Hatufwiifwiish muut, tudyaakal tumvw kakunying kavul. Ki bwabiny Bibl ubiibikan lufw neey, mulwiish. (1 Biin Korent 15:26) Twaakady balong mu diilongweesh dya 27 neey, Yehow wiiyiiy kubutul lufw. I biny biikaley mwa kulongel baat bakaady bafw? Mu diilongweesh eedy, wiiyiiy kumanyik myand yivul yitaatal mulay mulengel menmen wa Yehow​—wa kwaakish baat miliyar yivul buumy. Biiyiiy kwiikal byaabw ni buumy buyiil, bwaal Yehow wiiyiiy kwiibasangul! Bwaal oobw, bwiiyiiy kulongek biin-biin eeny? Baat bakaady bafw, biiyiiy kusangukil ha bulab eecy mu diiwul?

1. I biny bidy Yehow ukaam kulongel baat batudy bakat bakaady bafw?

Yehow ukaakaam kusangul baat bakaady bafw. Yoobw waakady ni diitabij dikasakan, waakady mujaadik neey, Mawej kiish mwa kumuvulaminoh bend iikaley mwa kufw. Wambiil Yehow neey: “Awaabiikan, niiyiiy kukwiitab [mu lukit].”​—Balaay Yoobw 14:13-15.

2. I mushind kaay utudy bamanyik neey, bafw biiyiiy kusanguk?

Haakady Yeez ha bulab, Mawej waakady mumwaakish bukash bwa kusangul baat ku lufw. Cileejel, Yeez waakady musangul mwaan mwaan-mukaj wa mivw 12 ni mwaan mwaan-mulum wa mukaj a mu lufwiil. (Mark 5:41, 42; Luuk 7:12-15) Kuunyim, Lazaar mulund nend a Yeez ufwiil. Ning mwaakady Lazaar muman kufw ni bamujiik kuman kuhit mafuk manaay, Yeez waakady mumusangul. Kuunyim kwa Yeez muman kusambil Mawej, umbil diiy dikasakan uleeb neey: “Lazaar, hatuk!” ni ‘muut waakady mufw uhatukil’​—mwiikal ni buumy! (Jah 11:​43, 44) Lang bwa musangal waakady nend biin mu cisak cya ba Lazaar ni balund nend!

3. I kutakamin kaay kutudy naakw bwa baat batukaady bafwiish?

Bibl uleeleeb neey: “Mawej wiiyiiy kusangul baat.” (Myand Yilongel Bapostol 24:15) Baat baakady Yeez musangul, kabaakadyoh bend bay mu diiwul kuunyim kwa lufw lwaababw. (Jah 3:13) Baakady ni musangal wa kwiikalobw ni buumy ha bulab. Bya mushind aakaabumw, Yeez wiiyiiy kusangul baat miliyo yivul mu kalung kakeeh oomw bwa kwiikalobw ni buumy buyiil mu paradiiz ha bulab. Uleebel neey: ‘boos bady mu majambw [nkit] biiyiiy kusanguk,’​—ning bakaadyobw bavulamin—​bwaal Mawej ucidy mwiibavuluk.​—Jah 5:28, 29.

 TWEEL MU BONDOK

4. Yeez i muleej mudyey mwa kusangul baat ku lufw

Tal cyaakady Yeez mulongel mulund nend Lazaar. Balaay Jah 11:14, 38-44, ni isambilaay ha majooj aam:

• I biny bileeleej neey, Lazaar waakady musanguk biin-biin ku lufw?​—Talaay verseh wa 39.

• Iikaleby neey, Lazaar waakady mufw muy mu diiwul, Yeez waakady mwa kumuhingish ha bulab bwa kumusangul eeny?

Talaay VIDEO.

5. Biiyiiy kusangul baat miliyar yivul ku lufw!

Balaay Musambw 37:29, ni isambilaay ha diijooj eedy:

• Baat biikalobw mwa kusangul, biiyiiy kushikacil kweeh?

Yeez kaakubuushoh bend teng baat baakady bahambidil Yehow. Balaay Myand Yilongel Bapostol 24:15, ni isambilaay ha diijooj eedy:

• I ngany uwudy mukat kutal usanguk ku lufw?

• I mushind kaay udy kusanguk kwa baat ku lufw kukashish balel ba Phelicity?

 CYA KUKWAAT

Bibl uleeleeb neey, baat miliyo yivul bakaady bafw biiyiiy kusanguk. Yehow ukaakaam kwiibakishilul cikwaabw buumy, i mwaakish Yeez bukookesh bwa kusangul baat.

Bwa kuvuluk

• Yehow ni Yeez bumvumvw bicy hakaakaamobw kusangul baat ku lufw?

• Baat biikalobw mwa kusangul ku lufw​—biiyiiy kushikacil ha bulab eecy mu diiwul? Bwabiny uleeleeb naak?

• I biny bikujaajadikil neey, baat bawudy mukat bakaady bafw biiyiiy kuhetulul buumy?