DIILONGWEESH 31

Bukaleng bwa Mawej i Biny?

PLAY

Bibl uleeleeb bikasakan bwa Bukaleng bwa Mawej. Ku dyambulwiish dya Bukaleng oobw, Yehow wiiyiiy kukumbaj cyaakadyey mulongolol ku butambwiil ahangiley bulab. Bukaleng bwa Mawej i biny? I mushind kaay utudy bamanyik neey, bwendend ni kukookesh? I myand kaay yikaadyebw bukumbaj? Bwiiyiiy kulong biny mu mafuk mady kuuhal ook? Twiiyiiy kuhet maalabul ma majooj aam, mu diilongweesh eedy ni mu malongweesh mabidy maloolond.

1. Bukaleng bwa Mawej i biny? I ngany udy Mukaleng aabubw?

Bukaleng bwa mu diiwul, i Mbul-matady muteek kudy Yehow kaayend. Mukaleng aabubw, i Yeez Krist, ukookookeshel mu diiwul (Matewus 4:17; Jah 18:36) Bibl uleeleeb bwa Yeez neey: “Wiikaakal Mukaleng . . . buyiil.” (Luuk 1:32, 33) Bu mudy Yeez Mukaleng a Bukaleng bwa Mawej, wiiyiiy kukookesh ha bulab butuutul.

2. Yeez wiiyiiy kukookesh ni bangany?

Yeez kaakukookeshoh bend kaayend. Bibl uleeleeb neey: ‘baat ba bis byoos, ba bileebel byoos, ba bibunj byoos ni baat boos . . . Biiyiiy kudy bukaleng bwa kukookeshobw ha bulab.’ (Myand yisokolweel Jah 5:9, 10) I baat buuny kaay biikal mwa kukookesh ni Krist? Kacy Yeez wiiy ha bulab, udy ni biin Krist miliyo yivul bady bashaal biiyij bindiy. Teng baat 144 000, ki biikal mwa kukookesh ni Yeez mu diiwul. (Balaay Myand yisokolweel Jah 14:1-4.) Biin Krist bakwaabw biikal mwa kushaal ha bulab, biikaakal biin dya Bukaleng bwa Mawej.—Musambw 37:29.

3. Bwabiny Bukaleng bwa Mawej i buhitok mbul-matady ya baan ba baat?

Ning mudyobw ni meej malengel, bakaleng ba baan ba baat, kabiinoh bend ni bukash bwa kukumbaj myand yoos yidyobw balongolol. Biisang bikwaabw, bibahiihing kudy bakwaabw bakiish bakumbajil baat myand yikaakaamobw. Ki, kakwiish mukaleng wiikal mwa kuhing ha cyaab cya Yeez, Mukaleng a Bukaleng bwa Mawej. Mawej wiiyiiy “kuhatul bukaleng bukwaabw bukiishobw mwa kubutul.” (Danyel 2:44) Yeez wiiyiiy kukookesh bulab butuutul ni kakwiikaloh bend ni kabow. Yeez i Mukaleng a lukat luvul, mwiikal ni myand yilengel ni muwaakan, ni wiiyiiy kulongweesh baat bwa kwiikalobw ni biikadil eeby—lukat, myand yilengel ni buwaakan.—Balaay Yeshaay 11:9.

TWEEL MU BONDOK

Tal bwabiny Bukaleng bwa Mawej i mbul-matady mulengel udy baat mwa kwiikal nend.

4. Mbul-matady a bukash wiiyiiy kukookesh bulab butuutul

Yeez Krist udy ni bukash buvul kuhitok bakaleng boos ba baan ba baat. Balaay Matewus 28:18, ni isambilaay ha diijooj eedy:

I kushiilangan kaay kudy hakacy ha bukaleng bwa Yeez ni bwa baan ba baat?

Mbul-matady ya baan ba baat yidyaakal teng yishiituluk, ni mbul-matady woos uloolombol teng cituh kaahand cya bulab. Ki tudy mwa kuleeb bicy bwa Bukaleng bwa Mawej? Balaay Danyel 7:14, ni isambilaay ha majooj aam:

Bwabiny i bilengel hatumvumvw neey: “kabiishoh bend biiy kubutul bukaleng” bwa Mawej?
Bwabiny i bilengel bwa Bukaleng bwa Mawej bukookesh bulab butuutul?

5. Bukaleng bwa Mawej bwiiyiiy kuhing ha cyaab cya makaleng ma baan ba baat

Bwabiny bikaam Bukaleng bwa Mawej buhing ha cyaab cya mbul-matady ya baan ba baat? Talaay VIDEO, ni isambilaay ha diijooj eedy.

VIDEO: Bukaleng bwa Mawej i Biny?—Katuh (1:41)

Bwabiny tuleeleeb neey, mbul-matady ya baan ba baat kayiish yikumbajil baat bikaakaamobw?

Balaay Muleej 8:9, ni isambilaay ha majooj aam:

Bwiibuh, ulaalangok neey, Bukaleng bwa Mawej bwiiyiiy kuhing ha cyaab cya mbul-matady ya baan ba baat eeny? Bwabiny?

6. Baat biikal mwa kukookesh mu Bukaleng bwa Mawej biiyiiy kwiitumvwiil

Bu mwaakady Yeez Mukaleng iitut ha bulab bu muut, i mu manyik neey: “Tudy bahuuyil biibiin beeh. Naak ni yiy bimutootond byend” (Ebreh 4:15) Bwa biin lulamat 144 000 baan-balum ni baan bakaj biikal mwa kukookesh haakaabumw ni Yeez, Yehow i mwiibasungul mu ‘bis byoos, bileebel byoos, bibunj byoos ni baat boos.’—Myand yisokolweel Jah 5:9.

Umvumvw bicy hawumaamanyik neey, Yeez ni baat 144 000 biiyiiy kumvw biheehel makab miitut? Bwabiny?

Yehow i musungul baan-balum ni baan-bakaj ba byaab byoos bwa kukookeshobw ni Yeez

7. Bukaleng bwa Mawej budy ni mikenj yilengel

Mbul-matady yitwaatwaal mikenj bwa kwambulwiish baat ni kwiibalam. Bukaleng bwa Mawej byaabw budy ni mikenj yidy biin dya bukaleng mwa kukooyel. Balaay 1 Biin Korent 6:9-11, ni isambilaay ha majooj aam:

Bwiibuh, bulab bwiikaakal bicy iikal baat balond mikenj ya Mawej? a
Bwiibuh utaatalok neey, i bilengel hady Yehow wiitulomb bwa kulond mikenj ya bukaleng? Bwabiny?
I biny bikujaajaadikil neey, baat baleeleek kulond mikenj eey bady mwa kushiituluk?—Talaay verseh 11.