ku butambwiil bidy mwa kumweek bikasakan bwa kwiicih ni kuhet baatiisumw. Ku bikeeh ku bikeeh, wiiyiiy kutal muwuyaay kuu­hal ni utal muwudy mukumban bwa kwangat diihangadik dya buseeb eedy. Bwiibuh kumanyik mudy bakwaabw bangat diihangadik dya buseeb eedy, talaay VIDEO.

Balaay Jah 17:3 ni Jak 1:5, ni isambilaay ha diijooj eedy:

• I mushind kaay udy muut mwa kwiilongolol bwa kuhet baatiisumw?

1. Twiiciicih kudy Yehow hatumulaalay bwa kumukadil mudimw buyiil

2. Hatuheehet baatiisumw, tuleeleej hatook neey: tudy baman ni kwiicih kudy Mawej

 6. Hatuheehet baatiisumw, tutweetweel mu cisak cya Yehow

Hatuheehet baatiisumw, tutweetweel mu cisak cya baat bady mu kaacyumw ha bulab butuutul. Ning tut biikal ni ciseb kaay ning bashikacil ha cyaab kaay, tut boos tukookooyel mikenj yaakaabumw. Balaay Musambw 25:14 ni 1 Pyeel 2:17, ni isambilaay ha diijooj eedy:

• I biny bidy baatiisumw mwa kulongel bulund budy naabw muut ni Yehow ni baat bamuhaahambidil?

 CYA KUKWAAT

Yeez waakady muleeb neey, bikaam biin Krist bahet baatiisumw. Bwa kukumbaj kiihacil aak, bikaam kwiikal ni diitabij dikasakan kudy Yehow, kwiikal ni shikacil uheehetangan ni mikenj yindiy, ni kwiicih kudyey.

Bwa kuvuluk

• Baatiisumw umvumvwiij biny? Bwabiny udy ni buseeb?

• I kumvwangan kaay kudy hakacy ha kwiicih ni baatiisumw?

• I myand kaay yidy muut mwa kulong bwa kwiicih kudy Mawej ni kuhet baatiisumw?