Bukaleng bwa Mawej bukaady butwaadij kukookesh. Bwiiyiiy kushiitulul myand ha bulab mu kalung kakeeh oomw. Tutalaay myand yilengel yiikal Bukaleng bwa Mawej mwa kulong.

1. I mushind kaay wiikal Bukaleng bwa Mawej mwa kutwaal diitalal ni buwaakan ha bulab?

Yeez Mukaleng a Bukaleng bwa Mawej, wiiyiiy kubutul baat babiih ni mbul-matady ya baan ba baat ku diivit dya Harmakedon. (Myand yisokolweel Jah 16:14, 16) Mu ciisang aacy mulay wa mu Bibl oow wiiyiiy kukumban: “Ikushaal bituh mafuk makeeh, kakwiish kwiiy kwiikal muut mubiih myand.” (Musambw 37:10) Ku dyambulwiish dya Bukaleng oobw, Yeez wiiyiiy kutwaal diitalal ni buwaakan ha bulab.​—Balaay Yeshaay 11:4.

2. Shikacil a baat wiikaakal bicy hiikal lukat lwa Mawej mwa kulongek ha bulab?

Mu Bukaleng bwa Mawej, “baat bawaakan biiyiiy kuhet cibunj [bulab], biiyiiy kushikatomw buyiil.” (Musambw 37:29) Lang mwiikal baat boos bawaakan, bakat Yehow ni bakatangan! Muut ning waakaabumw kakubeeloh bend ni boos biikaakal ni buumy buyiil.

3. I biny biikal Bukaleng bwa Mawej mwa kulong hiikalobw baman kubutul baat babiih?

Kuunyim kwa bab baman kubutul baat babiih, Yeez wiiyiiy kukookesh mund mwa mivw 1 000. Mu ciisang aacy, yiy ni baat 144 000 biiyiiy kwambulwiish baat bwa biikal bawaakan kabay ni mpekaat. Ku bulekel kwa mivw 1 000, biiyiiy kufutulul bulab bwa bwiikal paradiiz mulengel, mwiikal baat bamusangal, bakookooyel may ma Yehow. Kuunyim kwa byoos, Yeez wiiyiiy kuhingijil Taat indiy Yehow bukaleng, ni ‘diijin dindiy dijilang [biiyiiy] kwiidimanyik kudy boos.’ (Matewus 6:9, 10) Biiyiiy kuleej neey, Yehow ki Mukaleng mulengel ulaalam baat. Kuunyim, Yehow wiiyiiy kubutul Sataan ni bademoh bindiy ni baat boos batootombokel bufumw bwindiy. (Myand yisokolweel Jah 20:7-10) Myand yilengel yiikal Bukaleng bwa Mawej mwa kuteek yiikaakalok buyiil.

 TWEEL MU BONDOK

4. Bukaleng bwa Mawej bwiiyiiy kubutul mbul-matady ya baan ba baat

‘Muut udyaadyaatakany mukwaabw bwa kumushiy mu mal.’ (Muleej 8:9) Ku dyambulwiish dya Bukaleng, Yehow wiiyiiy kuful myand ya kabow.

Balaay Danyel 2:44 ni 2 Biin Tesalonik 1:6-8, ni isambilaay ha majooj aam:

• I biny biikal Yehow ni Yeez mwa kulongel mbul-matady ya baan ba baat ni biyiitwaat nyam ku mikon?

• I mushind kaay udy myand yiwudy mulong habitaatal Yehow ni Yeez mwa kukujadikil neey, myand yiikalobw mwa kulong yidy teng yilengel?

5. Yeez i Mukaleng mulengel

Bu mudy Yeez mwiikal Mukaleng a Bukaleng bwa Mawej, wiiyiiy kulongel baat myand yivul yilengel. Talaay VIDEO bwa kutal myand yileeleej neey, Yeez i mukat kwambulwiish baat ni mudy Mawej mumwaakish bukash bwa kulong nook.

Haakady Yeez ha bulab, uleejel kadyoosh ka myand yiikaley mwa kulong mu Bukaleng bwindiy. Mu myand yidyobw baleej mu kazubw aak, i mulay kaay uwukaakaam bwa akumban? Balaay verseh yidyobw batwaal bwa kutal myand yilengel yiikal mwa kulongek.

6. Bukaleng bwa Mawej bwiiyiiy kwiitwaakish mafuk miiyiiy malengel

 CYA KUKWAAT

Bukaleng bwa Mawej bwiiyiiy kukumbaj kiihacil kaabubw. Bwiiyiiy kufutulul bulab bwa bushaal paradiiz mulengel mwiikal bahambidil ba Yehow biikal ni buumy buyiil.

Bwa kuvuluk

• I mushind kaay udy Bukaleng bwa Mawej mwa kumanyikish diijin dya Yehow?

• Bwabiny twiitaatab neey, Bukaleng bwa Mawej bwiiyiiy kukumbaj malay moos ma mu Bibl?

• Mu malay moos mady Bukaleng mwa kukumbaj, i mulay kaay uwudy mukat bwa akumban?