Hady myand yibiih yifikil baat, badyaakal Biiyihanguj neey: “Bwabiny?” Biloolong musangal hatumaamanyik neey, Bibl waalaalabul bilengel diijooj eedy!

1. I mushind kaay utangil myand yibiih ha bulab?

Sataan Dyaabol waakady mutombokel Mawej. Bu mwaakady Sataan ukaam kulombol baat, waakady musak baat ba kuuhal, Adam ni Eev, bwa kutombokel Mawej. Sataan ulongel nook, haakadyey mwambil Eev myand ya makos. (Kutang kwa Bwanjil 3:1-5) Waakady mwiibasak bwa kulangobw neey, Yehow, i mwiibiimin myand yilengel. Waakady ukaam kuleeb neey, baat bady mwa kwiikal ni musangal hadyobw kabay bakooyel Mawej. Sataan uleebel makos ma kuuhal, haakadyey mudingomw Eev neey, kwiish mwa kufw. Ki hady Bibl ubiikan Sataan neey: “mwiin makos ni yiy mwiin i taatend a makos.”​—Jah 8:44.

2. Adam ni Eev baakady basungul bwa kulong biny?

Yehow waakady mwaakish Adam ni Eev biit bivul. Wiibambiil bwa kudyobw mamum ma mutond woos udy mu budimy bwa Eden kufulok teng mutond aakaabumw. (Kutang kwa Bwanjil 2:15-17) Ki baakady balek kulond cyaakady Mawej mwiibambil ni kudyobw diimum dya mutond mulekesh. Eev “wangacil diimum waady.” Kuunyim Adam “byend udiil.” (Kutang kwa Bwanjil 3:6) Boos babidy baakady batombokel Mawej. Bu mwaakady Adam ni Eev biikal baat bawaakan, baakady mwa kulong cidy cilengel. Bu mulekelobw kulond diiy dya Mawej, balongel mpekaat ni kulekobw bwa Mawej i balombol. Diihangadik dyaababw eedy, dyaakady dibakaamin makeng mavul.​—Kutang kwa Bwanjil 3:16-19.

3. Kulek kulond diiy dya Mawej kwa Adam ni Eev, i kwiitukaamin biny?

Haakady Adam ni Eev balong mpekaat, kabacyaakadyoh bend baat bawaakan, ni baakady bashiil lelakan yaababw yoos mpekaat. Bibl uleeleeb bwa Adam neey: “Myand yibiih i yifik ha bulab bwa hamut ha muut aakaabumw, Adam, ni myand yibiih i yilel lufuw. Naak lufw i lukwaat baat boos.”​—Biin Rom 5:12.

Kudy tubingil tushiil-shiilangan tuloolong bwa twiikal tukeng. Misang yikwaabw tukeekeng bwa mahangadik mabiih matwangangat. Eecy tukeekeng bwa mahangadik mabiih mady baat bakwaabw bangat. Cikwaabw, tukeekeng, bwaal tudy mwa kwiikal ha cyaab cibiih ni ha diib dibiih.​—Balaay Muleej 9:11.

 TWEEL MU BONDOK

4. Muut udy mwiitukaamin makeng

Baat bavul balaalang neey, i Mawej uloolombol bulab. Ki mudyeby eeny? Talaay VIDEO.

Balaay Jak 1:13 ni 1 Jah 5:19, ni isambilaay ha diijooj eedy:

• Mawej ki ukaakaamish makeng ni myand yibiih eeny?

5. Bihet bibiih byaalalukil kukulombol kwa Sataan

1. Adam ni Eev baakady baat bawaakan ni baakady bashikat mu paradiiz. Baakady bakun Sataan mat ni kutombokelobw Yehow

2.   Kuunyim kwa bab baman ni kutombok, bulab bwaakady bwiiwul teh ni mpekaat, makeng ni lufw

3. Yehow wiiyiiy kufulok mpekaat, makeng ni lufw. Mu katuh kakeeh oomw, baat biiyiiy kwiikal bawaakan ni biiyiiy kushikat mu Paradiiz

6. Yehow utaatat bikasakan hadyey wiitutal tukeng

Mawej, udyaakal wiitacishok bwa makab matudy naam eeny? Tal cyaakady Mukaleng Davih ni Mupostol Pyeel baleeb. Balaay Musambw 31:7 ni 1 Pyeel 5:7, ni isambilaay ha diijooj eedy:

• Umvumvw bicy, hawumaamanyik neey Yehow utaatat hadyey wiitutal tukeng?

 CYA KUKWAAT

Sataan Dyaabol ni baat babidy ba kuuhal, Adam ni Eev, ki bady bakaamish makeng ha bulab. Yehow utaatat bikasakan bwa mutukeekeng ni ukaady ha kufulok makeng mu kalung kakeeh oomw.

Bwa kuvuluk

• I makos kaay maakady Sataan Dyaabol mwambil Eev?

• Kutombok kwa Adam ni Eev i kwiitukaamin biny?

• I mushind kaay utudy bamanyik neey, Yehow utaatat bwa mutukeekeng?